በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ማርቆስ 9:1-50

9  ቀጥሎም “እውነት እላችኋለሁ፣ እዚህ ከቆሙት መካከል አንዳንዶች የአምላክ መንግሥት በኃይል ሲመጣ እስኪያዩ ድረስ ፈጽሞ ሞትን አይቀምሱም” አላቸው።  በመሆኑም ኢየሱስ ከስድስት ቀን በኋላ ጴጥሮስን፣ ያዕቆብንና ዮሐንስን ወደ አንድ ረጅም ተራራ ብቻቸውን ይዟቸው ወጣ። በፊታቸውም መልኩ ተለወጠ።  ልብሱም በምድር ላይ ያለ ማንኛውም ልብስ አጣቢ አጥቦ ሊያነጣው ከሚችለው በላይ እጅግ ነጭ ሆኖ አንጸባረቀ።  ደግሞም ኤልያስና ሙሴ ታዩአቸው፤ ከኢየሱስም ጋር እየተነጋገሩ ነበር።  በዚህ ጊዜ ጴጥሮስ ኢየሱስን “ረቢ፣* እዚህ መሆን ለእኛ መልካም ነው፤ ስለዚህ አንድ ለአንተ፣ አንድ ለሙሴና አንድ ለኤልያስ ሦስት ድንኳኖች እንትከል” አለው።  እርግጥ፣ በጣም ስለፈሩ የሚናገረውን አያውቅም ነበር።  ከዚያም ደመና መጥቶ ጋረዳቸው፤ ከደመናውም “የምወደው ልጄ ይህ ነው፤ እሱን ስሙት” የሚል ድምፅ መጣ።  ሆኖም ድንገት ዙሪያቸውን ሲመለከቱ ከኢየሱስ በቀር ማንም አብሯቸው አልነበረም።  ከተራራው እየወረዱ ሳሉ የሰው ልጅ ከሞት እስኪነሳ ድረስ ያዩትን ለማንም እንዳይናገሩ በግልጽ አዘዛቸው። 10  እነሱም ቃሉን በልባቸው አኖሩ፤ ነገር ግን ከሞት መነሳት ሲል ምን ማለቱ እንደሆነ እርስ በርሳቸው ተነጋገሩ። 11  ከዚያም “ጸሐፍት በመጀመሪያ ኤልያስ መምጣት አለበት የሚሉት ለምንድን ነው?” ሲሉ ይጠይቁት ጀመር። 12  እሱም እንዲህ አላቸው:- “በእርግጥ ኤልያስ መጀመሪያ መጥቶ ሁሉንም ነገር ወደ ቀድሞ ሁኔታው ይመልሳል፤ ይሁንና የሰው ልጅ ብዙ መከራ መቀበልና መናቅ እንዳለበት የተጻፈው ለምን ይመስላችኋል? 13  ነገር ግን እላችኋለሁ፣ ኤልያስ በእርግጥ መጥቷል፤ እነሱም ስለ እሱ በተጻፈው መሠረት የፈለጉትን ሁሉ አድርገውበታል።” 14  ወደቀሩት ደቀ መዛሙርት በመጡ ጊዜ ብዙ ሕዝብ ከቧቸው ጸሐፍት ከእነሱ ጋር ሲከራከሩ አዩ። 15  ሆኖም የተሰበሰቡት ሰዎች ሁሉ ወዲያው ኢየሱስን ሲያዩ በጣም ተገርመው ወደ እሱ ሮጠው በመሄድ ሰላምታ ይሰጡት ጀመር። 16  እሱም “ከእነሱ ጋር የምትከራከሩት ስለ ምን ጉዳይ ነው?” ሲል ጠየቃቸው። 