በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ማቴዎስ 14:1-36

14  በዚያን ጊዜ የአውራጃ ገዥ የነበረው ሄሮድስ* ስለ ኢየሱስ ሲሰማ  አገልጋዮቹን “ይህ መጥምቁ ዮሐንስ ነው። ከሞት ተነስቷል ማለት ነው፤ እንዲህ ያሉ ተአምራት መፈጸም የቻለውም ለዚህ ነው” አላቸው።  ሄሮድስ የወንድሙ የፊልጶስ ሚስት በሆነችው በሄሮድያዳ ምክንያት ዮሐንስን ይዞ በማሰር ወህኒ አስገብቶት ነበር።  ዮሐንስ ሄሮድስን “እሷን እንድታገባ ሕግ አይፈቅድልህም” ይለው ነበር።  ከዚህ የተነሳ ሄሮድስ ሊገድለው ይፈልግ የነበረ ቢሆንም ሕዝቡ እንደ ነቢይ ይመለከተው ስለነበር ሕዝቡን ፈራ።  ሆኖም የሄሮድስ ልደት በተከበረበት ዕለት የሄሮድያዳ ልጅ በተጋባዦቹ ፊት በመጨፈር ሄሮድስን እጅግ ደስ አሰኘችው፤  በመሆኑም የጠየቀችውን ሁሉ ሊሰጣት በመሐላ ቃል ገባላት።  ከዚያም እናቷ በሰጠቻት ምክር መሠረት “የመጥምቁ ዮሐንስን ራስ አሁኑኑ በሳህን ስጠኝ” አለችው።  ንጉሡ ቢያዝንም ስለ መሐላውና በማዕድ አብረውት ስለተቀመጡት ሲል እንዲሰጣት አዘዘ፤ 10  ሰው ልኮም የዮሐንስን ራስ በወህኒ ቤት አስቆረጠ። 11  ራሱንም በሳህን አምጥተው ለልጅቷ ሰጧት፤ እሷም ለእናቷ ሰጠቻት። 12  በኋላም የዮሐንስ ደቀ መዛሙርት መጡና አስከሬኑን ወስደው ቀበሩት፤ ከዚያም መጥተው ለኢየሱስ ነገሩት። 13  ኢየሱስ ይህን ሲሰማ ብቻውን ለመሆን በጀልባ ተሳፍሮ ገለል ወዳለ ስፍራ ሄደ፤ ሕዝቡ ግን መሄዱን ሰምተው ከየከተማው እየወጡ በእግር ተከተሉት። 14  ኢየሱስ ከጀልባው ሲወርድ እጅግ ብዙ ሕዝብ ተመለከተና በጣም አዘነላቸው፤ ሕመምተኞቻቸውንም ፈወሰ። 15  በመሸ ጊዜ ደቀ መዛሙርቱ ወደ እሱ ቀርበው “ቦታው ገለል ያለ ነው፣ ሰዓቱ ደግሞ ገፍቷል፤ ስለዚህ ሕዝቡ ወደ መንደሮቹ ሄደው የሚበሉት ነገር እንዲገዙ አሰናብታቸው” አሉት። 16  ይሁን እንጂ ኢየሱስ “መሄድ አያስፈልጋቸውም፤ የሚበሉት ነገር እናንተ ስጧቸው” አላቸው። 17  እነሱም “ከአምስት ዳቦና ከሁለት ዓሣ በስተቀር እዚህ ምንም ነገር የለንም” አሉት። 18  እሱም “ያለውን ወደ እኔ አምጡት” አላቸው። 19  ከዚያም ሕዝቡ ሣሩ ላይ እንዲቀመጡ አዘዘና አምስቱን ዳቦና ሁለቱን ዓሣ ይዞ ወደ ሰማይ በማየት ባረከ፤ ዳቦውን ከቆረሰ በኋላም ለደቀ መዛሙርቱ አከፋፈለ፤ እነሱ ደግሞ ለሕዝቡ አከፋፈሉ። 20  ሁሉም በልተው ጠገቡ፤ ከዚያም አሥራ ሁለት ቅርጫት ሙሉ የተረፈ ቁርስራሽ ሰበሰቡ። 21  የበሉትም ሴቶችንና ልጆችን ሳይጨምር አምስት ሺህ ወንዶች ነበሩ። 22  ወዲያውም እሱ ሕዝቡን እያሰናበተ ሳለ ደቀ መዛሙርቱን በጀልባ ተሳፍረው ወደ ባሕሩ ማዶ ቀድመውት እንዲሻገሩ ግድ አላቸው። 23  ሕዝቡን ካሰናበተ በኋላም ለመጸለይ ብቻውን ወደ ተራራ ወጣ። በጣም መሽቶ የነበረ ቢሆንም በዚያ ብቻውን ነበር። 24  በዚህ ጊዜ ጀልባው በመቶዎች የሚቆጠሩ ሜትሮች ከየብስ ርቆ የነበረ ሲሆን ነፋሱ ወደ እነሱ ይነፍስ ስለነበር ማዕበሉ በጣም አስቸገራቸው። 25  ሆኖም ኢየሱስ በአራተኛው ክፍለ ሌሊት* በባሕሩ ላይ እየተራመደ ወደ እነሱ መጣ። 26  ደቀ መዛሙርቱ በባሕሩ ላይ ሲራመድ ባዩት ጊዜ ደንግጠው “ምትሃት ነው!” አሉ። በፍርሃት ተውጠውም ጮኹ። 27  ሆኖም ኢየሱስ ወዲያውኑ “አይዟችሁ፣ እኔ ነኝ፤ አትፍሩ” አላቸው። 28  ጴጥሮስም መልሶ “ጌታ ሆይ፣ አንተ ከሆንክ በውኃው ላይ እየተራመድኩ ወደ አንተ እንድመጣ እዘዘኝ” አለው። 29  እሱም “ና!” አለው። በዚህ ጊዜ ጴጥሮስ ከጀልባው ላይ ወርዶ በውኃው ላይ እየተራመደ ወደ ኢየሱስ አመራ። 30  ሆኖም ማዕበሉን ሲያይ ፈራ፤ መስጠም ሲጀምርም “ጌታ ሆይ፣ አድነኝ!” ብሎ ጮኸ። 31  ወዲያው ኢየሱስ እጁን ዘርግቶ ያዘውና “አንተ እምነት የጎደለህ፣ ለምን ተጠራጠርክ?” አለው። 32  ጀልባው ላይ ከወጡ በኋላ ማዕበሉ ጸጥ አለ። 33  ከዚያም በጀልባው ውስጥ ያሉት “አንተ በእርግጥ የአምላክ ልጅ ነህ” ብለው ሰገዱለት። 34  ተሻግረውም ጌንሴሬጥ ወደተባለ ቦታ ደረሱ። 35  በዚያ ቦታ የሚኖሩ ሰዎች እሱ መሆኑን ሲያውቁ በዙሪያው ወዳለው አካባቢ ሁሉ መልእክት ላኩ፤ ሰዎችም የታመሙትን ሁሉ ወደ እሱ አመጡ። 36  የልብሱን ጫፍ ብቻ እንኳ ለመንካት ይለምኑት ጀመር፤ የነኩትም ሁሉ ሙሉ በሙሉ ተፈወሱ።

የግርጌ ማስታወሻዎች

ማቴ 14:1 ሉቃስ 3:1 ላይ የሚገኘውን የግርጌ ማስታወሻ ተመልከት።
ማቴ 14:25 ማርቆስ 13:35 ላይ የሚገኘውን የግርጌ ማስታወሻ ተመልከት።