በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ማቴዎስ 26:1-75

26  ኢየሱስ ይህን ሁሉ ተናግሮ በጨረሰ ጊዜ ደቀ መዛሙርቱን እንዲህ አላቸው:-  “እንደምታውቁት ከሁለት ቀን በኋላ ፋሲካ ይከበራል፤ የሰው ልጅም እንዲሰቀል አልፎ ይሰጣል።”  በዚያን ጊዜ የካህናት አለቆችና የሕዝቡ ሽማግሌዎች ቀያፋ ተብሎ በሚጠራው በሊቀ ካህናቱ ግቢ ውስጥ ተሰብስበው  የተንኮል ዘዴ በመጠቀም ኢየሱስን ለመያዝና ለመግደል ተማከሩ።  ይሁን እንጂ “በሕዝቡ መካከል ሁከት እንዳይፈጠር በበዓሉ ወቅት መሆን የለበትም” በማለት ደጋግመው ይናገሩ ነበር።  ኢየሱስ በቢታንያ፣ በሥጋ ደዌ በተያዘው በስምዖን ቤት ሳለ  አንዲት ሴት በጣም ውድ የሆነ ሽቶ የያዘ የአልባስጥሮስ ብልቃጥ ይዛ ወደ እሱ ቀረበች፤ በማዕድ ተቀምጦ ሳለም ሽቶውን ራሱ ላይ ታፈስ ጀመር።  ደቀ መዛሙርቱ ይህን ሲያዩ ተቆጥተው እንዲህ አሉ:- “ይህ ሁሉ ብክነት ለምንድን ነው?  ይህ ሽቶ እኮ በውድ ዋጋ ተሸጦ ለድሆች ሊሰጥ ይችል ነበር።” 10  ኢየሱስ ይህን አውቆ እንዲህ አላቸው:- “ይህችን ሴት ለምን ታስቸግሯታላችሁ? እሷ ለእኔ መልካም ነገር አድርጋለች። 11  ድሆች ሁልጊዜ ከእናንተ ጋር ናቸው፤ እኔን ግን ሁልጊዜ አታገኙኝም። 12  ይህች ሴት ሽቶውን በሰውነቴ ላይ ስታፈስ እኔን ለቀብር ማዘጋጀቷ ነው። 13  እውነት እላችኋለሁ፣ በመላው ዓለም ምሥራቹ በሚሰበክበት ሁሉ ይህች ሴት ያደረገችውም እንደ መታሰቢያ ሆኖ ይነገርላታል።” 14  ከዚህ በኋላ ከአሥራ ሁለቱ አንዱ የሆነው የአስቆሮቱ ይሁዳ ወደ ካህናት አለቆች ሄዶ 15  “እሱን አሳልፌ ብሰጣችሁ ምን ትሰጡኛላችሁ?” አላቸው። እነሱም ሠላሳ የብር ሳንቲሞች* ሊሰጡት ተስማሙ። 16  ስለዚህ ከዚያን ጊዜ አንስቶ ኢየሱስን አሳልፎ ለመስጠት ምቹ አጋጣሚ ይፈልግ ጀመር። 17  ያልቦካ ቂጣ በዓል በሚከበርበት የመጀመሪያ ቀን፣ ደቀ መዛሙርቱ ወደ ኢየሱስ መጥተው “ፋሲካን እንድትበላ የት እንድናዘጋጅልህ ትፈልጋለህ?” አሉት። 18  እሱም “ወደ ከተማ ሄዳችሁ እገሌ የተባለውን ሰው፣ መምህር ‘የተወሰነው ጊዜዬ ደርሷል፤ ከደቀ መዛሙርቴ ጋር ፋሲካን በቤትህ አከብራለሁ’ ብሏል በሉት” አላቸው። 19  ደቀ መዛሙርቱም ኢየሱስ እንዳዘዛቸው አደረጉ፤ ለፋሲካ በዓሉ የሚያስፈልጉትን ነገሮችም አዘጋጁ። 20  በመሸም ጊዜ ከአሥራ ሁለቱ ደቀ መዛሙርት ጋር በማዕድ ተቀመጠ። 21  እየበሉ ሳሉም “እውነት እላችኋለሁ፣ ከእናንተ አንዱ አሳልፎ ይሰጠኛል” አለ። 