በቀጥታ ወደ ዋናው ጉዳይ ግባ

በቀጥታ ወደ ርዕስ ማውጫው ሂድ

የይሖዋ ምሥክሮች

ቋንቋ ምረጥ አማርኛ

ማቴዎስ 12:1-50

12  በዚያን ጊዜ ኢየሱስ በሰንበት ቀን በእርሻ መካከል አለፈ። ደቀ መዛሙርቱም ተርበው ስለነበር እሸት እየቀጠፉ መብላት ጀመሩ።  ፈሪሳውያን ይህን ባዩ ጊዜ “ተመልከት! ደቀ መዛሙርትህ በሰንበት ቀን በሕግ የተከለከለ ነገር እያደረጉ ነው” አሉት።  እሱም እንዲህ አላቸው:- “ዳዊት እሱና ከእሱ ጋር የነበሩት ሰዎች በተራቡ ጊዜ ምን እንዳደረገ አላነበባችሁም?  ወደ አምላክ ቤት ገብቶ ከካህናት በስተቀር እሱም ሆነ ከእሱ ጋር የነበሩት ሰዎች እንዲበሉ ያልተፈቀደውን የመባ ኅብስት አልበሉም?  ደግሞስ ካህናት በሰንበት ቀን በቤተ መቅደሱ ውስጥ ሥራ እንደሚሠሩና* ይህም እንደ በደል እንደማይቆጠርባቸው በሕጉ ላይ አላነበባችሁም?  እኔ ግን እላችኋለሁ፣ ከቤተ መቅደሱ የሚበልጥ እዚህ አለ።  ይሁንና ‘እኔ የምፈልገው ምሕረትን እንጂ መሥዋዕትን አይደለም’ የሚለውን ቃል ትርጉም ተረድታችሁ ቢሆን ኖሮ ምንም በደል ባልሠሩት ላይ ባልፈረዳችሁ ነበር።  ምክንያቱም የሰው ልጅ የሰንበት ጌታ ነው።”  ከዚያ ስፍራ ከሄደ በኋላ ወደ ምኩራባቸው ገባ፤ 10  በዚያም እጁ የሰለለ አንድ ሰው ነበር። እነሱም ኢየሱስን የሚከሱበት ነገር ለማግኘት ፈልገው “በሰንበት መፈወስ በሕግ ተፈቅዷል?” ሲሉ ጠየቁት። 11  እሱም እንዲህ አላቸው:- “ከእናንተ መካከል አንድ በግ ያለው ቢኖርና በጉ በሰንበት ቀን ጉድጓድ ውስጥ ቢገባበት ይዞ የማያወጣው ይኖራል? 12  ታዲያ ሰው ከበግ እጅግ አይበልጥም? ስለዚህ በሰንበት መልካም ነገር ማድረግ ተፈቅዷል።” 13  ከዚያም ሰውየውን “እጅህን ዘርጋ” አለው። ሰውየውም እጁን ዘረጋ፤ እጁም እንደ ሌላኛው እጅ ደህና ሆነለት። 14  ፈሪሳውያኑ ግን ወጥተው እሱን እንዴት ሊያጠፉት እንደሚችሉ ተማከሩ። 15  ኢየሱስም ይህን ሲያውቅ አካባቢውን ለቆ ሄደ። ብዙ ሰዎችም ተከትለውት ሄዱ፤ እሱም ሁሉንም ፈወሳቸው፤ 16  ሆኖም ማንነቱን እንዳይገልጡ በጥብቅ አዘዛቸው፤ 17  ይህንም ያደረገው በነቢዩ ኢሳይያስ እንዲህ ተብሎ የተነገረው ይፈጸም ዘንድ ነው:- 18  “እነሆ፣ የመረጥኩት አገልጋዬ፣ የምወደውና ነፍሴ ደስ የምትሰኝበት እሱ ነው! መንፈሴን በእሱ ላይ አደርጋለሁ፤ ፍትሕ ማለት ምን ማለት እንደሆነም ለሰዎች ያሳውቃል። 