በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ማርቆስ 5:1-43

5  ከዚያም ወደ ባሕሩ ማዶ ተሻግረው ጌርጌሴኖን ወደተባለው አገር ደረሱ።  ወዲያውም ከጀልባ እንደወረደ ርኩስ መንፈስ ያደረበት አንድ ሰው ከመቃብር ቦታ ወጥቶ ተገናኘው።  ይህ ሰው በመቃብር ቦታ ይኖር የነበረ ሲሆን እስከዚያ ጊዜ ድረስ በሰንሰለት እንኳ አስሮ ሊያስቀምጠው የቻለ አንድም ሰው አልነበረም።  ምክንያቱም ብዙ ጊዜ በእግር ብረትና በሰንሰለት ይታሰር የነበረ ቢሆንም ሰንሰለቱን ይበጣጥስ፣ እግር ብረቱንም ይሰባብር ነበር፤ እሱን በቁጥጥር ሥር ለማዋል የሚያስችል ጉልበት ያለው አንድም ሰው አልነበረም።  ዘወትር ሌሊትና ቀን በመቃብር ቦታና በተራሮች ይጮኽ እንዲሁም ሰውነቱን በድንጋይ ይተለትል ነበር።  ኢየሱስን ከሩቅ ባየ ጊዜ ግን ወደ እሱ ሮጦ በመሄድ ሰገደለት።  በታላቅ ድምፅ እየጮኸም “የልዑል አምላክ ልጅ ኢየሱስ ሆይ፣ እኔ ከአንተ ጋር ምን ጉዳይ አለኝ? እንዳታሠቃየኝ በአምላክ አስምልሃለሁ” አለው።  ይህንንም ያለው “አንተ ርኩስ መንፈስ ከዚህ ሰው ውጣ” ይለው ስለነበር ነው።  ኢየሱስም “ስምህ ማን ነው?” ብሎ ጠየቀው። እሱም “ብዙ ስለሆንን ስሜ ሌጌዎን* ነው” አለው። 10  መናፍስቱን ከአገሪቱ እንዳያስወጣቸውም ደጋግሞ ለመነው። 11  በዚያም በተራራው ብዙ የአሳማ መንጋ ተሰማርቶ ነበር። 12  ርኩሳን መናፍስቱም “አሳማዎቹ ውስጥ እንገባ ዘንድ ወደ እነሱ ስደደን” ብለው ለመኑት። 13  እሱም ፈቀደላቸው። በዚህ ጊዜ ርኩሳን መናፍስቱ ወጥተው አሳማዎቹ ውስጥ ገቡ፤ ሁለት ሺህ ያህል አሳማዎች ከገደሉ አፋፍ እየተንደረደሩ በመውረድ አንድ በአንድ ባሕሩ ውስጥ ሰጠሙ። 14  የመንጋው እረኞች ግን ሸሽተው በመሄድ ወሬውን በከተማውና በገጠሩ አዳረሱ፤ ሰዎችም የሆነውን ነገር ለማየት መጡ። 15  ወደ ኢየሱስም መጥተው አጋንንት ያደሩበትን ያውም ሌጌዎን የነበረበትን ሰው ልብስ ለብሶና አእምሮው ተመልሶለት ተቀምጦ ባዩት ጊዜ በፍርሃት ተዋጡ። 16  የተፈጸመውንም ነገር ያዩ ሰዎች አጋንንት አድረውበት የነበረው ሰው እንዴት እንዲህ ሊሆን እንደቻለና በአሳማዎቹ ላይ የሆነውን ነገር አወሩላቸው። 17  በመሆኑም አካባቢያቸውን ለቆ እንዲሄድ ኢየሱስን ይለምኑት ጀመር። 18  ኢየሱስ ወደ ጀልባው በመውጣት ላይ ሳለ አጋንንት አድረውበት የነበረው ሰው አብሮት ይሆን ዘንድ ይለምነው ጀመር። 19  ኢየሱስ ግን አልፈቀደለትም፤ ከዚህ ይልቅ “ወደ ቤት ሄደህ ይሖዋ ያደረገልህን ነገር ሁሉና ያሳየህን ምሕረት ለዘመዶችህ ንገራቸው” አለው። 20  ሰውየውም ሄዶ ኢየሱስ ያደረገለትን ነገር ሁሉ በዲካፖሊስ* ያውጅ ጀመር፤ ሕዝቡም ሁሉ ተደነቁ። 21  ኢየሱስ በጀልባ ዳግመኛ ወደ ባሕሩ ማዶ ከተሻገረ በኋላ እጅግ ብዙ ሕዝብ ወደ እሱ ተሰበሰበ፤ እሱም በባሕሩ አጠገብ ነበር። 