በቀጥታ ወደ ዋናው ጉዳይ ግባ

በቀጥታ ወደ ርዕስ ማውጫው ሂድ

የይሖዋ ምሥክሮች

ቋንቋ ምረጥ አማርኛ

ማቴዎስ 13:1-58

13  በዚያን ቀን ኢየሱስ ከቤት ወጥቶ በባሕሩ ዳር ተቀመጠ፤  ብዙ ሰዎችም ወደ እሱ መጥተው ተሰበሰቡ፤ በመሆኑም ጀልባ ላይ ወጥቶ ተቀመጠ፤ ሕዝቡም ሁሉ በባሕሩ ዳር ቆመው ነበር።  ከዚያም ብዙ ነገሮችን እንዲህ እያለ በምሳሌ ይነግራቸው ጀመር:- “እነሆ፣ አንድ ዘሪ ሊዘራ ወጣ፤  በሚዘራበት ጊዜም አንዳንዶቹ ዘሮች መንገድ ዳር ወደቁ፤ ወፎችም መጥተው ለቀሟቸው።  ሌሎቹ ደግሞ ብዙ አፈር በሌላቸው ድንጋያማ ቦታዎች ላይ ወደቁ፤ አፈሩም ጥልቀት ስለሌለው ወዲያውኑ በቀሉ።  ፀሐይ በወጣ ጊዜ ግን ተቃጠሉ፤ ሥር ስላልነበራቸውም ደረቁ።  እንዲሁም ሌሎቹ ዘሮች በእሾህ መካከል ወደቁ፤ እሾሁም አድጎ አነቃቸው።  ሌሎቹ ደግሞ ጥሩ አፈር ላይ ወድቀው ፍሬ ማፍራት ጀመሩ፤ አንዱ መቶ፣ አንዱ ስልሳ፣ ሌላውም ሠላሳ እጥፍ አፈራ።  ጆሮ ያለው ሁሉ ይስማ።” 10  ከዚያም ደቀ መዛሙርቱ መጥተው “በምሳሌ የምትነግራቸው ለምንድን ነው?” አሉት። 11  እሱም መልሶ እንዲህ አለ:- “ለእናንተ የመንግሥተ ሰማያትን ቅዱስ ሚስጥሮች የመረዳት ችሎታ ተሰጥቷችኋል፤ ለእነሱ ግን አልተሰጣቸውም። 12  ላለው ሁሉ ይጨመርለታል፣ ደግሞም ይትረፈረፍለታል፤ የሌለው ግን ያው ያለው እንኳ ይወሰድበታል። 13  በምሳሌ የምነግራቸው ለዚህ ነው፤ ምክንያቱም ቢያዩም የሚያዩት እንዲያው በከንቱ ነው፤ ቢሰሙም የሚሰሙት እንዲያው በከንቱ ነው፤ ትርጉሙንም አያስተውሉም፤ 14  በመሆኑም እንዲህ የሚለው የኢሳይያስ ትንቢት በእነሱ ላይ እየተፈጸመ ነው:- ‘መስማቱን ትሰማላችሁ ግን በፍጹም ትርጉሙን አታስተውሉም፤ ማየቱን ታያላችሁ ግን በፍጹም ልብ አትሉም። 15  ምክንያቱም በዓይናቸው አይተው፣ በጆሯቸው ሰምተው እንዲሁም በልባቸው አስተውለው ወደ እኔ እንዳይመለሱና እንዳልፈውሳቸው የዚህ ሕዝብ ልብ ደንድኗል፤ በጆሯቸው ሰምተው ምላሽ አልሰጡም፣ ዓይናቸውንም ጨፍነዋል።’ 16  “እናንተ ግን ዓይኖቻችሁ ስለሚያዩ፣ ጆሮዎቻችሁም ስለሚሰሙ ደስተኞች ናችሁ። 17  እውነት እላችኋለሁ፣ ብዙ ነቢያትና ጻድቃን እናንተ እያያችሁት ያለውን ነገር ለማየት ተመኝተው ነበር፤ ግን አላዩም፤ እየሰማችሁት ያለውንም ነገር ለመስማት ተመኝተው ነበር፤ ግን አልሰሙም። 18  “እንግዲህ እናንተ ዘር የዘራውን ሰው ምሳሌ ስሙ። 19  አንድ ሰው የመንግሥቱን ቃል ሰምቶ የማያስተውል ከሆነ ክፉው መጥቶ በልቡ ውስጥ የተዘራውን ዘር ይነጥቀዋል፤ በመንገድ ዳር የተዘራው ዘር ይህ ነው። 20  በድንጋያማ ቦታ ላይ የተዘራው ደግሞ ቃሉን ሲሰማ ወዲያውኑ በደስታ የሚቀበል ሰው ነው። 