በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ማቴዎስ 9:1-38

9  ከዚህ በኋላ ጀልባ በመሳፈር ባሕሩን ተሻግሮ ወደ ራሱ ከተማ መጣ።  በዚያም ሰዎች በአልጋ ላይ የተኛ አንድ ሽባ ሰው ወደ እሱ አመጡ። ኢየሱስም እምነታቸውን አይቶ ሽባውን “ልጄ ሆይ አይዞህ፤ ኃጢአትህ ይቅር ተብሎልሃል” አለው።  በዚህ ጊዜ አንዳንድ ጸሐፍት በልባቸው “ይህ ሰው እኮ አምላክን እየተዳፈረ ነው” አሉ።  ኢየሱስም ሐሳባቸውን አውቆ እንዲህ አለ:- “በልባችሁ ክፉ ነገር የምታስቡት ለምንድን ነው?  ለመሆኑ፣ ኃጢአትህ ይቅር ተብሏል ከማለትና ተነስተህ ሂድ ከማለት የቱ ይቀላል?  ይሁን እንጂ የሰው ልጅ በምድር ላይ ኃጢአትን ይቅር የማለት ሥልጣን እንዳለው ታውቁ ዘንድ” አላቸውና ሽባውን “ተነስ፣ አልጋህን ተሸክመህ ወደ ቤትህ ሂድ” አለው።  እሱም ተነስቶ ወደ ቤቱ ሄደ።  ሕዝቡም ይህን ሲያዩ በፍርሃት ተዋጡ፤ እንዲህ ያለ ሥልጣን ለሰው የሰጠውንም አምላክ አከበሩ።  ኢየሱስ ከዚያ ተነስቶ በመንገድ እያለፈ ሳለ ማቴዎስ የሚባል ሰው በቀረጥ መሰብሰቢያው ቦታ ተቀምጦ አየና “ተከታዬ ሁን” አለው። በዚህ ጊዜ ተነስቶ ተከተለው። 10  በኋላም በቤት ውስጥ በማዕድ ተቀምጦ ሳለ ብዙ ቀረጥ ሰብሳቢዎችና ኃጢአተኞች መጥተው ከኢየሱስና ከደቀ መዛሙርቱ ጋር ሊበሉ ተቀመጡ። 11  ፈሪሳውያን ግን ይህን ባዩ ጊዜ ደቀ መዛሙርቱን “መምህራችሁ ከቀረጥ ሰብሳቢዎችና ከኃጢአተኞች ጋር የሚበላው ለምንድን ነው?” ይሏቸው ጀመር። 12  ኢየሱስም የተናገሩትን ሰምቶ እንዲህ አላቸው:- “ሐኪም የሚያስፈልጋቸው ሕመምተኞች እንጂ ጤነኞች አይደሉም። 13  እንግዲያው ሄዳችሁ ‘እኔ የምፈልገው ምሕረትን እንጂ መሥዋዕትን አይደለም’ የሚለውን ቃል ትርጉም አስተውሉ። ምክንያቱም እኔ የመጣሁት ጻድቃንን ሳይሆን ኃጢአተኞችን ልጠራ ነው።” 14  ከዚያም የዮሐንስ ደቀ መዛሙርት ወደ እሱ መጥተው “እኛና ፈሪሳውያን ዘወትር ስንጾም የአንተ ደቀ መዛሙርት ግን የማይጾሙት ለምንድን ነው?” ብለው ጠየቁት። 15  በዚህ ጊዜ ኢየሱስ እንዲህ አላቸው:- “የሙሽራው ጓደኞች ሙሽራው ከእነሱ ጋር እስካለ ድረስ የሚጾሙበት ምን ምክንያት አለ? ሆኖም ሙሽራው ከእነሱ የሚወሰድበት ጊዜ ይመጣል፤ በዚያን ጊዜ ይጾማሉ። 16  በአሮጌ ልብስ ላይ ውኃ ያልነካው አዲስ ጨርቅ የሚጥፍ ሰው የለም፤ ምክንያቱም አዲሱ ጨርቅ ሲሸበሸብ ልብሱን በኃይል ስለሚስበው ቀዳዳው የባሰ ይሰፋል። 17  ደግሞም ሰዎች ባረጀ አቁማዳ አዲስ የወይን ጠጅ አያስቀምጡም፤ እንዲህ ቢያደርጉ ግን አቁማዳው ይፈነዳል፤ ወይኑ ይፈሳል፣ አቁማዳውም ከጥቅም ውጭ ይሆናል። ሰዎች ግን አዲስ የወይን ጠጅ የሚያስቀምጡት በአዲስ አቁማዳ ነው፤ በመሆኑም ሁለቱም ሳይበላሹ ይቆያሉ።” 