በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ማቴዎስ 7:1-29

7  “እንዳይፈረድባችሁ በሌሎች ላይ መፍረዳችሁን ተዉ፤  በምትፈርዱት ፍርድ ይፈረድባችኋል፤ በምትሰፍሩበት መስፈሪያም ይሰፍሩላችኋል።  ታዲያ በራስህ ዓይን ውስጥ ያለውን ግንድ ትተህ በወንድምህ ዓይን ውስጥ ያለውን ጉድፍ ለምን ታያለህ?  ወይም በራስህ ዓይን ውስጥ ግንድ እያለ ወንድምህን ‘ከዓይንህ ውስጥ ጉድፍ ላውጣልህ’ እንዴት ትለዋለህ?  አንተ ግብዝ! በመጀመሪያ በራስህ ዓይን ውስጥ ያለውን ግንድ አውጣ፤ ከዚያም በወንድምህ ዓይን ውስጥ ያለውን ጉድፍ ለማውጣት አጥርተህ ማየት ትችላለህ።  “በእግራቸው እንዳይረጋግጡት፣ ተመልሰውም እንዳይቦጭቋችሁ ቅዱስ የሆነውን ነገር ለውሾች አትስጡ እንዲሁም ዕንቁዎቻችሁን በአሳማ ፊት አትጣሉ።  “ደጋግማችሁ ለምኑ፣ ይሰጣችኋል፤ ሳታቋርጡ ፈልጉ፣ ታገኛላችሁ፤ ደጋግማችሁ አንኳኩ፣ ይከፈትላችኋል።  የሚለምን ሁሉ ይሰጠዋል፤ የሚፈልግ ሁሉ ያገኛል፤ ለሚያንኳኳም ሁሉ ይከፈትለታል።  ደግሞስ ከመካከላችሁ ልጁ ዳቦ ቢለምነው ድንጋይ የሚሰጠው አለ? 10  ወይስ ዓሣ ቢለምነው እባብ ይሰጠዋል? 11  ታዲያ እናንተ ክፉዎች ሆናችሁ ሳላችሁ ለልጆቻችሁ መልካም ስጦታ መስጠት ካወቃችሁ በሰማያት ያለው አባታችሁ ለሚለምኑት እንዴት መልካም ነገር አብልጦ አይሰጣቸውም! 12  “እንግዲህ ሰዎች እንዲያደርጉላችሁ የምትፈልጉትን ነገር ሁሉ እናንተም እንደዚሁ ልታደርጉላቸው ይገባል፤ ሕግም ነቢያትም የሚሉት ይህንኑ ነው። 13  “በጠባቡ በር ግቡ፤ ምክንያቱም ወደ ጥፋት የሚወስደው መንገድ ትልቅና ሰፊ ነው፤ በዚያ የሚሄዱም ብዙዎች ናቸው። 14  ወደ ሕይወት የሚያስገባው በር ግን ጠባብ መንገዱም ቀጭን ነው፤ የሚያገኙትም ጥቂቶች ናቸው። 15  “በውስጣቸው ነጣቂ ተኩላዎች ሆነው ሳሉ የበግ ለምድ ለብሰው ወደ እናንተ ከሚመጡ ሐሰተኛ ነቢያት ተጠንቀቁ። 16  በፍሬያቸው ታውቋቸዋላችሁ። ሰዎች ከእሾህ ወይን፣ ከአሜኬላስ በለስ ይለቅማሉ? 17  በተመሳሳይም ጥሩ ዛፍ ሁሉ መልካም ፍሬ ያፈራል፤ የበሰበሰ ዛፍ ሁሉ ግን የማይጠቅም ፍሬ ያፈራል፤ 18  ጥሩ ዛፍ የማይጠቅም ፍሬ ሊያፈራ፣ የበሰበሰ ዛፍ ደግሞ መልካም ፍሬ ሊያፈራ አይችልም። 19  መልካም ፍሬ የማያፈራ ዛፍ ሁሉ ተቆርጦ ወደ እሳት ይጣላል። 20  ስለዚህ እነዚህን ሰዎች በፍሬያቸው ታውቋቸዋላችሁ። 21  “‘ጌታ ሆይ፣ ጌታ ሆይ’ የሚለኝ ሁሉ ወደ መንግሥተ ሰማያት አይገባም፤ ወደ መንግሥተ ሰማያት የሚገባው በሰማያት ያለውን የአባቴን ፈቃድ የሚያደርግ ነው። 22  በዚያ ቀን ብዙዎች ‘ጌታ ሆይ፣ ጌታ ሆይ፣ በስምህ ትንቢት አልተናገርንም? በስምህ አጋንንትን አላወጣንም? በስምህስ ብዙ ተአምራት አላደረግንም?’ ይሉኛል። 23  እኔም በዚያ ጊዜ ‘ቀድሞውንም አላውቃችሁም! እናንተ ዓመፀኞች፣ ከእኔ ራቁ’ እላቸዋለሁ። 24  “ስለዚህ ይህን ቃሌን ሰምቶ በተግባር የሚያውል ሁሉ ቤቱን በዐለት ላይ የሠራን አስተዋይ ሰው ይመስላል። 25  ዶፍ ወረደ፣ ጎርፍ ጎረፈ፣ ነፋስም ነፈሰ፤ ያንንም ቤት በኃይል መታው፤ ሆኖም ቤቱ በዐለት ላይ ስለተመሠረተ አልተደረመሰም። 26  በተጨማሪም ይህን ቃሌን ሰምቶ በተግባር የማያውል ሁሉ ቤቱን በአሸዋ ላይ የሠራን ሞኝ ሰው ይመስላል። 27  ዶፍ ወረደ፣ ጎርፍ ጎረፈ፣ ነፋስም ነፈሰ፤ ያንንም ቤት በኃይል መታው፤ ቤቱም ተደረመሰ፣ እንዳልነበረም ሆነ።” 28  ኢየሱስ ንግግሩን በጨረሰ ጊዜ ሕዝቡ በትምህርት አሰጣጡ እጅግ ተደነቁ፤ 29  ምክንያቱም የሚያስተምራቸው እንደ ጻፎቻቸው ሳይሆን እንደ ባለሥልጣን ነበር።

የግርጌ ማስታወሻዎች