22  እነሱም በዚህ እጅግ አዝነው ሁሉም ተራ በተራ “ጌታ ሆይ፣ መቼም እኔ አይደለሁም፣ እኔ እሆን እንዴ?” ይሉት ጀመር። 23  እሱም መልሶ እንዲህ አለ:- “አሳልፎ የሚሰጠኝ ከእኔ ጋር በሳህኑ ውስጥ የሚያጠቅሰው ነው። 24  እርግጥ፣ የሰው ልጅ ስለ እሱ በተጻፈው መሠረት ይሄዳል፤ የሰውን ልጅ አሳልፎ ለሚሰጠው ለዚያ ሰው ግን ወዮለት! ያ ሰው ባይወለድ ይሻለው ነበር።” 25  አሳልፎ ሊሰጠው የተዘጋጀው ይሁዳም መልሶ “ረቢ፣ መቼም እኔ አይደለሁም፣ እኔ ነኝ እንዴ?” አለው። እሱም “አንተው ራስህ ተናገርከው” አለው። 26  እየበሉም ሳሉ ኢየሱስ ቂጣ አንስቶ ከባረከ በኋላ ቆረሰው፤ ከዚያም ለደቀ መዛሙርቱ በመስጠት “እንኩ፣ ብሉ። ይህ ሥጋዬ ማለት ነው” አለ። 27  በተጨማሪም ጽዋ አንስቶ ካመሰገነ በኋላ ለደቀ መዛሙርቱ በመስጠት እንዲህ አለ:- “ሁላችሁም ከዚህ ጠጡ፤ 28  ይህ ስለ ብዙዎች ለኃጢአት ይቅርታ የሚፈስ ‘የቃል ኪዳን ደሜ’ ማለት ነው። 29  ነገር ግን እላችኋለሁ፣ በአባቴ መንግሥት አዲሱን ወይን ከእናንተ ጋር እስከምጠጣበት ቀን ድረስ ከዚህ በኋላ ከወይኑ ፍሬ አልጠጣም።” 30  በመጨረሻ የውዳሴ መዝሙር ከዘመሩ በኋላ ወደ ደብረ ዘይት ተራራ ሄዱ። 31  ከዚያም ኢየሱስ እንዲህ አላቸው:- “‘እረኛውን እመታለሁ፤ የመንጋውም በጎች ይበተናሉ’ ተብሎ ስለተጻፈ በዚህች ሌሊት ሁላችሁም በእኔ ምክንያት ትሰናከላላችሁ። 32  ከተነሳሁ በኋላ ግን ቀድሜያችሁ ወደ ገሊላ እሄዳለሁ።” 33  ይሁንና ጴጥሮስ መልሶ “ሌሎቹ ሁሉ በአንተ ምክንያት ቢሰናከሉ እንኳ እኔ ፈጽሞ አልሰናከልም!” አለው። 34  ኢየሱስም “እውነት እልሃለሁ፣ በዚህች ሌሊት ዶሮ ሳይጮኽ አንተ ሦስት ጊዜ ትክደኛለህ” አለው። 35  ጴጥሮስም “አብሬህ መሞት ቢያስፈልገኝ እንኳ በምንም ዓይነት አልክድህም” አለው። የቀሩት ደቀ መዛሙርትም ሁሉ እንደዚሁ አሉ። 36  ከዚያም ኢየሱስ ከእነሱ ጋር ጌቴሴማኒ ወደተባለ ቦታ መጣ፤ ደቀ መዛሙርቱንም “ወደዚያ ሄጄ በምጸልይበት ጊዜ እናንተ እዚህ ተቀመጡ” አላቸው። 37  ጴጥሮስንና ሁለቱን የዘብዴዎስ ልጆች ይዞ ከሄደ በኋላ እጅግ ያዝንና ይረበሽ ጀመር። 38  ከዚያም “ነፍሴ እስከ ሞት ድረስ እጅግ አዝናለች። እዚህ ሁኑና ከእኔ ጋር ነቅታችሁ ጠብቁ” አላቸው። 39  ትንሽ ወደፊት ራቅ በማለት በግምባሩ ተደፍቶ “አባቴ ሆይ፣ የሚቻል ከሆነ ይህ ጽዋ ከእኔ ይለፍ። ሆኖም እንደ እኔ ፈቃድ ሳይሆን እንደ አንተ ፈቃድ ይሁን” ብሎ ጸለየ። 40  ወደ ደቀ መዛሙርቱ ተመልሶ ሲመጣም ተኝተው አገኛቸውና ጴጥሮስን እንዲህ አለው:- “እናንተ ሰዎች፣ ከእኔ ጋር አንድ ሰዓት እንኳ መጠበቅ አልቻላችሁም? 