በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ሮም 3:1-31

3  ታዲያ አይሁዳዊ መሆን ብልጫው ምኑ ላይ ነው? ግርዘትስ ጥቅሙ ምንድን ነው?  በብዙ መንገድ ብልጫ አለው። በመጀመሪያ ደረጃ የአምላክ ቅዱስ ቃል በአደራ ተሰጥቷቸዋል።  ታዲያ ስለዚህ ጉዳይ ምን ማለት ይቻላል? አንዳንዶች እምነት ሳያሳዩ ቢቀሩ የእነሱ እምነት ማጣት የአምላክን ታማኝነት ከንቱ ሊያደርግ ይችላል?  ይህስ ከቶ አይሁን! ከዚህ ይልቅ “በቃልህ ጻድቅ ሆነህ ትገኝ ዘንድ፣ በፍርድም ፊት ትረታ ዘንድ” ተብሎ እንደተጻፈ ሰው ሁሉ ሐሰተኛ ሆኖ ቢገኝ አምላክ እውነተኛ ሆኖ እንዲገኝ አድርጉ።  ይሁን እንጂ የእኛ ክፋት የአምላክን ጽድቅ አጉልቶ የሚያሳይ ከሆነ ምን ማለት እንችላለን? አምላክ ቁጣውን መግለጹ ኢፍትሐዊ አያሰኘውም፤ ያሰኘዋል እንዴ? (እየተናገርኩ ያለሁት ሰዎች እንደሚሉት ነው።)  ይህስ ከቶ አይሁን! አለዚያ አምላክ በዓለም ላይ እንዴት ይፈርዳል?  ይሁንና በእኔ ውሸት የተነሳ የአምላክ እውነት ለእሱ ክብር በሚያመጣ መንገድ ይበልጥ ጎልቶ የሚወጣ ከሆነ ታዲያ አሁን እኔ ለምን ኃጢአተኛ ተብዬ ይፈረድብኛል?  እንዲህ ከሆነማ ልክ በሐሰት እንደምንከሰሰውና አንዳንድ ሰዎች “ጥሩ ነገር እንዲገኝ መጥፎ ነገር እንሥራ” ይላሉ ብለው እንደሚያስወሩብን ለምን አንልም? በእነዚህ ሰዎች ላይ የሚበየነው ፍርድ ፍትሐዊ ነው።  እንግዲህ ምን ማለት ይቻላል? እኛ የተሻልን ነን ማለት ነው? በፍጹም! ምክንያቱም አይሁዳውያንም ሆኑ ግሪካውያን ሁሉም የኃጢአት ተገዥዎች እንደሆኑ አስቀድመን በግልጽ ተናግረናል፤ 10  ይህም እንዲህ ተብሎ እንደተጻፈው ነው:- “ጻድቅ ሰው የለም፤ አንድም እንኳ የለም፤ 11  ማስተዋል ያለው አንድም ሰው የለም፤ አምላክን የሚፈልግም አንድም ሰው የለም። 12  ሁሉም መንገድ ስተዋል፤ ሁሉም በአንድነት የማይረቡ ሆነዋል፤ ደግነት የሚያደርግ አንድም ሰው የለም፤ አንድም እንኳ አይገኝም።” 13  “ጉሮሯቸው የተከፈተ መቃብር ነው፤ በምላሳቸው ያታልላሉ።” “ከከንፈራቸው ሥር የእባብ መርዝ አለ።” 14  “አፋቸውም በእርግማንና በጥላቻ ቃል የተሞላ ነው።” 15  “እግሮቻቸው ደም ለማፍሰስ ፈጣኖች ናቸው።” 16  “በመንገዳቸው ጥፋትና ጉስቁልና ይገኛል፤ 17  የሰላምንም መንገድ አያውቁም።” 18  “በዓይኖቻቸው ፊት ፈሪሃ አምላክ የለም።” 19  አፍ ሁሉ እንዲዘጋና ዓለም በሙሉ በአምላክ የቅጣት ፍርድ ሥር እንዲሆን ሕግ የሚናገረው ሁሉ ከሕግ በታች ላሉት እንደሆነ እናውቃለን። 20  ስለዚህ ሕግን በመጠበቅ አንድም ሥጋ ለባሽ በፊቱ ጻድቅ ተብሎ ሊጠራ አይችልም፤ ምክንያቱም ስለ ኃጢአት ትክክለኛ እውቀት የሚገኘው በሕጉ አማካኝነት ነው። 21  አሁን ግን ሕግ ሳያስፈልግ፣ በሕጉና በነቢያት የተመሠከረለት የአምላክ ጽድቅ ግልጽ ሆኗል፤ 22  እምነት ያላቸው ሁሉ ደግሞ በኢየሱስ ክርስቶስ ላይ ባላቸው እምነት አማካኝነት የአምላክን ጽድቅ ያገኛሉ። ይህም የሆነው ምንም ልዩነት ስለሌለ ነው። 23  ምክንያቱም ሁሉም ኃጢአት ሠርተዋል፤ የአምላክንም ክብር ማንጸባረቅ ተስኗቸዋል፤ 24  ይሁንና ክርስቶስ ኢየሱስ የከፈለው ቤዛ በሚያስገኘው ነፃነት አማካኝነት በጸጋው ጻድቃን ተብለው መጠራታቸው እንዲያው የተገኘ ነፃ ስጦታ ነው። 25  በኢየሱስ ደም የሚያምኑ ሁሉ ማስተሰረያ ያገኙ ዘንድ አምላክ እሱን መሥዋዕት አድርጎ አቅርቦታል። አምላክ ይህን ያደረገው ትዕግሥቱን ባሳየባቸው በቀደሙት ዘመናት የተፈጸሙትን ኃጢአቶች ይቅር በማለት የራሱን ጽድቅ ለማሳየት ነው፤ 26  በተጨማሪም በኢየሱስ ላይ እምነት ያለውን ሰው ጻድቅ ብሎ በመጥራት በዚህም ዘመን የራሱን ጽድቅ ለማሳየት ነው። 27  ታዲያ እንድንኮራ የሚያደርገን ነገር ይኖራል? ምንም ነገር የለም። እንዳንኮራ የሚያደርገን ሕግ የትኛው ነው? የሥራ ሕግ ነው? በፍጹም አይደለም፤ ከዚህ ይልቅ እንዳንኮራ የሚያደርገን የእምነት ሕግ ነው። 28  ምክንያቱም አንድ ሰው ጻድቅ ተብሎ የሚጠራው የሕግን ሥራ በመፈጸም ሳይሆን በእምነት እንደሆነ እንረዳለን። 29  ወይስ አምላክ የአይሁዳውያን አምላክ ብቻ ነው? የአሕዛብስ አምላክ አይደለም? አዎ፣ የአሕዛብም አምላክ ነው፤ 30  ምክንያቱም አምላክ አንድ ነው፤ የተገረዙትን ከእምነት የተነሳ ጻድቃን ብሎ ይጠራቸዋል፤ ያልተገረዙትን ደግሞ በእምነታቸው አማካኝነት ጻድቃን ብሎ ይጠራቸዋል። 31  ታዲያ በእምነታችን አማካኝነት ሕግን እንሽራለን ማለት ነው? ይህስ ከቶ አይሁን! እንዲያውም ሕግን እናጸናለን።

የግርጌ ማስታወሻዎች