በቀጥታ ወደ ዋናው ጉዳይ ግባ

በቀጥታ ወደ ርዕስ ማውጫው ሂድ

የይሖዋ ምሥክሮች

ቋንቋ ምረጥ አማርኛ

ራእይ 16:1-21

16  እኔም ከቅዱሱ ስፍራ የወጣ ታላቅ ድምፅ ሰባቱን መላእክት “ሂዱና የአምላክን ቁጣ የያዙትን ሰባቱን ሳህኖች ወደ ምድር አፍስሱ” ሲል ሰማሁ።  የመጀመሪያውም ሄዶ በሳህኑ ውስጥ ያለውን ወደ ምድር አፈሰሰው። የአውሬው ምልክት በነበራቸውና ምስሉን ያመልኩ በነበሩት ሰዎችም ላይ ጎጂና አስከፊ ቁስል ወጣባቸው።  ሁለተኛውም በሳህኑ ውስጥ ያለውን ወደ ባሕር አፈሰሰው። ባሕሩም እንደሞተ ሰው ደም ሆነ፤ ሕያው ነፍስ ሁሉ፣ አዎ፣ በባሕር ውስጥ ያለ ነገር ሁሉ ሞተ።  ሦስተኛውም በሳህኑ ውስጥ ያለውን ወደ ወንዞችና ወደ ውኃ ምንጮች አፈሰሰው። እነሱም ደም ሆኑ።  እኔም በውኃዎች ላይ ሥልጣን ያለው መልአክ እንዲህ ሲል ሰማሁ:- “ያለህና የነበርክ ታማኝ አምላካችን፣ እነዚህን ውሳኔዎች ስላስተላለፍክ አንተ ጻድቅ ነህ፤  ምክንያቱም የቅዱሳንንና የነቢያትን ደም አፍስሰዋል፤ አንተም ደም እንዲጠጡ ሰጥተሃቸዋል። ይህም ይገባቸዋል።”  እኔም መሠዊያው “አዎ፣ ሁሉን ቻይ የሆንከው ይሖዋ አምላክ ሆይ፣ የፍርድ ውሳኔዎችህ እውነትና ጽድቅ ናቸው” ሲል ሰማሁ።  አራተኛውም በሳህኑ ውስጥ ያለውን በፀሐይ ላይ አፈሰሰው፤ ፀሐይም ሰዎችን በእሳት እንድትለበልብ ተፈቀደላት።  ሰዎቹም በኃይለኛ ሙቀት ተለበለቡ፤ ሆኖም እነሱ በእነዚህ መቅሰፍቶች ላይ ሥልጣን ያለውን አምላክ ስም ተሳደቡ እንጂ ለእሱ ክብር ለመስጠት ንስሐ አልገቡም። 10  አምስተኛውም በሳህኑ ውስጥ ያለውን በአውሬው ዙፋን ላይ አፈሰሰው። መንግሥቱም በጨለማ ተዋጠ፤ እነሱም ከሥቃያቸው የተነሳ ምላሳቸውን ያኝኩ ጀመር፤ 11  ይሁንና ከሥቃያቸውና ከቁስላቸው የተነሳ የሰማይን አምላክ ተሳደቡ፤ ከሥራቸውም ንስሐ አልገቡም። 12  ስድስተኛውም በሳህኑ ውስጥ ያለውን በታላቁ የኤፍራጥስ ወንዝ ላይ አፈሰሰው፤ ከፀሐይ መውጫ ለሚመጡት ነገሥታት መንገድ እንዲዘጋጅላቸውም የወንዙ ውኃ ደረቀ። 13  እኔም እንቁራሪት የሚመስሉ በመንፈስ የተነገሩ ሦስት ርኩሳን ቃላት* ከዘንዶው አፍና ከአውሬው አፍ እንዲሁም ከሐሰተኛው ነቢይ አፍ ሲወጡ አየሁ። 14  እንዲያውም እነዚህ በአጋንንት መንፈስ መሪነት የተነገሩ ቃላት ናቸው፤ ተአምራዊ ምልክቶችም ይፈጽማሉ፤ እነሱም ሁሉን ቻይ ወደሆነው አምላክ ታላቅ የጦርነት ቀን ሊሰበስቧቸው ወደ ዓለም ነገሥታት ሁሉ ይወጣሉ። 15  “እነሆ፣ እንደ ሌባ እመጣለሁ። ራቁቱን እንዳይሄድና ሰዎች ኀፍረቱን እንዳያዩበት ነቅቶ የሚኖርና መደረቢያውን የሚጠብቅ ሰው ደስተኛ ነው።” 16  እነሱም ነገሥታቱን በዕብራይስጥ ሐር ማጌዶን* ወደሚባል ስፍራ ሰበሰቧቸው። 17  ሰባተኛውም በሳህኑ ውስጥ ያለውን በአየር ላይ አፈሰሰው። በዚህ ጊዜ ከቅዱሱ ስፍራ፣ ከዙፋኑ “ተፈጸመ!” የሚል ታላቅ ድምፅ ወጣ። 18  እንዲሁም መብረቅ፣ ድምፅና ነጎድጓድ ተከሰተ፤ ሰው በምድር ላይ መኖር ከጀመረበት ጊዜ አንስቶ ታይቶ የማይታወቅ ታላቅ የምድር ነውጥም ተከሰተ፤ የምድር ነውጡ መጠነ ሰፊና እጅግ ታላቅ ነበር። 19  ታላቂቱም ከተማ ለሦስት ተከፈለች፤ የብሔራት ከተሞችም ፈራረሱ፤ አምላክም የመዓቱን የቁጣ ወይን ጠጅ የያዘውን ጽዋ ይሰጣት ዘንድ ታላቂቱ ባቢሎንን አስታወሳት። 20  ደሴቶችም ሁሉ ሸሹ፤ ተራሮችም ሊገኙ አልቻሉም። 21  እያንዳንዱ አንድ ታላንት* የሚመዝን ታላቅ የበረዶ ድንጋይ ከሰማይ በሰዎች ላይ ወረደ፤ መቅሰፍቱ እጅግ ታላቅ ስለነበር ሰዎቹ ከበረዶው መቅሰፍት የተነሳ አምላክን ተሳደቡ።

የግርጌ ማስታወሻዎች

ራእይ 16:13 * ወይም፣ “ርኩሳን መናፍስት።”
ራእይ 16:16 * ወይም፣ “አርማጌዶን።” በዕብራይስጥ “የመጊዶ ተራራ” ማለት ነው።
ራእይ 16:21 * 20.4 ኪሎ ግራም ገደማ።