22  በዚህ ጊዜ ከምኩራብ አለቆች አንዱ የሆነ ኢያኢሮስ የሚባል ሰው መጣ፤ ኢየሱስንም ባየው ጊዜ እግሩ ላይ በመውደቅ 23  “ትንሿ ልጄ በአስጊ ሁኔታ ላይ ትገኛለች። እንድትድንና በሕይወት እንድትኖር፣ እባክህ መጥተህ እጅህን ጫንባት” በማለት ደጋግሞ ለመነው። 24  ኢየሱስም አብሮት ሄደ። እጅግ ብዙ ሕዝብም ተከትሎት እየተጋፋው ይሄድ ነበር። 25  ለአሥራ ሁለት ዓመት ደም ሲፈሳት የኖረች አንዲት ሴት ነበረች። 26  ይህች ሴት ከሐኪም ወደ ሐኪም በመሄድ ብዙ ተሠቃይታ ነበር፤ ያላትን ጥሪት ሁሉ ብትጨርስም ሕመሙ ባሰባት እንጂ አልተሻላትም። 27  ስለ ኢየሱስ የተወራውን በሰማች ጊዜ በሰዎች መካከል ከበስተኋላ መጥታ ልብሱን ነካች፤ 28  ምክንያቱም “ልብሱን ብቻ እንኳ ብነካ እድናለሁ” ብላ ታስብ ነበር። 29  ወዲያውም ይፈሳት የነበረው ደም ቆመ፤ ያሠቃያት ከነበረው ሕመም እንደተፈወሰችም በሰውነቷ ታወቃት። 30  ኢየሱስም ወዲያው ኃይል ከእሱ እንደወጣ ታወቀው፤ በመሆኑም ወደ ሕዝቡ በመዞር “ልብሴን የነካው ማን ነው?” አለ። 31  ደቀ መዛሙርቱ ግን “ሕዝቡ እንዲህ ሲጋፋህ እያየህ ‘የነካኝ ማን ነው?’ እንዴት ትላለህ?” አሉት። 32  ይሁንና ኢየሱስ ይህን ያደረገችውን ሴት ለማየት ዙሪያውን ተመለከተ። 33  ሴትየዋ ግን በእሷ ላይ የተፈጸመውን ነገር ስላወቀች በፍርሃት እየተንቀጠቀጠች መጥታ በፊቱ ተደፋች፤ እውነቱንም ሁሉ ነገረችው። 34  እሱም “ልጄ ሆይ፣ እምነትሽ አድኖሻል። በሰላም ሂጂ፣ ከሚያሠቃይ ሕመምሽም እረፊ” አላት። 35  ገና እየተናገረ ሳለ ከምኩራብ አለቃው ቤት የመጡ ሰዎች “ልጅህ ሞታለች! ከዚህ በኋላ መምህሩን ለምን ታስቸግረዋለህ?” አሉት። 36  ኢየሱስ ግን የተናገሩትን ሰምቶ የምኩራብ አለቃውን “አትፍራ፣ ብቻ እምነት ይኑርህ” አለው። 37  ከዚህ በኋላ ከጴጥሮስ፣ ከያዕቆብና ከያዕቆብ ወንድም ከዮሐንስ በስተቀር ማንም እንዲከተለው አልፈቀደም። 38  ወደ ምኩራብ አለቃው ቤትም በደረሱ ጊዜ ጫጫታውንና ትርምሱን እንዲሁም የሚያለቅሱትንና ዋይ ዋይ የሚሉትን ሰዎች ተመለከተ። 39  ወደ ውስጥ ከገባም በኋላ “ይህ ሁሉ ጫጫታና ለቅሶ ምንድን ነው? ልጅቷ ተኝታለች እንጂ አልሞተችም” አላቸው። 40  በዚህ ጊዜ በማፌዝ ይስቁበት ጀመር። እሱ ግን ሁሉንም ካስወጣ በኋላ የልጅቷን አባትና እናት እንዲሁም ከእሱ ጋር የነበሩትን አስከትሎ ልጅቷ ወዳለችበት ገባ። 41  የልጅቷንም እጅ ይዞ “ጣሊታ ቁሚ” አላት፤ ትርጉሙም “አንቺ ልጅ፣ እልሻለሁ ተነሽ!” ማለት ነው። 42  ልጅቷም ወዲያው ተነስታ መራመድ ጀመረች፤ ዕድሜዋም አሥራ ሁለት ዓመት ነበር። ወዲያውም የሚሆኑት እስኪጠፋቸው ድረስ በጣም ተደሰቱ። 43  እሱ ግን ይህን ማንም እንዳያውቅ ደጋግሞ አስጠነቀቃቸው፤ ለልጅቷም የሚበላ ነገር እንዲሰጧት ነገራቸው።

የግርጌ ማስታወሻዎች

ማር 5:9 ማቴዎስ 26:53 ላይ የሚገኘውን የግርጌ ማስታወሻ ተመልከት።
ማር 5:20 * ወይም፣ “አሥሩ ከተሞች።”