በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ራእይ 22:1-21

22  መልአኩም ከአምላክና ከበጉ ዙፋን ወጥቶ የሚፈሰውን እንደ ክሪስታል የጠራ የሕይወት ውኃ ወንዝ አሳየኝ፤  ወንዙም በከተማዋ አውራ ጎዳና መካከል ቁልቁል ይፈስ ነበር። በወንዙም ግራና ቀኝ በየወሩ እያፈሩ በዓመት አሥራ ሁለት ጊዜ ፍሬ የሚሰጡ የሕይወት ዛፎች ነበሩ። የዛፎቹም ቅጠሎች ብሔራትን ለመፈወስ የሚያገለግሉ ነበሩ።  በዚያም ከእንግዲህ እርግማን የሚባል ነገር አይኖርም። ከዚህ ይልቅ የአምላክና የበጉ ዙፋን በከተማዋ ውስጥ ይሆናል፤ ባሪያዎቹም ቅዱስ አገልግሎት ያቀርቡለታል፤  ፊቱንም ያያሉ፤ ስሙም በግምባራቸው ላይ ይሆናል።  በተጨማሪም ከእንግዲህ ወዲህ ሌሊት አይኖርም፤ ይሖዋ አምላክ በእነሱ ላይ ብርሃን ስለሚፈነጥቅ የመብራት ብርሃን አያስፈልጋቸውም፣ የፀሐይ ብርሃንም አይኖራቸውም፤ ነገሥታት ሆነውም ከዘላለም እስከ ዘላለም ይገዛሉ።  መልአኩም እንዲህ አለኝ:- “እነዚህ ቃላት እምነት የሚጣልባቸውና እውነት ናቸው፤ አዎ፣ ነቢያት በመንፈስ መሪነት እንዲናገሩ የሚያደርገው አምላክ ይሖዋ፣ በቅርብ ጊዜ ውስጥ መፈጸም ያለባቸውን ነገሮች ለባሪያዎቹ ለማሳየት መልአኩን ልኳል።  እነሆ፣ እኔ ቶሎ እመጣለሁ። በዚህ የመጽሐፍ ጥቅልል ውስጥ የሚገኙትን የትንቢት ቃላት የሚጠብቅ ማንኛውም ሰው ደስተኛ ነው።”  እነዚህን ነገሮች ስሰማና ስመለከት የነበርኩት እኔ ዮሐንስ ነኝ። በሰማሁና ባየሁ ጊዜም እነዚህን ነገሮች እያሳየኝ የነበረውን መልአክ ላመልከው እግሩ ሥር ተደፋሁ።  እሱ ግን “ተጠንቀቅ! ፈጽሞ ይህን እንዳታደርግ! እኔኮ ከአንተም ሆነ ነቢያት ከሆኑት ወንድሞችህና በዚህ የመጽሐፍ ጥቅልል ውስጥ የሰፈሩትን ቃላት ከሚጠብቁት ሁሉ ጋር አብሬ የማገለግል ባሪያ ነኝ። አምላክን አምልክ” አለኝ። 10  ደግሞም እንዲህ አለኝ:- “የተወሰነው ጊዜ ስለቀረበ በዚህ የመጽሐፍ ጥቅልል ውስጥ የሰፈሩትን የትንቢት ቃላት በማኅተም አታሽጋቸው። 11  ጽድቅ ያልሆነ ነገር የሚያደርግ፣ ጽድቅ ያልሆነ ነገር ማድረጉን ይቀጥል፤ ርኩስ ምግባር ያለውም ርኩስ የሆኑ ነገሮች ማድረጉን ይቀጥል፤ ጻድቅ የሆነው ግን የጽድቅ ሥራ መሥራቱን ይቀጥል፤ ቅዱስ የሆነውም በቅድስና ይቀጥል። 12  “‘እነሆ፣ እኔ ቶሎ እመጣለሁ፤ ለእያንዳንዱ እንደ ሥራው እከፍለው ዘንድ የምሰጠው ብድራት ከእኔ ጋር ነው። 13  እኔ አልፋና ኦሜጋ፣ ፊተኛውና ኋለኛው፣ የመጀመሪያውና የመጨረሻው ነኝ። 14  ከሕይወት ዛፎች ፍሬ የመብላት መብት እንዲያገኙና በበሮቿ ወደ ከተማዋ መግባት እንዲፈቀድላቸው ልብሳቸውን የሚያጥቡ ደስተኞች ናቸው። 15  ውሾች፣ መናፍስታዊ ድርጊት የሚፈጽሙ፣ ሴሰኞች፣ ነፍሰ ገዳዮች፣ ጣዖት አምላኪዎችና በቃልም ሆነ በድርጊት ውሸትን የሚወዱ ሁሉ በውጭ አሉ።’ 16  “‘እኔ ኢየሱስ ለጉባኤዎቹ ጥቅም ስል እነዚህን ነገሮች ለእናንተ ለመመሥከር መልአኬን ልኬአለሁ። እኔ የዳዊት ሥርና ዘር እንዲሁም ደማቅ የንጋት ኮከብ ነኝ።’” 17  መንፈሱና ሙሽራይቱም “ና!” እያሉ ነው። የሚሰማም ሁሉ “ና!” ይበል። የተጠማም ሁሉ ይምጣ፤ የሚፈልግ ሁሉ የሕይወትን ውኃ በነፃ ይውሰድ። 18  “በዚህ የመጽሐፍ ጥቅልል ላይ የሰፈሩትን የትንቢት ቃላት ለሚሰማ ሁሉ እመሠክራለሁ:- ማንም በእነዚህ ነገሮች ላይ አንዲት ነገር ቢጨምር አምላክ በዚህ የመጽሐፍ ጥቅልል ውስጥ የተጻፉትን መቅሰፍቶች ይጨምርበታል፤ 19  ማንም በዚህ የትንቢት መጽሐፍ ጥቅልል ላይ ከሰፈሩት ቃላት አንዲት ነገር ቢያጎድል አምላክ በዚህ የመጽሐፍ ጥቅልል ላይ ከተጠቀሱት የሕይወት ዛፎችና ከቅድስቲቱ ከተማ ዕጣ ፈንታውን ይወስድበታል። 20  “ስለ እነዚህ ነገሮች የሚመሠክረው ‘አዎ፣ ቶሎ እመጣለሁ’ ይላል።” “አሜን! ጌታ ኢየሱስ፣ ና።” 21  የጌታ ኢየሱስ ክርስቶስ ጸጋ ከቅዱሳኑ ጋር ይሁን።

የግርጌ ማስታወሻዎች