17  ከሕዝቡ መካከል አንድ ሰው እንዲህ ሲል መለሰለት:- “መምህር፣ ልጄ ዲዳ መንፈስ ስላደረበት ወደ አንተ አመጣሁት፤ 18  በያዘው ስፍራ ሁሉ መሬት ላይ ያፈርጠዋል፤ ከዚያም አረፋ ይደፍቃል፣ ጥርሱን ያፋጫል እንዲሁም ይዝለፈለፋል። ደቀ መዛሙርትህ እንዲያስወጡት ጠየቅኳቸው ግን አልቻሉም።” 19  እሱም መልሶ “እምነት የለሽ ትውልድ ሆይ፣ ከእናንተ ጋር እስከ መቼ መቆየት ሊኖርብኝ ነው? እስከ መቼስ እናንተን መታገስ ሊኖርብኝ ነው? ልጁን ወደ እኔ አምጡት” አላቸው። 20  ልጁንም ወደ እሱ አመጡት። ልጁን የያዘው መንፈስም ኢየሱስን ባየው ጊዜ ወዲያውኑ ልጁን አንዘፈዘፈው፤ መሬት ላይ ከወደቀ በኋላም አረፋ እየደፈቀ ይንከባለል ጀመር። 21  እሱም አባትየውን “እንዲህ ማድረግ ከጀመረው ምን ያህል ጊዜ ሆነው?” ሲል ጠየቀው። አባትየውም እንዲህ አለ:- “ከሕፃንነቱ ጀምሮ ነው፤ 22  ሊያጠፋው ፈልጎ ብዙ ጊዜ እሳት ውስጥና ውኃ ውስጥ ይጥለዋል። ማድረግ የምትችለው ነገር ካለ ግን እዘንልንና እርዳን።” 23  ኢየሱስም “‘የምትችለው ነገር ካለ’ አልክ! እምነት ላለው ሰው፣ ሁሉ ነገር ይቻላል” አለው። 24  ወዲያውም የልጁ አባት “እምነት አለኝ! እምነቴ እንዲጠነክር ደግሞ አንተ እርዳኝ!” በማለት ጮኾ ተናገረ። 25  ኢየሱስ ሕዝቡ ወደ እነሱ ግር ብሎ እየሮጠ በመምጣት ላይ መሆኑን ሲያይ ርኩሱን መንፈስ “አንተ ዲዳና ደንቆሮ መንፈስ ከእሱ ውጣ፤ ዳግመኛም ወደ እሱ እንዳትገባ አዝሃለሁ” ሲል ገሠጸው። 26  ርኩሱ መንፈስ በኃይል ከጮኸና ብዙ ካንዘፈዘፈው በኋላ ወጣ፤ ልጁም የሞተ ያህል ሆነ፤ በዚህ ጊዜ አብዛኞቹ ሰዎች “ሞቷል!” ይሉ ጀመር። 27  ይሁን እንጂ ኢየሱስ እጁን ይዞ አስነሳው፤ ልጁም ተነስቶ ቆመ። 28  ከዚያም ወደ ቤት ከገባ በኋላ ደቀ መዛሙርቱ “እኛ ልናስወጣው ያልቻልነው ለምንድን ነው?” ሲሉ ለብቻው ጠየቁት። 29  እሱም “እንዲህ ዓይነቱ በጸሎት ካልሆነ በቀር በምንም ሊወጣ አይችልም” አላቸው። 30  ከዚያ ተነስተው በገሊላ በኩል አለፉ፤ ሆኖም ይህን ማንም እንዲያውቅ አልፈለገም። 31  ምክንያቱም ደቀ መዛሙርቱን እያስተማራቸው የነበረ ከመሆኑም ሌላ “የሰውን ልጅ ለሰዎች አሳልፈው ይሰጡታል፤ እነሱም ይገድሉታል፤ ይሁንና ቢገደልም ከሦስት ቀን በኋላ ይነሳል” በማለት እየነገራቸው ነበር። 32  ይሁን እንጂ የተናገረው ነገር አልገባቸውም፤ እንዳይጠይቁትም ፈሩ። 33  ከዚህ በኋላ ወደ ቅፍርናሆም መጡ። ቤት ከገባ በኋላም “በመንገድ ላይ ስትከራከሩ የነበረው ስለ ምን ጉዳይ ነው?” ሲል ጠየቃቸው። 