በቀጥታ ወደ ዋናው ጉዳይ ግባ

በቀጥታ ወደ ርዕስ ማውጫው ሂድ

የይሖዋ ምሥክሮች

ቋንቋ ምረጥ አማርኛ

ማቴዎስ 8:1-34

8  ከተራራው ከወረደ በኋላ እጅግ ብዙ ሕዝብ ተከተለው።  በዚህ ጊዜ በሥጋ ደዌ የተያዘ አንድ ሰው ወደ እሱ መጥቶ እየሰገደለት “ጌታ ሆይ፣ ብትፈልግ እኮ ልታነጻኝ ትችላለህ” አለው።  ኢየሱስም እጁን ዘርግቶ ዳሰሰውና “እፈልጋለሁ፣ ንጻ” አለው። ወዲያውም ከሥጋ ደዌው ነጻ።  ከዚያም ኢየሱስ “ለማንም እንዳትናገር ተጠንቀቅ፤ ነገር ግን ሄደህ ራስህን ለካህን አሳይ፤ ለእነሱም ምሥክር እንዲሆን ሙሴ ያዘዘውን መባ አቅርብ” አለው።  ወደ ቅፍርናሆም በገባ ጊዜ አንድ የመቶ አለቃ ወደ እሱ ቀርቦ ለመነው፤  “ጌታ ሆይ፣ አገልጋዬ ሽባ ሆኖ ቤት ተኝቷል፤ እጅግም እየተሠቃየ ነው” አለው።  እሱም “መጥቼ እፈውሰዋለሁ” አለው።  የመቶ አለቃውም መልሶ እንዲህ አለ:- “ጌታ ሆይ፣ አንተ ወደ ቤቴ ትገባ ዘንድ የሚገባኝ ሰው አይደለሁም፤ ነገር ግን እዚሁ ሆነህ ብቻ አንድ ቃል ተናገር፣ አገልጋዬም ይፈወሳል።  እኔ ራሴ የምታዘዛቸው የበላይ አዛዦች አሉ፤ ለእኔም የሚታዘዙ የበታች ወታደሮች አሉኝ፤ አንዱን ‘ሂድ!’ ስለው ይሄዳል፣ ሌላውንም ‘ና!’ ስለው ይመጣል፤ ባሪያዬንም ‘ይህን አድርግ!’ ስለው ያደርጋል።” 10  ኢየሱስ ይህን ሲሰማ በጣም ተገርሞ ይከተሉት ለነበሩት እንዲህ አላቸው:- “እውነት እላችኋለሁ፣ በእስራኤል ውስጥ እንዲህ ዓይነት ታላቅ እምነት ያለው አንድም ሰው አላገኘሁም። 11  ነገር ግን እላችኋለሁ፣ ብዙዎች ከምሥራቅና ከምዕራብ ይመጣሉ፤ በመንግሥተ ሰማያትም ከአብርሃም፣ ከይስሐቅና ከያዕቆብ ጋር በማዕድ ይቀመጣሉ። 12  የመንግሥተ ሰማያት ልጆች ግን፣ ውጭ ወዳለው ጨለማ ይጣላሉ። በዚያም ያለቅሳሉ፣ በሐዘንም ጥርሳቸውን ያፋጫሉ።” 13  ከዚያም ኢየሱስ የመቶ አለቃውን “ሂድ፤ እንደ እምነትህ ይሁንልህ” አለው። አገልጋዩም በዚያች ሰዓት ተፈወሰ። 14  ኢየሱስ ወደ ጴጥሮስ ቤት ሲመጣ የጴጥሮስ አማት ትኩሳት ይዟት ተኝታ አገኛት። 15  እጇንም ሲዳስሳት ትኩሳቱ ለቀቃት፤ ተነስታም ታገለግለው ጀመር። 16  ከመሸ በኋላ ሰዎች አጋንንት ያደሩባቸውን ብዙ ሰዎች ወደ እሱ አመጡ፤ መናፍስቱንም በአንድ ቃል ያስወጣ ነበር፣ በጠና የታመሙትንም ሁሉ ፈወሰ፤ 17  ይህም የሆነው በነቢዩ ኢሳይያስ “እሱ ሕመማችንን ተቀበለ፣ ደዌያችንንም ተሸከመ” ተብሎ የተነገረው ይፈጸም ዘንድ ነው። 