በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ማቴዎስ 18:1-35

18  በዚያን ጊዜ ደቀ መዛሙርቱ ወደ ኢየሱስ ቀርበው “በመንግሥተ ሰማያት ከሁሉ የሚበልጠው ማን ነው?” አሉት።  ኢየሱስም አንድ ትንሽ ልጅ ጠርቶ በመካከላቸው በማቆም  እንዲህ አለ:- “እውነት እላችኋለሁ፣ ካልተመለሳችሁና እንደ ልጆች ካልሆናችሁ በምንም ዓይነት ወደ መንግሥተ ሰማያት አትገቡም።  ስለዚህ በመንግሥተ ሰማያት ከሁሉ የሚበልጠው እንደዚህ ትንሽ ልጅ ራሱን ዝቅ የሚያደርግ ነው፤  እንዲሁም እንደዚህ ያለውን ትንሽ ልጅ በስሜ የሚቀበል ሁሉ እኔንም ይቀበላል።  ሆኖም በእኔ ከሚያምኑት ከእነዚህ ከታናናሾቹ አንዱን የሚያሰናክል ሁሉ በአህያ የሚዞር የወፍጮ ድንጋይ በአንገቱ ታስሮ በተንጣለለ ሰፊ ባሕር ውስጥ ቢሰጥም ይሻለዋል።  “ይህ ዓለም ሰዎችን የሚያሰናክል ነገር ስለሚያስቀምጥ ወዮለት! እርግጥ ማሰናከያ መኖሩ የማይቀር ነው፤ ነገር ግን በእሱ ጠንቅ ሌሎች እንዲሰናከሉ ለሚያደርግ ሰው ወዮለት!  እንግዲያው እጅህ ወይም እግርህ ቢያሰናክልህ ቆርጠህ ጣለው፤ ሁለት እጅ ወይም ሁለት እግር ኖሮህ ወደ ዘላለማዊ እሳት ከምትወረወር ጉንድሽ ወይም አንካሳ ሆነህ ወደ ሕይወት ብትገባ ይሻልሃል።  እንዲሁም ዓይንህ ቢያሰናክልህ አውጥተህ ጣለው፤ ሁለት ዓይን ኖሮህ ወደ እሳታማ ገሃነም ከምትወረወር አንድ ዓይን ኖሮህ ወደ ሕይወት ብትገባ ይሻልሃል። 10  በሰማይ ያሉት መልአኮቻቸው ዘወትር በሰማይ ያለውን የአባቴን ፊት ስለሚያዩ ከእነዚህ ከታናናሾቹ መካከል አንዱንም እንዳትንቁ ተጠንቀቁ። 11*  —— 12  “እስቲ ምን ትላላችሁ? አንድ ሰው መቶ በጎች ቢኖሩትና ከእነሱ አንዷ ብትጠፋ ዘጠና ዘጠኙን በተራራ ላይ ትቶ የጠፋችውን ለመፈለግ አይሄድም? 13  እውነት እላችኋለሁ፣ የጠፋችውን በግ ካገኛት፣ ካልጠፉት ከዘጠና ዘጠኙ ይልቅ በእሷ ይበልጥ ይደሰታል። 14  በተመሳሳይም በሰማይ ያለው አባቴ ከእነዚህ ከታናናሾቹ መካከል አንዱም እንዲጠፋ አይፈልግም። 15  “በተጨማሪም ወንድምህ አንድ በደል ቢፈጽም አንተና እሱ ብቻችሁን ሆናችሁ ጥፋቱን በግልጽ ንገረው። ከሰማህ ወንድምህን መልሰህ የራስህ ታደርገዋለህ። 16  የማይሰማህ ከሆነ ግን ማንኛውም ጉዳይ በሁለት ወይም በሦስት ምሥክሮች አፍ ስለሚጸና አንድ ወይም ሁለት ሰው ይዘህ ሂድ። 17  እነሱንም ካልሰማ ለጉባኤ ንገር። ጉባኤውንም እንኳ የማይሰማ ከሆነ እንደ አሕዛብና እንደ ቀረጥ ሰብሳቢ አድርገህ ቁጠረው። 18  “እውነት እላችኋለሁ፣ በምድር የምታስሩት ነገር ሁሉ ቀድሞውኑ በሰማያት የታሰረ ይሆናል፤ እንዲሁም በምድር የምትፈቱት ነገር ሁሉ ቀድሞውኑ በሰማያት የተፈታ ይሆናል። 