በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ራእይ 6:1-17

6  እኔም በጉ ከሰባቱ ማኅተሞች አንዱን ሲከፍት አየሁ፤ ከአራቱ ሕያዋን ፍጥረታትም አንዱ እንደ ነጎድጓድ ባለ ድምፅ “ና!” ሲል ሰማሁ።  እኔም አየሁ፣ እነሆ ነጭ ፈረስ ነበር፤ በእሱም ላይ የተቀመጠው ቀስት ነበረው፤ አክሊልም ተሰጠው፤ እሱም ድል እያደረገ ወጣ፤ ድሉንም ለማጠናቀቅ ወደፊት ገሠገሠ።  ሁለተኛውንም ማኅተም በከፈተ ጊዜ ሁለተኛው ሕያው ፍጡር “ና!” ሲል ሰማሁ።  ሌላም ደማቅ ቀይ ቀለም ያለው ፈረስ ወጣ፤ በእሱም ላይ ለተቀመጠው ሰዎች እርስ በርሳቸው ይተራረዱ ዘንድ ሰላምን ከምድር እንዲወስድ ተፈቀደለት፤ እንዲሁም ትልቅ ሰይፍ ተሰጠው።  ሦስተኛውንም ማኅተም በከፈተ ጊዜ ሦስተኛው ሕያው ፍጡር “ና!” ሲል ሰማሁ። እኔም አየሁ፣ እነሆ ጥቁር ፈረስ ነበር፤ በእሱም ላይ የተቀመጠው በእጁ ሚዛን ይዞ ነበር።  ከአራቱ ሕያዋን ፍጥረታት መካከል የመጣ የሚመስል ድምፅ “አንድ እርቦ ስንዴ በዲናር፣ ሦስት እርቦ ገብስም በዲናር፤ ደግሞም የወይራ ዘይቱንና ወይኑን አትጉዳ” ሲል ሰማሁ።  አራተኛውንም ማኅተም በከፈተ ጊዜ አራተኛው ሕያው ፍጡር “ና!” ሲል ሰማሁ።  እኔም አየሁ፣ እነሆ ግራጫ ፈረስ ነበር፤ በእሱም ላይ የተቀመጠው ስሙ ሞት ነበር። ሔዲስም* በቅርብ ይከተለው ነበር። ሞትና ሔዲስም በረጅም ሰይፍ፣ በምግብ እጥረት፣ በገዳይ መቅሰፍትና በምድር አራዊት እንዲገድሉ በምድር አንድ አራተኛ ላይ ሥልጣን ተሰጣቸው።  አምስተኛውንም ማኅተም በከፈተ ጊዜ በአምላክ ቃል የተነሳና ያከናውኑት በነበረው የምሥክርነት ሥራ የተነሳ የታረዱትን ሰዎች ነፍሳት ከመሠዊያው በታች አየሁ። 10  እነሱም በታላቅ ድምፅ “ቅዱስና እውነተኛ የሆንከው ሉዓላዊ ጌታ ሆይ፣ በምድር በሚኖሩት ላይ ከመፍረድና ደማችንን ከመበቀል የምትቆጠበው እስከ መቼ ነው?” ብለው ጮኹ። 11  ለእያንዳንዳቸውም ነጭ ልብስ ተሰጣቸው፤ እንዲሁም ወደፊት እንደ እነሱ የሚገደሉት መሰሎቻቸው የሆኑ ባሪያዎችና የወንድሞቻቸው ቁጥርም እስኪሞላ ድረስ ለጥቂት ጊዜ እንዲጠብቁ ተነገራቸው። 12  ስድስተኛውንም ማኅተም ሲከፍት አየሁ፤ ታላቅ የምድር ነውጥም ተከሰተ፤ ፀሐይም እንደ ማቅ ፀጉር ጠቆረች፤ መላዋ ጨረቃም ደም መሰለች፤ 13  ኃይለኛ ነፋስ የበለስን ዛፍ ሲያወዛውዝ ያልበሰሉት ፍሬዎች ከዛፉ ላይ እንደሚረግፉ፣ የሰማይ ከዋክብትም ወደ ምድር ወደቁ። 14  ሰማይም እየተጠቀለለ እንዳለ የመጽሐፍ ጥቅልል ከቦታው ተነሳ፤ እንዲሁም ተራሮች ሁሉና ደሴቶች ሁሉ ከቦታቸው ተወገዱ። 15  በተጨማሪም የምድር ነገሥታት፣ ከፍተኛ ባለሥልጣናት፣ የጦር አዛዦች፣ ሀብታሞች፣ ብርቱዎች፣ ባሪያዎች ሁሉና ነፃ ሰዎች ሁሉ በዋሻዎች ውስጥና በተራራ ዐለቶች ውስጥ ተደበቁ። 16  ተራሮቹንና ዐለቶቹንም እንዲህ እያሉ ተማጸኑ:- “በላያችን ላይ ውደቁና በዙፋኑ ላይ ከተቀመጠው ፊትና ከበጉ ቁጣ ሰውሩን፤ 17  ምክንያቱም ቁጣቸውን የሚገልጹበት ታላቁ ቀን መጥቷል፤ ማንስ ሊቆም ይችላል?”

የግርጌ ማስታወሻዎች

ራእይ 6:8 * ከተጨማሪው መረጃ ላይ 8ኛውን ርዕስ ተመልከት።