በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ማቴዎስ 15:1-39

15  ከዚያም ከኢየሩሳሌም የመጡ ፈሪሳውያንና ጸሐፍት ወደ ኢየሱስ ቀርበው እንዲህ አሉት:-  “ደቀ መዛሙርትህ የአባቶችን ወግ የሚጥሱት ለምንድን ነው? ለምሳሌ ያህል፣ ሊበሉ ሲሉ እጃቸውን አይታጠቡም።”  እሱም መልሶ እንዲህ አላቸው:- “እናንተስ ለወጋችሁ ስትሉ የአምላክን ትእዛዝ የምትጥሱት ለምንድን ነው?  ለምሳሌ ያህል አምላክ ‘አባትህንና እናትህን አክብር’ እንዲሁም ‘አባቱን ወይም እናቱን የሚሳደብ ፈጽሞ ይሙት’ ብሏል።  እናንተ ግን እንዲህ ትላላችሁ:- ‘ማንኛውም ሰው አባቱን ወይም እናቱን “ከእኔ ጥቅም ልታገኙ የምትችሉበት ማንኛውም ያለኝ ነገር ለአምላክ የተሰጠ ስጦታ ነው” ካለ  ፈጽሞ አባቱን ማክበር አያስፈልገውም።’ በመሆኑም ለወጋችሁ ስትሉ የአምላክን ቃል ሽራችኋል።  እናንተ ግብዞች፣ ኢሳይያስ እንዲህ በማለት ስለ እናንተ በትክክል ተንብዮአል:-  ‘ይህ ሕዝብ በከንፈሩ ያከብረኛል፤ ልቡ ግን ከእኔ እጅግ የራቀ ነው።  የሚያስተምሩት የሰውን ሥርዓት ስለሆነ እኔን የሚያመልኩት በከንቱ ነው።’” 10  ከዚያም ሕዝቡን ወደ እሱ ጠርቶ እንዲህ አላቸው:- “ስሙ፣ ትርጉሙንም አስተውሉ:- 11  ሰውን የሚያረክሰው ወደ አፉ የሚገባው አይደለም፤ ከዚህ ይልቅ ሰውን የሚያረክሰው ከአፉ የሚወጣው ነው።” 12  ከዚያም ደቀ መዛሙርቱ ቀርበው “ፈሪሳውያን የተናገርከውን ሰምተው እንደተሰናከሉ አውቀሃል?” አሉት። 13  እሱም መልሶ እንዲህ አላቸው:- “የሰማዩ አባቴ ያልተከለው ተክል ሁሉ ይነቀላል። 14  ተዉአቸው። እነሱ ዕውር መሪዎች ናቸው። ስለዚህ ዕውር ዕውርን ቢመራ ሁለቱም ጉድጓድ ውስጥ ይወድቃሉ።” 15  ጴጥሮስም መልሶ “ምሳሌውን ግልጽ አድርግልን” አለው። 16  በዚህ ጊዜ እንዲህ አላቸው:- “እናንተም እስካሁን ማስተዋል ተስኗችኋል? 17  ወደ አፍ የሚገባ ሁሉ ወደ ሆድ እንደሚዘልቅና ከዚያም ወጥቶ ወደ ጉድጓድ እንደሚገባ አታውቁም? 18  ይሁን እንጂ ከአፍ የሚወጣ ሁሉ ከልብ ይወጣል፤ ሰውንም የሚያረክሰው ይህ ነው። 19  ለምሳሌ ያህል ከልብ ክፉ ሐሳብ፣ ግድያ፣ ምንዝር፣ ዝሙት፣ ሌብነት፣ በሐሰት መመስከርና ስድብ ይወጣሉ። 20  ሰውን የሚያረክሱት እነዚህ ነገሮች ናቸው፤ እጅን ሳይታጠቡ መብላት ግን ሰውን አያረክስም።” 21  ኢየሱስ ከዚያ ወጥቶ ወደ ጢሮስና ሲዶና አካባቢ ሄደ። 