በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ማቴዎስ 27:1-66

27  በነጋ ጊዜም የካህናት አለቆችና የሕዝቡ ሽማግሌዎች በሙሉ ኢየሱስን ለመግደል ተማከሩ።  ካሰሩትም በኋላ ወስደው ለአገረ ገዥው ለጲላጦስ አስረከቡት።  አሳልፎ የሰጠው ይሁዳም እንደተፈረደበት ባየ ጊዜ ጸጸት ተሰምቶት ሠላሳዎቹን የብር ሳንቲሞች* ለካህናት አለቆቹና ለሽማግሌዎቹ መልሶ በመስጠት  “ጻድቅ ሰው* አሳልፌ በመስጠቴ በድያለሁ” አለ። እነሱም “ታዲያ እኛ ምን አገባን? የራስህ ጉዳይ ነው!” አሉት።  ስለዚህ የብር ሳንቲሞቹን ቤተ መቅደሱ ውስጥ በትኖ ወጣ፤ ሄዶም ታንቆ ሞተ።  የካህናት አለቆቹ ግን የብር ሳንቲሞቹን ወስደው “ይህ ገንዘብ የደም ዋጋ ስለሆነ ግምጃ ቤት ውስጥ ማስገባት አይፈቀድም” አሉ።  ከተመካከሩም በኋላ ለእንግዶች የመቃብር ቦታ እንዲሆን የሸክላ ሠሪውን መሬት ገዙበት።  በመሆኑም ያ መሬት እስከ ዛሬ ድረስ “የደም መሬት” ተብሎ ይጠራል።  በዚህ ጊዜ በነቢዩ ኤርምያስ እንዲህ ተብሎ የተነገረው ተፈጸመ:- “ከእስራኤል ልጆች አንዳንዶቹ የገመቱትን፣ ለሰውየው የወጣውን የዋጋ ተመን ሠላሳ የብር ሳንቲሞች ወሰዱ፤ 10  ይሖዋ ባዘዘኝም መሠረት ሳንቲሞቹን ለሸክላ ሠሪው መሬት ከፈሉ።” 11  ኢየሱስም አገረ ገዥው ፊት ቀረበ፣ ገዥውም “አንተ የአይሁድ ንጉሥ ነህ?” ሲል ጠየቀው። ኢየሱስም መልሶ “አንተው ራስህ ተናገርከው” አለው። 12  የካህናት አለቆቹና ሽማግሌዎቹ ሲከሱት ግን ምንም መልስ አልሰጠም። 13  በዚህ ጊዜ ጲላጦስ “በስንት ነገር እየመሠከሩብህ እንዳሉ አትሰማም?” አለው። 14  እሱ ግን አገረ ገዥው እጅግ እስኪደነቅ ድረስ አንዲት ቃል እንኳ አልመለሰለትም። 15  አገረ ገዥው ሁልጊዜ በዚህ በዓል ወቅት ሕዝቡ እንዲፈታላቸው የሚፈልጉትን እስረኛ የመፍታት ልማድ ነበረው።  16  በዚሁ ጊዜ በዓመፀኝነቱ የታወቀ በርባን የተባለ እስረኛ ነበራቸው። 17  በመሆኑም ሕዝቡ በተሰበሰቡ ጊዜ ጲላጦስ “ማንን እንድፈታላችሁ ትፈልጋላችሁ? በርባንን ወይስ ክርስቶስ የሚባለውን ኢየሱስን?” አላቸው። 18  ይህን ያለው አሳልፈው የሰጡት በቅናት ተነሳስተው እንደሆነ ያውቅ ስለነበር ነው። 19  በተጨማሪም በፍርድ ወንበር ላይ ተቀምጦ ሳለ ሚስቱ “በእሱ ምክንያት ዛሬ በሕልም ብዙ ስለተሠቃየሁ በዚያ ጻድቅ ሰው ላይ ምንም ነገር እንዳታደርግ” የሚል መልእክት ላከችበት። 20  ሆኖም የካህናት አለቆቹና ሽማግሌዎቹ በርባን እንዲፈታላቸው ኢየሱስ ግን እንዲገደል ይጠይቁ ዘንድ ሕዝቡን አግባቡ። 21  አገረ ገዥውም መልሶ “ከሁለቱ ማንን እንድፈታላችሁ ትፈልጋላችሁ?” አላቸው። እነሱም “በርባንን” አሉ። 22  ጲላጦስም “እንግዲያው ክርስቶስ የሚባለውን ኢየሱስን ምን ባደርገው ይሻላል?” አላቸው። ሁሉም “ይሰቀል!” አሉ። 23  እሱም “ለምን? ምን ያጠፋው ነገር አለ?” አላቸው። እነሱ ግን “ይሰቀል!” እያሉ የባሰ መጮኻቸውን ቀጠሉ። 