19  ደግሞም እውነት እላችኋለሁ፣ በምድር ላይ ከእናንተ መካከል ሁለቱ አንድ አስፈላጊ የሆነ ነገር ለመለመን ቢስማሙ በሰማይ ያለው አባቴ ያደርግላቸዋል። 20  ምክንያቱም ሁለት ወይም ሦስት ሆነው በስሜ በሚሰበሰቡበት በዚያ በመካከላቸው እገኛለሁ።” 21  ከዚያም ጴጥሮስ ወደ ኢየሱስ ቀርቦ “ጌታ ሆይ፣ ወንድሜ ቢበድለኝ ስንት ጊዜ ይቅር ልበለው? ሰባት ጊዜ ይቅር ልበለው?” አለው። 22  ኢየሱስም እንዲህ አለው:- “እስከ ሰባ ሰባት ጊዜ እንጂ እስከ ሰባት ጊዜ ብቻ አልልህም። 23  “ስለዚህ መንግሥተ ሰማያት ከባሪያዎቹ ጋር ሒሳብ መተሳሰብ ከፈለገ አንድ ንጉሥ ጋር ይመሳሰላል። 24  ሒሳቡን መተሳሰብ በጀመረ ጊዜም አሥር ሺህ ታላንት [=60,000,000 ዲናር*] ዕዳ ያለበትን አንድ ሰው አቀረቡለት። 25  ሆኖም ሰውየው ዕዳውን የሚከፍልበት ምንም መንገድ ስላልነበረው ጌታው እሱም ሆነ ሚስቱ እንዲሁም ልጆቹና ያለው ንብረት ሁሉ ተሸጠው ዕዳው እንዲከፈል አዘዘ። 26  በዚህ ጊዜ ባሪያው እግሩ ላይ ወድቆ ‘እባክህ ታገሠኝ፣ ያለብኝን ዕዳ ሁሉ እከፍልሃለሁ’ ሲል ለመነው። 27  ጌታውም እጅግ አዘነለትና ለቀቀው፤ ዕዳውንም ሰረዘለት። 28  ሆኖም ይህ ባሪያ ወጥቶ ከሄደ በኋላ አንድ መቶ ዲናር ያበደረውን እንደ እሱ ያለ ባሪያ አግኝቶ በመያዝ አንገቱን አንቆ ‘ያለብህን ዕዳ ክፈለኝ’ አለው። 29  በዚህ ጊዜ ያ ባልንጀራው ባሪያ እግሩ ላይ ወድቆ ‘እባክህ ታገሠኝ፣ እከፍልሃለሁ’ ብሎ ይለምነው ጀመር። 30  እሱ ግን ፈቃደኛ አልሆነም፤ ከዚህ ይልቅ ሄዶ ያለበትን ዕዳ እስኪከፍል ድረስ ወህኒ ቤት አሳሰረው። 31  ባልንጀሮቹ የሆኑ ባሮች የሆነውን ነገር ባዩ ጊዜ እጅግ አዘኑ፤ ሄደውም የሆነውን ነገር ሁሉ ለጌታቸው ነገሩት። 32  በዚህ ጊዜ ጌታው አስጠራውና እንዲህ አለው:- ‘አንተ ክፉ ባሪያ፣ አንተ ስትለምነኝ እኔ ያን ሁሉ ዕዳ ተውኩልህ። 33  ታዲያ አንተ እኔ ምሕረት እንዳደረግኩልህ ባልንጀራህ ለሆነው ባሪያ ምሕረት ልታደርግለት አይገባም?’ 34  ጌታውም በዚህ እጅግ ተቆጥቶ ያለበትን ዕዳ ሁሉ እስኪከፍል ድረስ ለወህኒ ቤት ጠባቂዎቹ አሳልፎ ሰጠው። 35  እናንተም እያንዳንዳችሁ ወንድማችሁን ከልባችሁ ይቅር ካላላችሁ በሰማይ ያለው አባቴ እንደዚሁ ያደርግባችኋል።”

የግርጌ ማስታወሻዎች

ማቴ 18:11 ማቴዎስ 17:21 ላይ የሚገኘውን የግርጌ ማስታወሻ ተመልከት።
ማቴ 18:24 * ዲናር ከብር የተሠራ የሮማውያን ሳንቲም ነበር። አንድ ዲናር ለአንድ የግብርና ሠራተኛ የሚከፈል የአንድ ሙሉ ቀን ደሞዝ ነበር (ማቴ 20:2ን ተመልከት)።