በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ማቴዎስ 4:1-25

4  ከዚህ በኋላ ኢየሱስ በዲያብሎስ ይፈተን ዘንድ መንፈስ ወደ ምድረ በዳ መራው።  አርባ ቀንና አርባ ሌሊት ከጾመ በኋላ ተራበ።  ፈታኙም ቀርቦ “እስቲ የአምላክ ልጅ ከሆንክ እነዚህ ድንጋዮች ዳቦ እንዲሆኑ እዘዝ” አለው።  እሱ ግን መልሶ “‘ሰው ከይሖዋ አፍ በሚወጣ ቃል ሁሉ እንጂ በምግብ ብቻ ሊኖር አይችልም’ ተብሎ ተጽፏል” አለው።  ከዚያም ዲያብሎስ ወደ ቅድስቲቱ ከተማ ከወሰደው በኋላ በቤተ መቅደሱ ግንብ አናት ላይ አቁሞ  እንዲህ አለው:- “‘መላእክቱን ስለ አንተ ያዛል፤ እነሱም እግርህን ፈጽሞ እንቅፋት እንዳይመታው በእጃቸው ወደ ላይ ያነሱሃል’ ተብሎ ስለተጻፈ እስቲ የአምላክ ልጅ ከሆንክ ራስህን ወደ ታች ወርውር።”  ኢየሱስም “‘አምላክህን ይሖዋን አትፈታተነው’ ተብሎም ተጽፏል” አለው።  እንደገናም ዲያብሎስ በጣም ረጅም ወደሆነ ተራራ ወስዶ የዓለምን መንግሥታት ሁሉና ክብራቸውን አሳየው፤  ከዚያም “አንድ ጊዜ ተደፍተህ ብታመልከኝ እነዚህን ሁሉ እሰጥሃለሁ” አለው። 10  በዚህ ጊዜ ኢየሱስ “አንተ ሰይጣን፣ ከፊቴ ራቅ! ‘ይሖዋ አምላክህን ብቻ አምልክ፤ ለእሱም ብቻ ቅዱስ አገልግሎት አቅርብ’ ተብሎ ተጽፏልና” አለው። 11  ከዚያም ዲያብሎስ ትቶት ሄደ፤ መላእክትም መጥተው ያገለግሉት ጀመር። 12  ኢየሱስ፣ ዮሐንስ እንደታሰረ ሲሰማ ወደ ገሊላ ተመለሰ። 13  ከዚያም ከናዝሬት ወጥቶ በዛብሎንና በንፍታሌም አውራጃዎች፣ በባሕሩ አጠገብ ወደምትገኘው ወደ ቅፍርናሆም መጥቶ መኖር ጀመረ። 14  ይህም የሆነው በነቢዩ ኢሳይያስ የተነገረው የሚከተለው ቃል ይፈጸም ዘንድ ነው:- 15  “በዮርዳኖስ ማዶ በባሕሩ አጠገብ ያላችሁ የዛብሎን ምድር፣ የንፍታሌም ምድርና የአሕዛብ ገሊላ ሆይ! 16  በጨለማ ውስጥ ያለ ሕዝብ ታላቅ ብርሃን አየ፤ በሞት ጥላ ምድር ላሉም ብርሃን ወጣላቸው።” 17  ከዚያን ጊዜ አንስቶ ኢየሱስ “መንግሥተ ሰማያት ስለቀረበ ንስሐ ግቡ” እያለ ይሰብክ ጀመር። 18  በገሊላ ባሕር አጠገብ ሲሄድ ሁለት ወንድማማቾች ማለትም ጴጥሮስ ተብሎ የሚጠራው ስምዖንና ወንድሙ እንድርያስ ዓሣ አጥማጆች ስለነበሩ መረባቸውን ወደ ባሕሩ ሲጥሉ አየ። 19  እሱም “ኑ፣ ተከተሉኝ፤ ሰዎችን አጥማጆች አደርጋችኋለሁ” አላቸው። 20  ወዲያውኑም መረባቸውን ትተው ተከተሉት። 21  ከዚያ እልፍ እንዳለም ሌሎች ሁለት ወንድማማቾች ማለትም የዘብዴዎስ ልጅ ያዕቆብና ወንድሙ ዮሐንስ ከአባታቸው ከዘብዴዎስ ጋር በጀልባ ላይ ሆነው መረባቸውን ሲጠግኑ አይቶ ጠራቸው። 22  ወዲያውኑም ጀልባዋንና አባታቸውን ትተው ተከተሉት። 23  ከዚያም በምኩራቦቻቸው እያስተማረና የመንግሥቱን ምሥራች እየሰበከ እንዲሁም በሕዝቡ መካከል ያለውን ማንኛውንም ዓይነት በሽታና ማንኛውንም ዓይነት ሕመም እየፈወሰ በመላዋ ገሊላ ተዘዋወረ። 24  ስለ እሱም የሚገልጸው ወሬ በመላዋ ሶርያ ተዳረሰ፤ ሰዎችም በጠና የታመሙትን፣ በተለያየ በሽታና ከባድ ሕመም የሚሠቃዩትን እንዲሁም ጋኔን የያዛቸውን፣ የሚጥል በሽታ ያለባቸውንና ሽባዎችን ሁሉ ወደ እሱ አመጡ፤ እሱም ፈወሳቸው። 25  ከዚህም የተነሳ ከገሊላ፣ ከዲካፖሊስ፣* ከኢየሩሳሌም፣ ከይሁዳና ከዮርዳኖስ ማዶ የመጡ እጅግ ብዙ ሰዎች ተከተሉት።

የግርጌ ማስታወሻዎች

ማቴ 4:25 * ወይም፣ “አሥሩ ከተሞች።”