24  ጲላጦስ ነገሩ ምንም ጥቅም እንዳላስገኘ ከዚህ ይልቅ ሁከት እያስነሳ መሆኑን በመገንዘብ “ከዚህ ሰው ደም ንጹሕ ነኝ። ከዚህ በኋላ ተጠያቂ የምትሆኑት እናንተ ናችሁ” በማለት ውኃ አምጥቶ በሕዝቡ ፊት እጁን ታጠበ። 25  በዚህ ጊዜ ሕዝቡ ሁሉ መልሰው “ደሙ በእኛና በልጆቻችን ላይ ይሁን” አሉ። 26  ከዚያም በርባንን ፈታላቸው፤ ኢየሱስን ግን ካስገረፈው በኋላ እንዲሰቀል አሳልፎ ሰጠው። 27  በዚህ ጊዜ የአገረ ገዥው ወታደሮች ኢየሱስን ወደ ገዥው ቤተ መንግሥት ወሰዱት፤ ሠራዊቱንም ሁሉ በዙሪያው አሰባሰቡ። 28  ልብሱንም ገፈው ቀይ መጎናጸፊያ አለበሱት፤ 29  የእሾህ አክሊል ጎንጉነውም በራሱ ላይ ደፉበት፣ በቀኝ እጁም የመቃ ዘንግ አስያዙት። በፊቱ ተንበርክከውም “የአይሁድ ንጉሥ ሆይ፣ ሰላም ለአንተ ይሁን!” እያሉ አሾፉበት። 30  ደግሞም ተፉበት፣ መቃውንም ወስደው ራሱን ይመቱት ጀመር። 31  በመጨረሻም ሲያፌዙበት ከቆዩ በኋላ መጎናጸፊያውን አውልቀው የራሱን መደረቢያዎች አለበሱት፤ ከዚያም ሊሰቅሉት ይዘውት ሄዱ። 32  እየሄዱም ሳሉ የቀሬና ተወላጅ የሆነ ስምዖን የተባለ ሰው አገኙ። ሰውየውንም ኢየሱስ የሚሰቀልበትን የመከራ እንጨት* እንዲሸከም አስገደዱት።* 33  የራስ ቅል ቦታ የሚል ትርጉም ወዳለው ጎልጎታ ወደተባለ ስፍራ በደረሱ ጊዜ 34  ሐሞት የተቀላቀለበት ወይን ጠጅ እንዲጠጣ ሰጡት፤ እሱ ግን ከቀመሰው በኋላ ሊጠጣው አልፈለገም። 35  ከሰቀሉት በኋላም ዕጣ ተጣጥለው መደረቢያዎቹን ተከፋፈሉ፤ 36  በዚያም ተቀምጠው ይጠብቁት ነበር። 37  እንዲሁም “ይህ የአይሁድ ንጉሥ ኢየሱስ ነው” የሚል የተከሰሰበትን ጉዳይ የሚገልጽ ጽሑፍ ከራሱ በላይ ሰቅለው ነበር። 38  በዚያን ጊዜ ሁለት ወንበዴዎች፣ አንዱ በቀኙ አንዱ በግራው ተሰቅለው ነበር። 39  በመንገድ የሚያልፉም ይሰድቡት ጀመር፤ ራሳቸውን እየነቀነቁም 40  “አይ አንተ፣ ቤተ መቅደሱን አፍርሼ በሦስት ቀን መልሼ እሠራለሁ ባይ፣ እስቲ ራስህን አድን! የአምላክ ልጅ ከሆንክ እስቲ ከተሰቀልክበት እንጨት ላይ ውረድ!” ይሉት ነበር። 41  የካህናት አለቆችም እንደዚሁ ከጸሐፍትና ከሽማግሌዎች ጋር ሆነው እንዲህ እያሉ ያፌዙበት ጀመር:- 42  “ሌሎችን አዳነ፤ ራሱን ግን ማዳን አልቻለም! የእስራኤል ንጉሥ እኮ ነው፤ እስቲ አሁን ከተሰቀለበት እንጨት ይውረድና እኛም እንመንበት። 43  በአምላክ ታምኗል፤ ‘የአምላክ ልጅ ነኝ’ ስላለ ከወደደው እስቲ አሁን ያድነው።” 44  አብረውት የተሰቀሉት ወንበዴዎችም እንኳ ሳይቀሩ ልክ እንደዚሁ ይነቅፉት ጀመር። 45  ከስድስት ሰዓት ጀምሮ እስከ ዘጠኝ ሰዓት ድረስ አገሩ በሙሉ በጨለማ ተሸፈነ። 46  በዘጠኝ ሰዓት ገደማ ኢየሱስ በታላቅ ድምፅ “ኤሊ፣ ኤሊ፣ ላማ ሳባቅታኒ?” ብሎ ጮኸ፤ ይህም “አምላኬ፣ አምላኬ ለምን ተውከኝ?” ማለት ነው። 47  በዚያ ቆመው ከነበሩት አንዳንዶቹ ይህን ሲሰሙ “ይህ ሰው ኤልያስን እየተጣራ ነው” ይሉ ጀመር። 48  ወዲያውኑም ከመካከላቸው አንዱ ሮጦ በመሄድ ሰፍነግ ወስዶ የኮመጠጠ ወይን ጠጅ ውስጥ ከነከረ በኋላ በመቃ ላይ አድርጎ እንዲጠጣ ሰጠው። 