በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ቈላስይስ 1:1-29

1  በአምላክ ፈቃድ የክርስቶስ ኢየሱስ ሐዋርያ ከሆነው ከጳውሎስና ከወንድማችን ከጢሞቴዎስ  በቆላስይስ ለሚገኙ ከክርስቶስ ጋር አንድነት ላላቸው ቅዱሳንና ታማኝ ወንድሞች:- አባታችን ከሆነው አምላክ ጸጋና ሰላም ለእናንተ ይሁን።  ስለ እናንተ ስንጸልይ የጌታችን ኢየሱስ ክርስቶስ አባት የሆነውን አምላክ ሁልጊዜ እናመሰግናለን፤  ምክንያቱም ከክርስቶስ ኢየሱስ ጋር በተያያዘ ያላችሁን እምነትና ለቅዱሳን ሁሉ የምታሳዩትን ፍቅር ሰምተናል፤  ይህም የሆነው በሰማይ ከሚጠብቃችሁ ተስፋ የተነሳ ነው። ይህን ተስፋ ቀደም ሲል የሰማችሁት በተነገራችሁ እውነት ይኸውም በምሥራቹ አማካኝነት ሲሆን  ይህም ምሥራች በመካከላችሁ ተገኝቷል፤ የአምላክን ጸጋ በእውነት ከሰማችሁበትና በትክክል ካወቃችሁበት ቀን አንስቶ በእናንተ መካከል እንደሆነው በመላው ዓለምም ፍሬ እያፈራና እየጨመረ ነው።  የክርስቶስ ታማኝ አገልጋይ ሆኖ በእኛ ምትክ ከሚሠራውና አብሮን ባሪያ ከሆነው ከተወዳጁ ኤጳፍራ የተማራችሁት ይህን ነው፤  እሱም ስለ መንፈሳዊ ፍቅራችሁ ነግሮናል።  ከዚህም የተነሳ ይህን ከሰማንበት ቀን አንስቶ ከጥበብና ከመንፈሳዊ ግንዛቤ ሁሉ ጋር በፈቃዱ ትክክለኛ እውቀት ትሞሉ ዘንድ ስለ እናንተ መጸለያችንንና መለመናችንን አላቋረጥንም፤ 10  ይህም በመልካም ሥራ ሁሉ ፍሬ እያፈራችሁና ስለ አምላክ ትክክለኛ እውቀት በመቅሰም እያደጋችሁ ስትሄዱ ይሖዋን ሙሉ በሙሉ በማስደሰት ለእሱ በሚገባ ሁኔታ እንድትመላለሱ፣ 11  ሙሉ በሙሉ መጽናትና በደስታ መታገሥ እንድትችሉ የአምላክ ታላቅ ኃይል የሚያስፈልጋችሁን ብርታት ሁሉ እንዲሰጣችሁ 12  እንዲሁም በብርሃን ውስጥ ባሉት ቅዱሳን ውርሻ ለመካፈል ብቁ እንድትሆኑ ያደረጋችሁን አባት እንድታመሰግኑ ነው። 13  እሱ ከጨለማው ሥልጣን ታድጎን ወደሚወደው ልጁ መንግሥት አሻግሮናል፤ 14  ልጁም ቤዛውን በመክፈል ነፃ እንድንወጣ ይኸውም የኃጢአት ይቅርታ እንድናገኝ አድርጎናል። 15  እሱ የማይታየው አምላክ አምሳልና የፍጥረት ሁሉ በኩር ነው፤ 16  ምክንያቱም በሰማያትና በምድር ያሉ ሌሎች ነገሮች በሙሉ፣ የሚታዩትና የማይታዩት ነገሮች፣ ዙፋናትም ሆኑ ጌትነት፣ መንግሥታትም ሆኑ ሥልጣናት የተፈጠሩት በእሱ አማካኝነት ነው። ሌሎች ነገሮች በሙሉ የተፈጠሩት በእሱ በኩልና ለእሱ ነው። 