በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ሮም 1:1-32

1  የኢየሱስ ክርስቶስ ባሪያ ከሆነው፣ ሐዋርያ እንዲሆን ከተጠራውና የአምላክን ምሥራች ለማወጅ ከተለየው ከጳውሎስ፤  ይህ የምሥራች አምላክ በነቢያቱ አማካኝነት በቅዱሳን መጻሕፍት ውስጥ አስቀድሞ የሰጠው የተስፋ ቃል ሲሆን  በሥጋ ከዳዊት ዘር ስለተወለደው ልጁ የሚገልጽ ነው፤  ይሁንና እሱ ይኸውም ጌታችን ኢየሱስ ክርስቶስ ቅዱስ በሆነው መንፈስ ኃይል ከሞት በተነሳ ጊዜ የአምላክ ልጅ መሆኑ እንዲታወቅ ተደርጓል፤  ለስሙ ክብር በአሕዛብ ሁሉ መካከል በእምነት የሚታዘዙ ሰዎች እንዲገኙ ሲባል በእሱ አማካኝነት ጸጋና ሐዋርያነት ተቀብለናል፤  የኢየሱስ ክርስቶስ እንዲሆኑ ከአሕዛብ ከተጠሩት መካከል እናንተም ትገኙበታላችሁ፤  ቅዱሳን እንድትሆኑ ለተጠራችሁና በአምላክ ለተወደዳችሁ በሮም ለምትኖሩ ሁሉ:- አባታችን ከሆነው አምላክና ከጌታ ኢየሱስ ክርስቶስ ጸጋና ሰላም ለእናንተ ይሁን።  ከሁሉ አስቀድሜ፣ ስለ እምነታችሁ በመላው ዓለም ስለሚወራ ስለ ሁላችሁም በኢየሱስ ክርስቶስ በኩል ለአምላኬ ምስጋና አቀርባለሁ።  ያለማቋረጥ ዘወትር በጸሎቴ እናንተን ሳልጠቅስ እንደማላልፍ፣ ስለ ልጁ የሚገልጸውን ምሥራች በማወጅ በሙሉ ልቤ ቅዱስ አገልግሎት የማቀርብለት አምላክ ምሥክሬ ነው፤ 10  ደግሞም አምላክ ቢፈቅድ አሁን በመጨረሻ እንደምንም ተሳክቶልኝ ወደ እናንተ መምጣት እችል ዘንድ እየለመንኩ ነው። 11  ምክንያቱም እንድትጸኑ የሚያስችላችሁን መንፈሳዊ ስጦታ እንዳካፍላችሁ ላያችሁ እጓጓለሁ፤ 12  ይህንም ስል እኔ በእናንተ እምነት እናንተም በእኔ እምነት እርስ በርሳችን እንድንበረታታ ነው። 13  ይሁንና ወንድሞች፣ በሌሎች አሕዛብ መካከል ፍሬ እንዳፈራሁ ሁሉ በእናንተም መካከል ፍሬ ለማፍራት ወደ እናንተ ለመምጣት ብዙ ጊዜ አቅጄ እንደነበርና እስካሁን ድረስ ግን እንዳልተሳካልኝ እንድታውቁ እፈልጋለሁ። 14  ለግሪካውያንም ሆነ ግሪካውያን ላልሆኑ እንዲሁም ለጠቢባንም ሆነ ላልተማሩ ዕዳ አለብኝ፤ 15  በሮም ላላችሁት ለእናንተም ምሥራቹን ለማወጅ የምጓጓው ለዚህ ነው። 16  እኔ በምሥራቹ አላፍርም፤ እንዲያውም ምሥራቹ ለሚያምን ሁሉ ይኸውም በመጀመሪያ ለአይሁዳዊ ከዚያም ለግሪካዊ መዳን የሚያስገኝ የአምላክ ኃይል ነው፤ 17  ምክንያቱም “ጻድቅ ግን በእምነት ይኖራል” ተብሎ እንደተጻፈ ሁሉ እምነት ያላቸው ሰዎች አምላክ በምሥራቹ አማካኝነት ጽድቁን እንደሚገልጥ ይረዳሉ፤ ይህ ደግሞ እምነታቸውን ያጠነክርላቸዋል። 