በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ሮም 2:1-29

2  ስለዚህ አንተ ማንም ሆንክ ማን በሌላው ላይ የምትፈርድ ከሆነ ምንም የምታመካኝበት ነገር የለህም፤ አንድን ጉዳይ አስመልክቶ በሌላው ላይ ስትፈርድ ራስህንም ኮነንክ ማለት ነው፤ ምክንያቱም በሌላው ላይ የምትፈርደው አንተ ራስህ እነዚያኑ ነገሮች በተደጋጋሚ ታደርጋለህ።  በእውነት ላይ የተመሠረተው የአምላክ ፍርድ እንዲህ ያሉትን ነገሮች የመፈጸም ልማድ ባላቸው ሰዎች ላይ እንደሚመጣ እናውቃለን።  ይሁን እንጂ አንተ ሰው፣ እንዲህ ያሉትን ነገሮች የመፈጸም ልማድ ባላቸው ሰዎች ላይ እየፈረድክ አንተ ግን እነዚያኑ ነገሮች የምታደርግ ከሆነ ከአምላክ ፍርድ አመልጣለሁ ብለህ ታስባለህ?  ወይስ የአምላክ ደግነት ወደ ንስሐ ሊመራህ እየሞከረ እንዳለ ሳታውቅ የደግነቱን፣ የቻይነቱንና የትዕግሥቱን ብዛት ትንቃለህ?  እንግዲህ በግትርነትህና ንስሐ በማይገባ ልብህ የተነሳ ለቁጣ ቀንና የአምላክ የጽድቅ ፍርድ ለሚገለጥበት ቀን በራስህ ላይ ቁጣ ታከማቻለህ።  እሱም ለእያንዳንዱ እንደ ሥራው ይሰጠዋል:-  በመልካም ሥራ በመጽናት ክብርን፣ ሞገስንና የማይበሰብስ ሕይወትን ለሚፈልጉ የዘላለም ሕይወት ይሰጣቸዋል፤  ይሁን እንጂ ጠብ ወዳዶች በሆኑትና ለእውነት ከመታዘዝ ይልቅ ለዓመፅ በሚታዘዙት ላይ ቁጣና መዓት ይወርድባቸዋል፤  ክፉ ሥራ በሚሠራ ሰው ነፍስ ሁሉ ላይ ይኸውም በመጀመሪያ በአይሁዳዊ ከዚያም በግሪካዊ ላይ መከራና ጭንቀት ይመጣል፤ 10  ሆኖም መልካም ሥራ የሚሠራ ሁሉ ይኸውም በመጀመሪያ አይሁዳዊ ከዚያም ግሪካዊ ክብርና ሞገስ እንዲሁም ሰላም ያገኛል። 11  ምክንያቱም በአምላክ ዘንድ መድልዎ የለም። 12  ለምሳሌ ሕግ ሳይኖራቸው ኃጢአት የሠሩ ሁሉ ያለ ሕግ ይጠፋሉ፤ ሕግ እያላቸው ኃጢአት የሠሩ ሁሉ ግን በሕግ ይፈረድባቸዋል። 13  ምክንያቱም በአምላክ ፊት ጻድቅ የሆኑት ሕግን የሚሰሙ አይደሉም፤ ከዚህ ይልቅ ጻድቅ ተብለው የሚጠሩት ሕግን በሥራ የሚያውሉ ናቸው። 14  ሕግ የሌላቸው አሕዛብ በተፈጥሮ በሕጉ ውስጥ ያሉትን ነገሮች ሲያደርጉ እነዚህ ሰዎች ሕግ ባይኖራቸውም እንኳ እነሱ ለራሳቸው ሕግ ናቸው። 15  የሕጉ መሠረታዊ ሐሳብ በልባቸው እንደተጻፈ የሚያሳዩት እነሱ ራሳቸው ናቸው፤ ሕሊናቸው ከእነሱ ጋር ሆኖ በሚመሠክርበት ጊዜ ሐሳባቸው በውስጣቸው እየተሟገተ አንዴ ይከሳቸዋል ሌላ ጊዜ ደግሞ ጥፋተኛ አይደላችሁም ይላቸዋል። 16  ይህ የሚሆነው እኔ በማውጀው ምሥራች መሠረት አምላክ በክርስቶስ ኢየሱስ አማካኝነት ሰዎች በስውር በሚያስቧቸውና በሚያደርጓቸው ነገሮች ላይ በሚፈርድበት ቀን ነው። 17  አንተ አይሁዳዊ ተብለህ የምትጠራ፣ በሕጉ የምትመካ፣ ከአምላክ ጋር ባለህ ዝምድና የምትኩራራ፣ 18  ፈቃዱን የምታውቅ፣ በሕጉ ውስጥ ያለውን ነገር በቃል የተማርክ በመሆንህ የላቀ ዋጋ ያላቸውን ነገሮች የምትቀበል፣ 19  ለዕውር መሪ፣ በጨለማ ላሉት ብርሃን ነኝ ብለህ የምታምን፣ 20  ማስተዋል የጎደላቸውን የማሠለጥንና ሕፃናትን የማስተምር ነኝ የምትል እንዲሁም በሕጉ ውስጥ ያለውን እውቀትና እውነት መሠረታዊ ገጽታዎች የምታውቅ ብትሆን፣ 21  ታዲያ አንተ ሌላውን የምታስተምር ራስህን አታስተምርም? አንተ “አትስረቅ” ብለህ የምትሰብክ ትሰርቃለህ? 22  አንተ “አታመንዝር” የምትል ምንዝር ትፈጽማለህ? አንተ ጣዖትን የምትጸየፍ ቤተ መቅደስን ትዘርፋለህ? 23  አንተ በሕግ የምትኩራራ ሕጉን በመተላለፍ አምላክን ታዋርዳለህ? 24  ይህም “በእናንተ ምክንያት የአምላክ ስም በአሕዛብ መካከል ይሰደባል” ተብሎ እንደተጻፈው ነው። 25  መገረዝ ጥቅም የሚኖረው ሕጉን እስካከበርክ ድረስ ነው፤ ሕጉን የምትተላለፍ ከሆነ ግን መገረዝህ እንደ አለመገረዝ ይቆጠራል። 26  ስለዚህ ያልተገረዘ ሰው በሕጉ ውስጥ ያሉትን የጽድቅ መሥፈርቶች የሚጠብቅ ከሆነ አለመገረዙ እንደ መገረዝ ይቆጠራል፤ አይቆጠርም እንዴ? 27  እንግዲህ አንተ የተጻፈ ሕግ ያለህና የተገረዝክ ሆነህ ሕግን የምትጥስ ከሆነ በሥጋ ያልተገረዘ ሆኖ ሕግን የሚፈጽም ሰው ይፈርድብሃል። 28  ምክንያቱም እውነተኛ አይሁዳዊነት በውጫዊ ገጽታ የሚገለጽ አይደለም፤ ግርዘቱም አካላዊ ግርዘት አይደለም። 29  ከዚህ ይልቅ በውስጡ አይሁዳዊ የሆነ እሱ አይሁዳዊ ነው፤ ግርዘቱም በተጻፈ ሕግ ሳይሆን በመንፈስ የሆነ የልብ ግርዘት ነው። እንዲህ ዓይነቱ ሰው ምስጋና የሚቀበለው ከሰው ሳይሆን ከአምላክ ነው።

የግርጌ ማስታወሻዎች