34  በመንገድ ላይ እርስ በርስ የተከራከሩት ማን ይበልጣል በሚል ስለነበረ ዝም አሉ። 35  ስለዚህ ከተቀመጠ በኋላ አሥራ ሁለቱን ጠርቶ “መጀመሪያ መሆን የሚፈልግ ሁሉ፣ የሁሉም መጨረሻና የሁሉም አገልጋይ መሆን አለበት” አላቸው። 36  ከዚያም አንድ ትንሽ ልጅ አምጥቶ በመካከላቸው አቆመ፤ አቅፎትም እንዲህ አላቸው:- 37  “እንዲህ ካሉት ልጆች አንዱን በስሜ የሚቀበል ሁሉ እኔን ይቀበላል፤ እኔንም የሚቀበል ሁሉ እኔን ብቻ ሳይሆን የላከኝንም ይቀበላል።” 38  ዮሐንስ “መምህር፣ አንድ ሰው በስምህ አጋንንት ሲያስወጣ አየን፤ ሆኖም ከእኛ ጋር ስላልሆነ ልንከለክለው ሞከርን” አለው። 39  ኢየሱስ ግን እንዲህ አለ:- “በስሜ ተአምር ሠርቶ ወዲያውኑ በእኔ ላይ ክፉ ቃል ሊናገር የሚችል ስለሌለ ልትከለክሉት አትሞክሩ፤ 40  እኛን የማይቃወም ሁሉ ከእኛ ጋር ነው። 41  የክርስቶስ በመሆናችሁ ምክንያት አንድ ጽዋ የሚጠጣ ውኃ የሚሰጣችሁ ሁሉ፣ እውነት እላችኋለሁ፣ በምንም መንገድ ብድራቱን አያጣም። 42  ሆኖም ከሚያምኑት ከእነዚህ ከታናናሾቹ አንዱን የሚያሰናክል ሁሉ በአህያ የሚዞር የወፍጮ ድንጋይ በአንገቱ ታስሮ ወደ ባሕር ቢጣል ይሻለዋል። 43  “ስለዚህ እጅህ ቢያሰናክልህ ቁረጠው፤ ሁለት እጅ ኖሮህ እሳቱ ሊጠፋ ወደማይችልበት ወደ ገሃነም* ከምትሄድ ጉንድሽ ሆነህ ወደ ሕይወት ብትገባ ይሻልሃል። 44*  —— 45  እግርህም ቢያሰናክልህ ቁረጠው፤ ሁለት እግር ኖሮህ ወደ ገሃነም ከምትጣል አንካሳ ሆነህ ወደ ሕይወት ብትገባ ይሻልሃል። 46*  —— 47  ዓይንህም ቢያሰናክልህ አውጥተህ ጣለው፤ ሁለት ዓይን ኖሮህ ወደ ገሃነም ከምትጣል አንድ ዓይን ኖሮህ ወደ አምላክ መንግሥት ብትገባ ይሻልሃል፤ 48  በገሃነም ትላቸው አይሞትም፤ እሳቱም አይጠፋም። 49  “እያንዳንዱ ሰው እሳት እንደ ጨው ሊነሰነስበት ይገባል። 50  ጨው መልካም ነው፤ ነገር ግን ጨው የጨውነት ጣዕሙን ቢያጣ በምን ታጣፍጡታላችሁ? በውስጣችሁ ጨው ይኑራችሁ፤ እርስ በርሳችሁም ሰላም ይኑራችሁ።”

የግርጌ ማስታወሻዎች

ማር 9:5 * “መምህር” ማለት ነው።
ማር 9:43 * ከተጨማሪው መረጃ ላይ 9ኛውን ርዕስ ተመልከት።
ማር 9:44 ማቴዎስ 17:21 ላይ የሚገኘውን የግርጌ ማስታወሻ ተመልከት።
ማር 9:46 ማቴዎስ 17:21 ላይ የሚገኘውን የግርጌ ማስታወሻ ተመልከት።