18  ኢየሱስ በዙሪያው ብዙ ሰዎች እንደተሰበሰቡ ባየ ጊዜ ደቀ መዛሙርቱ ወደ ባሕሩ ማዶ እንዲሻገሩ አዘዘ። 19  በዚህ ጊዜ ከጸሐፍት አንዱ መጥቶ “መምህር፣ ወደምትሄድበት ሁሉ እከተልሃለሁ” አለው። 20  ኢየሱስ ግን “ቀበሮዎች ጉድጓድ፣ የሰማይ ወፎችም መስፈሪያ አላቸው፤ የሰው ልጅ ግን ራሱን እንኳ የሚያሳርፍበት ቦታ የለውም” አለው። 21  ከደቀ መዛሙርቱም አንዱ “ጌታ ሆይ፣ በመጀመሪያ ሄጄ አባቴን እንድቀብር ፍቀድልኝ” አለው። 22  ኢየሱስም “አንተ እኔን መከተልህን ቀጥል፤ ሙታን ሙታናቸውን እንዲቀብሩ ተዋቸው” አለው። 23  ከዚያም ጀልባ ላይ ሲሳፈር ደቀ መዛሙርቱ ተከተሉት። 24  በጉዞ ላይ ሳሉ በባሕሩ ላይ ኃይለኛ ማዕበል ተነስቶ ጀልባዋን ሊያሰጥማት ደረሰ፤ እሱ ግን ተኝቶ ነበር። 25  እነሱም ወደ እሱ ቀርበው ቀሰቀሱትና “ጌታ ሆይ፣ ማለቃችን እኮ ነው፣ አድነን!” አሉት። 26  እሱ ግን “እናንተ እምነት የጎደላችሁ፣ ለምን ትሸበራላችሁ?” አላቸው። ከዚያም ተነስቶ ነፋሱንና ባሕሩን ገሠጸ፤ ታላቅ ጸጥታም ሰፈነ። 27  ሰዎቹም ተደንቀው “ነፋስና ባሕር እንኳ የሚታዘዙለት ይህ እንዴት ያለ ሰው ነው?” አሉ። 28  ወደ ማዶም ወደ ገዳሬኖስ አገር በደረሰ ጊዜ አጋንንት ያደሩባቸው ሁለት ሰዎች ከመቃብር ቦታ ወጥተው ተገናኙት። ሰዎቹ በጣም ኃይለኛ ከመሆናቸው የተነሳ ማንም ሰው በዚያ ለማለፍ አይደፍርም ነበር። 29  እነሱም “የአምላክ ልጅ ሆይ፣ እኛ ከአንተ ጋር ምን ጉዳይ አለን? የመጣኸው ጊዜው ሳይደርስ ልታሠቃየን ነው?” ብለው ጮኹ። 30  ከእነሱ ራቅ ብሎ የብዙ አሳማዎች መንጋ ተሰማርቶ ነበር። 31  አጋንንቱም “የምታስወጣን ከሆነ ወደ አሳማዎቹ መንጋ ስደደን” ብለው ይለምኑት ጀመር። 32  እሱም “ሂዱ!” አላቸው። እነሱም ወጥተው ወደ አሳማዎቹ ሄዱ፤ የአሳማውም መንጋ እንዳለ ከገደሉ አፋፍ እየተንደረደረ በመውረድ ባሕሩ ውስጥ ሰጥሞ አለቀ። 33  እረኞቹ ግን ሸሽተው ወደ ከተማው በመሄድ አጋንንት ባደሩባቸው ሰዎች ላይ የተፈጸመውን ጨምሮ የሆነውን ነገር ሁሉ አወሩ። 34  ከተማው ሁሉ ኢየሱስን ሊገናኘው ወጣ፤ ሰዎቹም ባዩት ጊዜ ከአገራቸው እንዲሄድ አጥብቀው ለመኑት።

የግርጌ ማስታወሻዎች