በቀጥታ ወደ ዋናው ጉዳይ ግባ

በቀጥታ ወደ ርዕስ ማውጫው ሂድ

የይሖዋ ምሥክሮች

ቋንቋ ምረጥ አማርኛ

ማቴዎስ 25:1-46

25  “በተጨማሪም መንግሥተ ሰማያት መብራታቸውን ይዘው ሙሽራውን ሊቀበሉ ከወጡ አሥር ደናግል ጋር ይመሳሰላል።  አምስቱ ሞኞች፣ አምስቱ ደግሞ ልባሞች ነበሩ።  ሞኞቹ መብራታቸውን ቢይዙም ዘይት አልያዙም ነበር፤  ልባሞቹ ግን ከመብራታቸው ጋር በዕቃቸው ዘይት ይዘው ነበር።  ሙሽራው በዘገየ ጊዜ ሁሉም እንቅልፍ ተጫጫናቸውና ተኙ።  እኩለ ሌሊት ላይ ‘ሙሽራው መጣ! ወጥታችሁ ተቀበሉት’ የሚል ጥሪ ተሰማ።  በዚህ ጊዜ ደናግሉ ሁሉ ተነስተው መብራቶቻቸውን አዘጋጁ።  ሞኞቹ ደናግል ልባሞቹን ‘መብራታችን ሊጠፋብን ስለሆነ ከያዛችሁት ዘይት ስጡን’ አሏቸው።  ልባሞቹም ‘ምናልባት ለእኛና ለእናንተ ላይበቃ ስለሚችል ወደ ሻጮች ሄዳችሁ ለራሳችሁ ብትገዙ ይሻላል’ ብለው መለሱላቸው። 10  ሊገዙ ሄደው ሳሉም ሙሽራው ደረሰ፤ ተዘጋጅተው የነበሩት ደናግልም ወደ ሠርጉ ድግስ ገቡ፤ በሩም ተዘጋ። 11  በኋላም የቀሩት ደናግል መጥተው ‘ጌታ ሆይ፣ ጌታ ሆይ፣ ክፈትልን!’ አሉ። 12  እሱም መልሶ ‘እውነቴን ነው የምላችሁ፣ አላውቃችሁም’ አላቸው። 13  “እንግዲህ ቀኑንም ሆነ ሰዓቱን ስለማታውቁ ዘወትር ነቅታችሁ ጠብቁ። 14  “እንዲሁም መንግሥተ ሰማያት ባሪያዎቹን ጠርቶ ንብረቱን በአደራ በመስጠት ወደ ሌላ አገር ለመሄድ ከተነሳ ሰው ጋር ይመሳሰላል። 15  ለእያንዳንዱ እንደ ችሎታው፣ ለአንዱ አምስት ታላንት፣ ለሌላው ሁለት፣ ለሌላው ደግሞ አንድ በመስጠት ወደ ሌላ አገር ሄደ። 16  አምስት ታላንት የተቀበለው ሰው ወዲያው ሄዶ ነገደበትና ሌላ አምስት ታላንት አተረፈ። 17  በተመሳሳይ ሁለት ታላንት የተቀበለውም ሌላ ሁለት አተረፈ። 18  አንድ ታላንት ብቻ የተቀበለው ግን ሄዶ መሬት ቆፈረና ጌታው የሰጠውን የብር ገንዘብ* ቀበረ። 19  “ከረጅም ጊዜ በኋላ የእነዚያ ባሪያዎች ጌታ መጥቶ ሒሳቡን ከባሪያዎቹ ጋር ተሳሰበ። 20  ስለዚህ አምስት ታላንት የተቀበለው ባሪያ ሌላ አምስት ተጨማሪ ታላንት ይዞ በመቅረብ ‘ጌታ ሆይ፣ አምስት ታላንት ሰጥተኸኝ ነበር፤ ይኸው ሌላ አምስት ታላንት አተረፍኩ’ አለ። 21  ጌታውም ‘ጎበዝ፣ አንተ ጥሩና ታማኝ ባሪያ! በጥቂት ነገሮች ታማኝ ሆነህ ተገኝተሃል። ስለዚህ በብዙ ነገሮች ላይ እሾምሃለሁ። ወደ ጌታህ ደስታ ግባ’ አለው። 22  ቀጥሎም ሁለት ታላንት የተቀበለው ባሪያ ቀርቦ ‘ጌታ ሆይ፣ ሁለት ታላንት ሰጥተኸኝ ነበር፤ ይኸው ሌላ ሁለት ታላንት አተረፍኩ’ አለ። 23  ጌታውም ‘ጎበዝ፣ አንተ ጥሩና ታማኝ ባሪያ! በጥቂት ነገሮች ታማኝ ሆነህ ተገኝተሃል። ስለዚህ በብዙ ነገሮች ላይ እሾምሃለሁ። ወደ ጌታህ ደስታ ግባ’ አለው። 24  “በመጨረሻም አንድ ታላንት የተቀበለው ባሪያ ቀርቦ እንዲህ አለው:- ‘ጌታ ሆይ፣ አንተ ካልዘራህበት የምታጭድ፣ ካላዘራህበት የምትሰበስብ ጨካኝ ሰው መሆንህን አውቃለሁ። 