19  አይጨቃጨቅም ወይም አይጮኽም፤ በአውራ ጎዳናዎችም ላይ ድምፁን የሚሰማ አይኖርም። 20  ፍትሕን ለድል እስኪያበቃ ድረስ፣ የተቀጠቀጠን ሸምበቆ አይሰብርም፤ የሚጤስንም የጧፍ ክር አያጠፋም። 21  በእርግጥም አሕዛብ በስሙ ተስፋ ያደርጋሉ።” 22  ከዚያም ጋኔን ያደረበት ዕውርና ዲዳ ሰው ወደ እሱ አመጡ፤ እሱም ፈወሰው፣ ዲዳውም መናገርና ማየት ቻለ። 23  ሕዝቡም ሁሉ በጣም ተደንቀው “ይህ  የዳዊት ልጅ ይሆን እንዴ?” ይሉ ጀመር። 24  ፈሪሳውያን ይህን ሲሰሙ “ይህ ሰው በአጋንንት አለቃ በብዔልዜቡል ካልሆነ በስተቀር አጋንንትን ሊያስወጣ አይችልም” አሉ። 25  ኢየሱስም ሐሳባቸውን አውቆ እንዲህ አላቸው:- “እርስ በርሱ የሚከፋፈል መንግሥት ሁሉ ይጠፋል፤ እንዲሁም እርስ በርሱ የሚከፋፈል ከተማ ወይም ቤት ሁሉ ጸንቶ አይቆምም። 26  በተመሳሳይም ሰይጣን ሰይጣንን የሚያስወጣ ከሆነ እርስ በርሱ ተከፋፍሏል ማለት ነው፤ ይህ ከሆነ ታዲያ መንግሥቱ እንዴት ጸንቶ ሊቆም ይችላል? 27  በተጨማሪም እኔ አጋንንትን የማስወጣው በብዔልዜቡል ከሆነ፣ ልጆቻችሁ የሚያስወጧቸው ታዲያ በማን ነው? ልጆቻችሁ ፈራጆች የሚሆኑባችሁ በዚህ ምክንያት ነው። 28  ሆኖም አጋንንትን የማስወጣው በአምላክ መንፈስ ከሆነ የአምላክ መንግሥት ሳታስቡት ደርሶባችኋል። 29  ደግሞስ አንድ ሰው በቅድሚያ ሰውየውን ሳያስር ወደ አንድ ብርቱ ሰው ቤት ገብቶ እንዴት ንብረቱን ሊወስድ ይችላል? ካሰረው በኋላ ግን ቤቱን ይዘርፋል። 30  ከእኔ ጎን ያልቆመ ሁሉ ይቃወመኛል፤ ከእኔ ጋር የማይሰበስብም ሁሉ ይበትናል። 31  “ስለሆነም እላችኋለሁ፣ ሰዎች የሚሠሩት ኃጢአትና የሚሳደቡት ስድብ ሁሉ ይቅር ይባልላቸዋል፤ መንፈስ ቅዱስን የሰደበ ግን ይቅር አይባልለትም። 32  ለምሳሌ በሰው ልጅ ላይ ክፉ ቃል የሚናገር ሁሉ በደሉ ይቅር ይባልለታል፤ በመንፈስ ቅዱስ ላይ ክፉ ቃል የሚናገር ሁሉ ግን በዚህም ሆነ በሚመጣው ሥርዓት በደሉ ይቅር አይባልለትም። 33  “መልካም ዛፍ ከሆናችሁ መልካም ፍሬ ታፈራላችሁ፤ የበሰበሰ ዛፍ ከሆናችሁ ደግሞ የበሰበሰ ፍሬ ታፈራላችሁ፤ ምክንያቱም ዛፍ የሚታወቀው በፍሬው ነው። 34  እናንት የእፉኝት ልጆች፣ ክፉዎች ሆናችሁ ሳለ እንዴት መልካም ነገር ልትናገሩ ትችላላችሁ? ምክንያቱም አንደበት የሚናገረው በልብ ውስጥ የሞላውን ነው። 