በቀጥታ ወደ ዋናው ጉዳይ ግባ

በቀጥታ ወደ ርዕስ ማውጫው ሂድ

የይሖዋ ምሥክሮች

ቋንቋ ምረጥ አማርኛ

ማቴዎስ 17:1-27

17  ከስድስት ቀን በኋላ ኢየሱስ ጴጥሮስን፣ ያዕቆብንና ወንድሙን ዮሐንስን ወደ አንድ ረጅም ተራራ ብቻቸውን ይዟቸው ወጣ።  በፊታቸውም መልኩ ተለወጠ፤ ፊቱም እንደ ፀሐይ አበራ፤ ልብሱም እንደ ብርሃን አንጸባረቀ።  ከዚያም ሙሴና ኤልያስ ከእሱ ጋር ሲነጋገሩ ታዩአቸው።  በዚህ ጊዜ ጴጥሮስ ኢየሱስን “ጌታ ሆይ፣ እዚህ መሆን ለእኛ መልካም ነው። ከፈለግክ በዚህ ስፍራ አንድ ለአንተ፣ አንድ ለሙሴና አንድ ለኤልያስ ሦስት ድንኳኖች እተክላለሁ” አለው።  ገና እየተናገረ ሳለም ብሩህ ደመና ጋረዳቸው፤ ከደመናውም “በጣም የምደሰትበት፣ የምወደው ልጄ ይህ ነው፤ እሱን ስሙት” የሚል ድምፅ ተሰማ።  ደቀ መዛሙርቱ ይህን ሲሰሙ በጣም ፈርተው በግምባራቸው ተደፉ።  በዚህ ጊዜ ኢየሱስ ወደ እነሱ ቀርቦ ዳሰሳቸውና “ተነሱ፣ አትፍሩ” አላቸው።  ቀና ብለው ሲመለከቱ ከኢየሱስ በቀር ሌላ ማንንም አላዩም።  ከተራራው እየወረዱ ሳሉም ኢየሱስ “የሰው ልጅ ከሞት እስኪነሳ ድረስ ራእዩን ለማንም እንዳትናገሩ” ሲል አዘዛቸው። 10  ይሁን እንጂ ደቀ መዛሙርቱ “ታዲያ ጸሐፍት ኤልያስ በመጀመሪያ መምጣት አለበት የሚሉት ለምንድን ነው?” ሲሉ ጠየቁት። 11  እሱም መልሶ እንዲህ አለ:- “በእርግጥ ኤልያስ መጥቶ ሁሉንም ነገር ወደ ቀድሞ ሁኔታው ይመልሳል። 12  እኔ ግን እላችኋለሁ፣ ኤልያስ መምጣቱን መጥቷል፤ እነሱ ግን የፈለጉትን ነገር አደረጉበት እንጂ አላወቁትም። የሰው ልጅም እንደዚሁ በእነሱ እጅ መሠቃየቱ አይቀርም።” 13  በዚህ ጊዜ ደቀ መዛሙርቱ ኢየሱስ የነገራቸው ስለ መጥምቁ ዮሐንስ እንደሆነ ገባቸው። 14  ወደ ሕዝቡ በመጡ ጊዜም አንድ ሰው ወደ እሱ ቀረበና ተንበርክኮ እንዲህ አለው:- 15  “ጌታ ሆይ፣ ለልጄ ምሕረት አድርግለት፤ የሚጥል በሽታ ስላለበት በጠና ታሟል፤ አንዴ እሳት ውስጥ አንዴ ደግሞ ውኃ ውስጥ ይወድቃል፤ 16  ወደ ደቀ መዛሙርትህ አምጥቼው ነበር፤ እነሱ ግን ሊፈውሱት አልቻሉም።” 17  ኢየሱስም መልሶ “እምነት የለሽና ጠማማ ትውልድ ሆይ፣ ከእናንተ ጋር እስከ መቼ መቆየት ሊኖርብኝ ነው? እስከ መቼስ እናንተን መታገስ ሊኖርብኝ ነው? ልጁን ወደዚህ ወደ እኔ አምጡት” አለ። 18  ከዚያም ኢየሱስ ጋኔኑን ገሠጸው፤ ጋኔኑም ከልጁ ወጣ፤ ልጁም ከዚያ ሰዓት ጀምሮ ተፈወሰ። 19  ከዚህ በኋላ ደቀ መዛሙርቱ ብቻቸውን ወደ ኢየሱስ መጥተው “እኛ ልናስወጣው ያልቻልነው ለምንድን ነው?” አሉት። 20  እሱም “እምነታችሁ ስላነሰ ነው። እውነት እላችኋለሁ፣ የሰናፍጭ ቅንጣት የሚያክል እምነት ካላችሁ ይህን ተራራ ‘ከዚህ ተነስተህ ወደዚያ ሂድ’ ብትሉት ይሄዳል፤ የሚሳናችሁም ነገር አይኖርም” አላቸው። 21*  —— 22  በገሊላ ተሰባስበው ሳሉ ኢየሱስ እንዲህ አላቸው:- “የሰውን ልጅ ለሰዎች አሳልፈው ይሰጡታል፤ 23  እነሱም ይገድሉታል፤ እሱም በሦስተኛው ቀን ይነሳል።” በዚህ ጊዜ ደቀ መዛሙርቱ በጣም አዘኑ። 24  ቅፍርናሆም ከደረሱ በኋላ የቤተ መቅደሱን ግብር* የሚሰበስቡት ሰዎች ወደ ጴጥሮስ ቀርበው “መምህራችሁ የቤተ መቅደሱን ግብር አይከፍልም?” አሉት። 25  እሱም “ይከፍላል” አላቸው። ይሁን እንጂ ወደ ቤት በገባ ጊዜ ኢየሱስ ቀድሞት “ስምዖን ምን ይመስልሃል? የምድር ነገሥታት ቀረጥ ወይም ግብር የሚቀበሉት ከማን ነው? ከልጆቻቸው ወይስ ከሌሎች?” አለው። 26  ጴጥሮስ “ከሌሎች” ብሎ ሲመልስለት ኢየሱስ እንዲህ አለው:- “እንግዲያው ልጆቹ ግብር ከመክፈል ነፃ ናቸው። 27  ሆኖም እንቅፋት እንዳንሆንባቸው ወደ ባሕሩ ሄደህ መንጠቆ ጣል፤ ከዚያም መጀመሪያ የምትይዘውን ዓሣ አፉን ስትከፍት አንድ ስታቴር ሳንቲም* ታገኛለህ። ያንንም ወስደህ ለእኔና ለአንተ ክፈል።”

የግርጌ ማስታወሻዎች

ማቴ 17:21 * ይህ ጥቅስ በአንዳንድ የመጽሐፍ ቅዱስ ትርጉሞች ውስጥ የሚገኝ ቢሆንም በእጅ በተጻፉ የተለያዩ ዋና ዋና ጥንታዊ የግሪክኛ ቅጂዎች ውስጥ አይገኝም።
ማቴ 17:24 * ቃል በቃል፣ “የሁለት ድራክማ ዋጋ ያለው ሳንቲም።”
ማቴ 17:27 * ከተጨማሪው መረጃ ላይ 11ኛውን ርዕስ ተመልከት።