22  በዚያ ክልል የምትኖር አንዲት ፊንቄያዊት ሴት መጥታ “ጌታ ሆይ፣ የዳዊት ልጅ፣ ምሕረት አድርግልኝ። ልጄን ጋኔን ክፉኛ ይዟታል” ብላ ጮኸች። 23  እሱ ግን ምንም መልስ አልሰጣትም። ስለዚህ ደቀ መዛሙርቱ ቀርበው “ይህች ሴት ከኋላችን እየተከተለች ስለምትጮኽ እባክህ አሰናብታት” ብለው ጠየቁት። 24  እሱም መልሶ “እኔ የተላክሁት ከእስራኤል ቤት ለጠፉት በጎች እንጂ ለሌላ ለማንም አይደለም” አለ። 25  ሴትየዋም ቀርባ “ጌታ ሆይ፣ እርዳኝ!” እያለች ትሰግድለት ጀመር። 26  እሱም መልሶ “የልጆችን ዳቦ ወስዶ ለቡችሎች መጣል ተገቢ አይደለም” አለ። 27  እሷም “አዎን ጌታ ሆይ፣ ግን እኮ ቡችሎችም ከጌቶቻቸው ማዕድ የሚወድቀውን ፍርፋሪ ይበላሉ” አለች። 28  በዚህ ጊዜ ኢየሱስ “አንቺ ሴት፣ እምነትሽ ታላቅ ነው፤ በይ እንደ ፍላጎትሽ ይሁንልሽ” አላት። ልጇም ከዚያ ሰዓት ጀምሮ ተፈወሰች። 29  ኢየሱስ ከዚያ ተነስቶ ወደ ገሊላ ባሕር አቅራቢያ መጣ፤ ወደ ተራራ ወጥቶም ተቀመጠ። 30  በዚህ ጊዜ እጅግ ብዙ ሰዎች አንካሶችን፣ ሽባዎችን፣ ዕውሮችን፣ ዲዳዎችንና ሌሎች በርካታ ሕመምተኞችን ይዘው ወደ እሱ በመምጣት እግሩ ሥር አስቀመጧቸው፤ እሱም ፈወሳቸው። 31  ሕዝቡ ዲዳዎች ሲናገሩ፣ አንካሶች ሲራመዱና ዕውሮች ሲያዩ ተመልክተው እጅግ ተደነቁ፤ የእስራኤልንም አምላክ አከበሩ። 32  ኢየሱስ ደቀ መዛሙርቱን ወደ እሱ ጠርቶ “እነዚህ ሰዎች ሦስት ቀን ሙሉ ከእኔ ጋር ስለቆዩና የሚበሉት ስለሌላቸው አዝንላቸዋለሁ፤ እንዲሁ ጦማቸውን ልሰዳቸው አልፈልግም። መንገድ ላይ ዝለው ሊወድቁ ይችላሉ” አላቸው። 33  ደቀ መዛሙርቱ ግን “በዚህ ገለልተኛ ስፍራ ይህን ሁሉ ሕዝብ ሊያጠግብ የሚችል በቂ ዳቦ ከየት እናገኛለን?” አሉት። 34  በዚህ ጊዜ ኢየሱስ “ስንት ዳቦ አላችሁ?” አላቸው። እነሱም “ሰባት ዳቦና ጥቂት ትንንሽ ዓሣዎች” አሉት። 35  እሱም ሕዝቡ መሬት ላይ እንዲቀመጥ ካዘዘ በኋላ 36  ሰባቱን ዳቦና ዓሣዎቹን ወሰደ፤ ካመሰገነ በኋላም ቆርሶ ለደቀ መዛሙርቱ ማከፋፈል ጀመረ፤ ደቀ መዛሙርቱ ደግሞ ለሕዝቡ አከፋፈሉ። 37  ሁሉም በልተው ጠገቡ፤ ከዚያም ሰባት ትላልቅ ቅርጫት ሙሉ የተረፈ ቁርስራሽ ሰበሰቡ። 38  ሆኖም የበሉት፣ ሴቶችንና ልጆችን ሳይጨምር አራት ሺህ ወንዶች ነበሩ። 39  በመጨረሻም ሕዝቡን ካሰናበተ በኋላ ጀልባ ተሳፍሮ ወደ መጌዶን ክልል መጣ።

የግርጌ ማስታወሻዎች