በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ራእይ 2:1-29

2  “በኤፌሶን ላለው ጉባኤ መልአክ እንዲህ ብለህ ጻፍ:- ሰባቱን ከዋክብት በቀኝ እጁ የያዘው፣ በሰባቱ የወርቅ መቅረዞች መካከል የሚመላለሰው እንዲህ ይላል:-  ‘ሥራህን፣ ድካምህንና ጽናትህን አውቃለሁ፤ ደግሞም መጥፎ ሰዎችን መታገሥ እንደማትችል እንዲሁም ሐዋርያት ሳይሆኑ ሐዋርያት ነን የሚሉትን ፈትነህ ውሸታሞች ሆነው እንዳገኘሃቸው አውቃለሁ።  በተጨማሪም ጽናት እያሳየህ ነው፤ ስለ ስሜም ስትል ብዙ ችግሮችን ተቋቁመሃል፤ ደግሞም አልታከትክም።  ይሁን እንጂ የምነቅፍብህ ነገር አለኝ፤ ይኸውም መጀመሪያ ላይ የነበረህን ፍቅር ትተሃል።  “‘ስለዚህ ከምን ላይ እንደወደቅክ አስታውስ፤ ንስሐም ግባ፣ ቀድሞ ታደርገው የነበረውንም ነገር አድርግ። አለዚያ እመጣብሃለሁ፤ ንስሐ ካልገባህ በስተቀር መቅረዝህን ከስፍራው አነሳዋለሁ።  ያም ሆኖ አንድ የሚያስመሰግንህ ነገር አለ፤ እኔም የምጠላውን የኒቆላዎስን ኑፋቄ ተግባር ትጠላለህ።  መንፈስ ለጉባኤዎቹ የሚናገረውን ጆሮ ያለው ይስማ:- ድል ለሚነሳ በአምላክ ገነት ውስጥ ካለው የሕይወት ዛፍ እንዲበላ እፈቅድለታለሁ።’  “በሰምርኔስ ላለው ጉባኤ መልአክም እንዲህ ብለህ ጻፍ:- ‘የመጀመሪያውና የመጨረሻው፣’ ሞቶ የነበረውና ዳግም ሕያው የሆነው እንዲህ ይላል:-  ‘መከራህንና ድህነትህን አውቃለሁ፤ ይሁንና ሀብታም ነህ፤ አይሁዳውያን ሳይሆኑ አይሁዳውያን ነን የሚሉት ሆኖም የሰይጣን ምኩራብ የሆኑት የሚናገሩትን ስድብ አውቃለሁ። 10  ሊደርስብህ ያለውን መከራ አትፍራ። እነሆ፣ ሙሉ በሙሉ እንድትፈተኑና ለአሥር ቀን መከራ እንድትቀበሉ ዲያብሎስ አንዳንዶቻችሁን እስር ቤት መክተቱን ይቀጥላል። እስከ ሞት ድረስም እንኳ ታማኝነትህን አስመሥክር፤ እኔም የሕይወትን አክሊል እሰጥሃለሁ። 11  መንፈስ ለጉባኤዎቹ የሚናገረውን ጆሮ ያለው ይስማ:- ድል የሚነሳ በሁለተኛው ሞት ከቶ አይጎዳም።’ 12  “በጴርጋሞን ላለው ጉባኤ መልአክም እንዲህ ብለህ ጻፍ:- በሁለቱም በኩል ስለታም የሆነ ረጅም ሰይፍ ያለው እንዲህ ይላል:- 13  ‘የት እንደምትኖር አውቃለሁ፤ የምትኖረው የሰይጣን ዙፋን ባለበት ነው፤ ያም ሆኖ ስሜን አጥብቀህ እንደያዝክ ቀጥለሃል፤ ሰይጣን ባለበት፣ እናንተ በምትኖሩበት ቦታ በተገደለው፣ ምሥክሬ በሆነው፣ በታመነው በአንቲጳስ ዘመን እንኳ በእኔ ላይ ያለህን እምነት አልካድክም። 