49  የቀሩት ግን “ተወው! ኤልያስ መጥቶ ያድነው እንደሆነ እንይ” አሉ። [ሌላ ሰው ደግሞ ጦር ወስዶ ጎኑን ወጋው፤ ደምና ውኃም ፈሰሰ።]* 50  ኢየሱስ ዳግመኛ በታላቅ ድምፅ ጮኾ መንፈሱን ሰጠ። 51  በዚያን ጊዜ የቤተ መቅደሱ መጋረጃ ከላይ እስከ ታች ለሁለት ተቀደደ፤ ምድርም ተናወጠች፣ ዐለቶችም ተሰነጣጠቁ። 52  የመታሰቢያ መቃብሮችም ተከፈቱ፤ በሞት ካንቀላፉት ቅዱሳን ሰዎች መካከልም የብዙዎቹ አስከሬኖች ወጡ፤ 53  ብዙ ሰዎችም አዩአቸው። (ኢየሱስ ከተነሳ በኋላ ሰዎች ከመቃብር ስፍራው ወጥተው ወደ ቅድስቲቱ ከተማ ገቡ።)* 54  ሆኖም የመቶ አለቃውና አብረውት ኢየሱስን ይጠብቁ የነበሩት ሰዎች የምድር ነውጡንና የተከሰቱትን ነገሮች ሲመለከቱ እጅግ ፈርተው “ይህ በእርግጥ የአምላክ ልጅ ነበር” አሉ። 55  በተጨማሪም ኢየሱስን ለማገልገል ከገሊላ ጀምሮ አብረውት የነበሩ ብዙ ሴቶች እዚያ ሆነው ከሩቅ ይመለከቱ ነበር፤ 56  ከእነሱም መካከል መግደላዊት ማርያም፣ የያዕቆብና የዮሳ እናት ማርያም እንዲሁም የዘብዴዎስ ልጆች እናት ይገኙ ነበር። 57  በመሸም ጊዜ የአርማትያስ ሰው የሆነ ዮሴፍ የሚባል አንድ ሀብታም መጣ፤ እሱ ራሱም የኢየሱስ ደቀ መዝሙር ነበር። 58  ይህ ሰው ወደ ጲላጦስ ሄዶ የኢየሱስ አስከሬን እንዲሰጠው ጠየቀ። ጲላጦስም እንዲሰጠው አዘዘ። 59  ዮሴፍም አስከሬኑን ወስዶ በንጹሕ በፍታ ገነዘው፤ 60  ከዐለት ፈልፍሎ በሠራው በራሱ አዲስ የመታሰቢያ መቃብር ውስጥም አኖረው። ከዚያም አንድ ትልቅ ድንጋይ አንከባሎ የመታሰቢያ መቃብሩን ደጃፍ ዘጋውና ሄደ። 61  ይሁንና መግደላዊት ማርያምና ሌላዋ ማርያም ከመቃብሩ ፊት ለፊት እዚያው ተቀምጠው ነበር። 62  ከዝግጅት ቀን በኋላ በማግስቱ የካህናት አለቆችና ፈሪሳውያን አንድ ላይ ተሰብስበው ጲላጦስ ፊት ቀረቡና 63  እንዲህ አሉ:- “ክቡር ሆይ፣ ያ አስመሳይ በሕይወት ሳለ ‘ከሦስት ቀን በኋላ እነሳለሁ’ ብሎ የተናገረው ትዝ አለን። 64  ስለዚህ ደቀ መዛሙርቱ መጥተው እንዳይሰርቁትና ለሕዝቡ ‘ከሞት ተነስቷል!’ እንዳይሉ እስከ ሦስተኛው ቀን ድረስ መቃብሩ እንዲጠበቅ ትእዛዝ ስጥልን፤ አለዚያ ይህ የኋለኛው ማታለያ ከፊተኛው የከፋ ይሆናል።” 65  ጲላጦስም “ጠባቂዎች አሏችሁ። ስለዚህ ሄዳችሁ በምታውቁት መንገድ አስጠብቁ” አላቸው። 66  ስለዚህ ሄደው ድንጋዩ ላይ ማኅተም በማድረግ መቃብሩን አሸጉ፤ በወታደሮችም አስጠበቁ።

የግርጌ ማስታወሻዎች

ማቴ 27:3 * ብር ከተባለው ማዕድን የተሠራ ሳንቲም።
ማቴ 27:4 * ቃል በቃል፣ “ጻድቅ ደም።”
ማቴ 27:32 * ከተጨማሪው መረጃ ላይ 6ኛውን ርዕስ ተመልከት።
ማቴ 27:32 * ወይም፣ “የግዳጅ አገልግሎት እንዲፈጽም አስገደዱት።”
ማቴ 27:49 * ቅንፉን በተመለከተ ለተሰጠው ማብራሪያ ማቴዎስ 16:3 ላይ የሚገኘውን የግርጌ ማስታወሻ ተመልከት።
ማቴ 27:53 * በቅንፍ ውስጥ ያለው ሐሳብ ከጊዜ በኋላ የተከናወነውን ሁኔታ የሚገልጽ ነው።