በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ሮም 4:1-25

4  እንግዲህ እንዲህ ከሆነ በሥጋ አባታችን ስለሆነው ስለ አብርሃም ምን ማለት እንችላለን?  ለምሳሌ አብርሃም ጻድቅ ተብሎ የተጠራው በሥራ ቢሆን ኖሮ የሚመካበት ነገር በኖረው ነበር፤ ሆኖም በአምላክ ፊት ሊመካ አይችልም።  የቅዱስ መጽሐፉስ ቃል ምን ይላል? “አብርሃም በይሖዋ ላይ እምነት እንዳለው አሳየ፤ ጽድቅም ሆኖ ተቆጠረለት።”  ይሁንና ለሚሠራ ሰው ክፍያው እንደ ሥራው ዋጋ እንጂ እንደ ጸጋ ስጦታ ተደርጎ አይቆጠርለትም።  በሌላ በኩል ግን በራሱ ሥራ ከመመካት ይልቅ ኃጢአተኛውን ጻድቅ ብሎ በሚጠራው አምላክ የሚያምን እምነቱ እንደ ጽድቅ ይቆጠርለታል።  ይህም ዳዊት፣ አምላክ ያለ ሥራ እንደ ጻድቅ አድርጎ የሚቆጥረው ሰው ስለሚያገኘው ደስታ እንዲህ ብሎ እንደተናገረው ነው:-  “የዓመፅ ሥራቸው ይቅር የተባለላቸው፣ ኃጢአታቸውም የተሸፈነላቸው ደስተኞች ናቸው፤  ይሖዋ ኃጢአቱን የማይቆጥርበት ሰው ደስተኛ ነው።”  ታዲያ ይህን ደስታ የሚያገኙት የተገረዙ ሰዎች ብቻ ናቸው ወይስ ያልተገረዙትም ጭምር? ምክንያቱም “አብርሃም እምነቱ እንደ ጽድቅ ተቆጠረለት” ብለናል። 10  ታዲያ እምነቱ እንደ ጽድቅ የተቆጠረው በምን ዓይነት ሁኔታ ውስጥ እያለ ነው? ተገርዞ እያለ ነው ወይስ ከመገረዙ በፊት? ተገርዞ እያለ ሳይሆን ከመገረዙ በፊት ነው። 11  ገና ከመገረዙ በፊት በነበረው እምነት ላገኘው ጽድቅ ምልክት ሆኖ የሚያገለግለውን ግርዘትን እንደ ማኅተም ተቀበለ፤ ስለዚህ ባይገረዙም እንኳ በእምነታቸው የተነሳ እንደ ጻድቃን ለተቆጠሩት ሁሉ አባት ሆኗል፤ 12  ለተገረዙት ዘሮቹም አባት ነው፤ ይሁንና ግርዘትን አጥብቀው ለሚከተሉት ብቻ ሳይሆን አባታችን አብርሃም ከመገረዙ በፊት የነበረውን እምነት ተከትለው ለሚመላለሱ ሰዎችም ሁሉ አባት ነው። 13  ምክንያቱም አብርሃም ወይም ዘሩ የዓለም ወራሽ እንደሚሆን ተስፋ ያገኘው በሕግ አማካኝነት ሳይሆን በእምነት በሚገኘው ጽድቅ ነው። 14  ወራሾች የሚሆኑት ሕጉን በጥብቅ የሚከተሉ ቢሆኑ ኖሮ እምነት ከንቱ በሆነ ነበር፤ የተስፋውም ቃል ባከተመ ነበር። 15  እንደ እውነቱ ከሆነ ሕጉ ቁጣ ያስከትላል፤ ሆኖም ሕግ ከሌለ ሕግን መተላለፍ የሚባል ነገር አይኖርም። 16  በመሆኑም ተስፋው በእምነት የተገኘ ነው፤ ይህም የሆነው ተስፋው በጸጋ ላይ የተመሠረተ እንዲሆንና ለዘሩ ሁሉ ይኸውም ሕጉን በጥብቅ ለሚከተል ብቻ ሳይሆን የአብርሃምን እምነት በጥብቅ ለሚከተል ጭምር የተረጋገጠ እንዲሆን ነው። (እሱ የሁላችንም አባት ነው፤ 17  ይህም “ለብዙ ሕዝቦች አባት አድርጌሃለሁ” ተብሎ እንደተጻፈው ነው።) ይህ የሆነው እሱ ባመነበት ማለትም ሙታንን ሕያው በሚያደርገውና የሌለውን እንዳለ አድርጎ በሚጠራው አምላክ ፊት ነው። 18  ተስፋ ለማድረግ የሚያበቃ ምንም መሠረት ባይኖርም እንኳ “ዘርህ እጅግ ይበዛል” ተብሎ በተነገረው መሠረት የብዙ ሕዝቦች አባት እንደሚሆን በተሰጠው ተስፋ አምኗል። 19  እምነቱ ባይዳከምም እንኳ መቶ ዓመት ገደማ ሆኖት ስለነበር ሙት ስለሆነው የገዛ ራሱ አካል እንዲሁም ሙት ስለሆነው የሣራ ማህፀን አሰበ። 20  ሆኖም አምላክ ከሰጠው የተስፋ ቃል የተነሳ ለአምላክ ክብር በመስጠት በእምነት በረታ እንጂ እምነት በማጣት አልወላወለም፤ 21  ደግሞም አምላክ የሰጠውን ተስፋ መፈጸም እንደሚችልም ሙሉ በሙሉ እርግጠኛ ነበር። 22  በመሆኑም “ጽድቅ ሆኖ ተቆጠረለት።” 23  ሆኖም “ተቆጠረለት” ተብሎ የተጻፈው ስለ እሱ ብቻ አይደለም፤ 24  ከዚህ ይልቅ እንደ ጻድቃን እንድንቆጠር ለተወሰንነው ለእኛም ጭምር ነው፤ ምክንያቱም ጌታችንን ኢየሱስን ከሞት ባስነሳው በእሱ እናምናለን። 25  እሱ ስለ በደላችን ለሞት አልፎ ተሰጠ፤ አምላክ ጻድቃን ብሎ እንዲጠራንም ከሞት ተነሳ።

የግርጌ ማስታወሻዎች