በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ማቴዎስ 28:1-20

28  ከሰንበት ቀን በኋላ በሳምንቱ የመጀመሪያ ቀን ጎህ ሲቀድ መግደላዊት ማርያምና ሌላዋ ማርያም መቃብሩን ለማየት መጡ።  እነሆም የይሖዋ መልአክ ከሰማይ ስለወረደ ታላቅ የምድር መናወጥ ተከሰተ፤ መልአኩም ቀርቦ ድንጋዩን አንከባለለውና በላዩ ተቀመጠ።  መልኩ እንደ መብረቅ ያበራ ነበር፤ ልብሱም እንደ በረዶ ነጭ ነበር።  ጠባቂዎቹ እሱን ከመፍራታቸው የተነሳ ተንቀጠቀጡ፤ እንደ በድንም ሆኑ።  ሆኖም መልአኩ ሴቶቹን እንዲህ አላቸው:- “እናንተ አትፍሩ፣ የተሰቀለውን ኢየሱስን እየፈለጋችሁ እንዳላችሁ አውቃለሁ።  አስቀድሞ እንደተናገረው ስለተነሳ እዚህ የለም። ኑና አስከሬኑ አርፎበት የነበረውን ስፍራ እዩ።  ስለሆነም ፈጥናችሁ ሂዱና ለደቀ መዛሙርቱ ከሞት እንደተነሳ ንገሯቸው፤ እንዲሁም ‘ቀድሟችሁ ወደ ገሊላ ይሄዳል፤ እዚያም ታዩታላችሁ’ በሏቸው። እነሆ ነግሬአችኋለሁ።”  ስለዚህ ሴቶቹ በፍርሃትና በታላቅ ደስታ ተውጠው ከመታሰቢያ መቃብሩ በፍጥነት በመውጣት ወሬውን ለደቀ መዛሙርቱ ለመንገር እየሮጡ ሄዱ።  ወዲያውም ኢየሱስ አገኛቸውና “ሰላም ለእናንተ ይሁን!” አላቸው። እነሱም ወደ እሱ ቀረቡና እግሮቹን ይዘው ሰገዱለት። 10  ከዚያም ኢየሱስ “አትፍሩ! ሂዱና ወደ ገሊላ እንዲሄዱ ለወንድሞቼ ንገሯቸው፤ እዚያም ያዩኛል” አላቸው። 11  ሴቶቹ በመንገድ ላይ ሳሉ ከጠባቂዎቹ አንዳንዶቹ ወደ ከተማ ሄደው የሆነውን ነገር ሁሉ ለካህናት አለቆቹ ነገሯቸው። 12  የካህናት አለቆቹም ከሽማግሌዎቹ ጋር ተሰብስበው ከተማከሩ በኋላ ለወታደሮቹ በቂ የብር ሳንቲሞች* በመስጠት 13  እንዲህ አሏቸው:- “‘ደቀ መዛሙርቱ ሌሊት መጥተው ተኝተን ሳለ ሰረቁት’ በሉ። 14  ወሬው ወደ አገረ ገዥው ጆሮ ከደረሰ እሱን አሳምነን ምንም ችግር እንዳይደርስባችሁ እናደርጋለን።” 15  እነሱም የብር ሳንቲሞቹን ተቀብለው እንደታዘዙት አደረጉ፤ ይህም ወሬ እስከ ዛሬ ድረስ በአይሁዶች ዘንድ በስፋት ይወራል። 16  ይሁንና አሥራ አንዱ ደቀ መዛሙርት በገሊላ ወደሚገኘው፣ ኢየሱስ ወዳመለከታቸው ተራራ ሄዱ፤  17  ባዩትም ጊዜ ሰገዱለት፤ አንዳንዶች ግን ተጠራጠሩ። 18  ኢየሱስም ቀረበና እንዲህ አላቸው:- “ሥልጣን ሁሉ በሰማይና በምድር ተሰጥቶኛል። 19  ስለዚህ ሂዱና ከሁሉም ብሔራት ሰዎችን በአብ፣ በወልድና በመንፈስ ቅዱስ ስም እያጠመቃችኋቸው ደቀ መዛሙርት አድርጓቸው፤ 20  ያዘዝኳችሁንም ሁሉ እንዲጠብቁ አስተምሯቸው። እነሆም እኔ እስከ ሥርዓቱ መደምደሚያ ድረስ ሁልጊዜ ከእናንተ ጋር ነኝ።”

የግርጌ ማስታወሻዎች

ማቴ 28:12 * ብር ከተባለው ማዕድን የተሠራ ሳንቲም።