41  ወደ ፈተና እንዳትገቡ ነቅታችሁ ጠብቁ፣ ሳታሰልሱም ጸልዩ። እርግጥ፣ መንፈስ ዝግጁ ነው፣ ሥጋ ግን ደካማ ነው።” 42  እንደገናም ሄዶ ለሁለተኛ ጊዜ “አባቴ ሆይ፣ ይህ ጽዋ ሳልጠጣው ሊያልፍ የማይችል ከሆነ የአንተ ፈቃድ ይፈጸም” ሲል ጸለየ። 43  ዳግመኛ ተመልሶ ሲመጣም እንቅልፍ ተጫጭኗቸው ስለነበር ተኝተው አገኛቸው። 44  እንደገናም ትቷቸው ሄደና ለሦስተኛ ጊዜ ያንኑ ቃል ደግሞ ጸለየ። 45  ከዚያም ወደ ደቀ መዛሙርቱ መጥቶ እንዲህ አላቸው:- “ይህ የእንቅልፍና የእረፍት ሰዓት ነው? እነሆ፣ የሰው ልጅ ለኃጢአተኞች እጅ አልፎ የሚሰጥበት ሰዓት ደርሷል። 46  ተነሱ፣ እንሂድ። እነሆ፣ አሳልፎ የሚሰጠኝ ቀርቧል።” 47  ገና እየተናገረ ሳለም ከአሥራ ሁለቱ አንዱ የሆነው ይሁዳ መጣ፤ ከካህናት አለቆችና ከሕዝቡ ሽማግሌዎች የተላኩ ሰይፍና ቆመጥ የያዙ ብዙ ሰዎችም አብረውት ነበሩ። 48  አሳልፎ የሚሰጠውም “እኔ የምስመው ሰው እሱ ነው፤ ያዙት” በማለት ምልክት ሰጥቷቸው ነበር። 49  በቀጥታ ወደ ኢየሱስ በመሄድ “ረቢ! ሰላም ለአንተ ይሁን” ብሎ ሳም አደረገው። 50  ኢየሱስ ግን “ወዳጄ፣ እዚህ የተገኘህበት ዓላማ ምንድን ነው?” አለው። በዚህ ጊዜ ሰዎቹ ቀርበው በኢየሱስ ላይ እጃቸውን ጫኑበት፣ ያዙትም። 51  ሆኖም ከኢየሱስ ጋር ከነበሩት አንዱ እጁን ሰዶ ሰይፉን በመምዘዝ የሊቀ ካህናቱን ባሪያ መትቶ ጆሮውን ቆረጠው። 52  በዚህ ጊዜ ኢየሱስ እንዲህ አለው:- “ሰይፍህን ወደ ቦታው መልስ፤ ሰይፍ የሚመዙ ሁሉ በሰይፍ ይጠፋሉ። 53  ለመሆኑ በዚህች ቅጽበት ከአሥራ ሁለት ሌጌዎን* የሚበልጡ መላእክት እንዲልክልኝ አባቴን መጠየቅ የማልችል ይመስልሃል? 54  እንዲህ ከሆነ ታዲያ፣ እንደዚህ ሊሆን ይገባል የሚሉት ቅዱሳን መጻሕፍት እንዴት ይፈጸማሉ?” 55  በዚያን ሰዓት ኢየሱስ ሰዎቹን እንዲህ አላቸው:- “ወንበዴ የምትይዙ ይመስል ሰይፍና ቆመጥ ይዛችሁ የመጣችሁት እኔን ለመያዝ ነው? በየዕለቱ በቤተ መቅደስ ተቀምጬ አስተምር ነበር፤ ሆኖም ያን ጊዜ አልያዛችሁኝም። 56  ይህ ሁሉ የሆነው ግን በነቢያት መጻሕፍት የተጻፈው ይፈጸም ዘንድ ነው።” በዚህ ጊዜ ደቀ መዛሙርቱ ሁሉ ጥለውት ሸሹ። 57  ኢየሱስን የያዙት ሰዎች ጸሐፍትና ሽማግሌዎች ወደተሰበሰቡበት ወደ ሊቀ ካህናቱ ወደ ቀያፋ ወሰዱት። 58  ይሁንና ጴጥሮስ እስከ ሊቀ ካህናቱ ግቢ ድረስ በርቀት ይከተለው ነበር፤ ወደ ውስጥ ከገባ በኋላም መጨረሻውን ለማየት ከቤቱ አገልጋዮች ጋር ተቀመጠ። 