በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ሮም 15:1-33

15  እኛ ብርቱዎች የሆንን ብርቱ ያልሆኑትን ሰዎች ድክመት ልንሸከም ይገባል እንጂ ራሳችንን የምናስደስት መሆን የለብንም።  እያንዳንዳችን ባልንጀራችንን* የሚጠቅመውን ይኸውም ሊያንጸው የሚችለውን ነገር በማድረግ እናስደስተው።  ክርስቶስ እንኳ ራሱን አላስደሰተም፤ ከዚህ ይልቅ “አንተን ይነቅፉበት የነበረው ነቀፋ በእኔ ላይ ደረሰ” ተብሎ እንደተጻፈው ሆነበት።  በምናሳየው ጽናትና ከቅዱሳን መጻሕፍት በምናገኘው መጽናኛ ተስፋ ይኖረን ዘንድ ቀደም ብሎ የተጻፈው ነገር ሁሉ ለእኛ ትምህርት እንዲሆን ተጽፏል።  ጽናትንና መጽናኛን የሚሰጠው አምላክ፣ ክርስቶስ ኢየሱስ የነበረው ዓይነት አስተሳሰብ በመካከላችሁ እንዲሰፍን ያድርግ፤  ይኸውም በአንድ ሐሳብና በአንድ አፍ የጌታችንን የኢየሱስ ክርስቶስን አምላክና አባት ታከብሩ ዘንድ ነው።  ስለዚህ ክርስቶስ እኛን እንደተቀበለን ሁሉ አምላክ ይከበር ዘንድ እናንተም አንዳችሁ ሌላውን ተቀበሉ።  ክርስቶስ፣ አምላክ እውነተኛ መሆኑን ለማሳየት ሲል ለተገረዙት አገልጋይ እንደሆነ ልገልጽ እወዳለሁ፤ በተጨማሪም አገልጋይ የሆነው አምላክ ለአባቶቻቸው የገባውን ቃል ለማረጋገጥ  እንዲሁም አሕዛብ አምላክን ስለ ምሕረቱ ያከብሩት ዘንድ ነው። ይህም “ስለዚህ በአሕዛብ መካከል በይፋ አወድስሃለሁ፤ ለስምህም የምስጋና መዝሙር እዘምራለሁ” ተብሎ እንደተጻፈው ነው። 10  ደግሞም “እናንተ አሕዛብ፣ ከሕዝቡ ጋር ደስ ይበላችሁ” ይላል። 11  እንደገናም “እናንተ አሕዛብ ሁላችሁ፣ ይሖዋን አወድሱ፤ ሕዝቦችም ሁሉ ያወድሱት” ይላል። 12  እንዲሁም ኢሳይያስ “የእሴይ ሥር ይገለጣል፤ አሕዛብንም የሚገዛ ይነሳል፤ አሕዛብም ተስፋቸውን በእሱ ላይ ይጥላሉ” ይላል። 13  በእሱ በማመናችሁ የተነሳ በመንፈስ ቅዱስ ኃይል ተስፋ እንዲትረፈረፍላችሁ ተስፋ የሚሰጠው አምላክ ደስታንና ሰላምን ሁሉ ይሙላባችሁ። 14  ወንድሞቼ ሆይ፣ እናንተ ራሳችሁ የተሟላ እውቀት ያላችሁ እንደሆናችሁ ሁሉ ልክ እንደዚሁም በጥሩነት የተሞላችሁ እንደሆናችሁና አንዳችሁ ሌላውን መምከር እንደምትችሉ እኔ ራሴም ስለ እናንተ እርግጠኛ መሆን ችያለሁ። 15  ይሁን እንጂ አንዳንድ ጉዳዮችን ግልጥልጥ አድርጌ የጻፍኩላችሁ እንደገና ላሳስባችሁ ስለፈለግኩ ነው። ይህንም የማደርገው ከአምላክ በተሰጠኝ ጸጋ የተነሳ ነው። 16  ይህ ጸጋ የተሰጠኝም ለአሕዛብ የክርስቶስ ኢየሱስ የሕዝብ አገልጋይ ሆኜ የአምላክን ምሥራች በማወጁ ሥራ እንድሳተፍ ነው። በዚህ ቅዱስ ሥራ የምሳተፍበት ዓላማ አሕዛብ ተቀባይነት ያለው በመንፈስ ቅዱስ የተቀደሰ ስጦታ ሆነው ለአምላክ እንዲቀርቡ ነው። 17  ስለዚህ ለአምላክ ከማቀርበው አገልግሎት ጋር በተያያዘ በክርስቶስ ኢየሱስ ሐሴት የማደርግበት ምክንያት አለኝ። 