በቀጥታ ወደ ዋናው ጉዳይ ግባ

በቀጥታ ወደ ርዕስ ማውጫው ሂድ

የይሖዋ ምሥክሮች

ቋንቋ ምረጥ አማርኛ

ማቴዎስ 11:1-30

11  ኢየሱስ ለአሥራ ሁለት ደቀ መዛሙርቱ መመሪያ ሰጥቶ ከጨረሰ በኋላ በሌሎች ከተሞች ለማስተማርና ለመስበክ ሄደ።  ዮሐንስ በእስር ቤት ሆኖ መሲሑ ስላከናወናቸው ሥራዎች ሲሰማ የራሱን ደቀ መዛሙርት በመላክ  “ይመጣል የተባልከው አንተ ነህ ወይስ ሌላ እንጠብቅ?” አለው።  ኢየሱስም እንዲህ ብሎ መለሰላቸው:- “ሄዳችሁ እየሰማችሁና እያያችሁ ያላችሁትን ነገር ለዮሐንስ ንገሩት፤  ዕውሮች እያዩ ነው፣ አንካሶች እየተራመዱ ነው፣ የሥጋ ደዌ የያዛቸው እየነጹ ነው፣ ደንቆሮዎች እየሰሙ ነው፣ ሙታን እየተነሱ ነው፣ ለድሆችም ምሥራቹ እየተሰበከ ነው፤  በእኔ የማይሰናከል ደስተኛ ነው።”  መልእክተኞቹ ከሄዱ በኋላ ኢየሱስ ዮሐንስን በተመለከተ ለሕዝቡ እንዲህ አለ:- “ወደ ምድረ በዳ የሄዳችሁት ምን ለማየት ነበር? ነፋስ የሚያወዛውዘውን ሸምበቆ ለማየት ነው?  ታዲያ ምን ለማየት ነበር የሄዳችሁት? ያማረ ልብስ የለበሰ ሰው ለማየት? ያማረ ልብስ የለበሱማ የሚገኙት በነገሥታት ቤት ነው።  ታዲያ ለምን ሄዳችሁ? ነቢይ ለማየት? አዎ፣ እላችኋለሁ፣ ከነቢይም የሚበልጥ ነው። 10  ‘እነሆ፣ ከፊትህ እየሄደ መንገድህን የሚያዘጋጅ መልእክተኛዬን እኔ ራሴ በፊትህ እልካለሁ’ ተብሎ የተጻፈው ስለ እሱ ነው። 11  እውነት እላችኋለሁ፣ ከሴት ከተወለዱት መካከል ከመጥምቁ ዮሐንስ የሚበልጥ አልተነሳም፤ ሆኖም በመንግሥተ ሰማያት ዝቅተኛ የሆነው እንኳ ይበልጠዋል። 12  መንግሥተ ሰማያት ከመጥምቁ ዮሐንስ ዘመን ጀምሮ እስካሁን ድረስ ሰዎች የሚጋደሉለት ግብ ሆኗል፤ በተጋድሏቸው የሚገፉም ይጨብጡታል። 13  ነቢያትም ሆኑ ሕጉ እስከ ዮሐንስ ድረስ ተንብየዋል፤ 14  እንግዲህ ለመቀበል ፈቃደኛ ከሆናችሁ፣ ‘ይመጣል የተባለው ኤልያስ’ እሱ ራሱ ነው። 15  ጆሮ ያለው ይስማ። 16  “ይህን ትውልድ ከማን ጋር ላመሳስለው? በገበያ ስፍራ ተቀምጠው ጓደኞቻቸውን እየተጣሩ እንዲህ ከሚሉ ልጆች ጋር ይመሳሰላል:- 17  ‘ዋሽንት ነፋንላችሁ፣ እናንተ ግን አልጨፈራችሁም፤ ሙሾ አወረድንላችሁ፣ እናንተ ግን በሐዘን ደረታችሁን አልደቃችሁም።’ 18  በተመሳሳይም ዮሐንስ ሳይበላና ሳይጠጣ መጣ፣ ሰዎች ግን ‘ጋኔን አለበት’ አሉ፤ 19  የሰው ልጅ እየበላና እየጠጣ ሲመጣ ደግሞ ‘እዩ፣ ይህን ሆዳምና ለወይን ጠጅ ያደረ፣ የቀረጥ ሰብሳቢዎችና የኃጢአተኞች ወዳጅ’ አሉ። የሆነ ሆኖ፣ ጥበብ ጻድቅ መሆኗ በሥራዋ ተረጋግጧል።” 20  ከዚያም አብዛኞቹን ተአምራት የፈጸመባቸውን ከተሞች ንስሐ ባለመግባታቸው የተነሳ እንዲህ ሲል ይነቅፋቸው ጀመር:- 21  “ወዮልሽ ኮራዚን! ወዮልሽ ቤተሳይዳ! በእናንተ ውስጥ የተደረጉት ተአምራት በጢሮስና በሲዶና ተደርገው ቢሆን ኖሮ ገና ድሮ ማቅ ለብሰውና አመድ ላይ ተቀምጠው ንስሐ በገቡ ነበር። 22  ስለዚህ እላችኋለሁ፣ በፍርድ ቀን ከእናንተ ይልቅ ለጢሮስና ለሲዶና ቅጣቱ ይቀልላቸዋል። 23  አንቺም ቅፍርናሆም ወደ ሰማይ ከፍ የምትዪ ይመስልሻል? ወደ ሔዲስ* ትወርጃለሽ፤ ምክንያቱም በአንቺ ውስጥ የተደረጉት ተአምራት በሰዶም ተደርገው ቢሆን ኖሮ እስከ ዛሬ በኖረች ነበር። 24  ስለዚህ እላችኋለሁ፣ በፍርድ ቀን ከአንቺ ይልቅ ለሰዶም ምድር ቅጣቱ ይቀልላታል።” 25  በዚያን ጊዜ ኢየሱስ እንዲህ አለ:- “የሰማይና የምድር ጌታ አባት ሆይ፣ እነዚህን ነገሮች ከጥበበኞችና ከአዋቂዎች ሰውረህ ለሕፃናት ስለገለጥክላቸው በሕዝብ ፊት አወድስሃለሁ። 26  አዎ፣ አባት ሆይ፣ ይህን ማድረጉ የአንተ ፈቃድ ሆኖ ተገኝቷል። 27  አባቴ ሁሉንም ነገር ለእኔ ሰጥቶኛል፤ ከአብ በቀር ወልድን ሙሉ በሙሉ የሚያውቅ የለም፣ ከወልድና ወልድ ሊገልጥለት ከሚፈቅድ በቀር አብን ሙሉ በሙሉ የሚያውቅ ማንም የለም። 28  እናንተ የደከማችሁና ሸክም የከበዳችሁ ሁሉ ወደ እኔ ኑ፣ እኔም እረፍት እሰጣችኋለሁ። 29  ቀንበሬን ተሸከሙ፣ ከእኔም ተማሩ፤ እኔ ገርና በልቤ ትሑት ነኝ፤ ለነፍሳችሁም እረፍት ታገኛላችሁ። 30  ምክንያቱም ቀንበሬ ልዝብ፣ ሸክሜም ቀላል ነው።”

የግርጌ ማስታወሻዎች

ማቴ 11:23 * ከተጨማሪው መረጃ ላይ 8ኛውን ርዕስ ተመልከት።