59  በዚህ ጊዜ የካህናት አለቆችና የሳንሄድሪን ሸንጎ በሙሉ ኢየሱስን ለመግደል በእሱ ላይ የሐሰት የምሥክርነት ቃል እየፈለጉ ነበር፤ 60  ብዙ የሐሰት ምሥክሮች ቢቀርቡም ምንም ማስረጃ አላገኙም። በኋላ ሁለት ሰዎች ቀርበው 61  “ይህ ሰው ‘የአምላክን ቤተ መቅደስ አፍርሼ በሦስት ቀን ውስጥ ልሠራው እችላለሁ’ ብሏል” አሉ። 62  በዚህ ጊዜ ሊቀ ካህናቱ ተነስቶ በመቆም “ምንም መልስ አትሰጥም? እነዚህ በአንተ ላይ የሚሰጡት ምሥክርነት ምንድን ነው?” አለው። 63  ኢየሱስ ግን ዝም አለ። ሊቀ ካህናቱም “አንተ የአምላክ ልጅ ክርስቶስ መሆን አለመሆንህን እንድትነግረን በሕያው አምላክ አስምልሃለሁ!” አለው። 64  ኢየሱስም “አንተው ራስህ ተናገርከው። ነገር ግን እላችኋለሁ፣ ከዚህ በኋላ የሰው ልጅ በኃያሉ ቀኝ ተቀምጦ በሰማይ ደመና ሲመጣ ታያላችሁ” አለው። 65  በዚህ ጊዜ ሊቀ ካህናቱ ልብሱን ቀዶ እንዲህ አለ:- “አምላክን ተሳድቧል! ከዚህ በላይ ምን ምሥክሮች ያስፈልጉናል? ስድቡን እንደሆነ እናንተም ሰምታችኋል። 66  እንግዲህ ምን ትላላችሁ?” እነሱም “ሞት ይገባዋል” ብለው መለሱ። 67  ከዚያም ፊቱ ላይ ተፉበት፤ በቡጢም መቱት። ሌሎቹም በጥፊ እየመቱት 68  “ክርስቶስ ሆይ፣ ነቢይ ከሆንክ እስቲ ማን እንደመታህ ንገረን?” አሉት። 69  ጴጥሮስ ውጭ፣ ግቢው ውስጥ ተቀምጦ ነበር፤ አንዲት አገልጋይ ወደ እሱ መጥታ “አንተም ከገሊላው ኢየሱስ ጋር ነበርክ!” አለችው። 70  እሱ ግን “ስለ ምን እየተናገርሽ እንዳለ አላውቅም” በማለት በሁሉም ፊት ካደ። 71  ወደ ግቢው መግቢያ አካባቢ ከሄደ በኋላ ሌላ ሴት አየችውና በዚያ ለነበሩት ሰዎች “ይህ ሰው ከናዝሬቱ ኢየሱስ ጋር ነበር” አለች። 72  እሱም በመሐላ ቃል “ሰውየውን አላውቀውም!” በማለት ዳግመኛ ካደ። 73  ከጥቂት ጊዜ በኋላ በአካባቢው ቆመው የነበሩት መጥተው ጴጥሮስን “አነጋገርህ ያስታውቃል፣ በእርግጥ አንተም ከእነሱ አንዱ ነህ” አሉት። 74  በዚህ ጊዜ ጴጥሮስ “ሰውየውን አላውቀውም!” በማለት ይምልና ራሱን ይረግም ጀመር። ወዲያውም ዶሮ ጮኸ። 75  ጴጥሮስም “ዶሮ ሳይጮኽ ሦስት ጊዜ ትክደኛለህ” ሲል ኢየሱስ የተናገረውን ቃል አስታወሰ። ከዚያም ወደ ውጭ ወጥቶ ምርር ብሎ አለቀሰ።

የግርጌ ማስታወሻዎች

ማቴ 26:15 * ብር ከተባለው ማዕድን የተሠራ ሳንቲም።
ማቴ 26:53 * “ሌጌዎን” በጥንት የሮማ ወታደራዊ መዋቅር ውስጥ አንድን ትልቅ ክፍለ ሠራዊት ያመለክት ነበር። እዚህ ላይ ቃሉ ብዛትን ያመለክታል።