በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ራእይ 21:1-27

21  እኔም አዲስ ሰማይና አዲስ ምድር አየሁ፤ ምክንያቱም የቀድሞው ሰማይና የቀድሞው ምድር አልፈዋል፤ ባሕሩም ከእንግዲህ ወዲህ የለም።  በተጨማሪም ቅድስቲቱ ከተማ፣ አዲሲቱ ኢየሩሳሌም ከሰማይ ከአምላክ ዘንድ ስትወርድ አየሁ፤ እሷም ለባሏ እንዳጌጠች ሙሽራ ተዘጋጅታ ነበር።  በዚህ ጊዜ ከዙፋኑ አንድ ታላቅ ድምፅ እንዲህ ሲል ሰማሁ:- “እነሆ፣ የአምላክ ድንኳን ከሰዎች ጋር ነው፤ እሱም ከእነሱ ጋር ይኖራል፤ እነሱም ሕዝቦቹ ይሆናሉ። አምላክ ራሱም ከእነሱ ጋር ይሆናል።  እሱም እንባን ሁሉ ከዓይኖቻቸው ላይ ይጠርጋል፤ ከእንግዲህ ወዲህ ሞት አይኖርም፤ ሐዘንም ሆነ ጩኸት እንዲሁም ሥቃይ ከእንግዲህ ወዲህ አይኖርም። ቀድሞ የነበሩት ነገሮች አልፈዋል።”  በዙፋኑም ላይ የተቀመጠው “እነሆ፣ ሁሉንም ነገር አዲስ አደርጋለሁ” አለ። ደግሞም “እነዚህ ቃላት እምነት የሚጣልባቸውና እውነት ስለሆኑ ጻፍ” አለ።  እንዲህም አለኝ:- “እነዚህ ነገሮች ተፈጽመዋል! እኔ አልፋና ኦሜጋ፣ የመጀመሪያውና የመጨረሻው ነኝ። ለተጠማ ሁሉ ከሕይወት ውኃ ምንጭ በነፃ እሰጣለሁ።  ድል የሚነሳ ሁሉ እነዚህን ነገሮች ይወርሳል፤ እኔም አምላክ እሆነዋለሁ፣ እሱም ልጄ ይሆናል።  ይሁን እንጂ የፈሪዎች፣ እምነት የሌላቸው ሰዎች፣ በርኩሰታቸው አስጸያፊ የሆኑ፣ የነፍሰ ገዳዮች፣ የሴሰኞች፣ መናፍስታዊ ድርጊት የሚፈጽሙ፣ የጣዖት አምላኪዎችና የውሸታሞች ሁሉ ዕጣ ፈንታቸው በእሳትና በድኝ በሚቃጠል ሐይቅ ውስጥ መጣል ነው። ይህ ሁለተኛው ሞት ማለት ነው።”  በመጨረሻዎቹ ሰባት መቅሰፍቶች የተሞሉትን ሰባቱን ሳህኖች ይዘው ከነበሩት ሰባት መላእክት አንዱ መጥቶ “ወደዚህ ና፤ የበጉን ሚስት፣ ሙሽራይቱን አሳይሃለሁ” ሲል አናገረኝ። 10  ከዚያም በመንፈስ ኃይል ወደ አንድ ትልቅና ረጅም ተራራ ወሰደኝና ቅድስቲቱ ከተማ ኢየሩሳሌም ከሰማይ ከአምላክ ዘንድ ስትወርድ አሳየኝ፤ 11  እሷም የአምላክን ክብር ተላብሳ ነበር። የብርሃኗም ድምቀት እጅግ እንደከበረ ድንጋይ፣ እንደ ኢያስጲድ ድንጋይ ሆኖ እንደ ክሪስታል ጥርት ብሎ ያንጸባርቅ ነበር። 12  ትልቅና ረጅም የግንብ አጥር እንዲሁም አሥራ ሁለት በሮች ነበሯት፤ በበሮቹም ላይ አሥራ ሁለት መላእክት ነበሩ፤ የአሥራ ሁለቱ የእስራኤል ልጆች ነገዶች ስምም በበሮቹ ላይ ተቀርጾ ነበር። 13  በምሥራቅ ሦስት በሮች፣ በሰሜን ሦስት በሮች፣ በደቡብ ሦስት በሮችና በምዕራብ ሦስት በሮች ነበሩ። 