35  ጥሩ ሰው ካከማቸው መልካም ነገር ጥሩ ነገር ያወጣል፤ ክፉ ሰው ግን ካከማቸው መጥፎ ነገር ክፉ ነገር ያወጣል። 36  ነገር ግን እላችኋለሁ፣ ሰዎች ለሚናገሩት ከንቱ ቃል ሁሉ በፍርድ ቀን ይጠየቁበታል፤ 37  ምክንያቱም ከቃልህ የተነሳ ጻድቅ ትባላለህ፣ ከቃልህም የተነሳ ትኮነናለህ።” 38  ከዚያም ከጸሐፍትና ከፈሪሳውያን አንዳንዶቹ መልሰው “መምህር፣ ምልክት እንድታሳየን እንፈልጋለን” አሉት። 39  እሱም መልሶ እንዲህ አላቸው:- “ክፉና አመንዝራ* ትውልድ ሁልጊዜ ምልክት ማየት ይፈልጋል፤ ሆኖም ከነቢዩ ከዮናስ ምልክት በስተቀር ምንም ምልክት አይሰጠውም። 40  ዮናስ በትልቅ ዓሣ ሆድ ውስጥ ሦስት ቀንና ሦስት ሌሊት እንደነበረ ሁሉ የሰው ልጅም በምድር ልብ ውስጥ ሦስት ቀንና ሦስት ሌሊት ይቆያል። 41  የነነዌ ሰዎች የዮናስን ስብከት ሰምተው ንስሐ ስለገቡ በፍርድ ቀን ከዚህ ትውልድ ጋር ተነስተው ይኮንኑታል፤ ነገር ግን ከዮናስ የሚበልጥ እዚህ አለ። 42  የደቡብ ንግሥት የሰለሞንን ጥበብ ለመስማት ከምድር ዳርቻ ስለመጣች በፍርድ ቀን ከዚህ ትውልድ ጋር ተነስታ ትኮንነዋለች፤ ነገር ግን ከሰለሞን የሚበልጥ እዚህ አለ። 43  “ርኩስ መንፈስ ከሰው ሲወጣ የሚያርፍበት ቦታ ፍለጋ በደረቅ ስፍራ ይንከራተታል፤ ሆኖም የሚያርፍበት ቦታ አያገኝም። 44  ከዚያም ‘ወደ ወጣሁበት ቤቴ ተመልሼ እሄዳለሁ’ ይላል፤ ሲመለስም ባዶ ሆኖ፣ ጸድቶና አጊጦ ያገኘዋል። 45  ከዚያም ሄዶ ከእሱ የከፉ የተለያዩ ሰባት መናፍስት ይዞ ይመጣል፤ ገብተውም ይኖሩበታል፤ የዚያም ሰው የኋለኛው ሁኔታ ከቀድሞው የከፋ ይሆንበታል። ይህ ክፉ ትውልድም ተመሳሳይ ነገር ይደርስበታል።” 46  ኢየሱስ ለሕዝቡ እየተናገረ ሳለ እናቱና ወንድሞቹ ሊያነጋግሩት ፈልገው ውጭ ቆመው ነበር። 47  ስለሆነም አንድ ሰው “እነሆ፣ እናትህና ወንድሞችህ ሊያነጋግሩህ ፈልገው ውጭ ቆመዋል” አለው። 48  ኢየሱስም ለሰውየው መልሶ “እናቴ ማን ናት? ወንድሞቼስ እነማን ናቸው?” አለው። 49  እጁንም ወደ ደቀ መዛሙርቱ ዘርግቶ እንዲህ አለ:- “እናቴና ወንድሞቼ እነዚህ ናቸው! 50  ምክንያቱም በሰማይ ያለውን የአባቴን ፈቃድ የሚያደርግ ሁሉ ወንድሜ፣ እህቴና እናቴ ነው።”

የግርጌ ማስታወሻዎች

ማቴ 12:5 * ቃል በቃል፣ “ሰንበትን ቅዱስ አድርገው እንደማይመለከቱ።”
ማቴ 12:39 * ወይም፣ “ለአምላክ ታማኝ ያልሆነ።”