18  ይህን እየነገራቸው ሳለ አንድ የምኩራብ አለቃ ወደ እሱ መጥቶ እየሰገደለት “እስካሁን ልጄ ሳትሞት አትቀርም፤ ቢሆንም መጥተህ እጅህን ጫንባት፣ ዳግመኛም ሕያው ትሆናለች” አለው። 19  ኢየሱስም ተነስቶ ተከተለው፤ ደቀ መዛሙርቱም አብረው ሄዱ። 20  በዚህ ጊዜ ለአሥራ ሁለት ዓመት ደም ይፈሳት የነበረች አንዲት ሴት ከኋላ መጥታ የልብሱን ዘርፍ ነካች፤ 21  ምክንያቱም “ልብሱን ብቻ እንኳ ብነካ እድናለሁ” ብላ በልቧ ታስብ ነበር። 22  ኢየሱስ ወደኋላ ዞር ብሎ አያትና “ልጄ ሆይ አይዞሽ፣ እምነትሽ አድኖሻል” አለ። ከዚያች ሰዓት ጀምሮ ሴትየዋ ዳነች። 23  ኢየሱስ ወደ ምኩራብ አለቃው ቤት ሲደርስ የሐዘን እምቢልታ ነፊዎቹን እንዲሁም የሚንጫጫውንና የሚተራመሰውን ሕዝብ አይቶ 24  “እስቲ አንዴ ውጡ፣ ልጅቷ ተኝታለች እንጂ አልሞተችም” አለ። በዚህ ጊዜ በማፌዝ ይስቁበት ጀመር። 25  ሕዝቡ ወደ ውጭ እንዲወጣ ከተደረገ በኋላ ወደ ውስጥ ገብቶ እጇን ያዛት፤ ልጅቷም ተነሳች። 26  ይህም ነገር በአካባቢው ሁሉ በሰፊው ተወራ። 27  ኢየሱስ ከዚያ ተነስቶ ሲሄድ ሁለት ዓይነ ስውሮች “የዳዊት ልጅ ሆይ፣ ምሕረት አድርግልን” ብለው እየጮኹ ተከተሉት። 28  ወደ ቤት ከገባ በኋላ ዓይነ ስውሮቹ ወደ እሱ መጡ፤ ኢየሱስም “ይህን ማድረግ እንደምችል ታምናላችሁ?” ሲል ጠየቃቸው። እነሱም “አዎን ጌታ ሆይ” ብለው መለሱለት። 29  ከዚያም ዓይናቸውን ዳስሶ “እንደ እምነታችሁ ይሁንላችሁ” አላቸው። 30  ዓይናቸውም በራ። ኢየሱስም “ማንም ሰው ስለዚህ ጉዳይ እንዳያውቅ ተጠንቀቁ” ሲል አጥብቆ አዘዛቸው። 31  እነሱ ግን ከወጡ በኋላ በአካባቢው ሁሉ ስለ እሱ በይፋ አወሩ። 32  እነሱም ሲወጡ፣ ሰዎች ጋኔን ያደረበት ዲዳ ሰው ወደ እሱ አመጡ፤ 33  ጋኔኑን ካስወጣለት በኋላ ዲዳው ተናገረ። ሕዝቡም እጅግ ተደንቀው “በእስራኤል ምድር እንዲህ ያለ ነገር ታይቶ አያውቅም” አሉ። 34  ፈሪሳውያን ግን “አጋንንትን የሚያስወጣው በአጋንንት አለቃ ነው” ይሉ ጀመር። 35  ኢየሱስም በምኩራቦቻቸው እያስተማረ፣ የመንግሥቱን ምሥራች እየሰበከ እንዲሁም ማንኛውንም ዓይነት በሽታና ማንኛውንም ዓይነት ሕመም እየፈወሰ በየከተማውና በየመንደሩ ይዞር ጀመር። 36  ሕዝቡንም ባየ ጊዜ እረኛ እንደሌላቸው በጎች ተገፈውና ተጥለው ስለነበር እጅግ አዘነላቸው። 37  ከዚያም ደቀ መዛሙርቱን እንዲህ አላቸው:- “በእርግጥ አዝመራው ብዙ ነው፤ ሠራተኞቹ ግን ጥቂት ናቸው። 38  ስለዚህ የመከሩ ሥራ ጌታ ወደ መከር ሥራው ሠራተኞች እንዲልክ ለምኑት።”

የግርጌ ማስታወሻዎች