21  ሆኖም ቃሉ በውስጡ ሥር ስለማይሰድ የሚቆየው ለጥቂት ጊዜ ነው፤ በቃሉ የተነሳም መከራ ወይም ስደት ሲደርስበት ወዲያው ይሰናከላል። 22  በእሾህ መካከል የተዘራው ደግሞ ቃሉን የሚሰማ ነው፤ ይሁንና የዚህ ሥርዓት ጭንቀት እንዲሁም ሀብት ያለው የማታለል ኃይል ቃሉን ያንቀዋል፤ የማያፈራም ይሆናል። 23  በጥሩ አፈር ላይ የተዘራው ደግሞ ቃሉን የሚሰማና የሚያስተውል ነው፤ ፍሬም ያፈራል፤ አንዱ መቶ፣ አንዱም ስልሳ፣ ሌላውም ሠላሳ እጥፍ ይሰጣል።” 24  ሌላም ምሳሌ እንዲህ ሲል አቀረበላቸው:- “መንግሥተ ሰማያት በእርሻው ላይ ጥሩ ዘር ከዘራ ሰው ጋር ይመሳሰላል። 25  ነገር ግን ሰው ሁሉ ተኝቶ ሳለ ጠላቱ መጥቶ በስንዴው ላይ እንክርዳድ ዘርቶ ሄደ። 26  ቡቃያው አድጎ ፍሬ ባፈራ ጊዜ እንክርዳዱም አብሮ ታየ። 27  ስለሆነም የባለቤቱ ባሪያዎች ወደ እሱ ቀርበው ‘ጌታ ሆይ፣ በእርሻህ ላይ የዘራኸው ጥሩ ዘር አልነበረም እንዴ? ታዲያ እንክርዳዱ ከየት መጣ?’ አሉት። 28  እሱም ‘ይህን ያደረገው አንድ ጠላት የሆነ ሰው ነው’ አላቸው። እነሱም ‘ታዲያ ሄደን እንድንነቅለው ትፈልጋለህ?’ አሉት። 29  እሱ ግን እንዲህ አላቸው:- ‘አይ፣ አይሆንም፤ ምክንያቱም እንክርዳዱን ስትነቅሉ ስንዴውንም አብራችሁ ልትነቅሉ ትችላላችሁ። 30  ተዉት፣ እስከ መከር ጊዜ ድረስ አብሮ ይደግ፤ የመከር ወቅት ሲደርስ አጫጆቹን፣ በመጀመሪያ እንክርዳዱን ሰብስቡና እንዲቃጠል በየነዶው እሰሩ፤ ከዚያም ስንዴውን ሰብስባችሁ ወደ ጎተራዬ አስገቡ እላቸዋለሁ።’” 31  ሌላም ምሳሌ እንዲህ ሲል አቀረበላቸው:- “መንግሥተ ሰማያት አንድ ሰው ወስዶ እርሻው ውስጥ ከተከላት አንዲት የሰናፍጭ ዘር ጋር ይመሳሰላል፤ 32  የሰናፍጭ ዘር ከሌሎች ዘሮች ሁሉ ያነሰች ብትሆንም ስታድግ ግን ከአትክልቶች ሁሉ በልጣ ዛፍ ስለምትሆን የሰማይ ወፎች መጥተው በቅርንጫፎቿ ላይ መስፈሪያ ያገኛሉ።” 33  አሁንም ሌላ ምሳሌ እንዲህ ሲል ነገራቸው:- “መንግሥተ ሰማያት አንዲት ሴት ወስዳ ሊጡ በሙሉ እስኪቦካ ድረስ በሦስት ትልልቅ መስፈሪያ ዱቄት ውስጥ ከሰወረችው እርሾ ጋር ይመሳሰላል።” 34  ኢየሱስ ለሕዝቡ ይህን ሁሉ ነገር በምሳሌ ተናገረ። እንዲያውም ያለ ምሳሌ አይነግራቸውም ነበር፤ 35  ይህም የሆነው “አፌን በምሳሌ እከፍታለሁ፤ ዓለም ከተመሠረተበት ጊዜ ጀምሮ የተሰወሩትን ነገሮች አሳውቃለሁ” ተብሎ በነቢዩ የተነገረው ይፈጸም ዘንድ ነው። 36  ከዚያም ሕዝቡን ካሰናበተ በኋላ ወደ ቤት ገባ። ደቀ መዛሙርቱም ወደ እሱ ቀርበው “በእርሻው ውስጥ ስላለው እንክርዳድ የተናገርከውን ምሳሌ አብራራልን” አሉት። 