በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ማርቆስ 8:1-38

8  በዚያን ወቅት፣ እንደገና ብዙ ሰዎች ተሰበሰቡ፤ የሚበሉት ባጡ ጊዜም ኢየሱስ ደቀ መዛሙርቱን ጠርቶ እንዲህ አላቸው:-  “እነዚህ ሰዎች ሦስት ቀን ሙሉ ከእኔ ጋር ስለቆዩና የሚበሉት ስለሌላቸው ያሳዝኑኛል፤  እንዲሁ ጦማቸውን ወደ ቤታቸው ብሰዳቸው መንገድ ላይ ዝለው ይወድቃሉ። ደግሞም አንዳንዶቹ የመጡት ከሩቅ ነው።”  ደቀ መዛሙርቱ ግን “በዚህ ገለልተኛ ሥፍራ እነዚህን ሰዎች የሚያጠግብ ዳቦ ከየት ማግኘት ይቻላል?” ሲሉ መለሱለት።  እሱም መልሶ “ስንት ዳቦ አላችሁ?” ሲል ጠየቃቸው። እነሱም “ሰባት” አሉት።  ከዚያም ሕዝቡ መሬት ላይ እንዲቀመጥ አዘዘ፤ ሰባቱንም ዳቦ ይዞ አመሰገነ፤ ቆርሶም እንዲያድሉ ለደቀ መዛሙርቱ ሰጣቸው፤ እነሱም ለሕዝቡ አደሉ።  ጥቂት ትናንሽ ዓሣዎችም ነበሯቸው፤ እነዚህንም ከባረከ በኋላ እንዲያድሉ ነገራቸው።  ሕዝቡም በልቶ ጠገበ፤ ከዚያም ሰባት ትላልቅ ቅርጫት ሙሉ የተረፈ ቁርስራሽ ሰበሰቡ።  የተመገቡትም አራት ሺህ ገደማ ወንዶች ነበሩ። በመጨረሻም አሰናበታቸው። 10  ወዲያውም ከደቀ መዛሙርቱ ጋር በጀልባ ተሳፍሮ ዳልማኑታ ወደተባለ ስፍራ መጣ። 11  እዚያም ፈሪሳውያን መጥተው እሱን ለመፈተን ከሰማይ ምልክት እንዲያሳያቸው በመጠየቅ ይከራከሩት ጀመር። 12  እሱም እጅግ አዝኖ በረጅሙ በመተንፈስ “ይህ ትውልድ ምልክት የሚፈልገው ለምንድን ነው? እውነት እላችኋለሁ፣ ለዚህ ትውልድ ምንም ምልክት አይሰጠውም” አለ። 13  ከዚያም ትቷቸው እንደገና ጀልባ ተሳፍሮ ወደ ባሕሩ ማዶ ተሻገረ። 14  በዚህ ጊዜ ዳቦ መያዝ ረስተው ስለነበር በጀልባው ውስጥ ከአንድ ዳቦ በስተቀር ምንም አልነበራቸውም። 15  ኢየሱስም “ተጠንቀቁ፣ ከፈሪሳውያን እርሾና ከሄሮድስ እርሾ ተጠበቁ” በማለት በግልጽ አዘዛቸው። 16  እነሱም ዳቦ ባለመያዛቸው እርስ በርሳቸው ይከራከሩ ጀመር። 17  ኢየሱስም ይህን አውቆ እንዲህ አላቸው:- “ዳቦ ባለመያዛችሁ ለምን ትከራከራላችሁ? አሁንም ትርጉሙን አላስተዋላችሁም? ልባችሁ መረዳት ተስኖታል? 18  ‘ዓይን እያላችሁ አታዩም? ጆሮ እያላችሁ አትሰሙም?’ ደግሞስ አታስታውሱም? 19  አምስቱን ዳቦ ለአምስት ሺህዎቹ ወንዶች በቆረስኩ ጊዜ ስንት ቅርጫት ሙሉ ትርፍራፊ አነሳችሁ?” እነሱም “አሥራ ሁለት” አሉት። 20  “ሰባቱን ዳቦ ለአራት ሺህዎቹ ወንዶች በቆረስኩ ጊዜ ስንት ትላልቅ ቅርጫት ሙሉ ትርፍራፊ አነሳችሁ?” እነሱም “ሰባት” አሉት። 