18  አሕዛብ ታዛዦች እንዲሆኑ ክርስቶስ በእኔ አማካኝነት ስላከናወናቸው ነገሮች ባይሆን ኖሮ አንድም ነገር ለመናገር አልደፍርም። ይህንም ያከናወነው እኔ በተናገርኩትና ባደረግኩት ነገር 19  እንዲሁም በተአምራዊ ምልክቶችና ድንቅ ነገሮች ኃይል ደግሞም በመንፈስ ቅዱስ ኃይል ነው፤ በዚህም ሁኔታ ከኢየሩሳሌም አንስቶ ዙሪያውን እስከ እልዋሪቆን ድረስ ስለ ክርስቶስ የሚገልጸውን ምሥራች በተሟላ ሁኔታ ሰብኬያለሁ። 20  በመሆኑም ሌላው ሰው በጣለው መሠረት ላይ መገንባት ስላልፈለግኩ ቀደም ብሎ የክርስቶስ ስም በተጠራበት ቦታ ምሥራቹን ላለመስበክ ወስኜ ነበር፤ 21  ይልቁንም “ከዚህ በፊት ስለ እሱ ምንም ያልተነገራቸው ያያሉ፤ ያልሰሙም ያስተውላሉ” ተብሎ እንደተጻፈው ነው። 22  በተደጋጋሚ ጊዜያት ወደ እናንተ መምጣት ሳልችል የቀረሁትም በዚህ ምክንያት ነው። 23  አሁን ግን በዚህ አካባቢ ባሉት አገሮች ያልሰበክሁበት ክልል የለም፤ ደግሞም ከተወሰኑ ዓመታት ወዲህ ወደ እናንተ ለመምጣት ስጓጓ ቆይቻለሁ፤ 24  በመሆኑም ከሁሉ በላይ እናንተን ማየት ስለምፈልግ ወደ ስፔን በምጓዝበት ጊዜ እንደምጎበኛችሁና እናንተ ጋር ለጥቂት ጊዜ ቆይቼ ናፍቆቴን ከተወጣሁ በኋላ የተወሰነ መንገድ እንደምትሸኙኝ ተስፋ አደርጋለሁ። 25  አሁን ግን ቅዱሳንን ለማገልገል ወደ ኢየሩሳሌም ልጓዝ ነው። 26  በመቄዶንያና በአካይያ ያሉት ወንድሞች በኢየሩሳሌም ላሉት ችግረኛ የሆኑ ቅዱሳን መዋጮ በመስጠት ያላቸውን ነገር በደስታ አካፍለዋል። 27  እርግጥ ይህን ያደረጉት በደስታ ነው፤ ሆኖም የእነሱ ዕዳ ነበረባቸው፤ ምክንያቱም አሕዛብ የእነሱን መንፈሳዊ ነገር ከተካፈሉ እነሱ ደግሞ ለሚያስፈልጓቸው ቁሳዊ ነገሮች የማዋጣት ዕዳ አለባቸው። 28  ስለሆነም ይህን ሥራ ካከናወንኩና መዋጮውን በእጃቸው ካስረከብኩ በኋላ በእናንተ በኩል አድርጌ ወደ ስፔን እሄዳለሁ። 29  ደግሞም ወደ እናንተ በምመጣበት ጊዜ የክርስቶስን የተትረፈረፈ በረከት ይዤላችሁ እንደምመጣ አውቃለሁ። 30  እንግዲህ ወንድሞች፣ ስለ እኔ ወደ አምላክ በመጸለይ ከእኔ ጋር አብራችሁ እንድትጋደሉ በጌታችን በኢየሱስ ክርስቶስና ከመንፈስ በሚገኘው ፍቅር እማጸናችኋለሁ፤ 31  በይሁዳ ካሉት የማያምኑ ሰዎች እጅ እንድድንና ወደ ኢየሩሳሌም የምወስደው እርዳታ በቅዱሳኑ ዘንድ ተቀባይነት እንዲያገኝ ጸልዩልኝ፤ 32  ይኸውም በአምላክ ፈቃድ ወደ እናንተ በደስታ ስመጣ ከእናንተ ጋር በመሆን መንፈሴ እንዲታደስ ነው። 33  ሰላም የሚሰጠው አምላክ ከሁላችሁ ጋር ይሁን። አሜን።

የግርጌ ማስታወሻዎች

ሮም 15:2 * “ባልንጀራ” ተብሎ የተተረጎመው ግሪክኛ ቃል የአንድን ሰው የቅርብ ጓደኛ ብቻ ሳይሆን ማንኛውንም ሰው ሊያመለክት ይችላል።