37  እሱም መልሶ እንዲህ አለ:- “ጥሩውን ዘር የዘራው የሰው ልጅ ነው፤ 38  እርሻው ዓለም ነው፤ ጥሩው ዘር ደግሞ የመንግሥቱ ልጆች ናቸው፤ እንክርዳዱ ግን የክፉው ልጆች ናቸው፤ 39  እንክርዳዱን የዘራው ጠላት፣ ዲያብሎስ ነው። መከሩ የዚህ ሥርዓት መደምደሚያ ሲሆን አጫጆቹ ደግሞ መላእክት ናቸው። 40  በመሆኑም እንክርዳዱ ተሰብስቦ በእሳት እንደሚቃጠል ሁሉ በዚህ ሥርዓት መደምደሚያም እንዲሁ ይሆናል። 41  የሰው ልጅ መላእክቱን ይልካል፤ እነሱም እንቅፋት የሚፈጥሩትን ነገሮች ሁሉና ዓመፅ የሚፈጽሙትን ሰዎች ከመንግሥቱ ይለቅማሉ፤ 42  ወደ እቶን እሳትም ይጥሏቸዋል። በዚያም ያለቅሳሉ፣ በሐዘንም ጥርሳቸውን ያፋጫሉ። 43  በዚያ ጊዜ ጻድቃን በአባታቸው መንግሥት እንደ ፀሐይ ደምቀው ያበራሉ። ጆሮ ያለው ሁሉ ይስማ። 44  “መንግሥተ ሰማያት በእርሻ ውስጥ ከተደበቀ ውድ ሀብት ጋር ይመሳሰላል፤ አንድ ሰው ባገኘው ጊዜ ሸሸገው፤ በጣም ከመደሰቱም የተነሳ ሄዶ ያለውን ሁሉ በመሸጥ እርሻውን ገዛው። 45  “እንዲሁም መንግሥተ ሰማያት ጥሩ ዕንቁ ከሚፈልግ ተጓዥ ነጋዴ ጋር ይመሳሰላል። 46  ከፍተኛ ዋጋ ያለው አንድ ዕንቁ ባገኘ ጊዜ ሄዶ ያለውን ሁሉ ወዲያውኑ በመሸጥ ዕንቁውን ገዛው። 47  “ደግሞም መንግሥተ ሰማያት ወደ ባሕር ተጥሎ የተለያየ ዓይነት ዓሣ ከሰበሰበ መረብ ጋር ይመሳሰላል። 48  መረቡ በሞላ ጊዜ ወደ ባሕሩ ዳር ጎትተው አወጡት፤ ከዚያም ተቀምጠው ጥሩ ጥሩውን እየለዩ በዕቃ ውስጥ አስቀመጡ፤ የማይፈለገውን ግን ጣሉት። 49  በዚህ ሥርዓት መደምደሚያም እንደዚሁ ይሆናል፤ መላእክት ሄደው ክፉዎችን ከጻድቃን ይለያሉ፤ 50  ወደ እቶን እሳትም ይጥሏቸዋል። በዚያም ያለቅሳሉ፣ በሐዘንም ጥርሳቸውን ያፋጫሉ። 51  “የዚህ ሁሉ ትርጉም ገብቷችኋል?” እነሱም “አዎን” አሉት። 52  ከዚያም ኢየሱስ “እንደዚያ ከሆነ፣ የሕዝብ አስተማሪ ሁሉ ስለ መንግሥተ ሰማያት ጠንቅቆ ሲያውቅ ከከበረ ሀብት ማከማቻው አዲስና አሮጌ ዕቃ ከሚያወጣ ባለቤት ጋር ይመሳሰላል” አላቸው። 53  ኢየሱስ እነዚህን ምሳሌዎች ተናግሮ ከጨረሰ በኋላ ከዚያ ስፍራ ተነስቶ ሄደ። 54  ወደ ትውልድ አገሩም ከመጣ በኋላ በምኩራባቸው ያስተምራቸው ጀመር፤ ሰዎቹም ተገርመው እንዲህ አሉ:- “ይህ ሰው ይህን ጥበብና እነዚህን ተአምራት የማድረግ ችሎታ ከየት አገኘ? 55  ይህ የአናጢው ልጅ አይደለም? እናቱስ ማርያም የምትባለው አይደለችም? ወንድሞቹስ ያዕቆብ፣ ዮሴፍ፣ ስምዖንና ይሁዳ አይደሉም? 56  እህቶቹስ ሁሉ ከእኛ ጋር አይደሉም? ታዲያ ይህ ሰው ይህን ሁሉ ነገር ከየት አገኘው?” 57  ከዚህም የተነሳ ይሰናከሉበት ጀመር። ኢየሱስ ግን “ነቢይ በገዛ አገሩና በገዛ ቤቱ ካልሆነ በስተቀር በሌላ ቦታ ሁሉ ይከበራል” አላቸው። 58  ባለማመናቸው ምክንያት በዚያ ብዙ ተአምራት አላደረገም።

የግርጌ ማስታወሻዎች