በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ማቴዎስ 19:1-30

19  ኢየሱስ ይህን ተናግሮ ከጨረሰ በኋላ ከገሊላ ወጥቶ ከዮርዳኖስ ማዶ ወዳሉት የይሁዳ የድንበር አካባቢዎች መጣ።  እጅግ ብዙ ሰዎችም ተከተሉት፤ እሱም በዚያ ፈወሳቸው።  ፈሪሳውያንም ወደ እሱ መጥተው ሊፈትኑት በማሰብ “አንድ ሰው በማንኛውም ምክንያት ሚስቱን እንዲፈታ ሕግ ይፈቅድለታል?” አሉት።  እሱም መልሶ እንዲህ አለ:- “ፈጣሪ ከመጀመሪያውም ወንድና ሴት አድርጎ እንደፈጠራቸው አላነበባችሁም?  ‘በዚህ ምክንያት ሰው ከአባትና ከእናቱ ይለያል፤ ከሚስቱም ጋር ይጣበቃል፤ ሁለቱም አንድ ሥጋ ይሆናሉ’ ብሎ እንደተናገረስ አላነበባችሁም?  በመሆኑም ከዚህ በኋላ አንድ ሥጋ ናቸው እንጂ ሁለት አይደሉም። ስለዚህ አምላክ ያጣመረውን* ማንም ሰው አይለያየው።”  እነሱም “ታዲያ ሙሴ የፍቺ የምሥክር ወረቀት ሰጥቶ እንዲፈታት ያዘዘው ለምንድን ነው?” አሉት።  እሱም እንዲህ አላቸው:- “ሙሴ የልባችሁን ደንዳናነት አይቶ ሚስቶቻችሁን እንድትፈቱ ፈቀደላችሁ እንጂ ከመጀመሪያው እንዲህ አልነበረም።  እኔ ግን እላችኋለሁ፣ በዝሙት ምክንያት ካልሆነ በስተቀር ሚስቱን ፈቶ ሌላ የሚያገባ ሁሉ ምንዝር ይፈጽማል።” 10  ደቀ መዛሙርቱም “በባልና በሚስት መካከል ያለው ሁኔታ እንዲህ ከሆነስ አለማግባት ይመረጣል” አሉት። 11  እሱም እንዲህ አላቸው:- “ስጦታው ያላቸው ካልሆኑ በስተቀር ይህን ሁሉም ሰው ሊቀበለው አይችልም። 12  ምክንያቱም ገና ከእናታቸው ማህፀን ጀምሮ ጃንደረባ ሆነው የሚወለዱ አሉ፤ ሰው የሰለባቸው ጃንደረቦችም አሉ፤ እንዲሁም ለመንግሥተ ሰማያት ሲሉ ራሳቸውን ጃንደረባ ያደረጉ ጃንደረቦችም አሉ። ይህን ሊቀበለው የሚችል ይቀበለው።” 13  ከዚያም እጁን በላያቸው ጭኖ እንዲጸልይላቸው ትንንሽ ልጆችን ወደ እሱ አመጡ፤ ደቀ መዛሙርቱ ግን ገሠጿቸው። 14  ይሁን እንጂ ኢየሱስ “ልጆቹን ተዉአቸው፤ ወደ እኔ እንዳይመጡ አትከልክሏቸው፤ ምክንያቱም መንግሥተ ሰማያት እንደነዚህ ላሉት ነው” አለ። 15  እጁንም ከጫነባቸው በኋላ ከዚያ ስፍራ ተነስቶ ሄደ። 16  ከዚያም አንድ ሰው ወደ እሱ መጥቶ “መምህር ሆይ፣ የዘላለም ሕይወት ለማግኘት ምን ጥሩ ነገር ማድረግ ይኖርብኛል?” አለው። 17  እሱም “ስለ ጥሩ ነገር ለምን ትጠይቀኛለህ? ጥሩ የሆነ አንዱ ብቻ ነው። ሆኖም ወደ ሕይወት መግባት የምትፈልግ ከሆነ ዘወትር ትእዛዛቱን ጠብቅ” አለው። 18  እሱም “የትኞቹን?” አለው። ኢየሱስም እንዲህ አለው:- “አትግደል፣ አታመንዝር፣ አትስረቅ፣ በሐሰት አትመሥክር፣ 19  አባትህንና እናትህን አክብር እንዲሁም ባልንጀራህን* እንደ ራስህ ውደድ።” 20  ወጣቱም “እነዚህን ሁሉ ስጠብቅ ኖሬያለሁ፤ አሁን የሚጎድለኝ ነገር ምንድን ነው?” አለው። 21  ኢየሱስም “ፍጹም መሆን ከፈለግክ ሂድና ንብረትህን ሸጠህ ለድሆች ስጥ፤ በሰማይም ውድ ሀብት ታገኛለህ፤ መጥተህም ተከታዬ ሁን” አለው። 22  ወጣቱም ይህን ሲሰማ ብዙ ንብረት ስለነበረው እያዘነ ሄደ። 23  ኢየሱስ ግን ደቀ መዛሙርቱን እንዲህ አላቸው:- “እውነት እላችኋለሁ፣ ለሀብታም ሰው ወደ መንግሥተ ሰማያት መግባት እጅግ አስቸጋሪ ይሆንበታል። 24  ዳግመኛም እላችኋለሁ፣ ሀብታም ሰው ወደ አምላክ መንግሥት ከሚገባ ግመል በመርፌ ቀዳዳ ቢሾልክ ይቀላል።” 25  ደቀ መዛሙርቱ ይህን ሲሰሙ “በዚህ ዓይነትማ ማን ሊድን ይችላል?” በማለት በጣም መገረማቸውን ገለጹ። 26  ኢየሱስም ፊት ለፊት እየተመለከታቸው “ይህ በሰዎች ዘንድ አይቻልም፤ በአምላክ ዘንድ ግን ሁሉ ነገር ይቻላል” አላቸው። 27  ከዚያም ጴጥሮስ መልሶ “እነሆ፣ እኛ ሁሉን ትተን ተከትለንሃል፤ ታዲያ የምናገኘው ምን ይሆን?” አለው። 28  ኢየሱስም እንዲህ አላቸው:- “እውነት እላችኋለሁ፣ በዳግም ፍጥረት የሰው ልጅ፣ ክብር በተላበሰው ዙፋኑ ላይ በሚቀመጥበት ጊዜ እኔን የተከተላችሁኝ እናንተም በአሥራ ሁለት ዙፋኖች ላይ ተቀምጣችሁ በአሥራ ሁለቱ የእስራኤል ነገዶች ላይ ትፈርዳላችሁ። 29  እንዲሁም ስለ ስሜ ሲል ቤቶችን ወይም ወንድሞችን ወይም እህቶችን ወይም አባትን ወይም እናትን ወይም ልጆችን ወይም እርሻን የተወ ሁሉ ብዙ እጥፍ ይቀበላል፤ የዘላለም ሕይወትም ይወርሳል። 30  “ሆኖም ፊተኞች የሆኑ ብዙዎች ኋለኞች፣ ኋለኞች የሆኑ ደግሞ ፊተኞች ይሆናሉ።

የግርጌ ማስታወሻዎች

ማቴ 19:6 * ቃል በቃል፣ “በአንድ ቀንበር ያጣመደውን።”
ማቴ 19:19 * “ባልንጀራ” ተብሎ የተተረጎመው ግሪክኛ ቃል የአንድን ሰው የቅርብ ጓደኛ ብቻ ሳይሆን ማንኛውንም ሰው ሊያመለክት ይችላል።