በቀጥታ ወደ ዋናው ጉዳይ ግባ

በቀጥታ ወደ ርዕስ ማውጫው ሂድ

የይሖዋ ምሥክሮች

ቋንቋ ምረጥ አማርኛ

ራእይ 13:1-18

13  ዘንዶውም በባሕር አሸዋ ላይ ቆመ። እኔም አሥር ቀንዶችና ሰባት ራሶች ያሉት አንድ አውሬ ከባሕር ሲወጣ አየሁ፤ በቀንዶቹም ላይ አሥር ዘውዶች የነበሩት ሲሆን በራሶቹ ላይ ግን አምላክን የሚሰድቡ ስሞች ነበሩት።  ያየሁትም አውሬ ነብር ይመስል ነበር፤ እግሮቹ ግን የድብ እግር፣ አፉ ደግሞ የአንበሳ አፍ ይመስል ነበር። ዘንዶውም ለአውሬው የራሱን ኃይልና የራሱን ዙፋን እንዲሁም ታላቅ ሥልጣን ሰጠው።  ከአውሬው ራሶችም አንዱ ለሞት የሚያደርስ በሚመስል ሁኔታ ታርዶ አየሁት፤ ሆኖም ለሞት የሚያደርሰው ቁስሉ ዳነ፤ ምድርም ሁሉ አውሬውን በአድናቆት ተከተለው።  ዘንዶው ለአውሬው ሥልጣን ስለሰጠውም ዘንዶውን አመለኩት፤ እንዲሁም “እንደ አውሬው ያለ ማን ነው? ከእሱ ጋርስ ማን ሊዋጋ ይችላል?” በማለት አውሬውን አመለኩ።  እሱም የትዕቢት ቃል የሚናገርበትና አምላክን የሚሳደብበት አፍ ተሰጠው፤ ደግሞም ለአርባ ሁለት ወር የፈለገውን እንዲያደርግ ሥልጣን ተሰጠው።  አምላክን በመሳደብ አፉን ከፈተ፤ እንዲሁም የአምላክን ስምና የአምላክን መኖሪያ ይኸውም በሰማይ የሚኖሩትን ለመሳደብ አፉን ከፈተ።  ቅዱሳኑን እንዲዋጋና ድል እንዲያደርጋቸውም ተፈቀደለት፤ ደግሞም በነገድ፣ በሕዝብ፣ በቋንቋና በብሔር ሁሉ ላይ ሥልጣን ተሰጠው።  በምድር ላይ የሚኖሩም ሁሉ ያመልኩታል፤ ዓለም ከተመሠረተበት ጊዜ ጀምሮ የአንዳቸውም ስም በታረደው በግ የሕይወት መጽሐፍ ጥቅልል ላይ አልሰፈረም።  ማንም ጆሮ ያለው ካለ ይስማ። 10  ማንም ሰው መማረክ ካለበት ይማረካል። ማንም በሰይፍ የሚገድል ካለ በሰይፍ መገደል አለበት። የቅዱሳን ጽናትና እምነት የሚያስፈልገው እንግዲህ እዚህ ላይ ነው። 11  ከዚያም ሌላ አውሬ ከምድር ሲወጣ አየሁ፤ እሱም እንደ በግ ሁለት ቀንዶች ነበሩት፤ ነገር ግን እንደ ዘንዶ መናገር ጀመረ። 12  በመጀመሪያው አውሬ ፊትም የመጀመሪያውን አውሬ ሥልጣን ሙሉ በሙሉ ይጠቀማል። ምድርና በምድር ላይ የሚኖሩ ለሞት የሚያበቃ ቁስሉ የዳነለትን የመጀመሪያውን አውሬ እንዲያመልኩ ያደርጋል። 13  በሰው ልጆች ፊት ከሰማይ ወደ ምድር እሳት እስኪያወርድ ድረስም ታላላቅ ምልክቶችን ይፈጽማል። 14  በምድር ላይ የሚኖሩ ሰዎች በሰይፍ ቆስሎ ለነበረው በኋላ ግን ላገገመው አውሬ ምስል እንዲሠሩ እያዘዘ በአውሬው ፊት እንዲፈጽማቸው በተፈቀዱለት ምልክቶች አማካኝነት በምድር ላይ የሚኖሩትን ያሳስታል። 15  እንዲሁም ለአውሬው ምስል እስትንፋስ እንዲሰጠው ተፈቀደለት፤ ይህም የሆነው የአውሬው ምስል መናገር እንዲችልና የአውሬውን ምስል በምንም ዓይነት ሁኔታ የማያመልኩት ሁሉ እንዲገደሉ እንዲያደርግ ነው። 16  ደግሞም ሰዎች ሁሉ ይኸውም ታናናሾችና ታላላቆች፣ ሀብታሞችና ድሆች እንዲሁም ነፃ ሰዎችና ባሪያዎች በቀኝ እጃቸው ወይም በግምባራቸው ላይ የሚደረግ ምልክት እንዲቀበሉ አስገደደ፤ 17  ይህም የሆነው ምልክቱ ይኸውም የአውሬው ስም ወይም የስሙ ቁጥር ካለው ሰው በስተቀር ማንም መግዛት ወይም መሸጥ እንዳይችል ነው። 18  ጥበብ የሚያስፈልገው እንግዲህ እዚህ ላይ ነው:- የማመዛዘን ችሎታ ያለው ሰው የአውሬውን ቁጥር ያስላ፤ ምክንያቱም ቁጥሩ የሰው ቁጥር ነው፤ ቁጥሩም ስድስት መቶ ስልሳ ስድስት ነው።

የግርጌ ማስታወሻዎች