በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ማቴዎስ 2:1-23

2  በንጉሥ ሄሮድስ* ዘመን ኢየሱስ በይሁዳ በምትገኘው በቤተልሔም ከተወለደ በኋላ ኮከብ ቆጣሪዎች ከምሥራቅ አገር ወደ ኢየሩሳሌም መጥተው፣  “የተወለደው የአይሁድ ንጉሥ የሚገኘው የት ነው? በምሥራቅ ሳለን ኮከቡን ስላየን ልንሰግድለት መጥተናል” አሉ።  ንጉሥ ሄሮድስ ይህን ሲሰማ ተደናገጠ፤ መላዋ ኢየሩሳሌምም ተሸበረች፤  የሕዝቡን የካህናት አለቆችና ጸሐፍት በሙሉ ሰብስቦ መሲሑ የት እንደሚወለድ ይጠይቃቸው ጀመር።  እነሱም እንዲህ አሉት:- “በይሁዳ በምትገኘው በቤተልሔም ነው፤ ምክንያቱም በነቢዩ እንዲህ ተብሎ ተጽፏል:-  ‘በይሁዳ ምድር የምትገኚው አንቺ ቤተልሔም ሆይ፣ ሕዝቤን እስራኤልን የሚጠብቅ ገዥ ከአንቺ ስለሚወጣ በይሁዳ ገዥዎች ዘንድ በምንም ዓይነት ከሁሉ የተናቅሽ ከተማ አትሆኚም።’”  ከዚያም ሄሮድስ ኮከብ ቆጣሪዎቹን በድብቅ ጠርቶ ኮከቡ የታየበትን ጊዜ በትክክል አረጋገጠ፤  ኮከብ ቆጣሪዎቹንም “ሄዳችሁ ሕፃኑን በደንብ ፈልጉ፤ ባገኛችሁትም ጊዜ እኔም ሄጄ እንድሰግድለት መጥታችሁ ንገሩኝ” ብሎ ወደ ቤተልሔም ላካቸው።  እነሱም ንጉሡ የነገራቸውን ከሰሙ በኋላ ጉዟቸውን ቀጠሉ፤ በምሥራቅ ሳሉ ያዩት ኮከብም ሕፃኑ ባለበት ቦታ እስከቆመበት ጊዜ ድረስ ከፊት ከፊታቸው ይሄድ ነበር። 10  ኮከቡ መቆሙን ሲያዩም በጣም ተደሰቱ። 11  ወደ ቤትም ሲገቡ ሕፃኑን ከእናቱ ከማርያም ጋር አዩት፤ ተንበርክከውም ሰገዱለት። ዕቃቸውንም ከፍተው ወርቅ፣ ነጭ ዕጣንና ከርቤ በስጦታ መልክ አቀረቡለት። 12  ይሁንና ወደ ሄሮድስ ተመልሰው እንዳይሄዱ በሕልም መለኮታዊ ማስጠንቀቂያ ስለተሰጣቸው በሌላ መንገድ ወደ አገራቸው ተመለሱ። 13  እነሱ ከሄዱ በኋላ የይሖዋ መልአክ ለዮሴፍ በሕልም ተገልጦ “ሄሮድስ ሕፃኑን ፈልጎ ሊገድለው ስላሰበ ተነስ፣ ሕፃኑንና እናቱን ይዘህ ወደ ግብፅ ሽሽ፤ እኔ እስካሳውቅህም ድረስ እዚያው ቆይ” አለው። 14  ስለዚህ ዮሴፍ ተነሳ፤ ሕፃኑንና እናቱን ይዞ በሌሊት ወደ ግብፅ ሄደ። 15  ይሖዋ “ልጄን ከግብፅ ጠራሁት” ብሎ በነቢዩ አማካኝነት የተናገረው ይፈጸም ዘንድም ሄሮድስ እስኪሞት ድረስ እዚያው ቆየ። 16  ከዚያም ሄሮድስ ኮከብ ቆጣሪዎቹ እንዳታለሉት ሲያውቅ በጣም ተናደደ፤ ጊዜውን በተመለከተ ከኮከብ ቆጣሪዎቹ ባገኘው መረጃ መሠረትም ሰዎች ልኮ በቤተልሔምና በአካባቢዋ ሁሉ የሚገኙትን ሁለት ዓመትና ከዚያ በታች የሆኑትን ወንዶች ልጆች በሙሉ አስጨፈጨፈ። 17  በዚህ ጊዜ በነቢዩ ኤርምያስ የተነገረው የሚከተለው ቃል ተፈጸመ:- 18  “የልቅሶና የዋይታ ድምፅ በራማ ተሰማ፤ ራሔል ስለ ልጆቿ አለቀሰች፣ ልጆቿ ሁሉ በማለቃቸው ልትጽናና አልቻለችም።” 19  ሄሮድስ ከሞተ በኋላ የይሖዋ መልአክ በግብፅ ለዮሴፍ በሕልም ተገልጦ 20  “ተነስ፣ የሕፃኑን ነፍስ የሚፈልጉት ሰዎች ስለሞቱ ሕፃኑንና እናቱን ይዘህ ወደ እስራኤል ምድር ተመለስ” አለው። 21  ዮሴፍም ተነሳ፣ ሕፃኑንና እናቱን ይዞ ወደ እስራኤል ምድር ተመለሰ። 22  ሆኖም አርኬላዎስ በአባቱ በሄሮድስ ፋንታ የይሁዳ ንጉሥ ሆኖ በመግዛት ላይ መሆኑን በመስማቱ ወደዚያ ለመሄድ ፈራ። ከዚህም በተጨማሪ በሕልም መለኮታዊ ማስጠንቀቂያ ስለተሰጠው ወደ ገሊላ ምድር ሄደ፤ 23  “የናዝሬት ሰው ይባላል” ተብሎ በነቢያት የተነገረው ይፈጸም ዘንድም ናዝሬት ወደምትባል ከተማ መጥቶ መኖር ጀመረ።

የግርጌ ማስታወሻዎች

ማቴ 2:1 * እዚህ ላይ የተጠቀሰው ታላቁ ሄሮድስ ነው።