በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ራእይ 20:1-15

20  እኔም የጥልቁን ቁልፍና ታላቅ ሰንሰለት በእጁ የያዘ አንድ መልአክ ከሰማይ ሲወርድ አየሁ።  እሱም ዘንዶውን ያዘውና ለአንድ ሺህ ዓመት አሰረው፤ ይህም ዘንዶ ዲያብሎስና ሰይጣን የሆነው የመጀመሪያው እባብ ነው።  አንድ ሺው ዓመት እስኪያበቃ ድረስ ከእንግዲህ ብሔራትን እንዳያሳስት ወደ ጥልቁ ወረወረውና ዘጋበት፤ በማኅተምም አሸገው። ከዚያ በኋላ ለጥቂት ጊዜ ሊፈታ ይገባዋል።  ዙፋኖችንም አየሁ፤ በዙፋኖቹም ላይ የተቀመጡ ነበሩ፤ ለእነሱም የመፍረድ ሥልጣን ተሰጣቸው። አዎ፣ ስለ ኢየሱስ በመመሥከራቸውና ስለ አምላክ በመናገራቸው የተነሳ በመጥረቢያ የተቀሉትን ሰዎች ነፍሳት ይኸውም አውሬውንም ሆነ ምስሉን ያላመለኩትንና በግምባራቸው ላይም ሆነ በእጃቸው ላይ ምልክቱን ያልተቀበሉትን ሰዎች ነፍሳት አየሁ። እነሱም ዳግም ሕያው ሆነው ከክርስቶስ ጋር ለአንድ ሺህ ዓመት ነገሥታት ሆነው ገዙ።  (የቀሩት ሙታን አንድ ሺው ዓመት እስኪያበቃ ድረስ ሕያው አልሆኑም።) ይህ የመጀመሪያው ትንሣኤ ነው።  በመጀመሪያው ትንሣኤ ተካፋይ የሆኑ ሁሉ ደስተኞችና ቅዱሳን ናቸው፤ ሁለተኛው ሞት በእነዚህ ላይ ሥልጣን የለውም፤ ከዚህ ይልቅ የአምላክና የክርስቶስ ካህናት ይሆናሉ፤ እንዲሁም ከእሱ ጋር ነገሥታት ሆነው ለአንድ ሺህ ዓመት ይገዛሉ።  አንድ ሺው ዓመት እንዳበቃም ሰይጣን ከእስራቱ ይፈታል፤  እሱም በአራቱም የምድር ማዕዘናት ያሉትን ብሔራት፣ ጎግንና ማጎግን ለማሳሳትና ለጦርነቱ አንድ ላይ ለመሰብሰብ ይወጣል። የእነዚህም ቁጥር በባሕር ዳር እንዳለ አሸዋ ነው።  እነሱም በምድር ሁሉ ተሰራጩ፤ እንዲሁም የቅዱሳኑን ሰፈርና የተወደደችውን ከተማ ከበቡ። ሆኖም እሳት ከሰማይ ወርዶ በላቸው። 10  ሲያሳስታቸው የነበረው ዲያብሎስም አውሬውና ሐሰተኛው ነቢይ ወዳሉበት ወደ እሳቱና ወደ ድኙ ሐይቅ ተወረወረ፤ እነሱም ከዘላለም እስከ ዘላለም ቀንና ሌሊት ይሠቃያሉ። 11  እኔም አንድ ትልቅ ነጭ ዙፋንና በዙፋኑ ላይ የተቀመጠውን አየሁ። ምድርና ሰማይ ከፊቱ ሸሹ፤ ስፍራም አልተገኘላቸውም። 12  ከዚያም ሙታንን፣ ታላላቆችንና ታናናሾችን በዙፋኑ ፊት ቆመው አየሁ፤ የመጽሐፍ ጥቅልሎችም ተከፈቱ። ሆኖም ሌላ ጥቅልል ተከፈተ፤ ይህም የሕይወት መጽሐፍ ጥቅልል ነው። ሙታንም በጥቅልሎቹ ውስጥ በተጻፉት ነገሮች መሠረት እንደየሥራቸው ፍርድ ተሰጣቸው። 13  ባሕርም በውስጡ ያሉትን ሙታን ሰጠ፤ ሞትና ሔዲስም* በውስጣቸው ያሉትን ሙታን ሰጡ፤ እነሱም እንደየሥራቸው በግለሰብ ደረጃ ፍርድ ተሰጣቸው። 14  ሞትና ሔዲስም ወደ እሳቱ ሐይቅ ተወረወሩ። ይህም የእሳት ሐይቅ ሁለተኛው ሞት ማለት ነው። 15  በተጨማሪም በሕይወት መጽሐፍ ላይ ተጽፎ ያልተገኘ ሁሉ ወደ እሳቱ ሐይቅ ተወረወረ።

የግርጌ ማስታወሻዎች

ራእይ 20:13 * ከተጨማሪው መረጃ ላይ 8ኛውን ርዕስ ተመልከት።