በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ሮም 7:1-25

7  ወንድሞች፣ (እየተናገርኩ ያለሁት ሕጉን ለሚያውቁ ሰዎች ነው፤) ሕጉ በአንድ ሰው ላይ ሥልጣን የሚኖረው በሕይወት እስከኖረ ድረስ ብቻ እንደሆነ አታውቁም?  ለምሳሌ ያህል፣ ያገባች ሴት ባሏ በሕይወት እስካለ ድረስ በሕግ ለእሱ የታሰረች ናት፤ ሆኖም ባሏ ከሞተ ከባሏ ሕግ ነፃ ትሆናለች።  በመሆኑም ባሏ በሕይወት እያለ የሌላ ወንድ ብትሆን አመንዝራ ትባላለች። ባሏ ከሞተ ግን ከእሱ ሕግ ነፃ ስለምትሆን የሌላ ወንድ ብትሆን አመንዝራ አትባልም።  ስለዚህ ወንድሞቼ፣ እናንተም የሌላ ይኸውም ከሞት የተነሳው የክርስቶስ መሆን ትችሉ ዘንድ በእሱ አካል አማካኝነት ለሕጉ ሞታችኋል፤ ይህም የሆነው ለአምላክ ፍሬ እንድናፈራ ነው።  ምክንያቱም እንደ ሥጋ ፍላጎት እንኖር በነበረበት ጊዜ ሕጉ ይፋ ያወጣቸው የኃጢአት ምኞቶች ለሞት ፍሬ እንድናፈራ በአካላችን ክፍሎች ውስጥ ይሠሩ ነበር።  አሁን ግን አሮጌ በሆነው በተጻፈው ሕግ ሳይሆን በአዲስ መልክ በመንፈስ ባሪያዎች እንሆን ዘንድ አስሮ ይዞን ለነበረው ሕግ ስለሞትን ከሕጉ ነፃ ወጥተናል።  እንግዲህ ምን ማለት እንችላለን? ሕጉ ጉድለት አለበት ማለት ነው?* በፍጹም! እንደ እውነቱ ከሆነ ሕጉ ባይኖር ኖሮ ኃጢአት ምን እንደሆነ ባላወቅኩ ነበር፤ ለምሳሌ ሕጉ “አትጎምጅ” ባይል ኖሮ መጎምጀት ምን እንደሆነ ባላወቅኩ ነበር።  ሆኖም ኃጢአት ትእዛዙ ባስገኘው አጋጣሚ ተጠቅሞ ማንኛውንም ዓይነት ነገር የመጎምጀት ፍላጎት በውስጤ እንዲያድር አደረገ፤ ምክንያቱም ሕግ ከሌለ ኃጢአት የሞተ ነው።  በእርግጥ ሕጉ ሳይኖር ሕያው የነበርኩበት ጊዜ ነበር፤ ትእዛዙ ሲመጣ ግን ኃጢአት ዳግመኛ ሕያው ሆነ፤ እኔ ግን ሞትኩ። 10  ወደ ሕይወት እንዲመራ የታሰበውም ትእዛዝ ሞት እንዳመጣ ተገነዘብኩ። 11  ምክንያቱም ኃጢአት ትእዛዙ ባስገኘው አጋጣሚ ተጠቅሞ አታለለኝ፤ እንዲሁም በትእዛዙ አማካኝነት ገደለኝ። 12  ስለዚህ ሕጉ በራሱ ቅዱስ ነው፤ ትእዛዙም ቅዱስ፣ ጻድቅና ጥሩ ነው። 13  ታዲያ ይህ ጥሩ የሆነው ነገር ሞት አመጣብኝ ማለት ነው? በፍጹም! ከዚህ ይልቅ ኃጢአት፣ ኃጢአት ሆኖ እንዲገለጥ ጥሩ በሆነው ነገር አማካኝነት ሞት ያመጣብኝ ኃጢአት ራሱ ነው፤ ይህም የሆነው ኃጢአት በትእዛዝ አማካኝነት ይበልጥ ኃጢአተኛ እንዲሆን ነው። 14  ሕጉ መንፈሳዊ እንደሆነ እናውቃለን፤ እኔ ግን ለኃጢአት የተሸጥኩ ሥጋዊ ነኝ። 15  ምክንያቱም የማደርገውን አላውቀውም። ለማድረግ የምፈልገውን ነገር አላደርግምና፤ ከዚህ ይልቅ የማደርገው የምጠላውን ነገር ነው። 16  ይሁን እንጂ የማደርገው የማልፈልገውን ከሆነ ሕጉ መልካም ነው በሚለው እስማማለሁ። 17  ሆኖም አሁን ይህን የሚያደርገው በእኔ ውስጥ የሚኖረው ኃጢአት ነው እንጂ እኔ አይደለሁም። 18  ምክንያቱም በውስጤ ማለትም በሥጋዬ ውስጥ የሚኖር ምንም ጥሩ ነገር የለም፤ መልካም የሆነውን ነገር የመመኘት ችሎታ በውስጤ አለ፤ ያን የማድረግ ችሎታ ግን የለም። 19  የምመኘውን መልካም ነገር አላደርግምና፤ የማልፈልገውን መጥፎ ነገር የማድረግ ልማድ ግን አለኝ። 20  እንግዲህ የማደርገው የማልፈልገውን ነገር ከሆነ ይህን የማደርገው እኔ ሳልሆን በውስጤ የሚኖረው ኃጢአት ነው። 21  እንግዲያው ይህ ሕግ በራሴ ላይ ሲሠራ አያለሁ:- ይኸውም ትክክል የሆነውን ነገር ማድረግ ስፈልግ ከእኔ ጋር ያለው ግን መጥፎ ነገር ነው። 22  በውስጤ በአምላክ ሕግ እጅግ ደስ ይለኛል፤ 23  በአካሌ ክፍሎች ውስጥ ግን ከአእምሮዬ ሕግ ጋር የሚዋጋና በአካሌ ክፍሎች ውስጥ ላለው የኃጢአት ሕግ ምርኮኛ አድርጎ የሚሰጠኝን ሌላ ሕግ አያለሁ። 24  እኔ ምንኛ ጎስቋላ ሰው ነኝ! እንዲህ ወዳለው ሞት ከሚመራኝ ሰውነት ማን ይታደገኛል? 25  በጌታችን በኢየሱስ ክርስቶስ በኩል የሚታደገኝ አምላክ የተመሰገነ ይሁን! ስለዚህ እኔ ራሴ በአእምሮዬ ለአምላክ ሕግ ባሪያ ስሆን በሥጋዬ ግን ለኃጢአት ሕግ ባሪያ ነኝ።

የግርጌ ማስታወሻዎች

ሮም 7:7 * ቃል በቃል፣ “ሕጉ ኃጢአት ነው?”