18  እውነትን ለማፈን የተንኮል ዘዴ የሚጠቀሙ ሰዎች በሚፈጽሙት አምላክን የሚጻረር ድርጊትና ክፋት ሁሉ ላይ የአምላክ ቁጣ ከሰማይ ይገለጣል፤ 19  ምክንያቱም ስለ አምላክ ሊታወቅ የሚችለው ነገር በእነሱ ዘንድ የታወቀ ነው፤ ይህም የሆነው አምላክ ይህን ግልጽ ስላደረገላቸው ነው። 20  የማይታዩት ባሕርያቱ ይኸውም ዘላለማዊ ኃይሉና አምላክነቱ ዓለም ከተፈጠረበት ጊዜ አንስቶ በግልጽ ይታያሉ፤ ምክንያቱም ባሕርያቱን ከተሠሩት ነገሮች ማስተዋል ይቻላል፤ ስለሆነም የሚያመካኙበት ነገር የላቸውም፤ 21  አምላክን የሚያውቁ ቢሆኑም እንኳ እንደ አምላክነቱ አላከበሩትም ብሎም አላመሰገኑትም፤ ከዚህ ይልቅ አስተሳሰባቸው ከንቱ ሆነ፣ የማያስተውለው ልባቸውም ጨለመ። 22  ጥበበኞች ነን ብለው ቢናገሩም ሞኞች ሆኑ፤ 23  የማይበሰብሰውን አምላክ ክብር በስባሽ በሆነው ሰው፣ በወፎች፣ አራት እግር ባላቸው እንስሳትና በደረታቸው በሚሳቡ ፍጥረታት መልክ መስለው ለወጡት። 24  ስለሆነም አምላክ በልባቸው ምኞት መሠረት የገዛ ራሳቸውን አካል እንዲያስነውሩ ለርኩሰት አሳልፎ ሰጣቸው፤ 25  የአምላክን እውነት በሐሰት የለወጡት፣ በፈጣሪ ፋንታ ፍጥረትን ያከበሩትና ያመለኩት እነዚሁ ሰዎች ናቸው፤ ይሁንና ፈጣሪ ለዘላለም የተባረከ ነው። አሜን። 26  አምላክ አሳፋሪ ለሆነ የፆታ ፍላጎት አሳልፎ የሰጣቸው በዚህ ምክንያት ነው፤ ሴቶቻቸውም ተፈጥሯዊ የሆነውን ግንኙነት ከተፈጥሮ ውጪ በሆነ ግንኙነት ለወጡ፤ 27  ወንዶቹም ቢሆኑ ተፈጥሯዊ በሆነ መንገድ ከሴቶች ጋር መገናኘት ትተው እርስ በርሳቸው ኃይለኛ በሆነ የፆታ ስሜት ተቃጠሉ፤ ወንዶች ከወንዶች ጋር አስነዋሪ ነገር ፈጸሙ፤ ለጥፋታቸውም የሚገባውን ሙሉ ብድራት በራሳቸው እየተቀበሉ ነው። 28  ስለ አምላክ ትክክለኛ እውቀት ማግኘት ስላልፈለጉም መደረግ የማይገባውን ነገር እንዲያደርጉ አምላክ በእሱ ዘንድ ተቀባይነት ለሌለው አስተሳሰብ አሳልፎ ሰጣቸው፤ 29  ምክንያቱም በዓመፅ፣ በኃጢአተኝነት፣ በመጎምጀት፣ በክፋት፣ በቅናት፣ በነፍሰ ገዳይነት፣ በጥል፣ በማታለልና በተንኮል የተሞሉ ናቸው፤ እንዲሁም ሐሜተኞች፣ 30  ስም አጥፊዎች፣ አምላክን የሚጠሉ፣ ተሳዳቢዎች፣ ትዕቢተኞች፣ ትምክህተኞች፣ የክፋት ጠንሳሾች፣ ለወላጆች የማይታዘዙ፣ 31  የማያስተውሉ፣ ቃላቸውን የማይጠብቁ፣ ተፈጥሯዊ ፍቅር የሌላቸውና ምሕረት የለሾች ናቸው። 32  እነዚህ ሰዎች ‘እንዲህ ያሉ ነገሮችን የመፈጸም ልማድ ያላቸው ሁሉ ሞት ይገባቸዋል’ የሚለውን የአምላክ የጽድቅ ሕግ በሚገባ የሚያውቁ ቢሆኑም በዚህ ድርጊታቸው መግፋት ብቻ ሳይሆን ይህን የማድረግ ልማድ ያላቸውንም ይደግፋሉ።

የግርጌ ማስታወሻዎች