14  “‘ይሁን እንጂ የምነቅፍብህ ጥቂት ነገሮች አሉኝ፤ የእስራኤል ልጆች ለጣዖታት የተሠዉ ነገሮችን እንዲበሉና ዝሙት እንዲፈጽሙ በፊታቸው ማሰናከያ እንዲያስቀምጥ ባላቅን ያስተማረውን የበለዓምን ትምህርት አጥብቀው የያዙ በመካከልህ አሉ። 15  ልክ እንደዚሁ የኒቆላዎስን ኑፋቄ ትምህርት አጥብቀው የያዙ ሰዎችም በመካከልህ አሉ። 16  ስለዚህ ንስሐ ግባ። አለዚያ በፍጥነት ወደ አንተ እመጣለሁ፤ በአፌም ረጅም ሰይፍ እዋጋቸዋለሁ። 17  “‘መንፈስ ለጉባኤዎቹ የሚናገረውን ጆሮ ያለው ይስማ:- ድል ለሚነሳ ከተሰወረው መና ላይ የተወሰነ እሰጠዋለሁ፤ እንዲሁም ነጭ ጠጠር እሰጠዋለሁ፤ በጠጠሩም ላይ ከሚቀበለው ሰው በቀር ማንም የማያውቀው አዲስ ስም ተጽፎበታል።’ 18  “በትያጥሮን ላለው ጉባኤ መልአክም እንዲህ ብለህ ጻፍ:- እንደ እሳት ነበልባል የሆኑ ዓይኖችና እንደጠራ መዳብ ያሉ እግሮች ያሉት የአምላክ ልጅ እንዲህ ይላል:- 19  ‘ሥራህን፣ ፍቅርህን፣ እምነትህን፣ አገልግሎትህንና ጽናትህን አውቃለሁ፤ ደግሞም ከቀድሞው ሥራህ ይልቅ የአሁኑ እንደሚበልጥ አውቃለሁ። 20  “‘ይሁን እንጂ የምነቅፍብህ ነገር አለኝ፤ ራሷን ነቢይት ብላ የምትጠራውን ያቺን ሴት ኤልዛቤልን ችላ ብለሃታል፤ እሷም ዝሙት እንዲፈጽሙና ለጣዖታት የተሠዉ ነገሮችን እንዲበሉ ባሪያዎቼን ታስተምራለች እንዲሁም ታሳስታለች። 21  እኔም ንስሐ እንድትገባ ጊዜ ሰጠኋት፤ እሷ ግን ከዝሙቷ ንስሐ ለመግባት ፈቃደኛ አይደለችም። 22  እነሆ፣ የአልጋ ቁራኛ ላደርጋት ነው፤ ከእሷ ጋር ምንዝር የሚፈጽሙትም ከድርጊቷ ንስሐ ካልገቡ ታላቅ መከራ አመጣባቸዋለሁ። 23  እንዲሁም እኔ ኩላሊትንና ልብን የምመረምር እንደሆንኩ ጉባኤዎቹ ሁሉ እንዲያውቁ ልጆቿን በገዳይ መቅሰፍት እገድላለሁ፤ ለእናንተም በግለሰብ ደረጃ እንደሥራችሁ እሰጣችኋለሁ። 24  “‘ነገር ግን ይህን ትምህርት ለማትከተሉ ሁሉና እነሱ እንደሚሉት “የሰይጣንን ጥልቅ ነገሮች” ለማታውቁ በትያጥሮን ላላችሁት ለተቀራችሁት ለእናንተ ይህን እላለሁ:- በእናንተ ላይ ምንም ዓይነት ተጨማሪ ሸክም አልጭንባችሁም። 25  ብቻ እኔ እስክመጣ ድረስ ያላችሁን አጥብቃችሁ ያዙ። 26  ድል ለሚነሳና በሥራዬ እስከ መጨረሻ ለሚጸናም በሕዝቦች ላይ ሥልጣን እሰጠዋለሁ፤ 27  እሱም ሕዝቦችን እንደ ሸክላ ዕቃ እንዲደቁ እንደ እረኛ በብረት በትር ያግዳቸዋል፤ ይህም እኔ ከአባቴ ሥልጣን እንደተቀበልኩት ዓይነት ነው፤ 28  እኔም የንጋት ኮከብን እሰጠዋለሁ። 29  መንፈስ ለጉባኤዎቹ የሚናገረውን ጆሮ ያለው ይስማ።’

የግርጌ ማስታወሻዎች