25  ስለዚህ ፈራሁ፣ ሄጄም ታላንትህን መሬት ውስጥ ቀበርኩት። ገንዘብህ ይኸውልህ።’ 26  ጌታውም መልሶ እንዲህ አለው:- ‘አንተ ክፉና ሰነፍ ባሪያ፣ ካልዘራሁበት የማጭድ፣ ካላዘራሁበትም የምሰበስብ መሆኔን ታውቅ ኖሯል ማለት ነው? 27  ይህን ካወቅህ ገንዘቤን፣ ገንዘብ ለዋጮች ጋር ማስቀመጥ ነበረብህ፤ እኔም ተመልሼ ስመጣ ገንዘቡን ከነወለዱ እወስደው ነበር። 28  “‘ስለዚህ ታላንቱን ውሰዱበትና አሥር ታላንት ላለው ስጡት። 29  ምክንያቱም ላለው ሁሉ ይጨመርለታል፣ ደግሞም ይትረፈረፍለታል፤ የሌለው ግን ያው ያለው እንኳን ይወሰድበታል። 30  ይህን የማይረባ ባሪያ ውጭ ወዳለው ጨለማ ጣሉት። በዚያም ያለቅሳል፣ በሐዘንም ጥርሱን ያፋጫል።’ 31  “የሰው ልጅ ከመላእክቱ ሁሉ ጋር በክብሩ ሲመጣ በክብራማ ዙፋኑ ላይ ይቀመጣል። 32  ሕዝቦችም ሁሉ በፊቱ ይሰበሰባሉ፤ እሱም እረኛ በጎቹን ከፍየሎቹ እንደሚለይ ሰዎችን አንዱን ከሌላው ይለያል። 33  በጎቹን በቀኙ፣ ፍየሎቹን ግን በግራው ያደርጋቸዋል። 34  “ከዚያም ንጉሡ በቀኙ ያሉትን እንዲህ ይላቸዋል:- ‘እናንተ አባቴ የባረካችሁ ኑ፣ ዓለም ከተመሠረተበት ጊዜ ጀምሮ የተዘጋጀላችሁን መንግሥት ውረሱ። 35  ምክንያቱም ተርቤ አብልታችሁኛል፣ ተጠምቼ አጠጥታችሁኛል። እንግዳ ሆኜ ስመጣ አስተናግዳችሁኛል፤ 36  ተራቁቼ አልብሳችሁኛል። ታምሜ አስታማችሁኛል። ታስሬ ጠይቃችሁኛል።’ 37  ከዚያም ጻድቃኑ መልሰው እንዲህ ይሉታል:- ‘ጌታ ሆይ፣ ተርበህ አይተን መቼ አበላንህ? ተጠምተህ አይተንስ መቼ አጠጣንህ? 38  እንግዳ ሆነህ አይተን መቼ አስተናገድንህ? ወይስ ተራቁተህ አይተን መቼ አለበስንህ? 39  ታመህ ወይም ታስረህ አይተን መቼ ጠየቅንህ?’ 40  ንጉሡም መልሶ ‘እውነት እላችኋለሁ፣ ከሁሉ ከሚያንሱት ከእነዚህ ወንድሞቼ ለአንዱ ያደረጋችሁት ለእኔ እንዳደረጋችሁት ይቆጠራል’ ይላቸዋል። 41  “ከዚያም በግራው ያሉትን እንዲህ ይላቸዋል:- ‘እናንተ የተረገማችሁ፣ ከእኔ ራቁ፤ ለዲያብሎስና ለመላእክቱ ወደተዘጋጀው ዘላለማዊ እሳት ሂዱ። 42  ምክንያቱም ተርቤ ነበር እናንተ ግን አላበላችሁኝም፣ ተጠምቼ ነበር እናንተ ግን አላጠጣችሁኝም። 43  እንግዳ ሆኜ መጥቼ ነበር እናንተ ግን አላስተናገዳችሁኝም፣ ተራቁቼ ነበር እናንተ ግን አላለበሳችሁኝም፤ ታምሜና ታስሬ ነበር እናንተ ግን አልጠየቃችሁኝም።’ 44  እነሱም መልሰው ‘ጌታ ሆይ፣ ተርበህ ወይስ ተጠምተህ ወይስ እንግዳ ሆነህ ወይስ ተራቁተህ ወይስ ታመህ ወይስ ታስረህ መቼ አየንና ሳናገለግልህ ቀረን?’ ይሉታል። 45  እሱም መልሶ ‘እውነት እላችኋለሁ፣ ከሁሉ ከሚያንሱት ከእነዚህ ለአንዱ ይህን ሳታደርጉ መቅረታችሁ ለእኔ እንዳላደረጋችሁት ይቆጠራል’ ይላቸዋል። 46  እነዚህ ወደ ዘላለም ጥፋት ጻድቃን ግን ወደ ዘላለም ሕይወት ይሄዳሉ።”

የግርጌ ማስታወሻዎች

ማቴ 25:18 * ብር ከተባለው ማዕድን የተሠራ ገንዘብ።