17  በተጨማሪም እሱ ከሌሎች ነገሮች ሁሉ በፊት ነው፤ ሌሎች ነገሮች ሁሉ ወደ ሕልውና የመጡትም በእሱ አማካኝነት ነው፤ 18  እሱ የአካሉ ማለትም የጉባኤው ራስ ነው። በሁሉም ነገር ቀዳሚ መሆን እንዲችልም እሱ የመጀመሪያ፣ ከሙታን መካከልም በኩር ነው፤ 19  ይህም የሆነው ሙላት ሁሉ በእሱ ውስጥ እንዲኖር አምላክ መልካም ሆኖ ስላገኘው ነው፤ 20  እንዲሁም በመከራው እንጨት* ላይ ባፈሰሰው ደም አማካኝነት ሰላም በመፍጠር ሌሎቹን ነገሮች ሁሉ ይኸውም በምድርም ሆነ በሰማያት ያሉትን ነገሮች ሁሉ በእሱ በኩል ከራሱ ጋር እንደገና ለማስታረቅ ስለወደደ ነው። 21  በእርግጥ እናንተ በአንድ ወቅት አእምሯችሁ በክፉ ሥራዎች የተጠመደ ስለነበር ከአምላክ የራቃችሁና ጠላቶች ነበራችሁ፤ 22  አሁን ግን እሱ ቅዱሳንና እንከን የሌለባችሁ እንዲሁም ከማንኛውም ክስ ነፃ የሆናችሁ አድርጎ በፊቱ ሊያቀርባችሁ ስለፈለገ ራሱን ለሞት አሳልፎ በሰጠው ሰው ሥጋዊ አካል አማካኝነት እንደገና ከራሱ ጋር አስታርቋችኋል፤ 23  በእርግጥ ይህ የሚሆነው በእምነት መሠረት ላይ ታንጻችሁና ተደላድላችሁ በመቆም፣ የሰማችሁት ምሥራች ካስገኘላችሁ ተስፋ ሳትወሰዱ በእምነት ጸንታችሁ ስትኖሩ ነው፤ ይህም ምሥራች ከሰማይ በታች ባለ ፍጥረት ሁሉ መካከል ተሰብኳል። እኔም ጳውሎስ የዚህ ምሥራች አገልጋይ ሆኛለሁ። 24  ለእናንተ ስል በተቀበልኩት መከራ አሁን እየተደሰትኩ ነው፤ በበኩሌ በክርስቶስ የተነሳ ለአካሉ ይኸውም ለጉባኤው ስል በሥጋዬ ከምቀበለው መከራ የጎደለውን እያሟላሁ ነው። 25  የአምላክን ቃል በተሟላ ሁኔታ እንድሰብክላችሁ ከአምላክ በተሰጠኝ የመጋቢነት ሥራ መሠረት የዚህ ጉባኤ አገልጋይ ሆኛለሁ፤ 26  ይህም ቃል ካለፉት ሥርዓቶችና ካለፉት ትውልዶች አንስቶ ተሰውሮ የቆየው ቅዱስ ሚስጥር ነው። አሁን ግን ለቅዱሳኑ ተገልጧል፤ 27  ለእነሱም አምላክ የዚህ ቅዱስ ሚስጥር ታላቅ ብልጽግና ምን እንደሆነ በአሕዛብ መካከል ያሳውቅ ዘንድ ወዷል። ይህ ቅዱስ ሚስጥር የክብሩ ተካፋዮች ለመሆን በተስፋ የምትጠብቁት ከእናንተ ጋር አንድነት ያለው ክርስቶስ ነው። 28  ከክርስቶስ ጋር አንድነት ያለውን ሰው ሁሉ የተሟላ አድርገን ማቅረብ እንድንችል እያንዳንዱን ሰው እያሳሰብንና እያንዳንዱን ሰው በጥበብ ሁሉ እያስተማርን በሰፊው እንዲታወቅ እያደረግን ያለነው እሱን ነው። 29  ይህንም ዳር ለማድረስ በውስጤ እየሠራ ባለው በእሱ ኃይል አማካኝነት የተቻለኝን ጥረት በማድረግ ተግቼ እየሠራሁ ነው።

የግርጌ ማስታወሻዎች

ቆላ 1:20 * ከተጨማሪው መረጃ ላይ 6ኛውን ርዕስ ተመልከት።