14  በተጨማሪም የከተማዋ የግንብ አጥር አሥራ ሁለት የመሠረት ድንጋዮች ነበሩት፤ በእነሱም ላይ የአሥራ ሁለቱ የበጉ ሐዋርያት አሥራ ሁለት ስሞች ተጽፈው ነበር። 15  እያነጋገረኝ የነበረው መልአክም ከተማዋን፣ በሮቿንና የግንብ አጥሯን ለመለካት እንደ መለኪያ የሚያገለግል የወርቅ ዘንግ ይዞ ነበር። 16  ከተማዋ አራት ማዕዘን ቅርጽ ያላት ሲሆን ርዝመቷ ከወርዷ ጋር እኩል ነው። እሱም ከተማዋን በዘንጉ ሲለካት አሥራ ሁለት ሺህ ምዕራፍ* ሆና ተገኘች፤ ርዝመቷ፣ ወርዷና ከፍታዋ እኩል ነው። 17  በተጨማሪም የግንብ አጥሯን ለካ፤ አጥሩም በሰው መለኪያ፣ በመልአክም መለኪያ አንድ መቶ አርባ አራት ክንድ* ሆኖ ተገኘ። 18  የከተማዋ የግንብ አጥር የተገነባው ከኢያስጲድ ነበር፤ ከተማዋም የጠራ መስተዋት የሚመስል ንጹሕ ወርቅ ነበረች። 19  የከተማዋ የግንብ አጥር መሠረቶች በተለያየ ዓይነት የከበረ ድንጋይ ያጌጡ ነበሩ:- የመጀመሪያው መሠረት ኢያስጲድ፣ ሁለተኛው ሰንፔር፣ ሦስተኛው ኬልቄዶን፣ አራተኛው መረግድ፣ 20  አምስተኛው ሰርዶንክስ፣ ስድስተኛው ሰርድዮን፣ ሰባተኛው ክርስቲሎቤ፣ ስምንተኛው ቢረሌ፣ ዘጠነኛው ቶጳዝዮን፣ አሥረኛው ክርስጵራስስ፣ አሥራ አንደኛው ያክንትና አሥራ ሁለተኛው አሜቴስጢኖስ ነበር። 21  በተጨማሪም አሥራ ሁለቱ በሮች አሥራ ሁለት ዕንቁዎች ነበሩ፤ እያንዳንዱ በር ከአንድ ዕንቁ የተሠራ ነበር። የከተማዋ አውራ ጎዳናም ብርሃን እንደሚያስተላልፍ መስተዋት ንጹሕ ወርቅ ነበር። 22  በከተማዋም ውስጥ ቤተ መቅደስ አላየሁም፤ ምክንያቱም ሁሉን ቻይ የሆነው ይሖዋ አምላክ ቤተ መቅደሷ ነው፤ በጉም እንደዚሁ ቤተ መቅደሷ ነው። 23  ከተማዋም የፀሐይም ሆነ የጨረቃ ብርሃን አላስፈለጋትም፤ ምክንያቱም የአምላክ ክብር ብርሃን ሰጥቷታል፤ በጉም መብራቷ ነበር። 24  ብሔራትም በእሷ ብርሃን ይጓዛሉ፤ የምድር ነገሥታትም ክብራቸውን ወደ እሷ ያመጣሉ። 25  በዚያም ሌሊት ስለማይኖር በሮቿ በምንም ዓይነት በቀን አይዘጉም። 26  የብሔራትን ግርማና ክብርም ወደ እሷ ያመጣሉ። 27  ሆኖም ቅዱስ ያልሆነ ማንኛውም ነገር እንዲሁም አስጸያፊ ነገር የሚያደርግና ውሸት የሚናገር ማንኛውም ሰው በምንም ዓይነት ወደ እሷ አይገባም፤ ወደ እሷ የሚገቡት በበጉ የሕይወት መጽሐፍ ጥቅልል ላይ የተጻፉ ብቻ ናቸው።

የግርጌ ማስታወሻዎች

ራእይ 21:16 * 2,220 ኪሎ ሜትር ገደማ።
ራእይ 21:17 * 64 ሜትር ገደማ።