21  እሱም “ታዲያ አሁንም ትርጉሙ አልገባችሁም?” አላቸው። 22  ከዚያም ወደ ቤተሳይዳ መጡ። በዚያም ሰዎች አንድ ዓይነ ስውር ወደ እሱ አምጥተው እንዲዳስሰው ለመኑት። 23  እሱም ዓይነ ስውሩን፣ እጁን ይዞ ከመንደሩ ውጭ ወሰደው፤ በዓይኖቹ ላይ እንትፍ በማለት እጆቹን ጫነበትና “የሚታይህ ነገር አለ?” ሲል ጠየቀው። 24  ሰውየውም ቀና ብሎ በማየት “ሰዎች ይታዩኛል፤ ምክንያቱም ዛፎች የሚመስሉ ነገሮች አያለሁ፣ ሆኖም ይራመዳሉ” አለ። 25  ከዚያም እንደገና እጆቹን ሰውየው ዓይኖች ላይ ጫነ፤ በዚህ ጊዜ ሰውየው አጥርቶ አየ፤ ዓይኖቹም በሩ፤ ሁሉንም ነገር በደንብ ለይቶ ማየት ቻለ። 26  በመጨረሻም “ወደ መንደሩ አትግባ” ብሎ ወደ ቤት ሰደደው። 27  ኢየሱስና ደቀ መዛሙርቱ ወደ ቂሳርያ ፊልጵስዩስ አመሩ፤ በመንገድ ላይ ሳሉም ደቀ መዛሙርቱን “ሰዎች እኔን ማን ይሉኛል?” ሲል ጠየቃቸው። 28  እነሱም “አንዳንዶች መጥምቁ ዮሐንስ፣ ሌሎች ኤልያስ፣ ሌሎች ደግሞ ከነቢያት አንዱ ነው ይላሉ” አሉት። 29  ከዚያም እነሱን “እናንተስ እኔን ማን ትሉኛላችሁ?” ሲል ጠየቃቸው። ጴጥሮስም “አንተ መሲሑ ነህ” ብሎ መለሰለት። 30  በዚህ ጊዜ ስለ እሱ ለማንም እንዳይናገሩ አጥብቆ አዘዛቸው። 31  በተጨማሪም የሰው ልጅ ብዙ መከራ እንደሚደርስበትና ሽማግሌዎች፣ የካህናት አለቆችና ጸሐፍት እንደማይቀበሉት እንዲሁም እንደሚገደልና ከሦስት ቀን በኋላ እንደሚነሳ ያስተምራቸው ጀመር። 32  ይህንንም በግልጽ ነገራቸው። በዚህ ጊዜ ጴጥሮስ ለብቻው ገለል አድርጎ ይገሥጸው ጀመር። 33  ዞር ብሎ ደቀ መዛሙርቱን ተመለከተና ጴጥሮስን “ከአጠገቤ ራቅ፣ ሰይጣን፤ የሰውን እንጂ የአምላክን ሐሳብ አታስብም” ሲል ገሠጸው። 34  ከዚህ በኋላ ሕዝቡን ከደቀ መዛሙርቱ ጋር ወደ እሱ ጠርቶ እንዲህ አላቸው:- “ሊከተለኝ የሚፈልግ ካለ ራሱን ይካድ፣ የራሱን የመከራ እንጨት* ይሸከም፤ ያለማቋረጥም ይከተለኝ። 35  ምክንያቱም ነፍሱን ማዳን የሚፈልግ ሁሉ ያጣታል፤ ለእኔና ለምሥራቹ ሲል ነፍሱን የሚያጣ ግን ያድናታል። 36  ደግሞስ አንድ ሰው ዓለሙን ሁሉ የራሱ ቢያደርግና ነፍሱን ቢያጣ ምን ይጠቅመዋል? 37  ሰው ለነፍሱ ምትክ የሚሆን ምን ነገር ሊሰጥ ይችላል? 38  በዚህ አመንዝራና* ኃጢአተኛ ትውልድ መካከል በእኔና በቃሌ የሚያፍር ሁሉ የሰው ልጅም ከቅዱሳን መላእክቱ ጋር በአባቱ ክብር ሲመጣ ያፍርበታል።”

የግርጌ ማስታወሻዎች

ማር 8:34 * ከተጨማሪው መረጃ ላይ 6ኛውን ርዕስ ተመልከት።
ማር 8:38 * ወይም፣ “ለአምላክ ታማኝ ያልሆነ።”