በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ሮም 14:1-23

14  በእምነቱ ደካማ የሆነውን ሰው ተቀበሉት እንጂ በውስጡ በሚፈጠሩበት ጥያቄዎች አትፍረዱበት።  አንድ ሰው እምነቱ ማንኛውንም ነገር እንዲበላ ይፈቅድለታል፤ በእምነቱ ደካማ የሆነ ሰው ግን አትክልት ይበላል።  የሚበላው የማይበላውን አይናቅ፤ የማይበላው ደግሞ በሚበላው ላይ አይፍረድ፤ ምክንያቱም ይህን ሰው አምላክ ተቀብሎታል።  በሌላው ሰው የቤት አገልጋይ ላይ የምትፈርድ አንተ ማን ነህ? እሱ ቢቆምም ሆነ ቢወድቅ ለጌታው ነው። እንዲያውም ይሖዋ እንዲቆም ሊያደርገው ስለሚችል ይቆማል።  አንድ ሰው አንዱ ቀን ከሌላው ቀን የበለጠ እንደሆነ አድርጎ ያስባል፤ ሌላው ሰው ደግሞ አንዱ ቀን ከሌሎቹ ቀናት ሁሉ የተለየ እንዳልሆነ ያስባል፤ እያንዳንዱ ሰው ሙሉ በሙሉ ያመነበትን ያድርግ።  አንድን ቀን የሚያከብር ለይሖዋ ብሎ ያከብራል። የሚበላም አምላክን ስለሚያመሰግን ለይሖዋ ብሎ ይበላል፤ የማይበላም ለይሖዋ ብሎ አይበላም፤ ይሁንና አምላክን ያመሰግናል።  እንዲያውም ከመካከላችን ለራሱ ብቻ ብሎ የሚኖር የለም፤ ለራሱ ብቻ ብሎም የሚሞት የለም፤  ምክንያቱም ብንኖር የምንኖረው ለይሖዋ ነው፤ ብንሞትም የምንሞተው ለይሖዋ ነው። ስለዚህ ብንኖርም ሆነ ብንሞት የይሖዋ ነን።  ክርስቶስ የሞተውና ዳግም ሕያው የሆነው ለዚህ ዓላማ ይኸውም በሙታንም ሆነ በሕያዋን ላይ ጌታ ይሆን ዘንድ ነው። 10  ታዲያ አንተ በወንድምህ ላይ ለምን ትፈርዳለህ? ወይስ ወንድምህን ለምን ትንቃለህ? ምክንያቱም ሁላችንም በአምላክ የፍርድ ወንበር ፊት እንቆማለን፤ 11  “‘እኔ ሕያው መሆኔ የተረጋገጠ እንደሆነ ሁሉ’ ይላል ይሖዋ፣ ‘ጉልበት ሁሉ እንደሚንበረከክና ምላስ ሁሉ እኔ አምላክ መሆኔን በይፋ አምኖ እንደሚቀበል የተረጋገጠ ነው’” ተብሎ ተጽፏልና። 12  ስለዚህ እያንዳንዳችን ስለ ራሳችን ለአምላክ መልስ እንሰጣለን። 13  ስለሆነም ከእንግዲህ አንዳችን በሌላው ላይ አንፍረድ፤ ከዚህ ይልቅ በአንድ ወንድም ፊት የሚያደናቅፍ ወይም የሚያሰናክል ነገር ላለማስቀመጥ ቁርጥ ውሳኔ አድርጉ። 14  አንድ ነገር ለአንድ ሰው ርኩስ የሚሆንበት እሱ ያ ነገር ርኩስ ነው ብሎ ሲያስብ ብቻ ነው እንጂ ማንኛውም ነገር በራሱ ርኩስ እንዳልሆነ በጌታ ኢየሱስ አውቄያለሁ፤ እንዲሁም አምኜ ተቀብያለሁ። 15  አንተ በምግብ የተነሳ ወንድምህ እንዲያዝን ካደረግክ በፍቅር መኖርህን ትተሃል ማለት ነው። ስለዚህ ክርስቶስ የሞተለት ይህ ሰው በምትበላው ምግብ ምክንያት እንዲጠፋ አታድርግ። 16  በመሆኑም እናንተ የምታደርጉትን መልካም ነገር የሚያስነቅፍባችሁ ነገር አታድርጉ። 17  የአምላክ መንግሥት በመንፈስ ቅዱስ የሚገኝ ጽድቅ፣ ሰላምና ደስታ ነው እንጂ የመብልና የመጠጥ ጉዳይ አይደለም። 18  በዚህ ረገድ ክርስቶስን እንደ ባሪያ የሚያገለግል ሰው በአምላክ ፊት ተቀባይነት፣ በሰዎችም ዘንድ ሞገስ ያገኛል። 19  ስለዚህ ሰላም የሚገኝበትንና እርስ በርሳችን የምንተናነጽበትን ነገር ለማድረግ የተቻለንን ሁሉ ጥረት እናድርግ። 20  ለምግብ ብለህ የአምላክን ሥራ ማፍረስ ተው። እርግጥ ነው፣ ሁሉም ነገር ንጹሕ ነው፤ ሆኖም እንቅፋት ሊሆን የሚችል ሁኔታ እያለ ለሚበላ ጎጂ ነው። 21  ወንድምህ የሚሰናከልበት ከሆነ ሥጋ አለመብላት ወይም የወይን ጠጅ አለመጠጣት ወይም ማንኛውንም የሚያሰናክል ነገር አለማድረግ መልካም ነው። 22  እንግዲህ እምነትህን በአምላክ ፊት ለራስህ ሥራበት። ትክክል ነው ብሎ ያመነበትን ነገር ካደረገ በኋላ ራሱን የማይኮንን ሰው ደስተኛ ነው። 23  እየተጠራጠረ ከበላ ግን የበላው በእምነት ስላልሆነ ቀድሞውንም ተኮንኗል። ደግሞም በእምነት ያልተደረገ ነገር ሁሉ ኃጢአት ነው።

የግርጌ ማስታወሻዎች