በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ማርቆስ 4:1-41

4  ዳግመኛም በባሕሩ አጠገብ ሆኖ ያስተምር ጀመር። እጅግ ብዙ ሕዝብም ወደ እሱ መጥቶ ተሰበሰበ፤ በመሆኑም ጀልባ ላይ ወጥቶ ከተቀመጠ በኋላ ወደ ባሕሩ ፈቀቅ አለ፤ ሕዝቡ ሁሉ ግን በባሕሩ ዳርቻ ነበር።  ከዚያም ብዙ ነገር በምሳሌ ያስተምራቸው ጀመር፤ ሲያስተምርም እንዲህ አላቸው:-  “ስሙ። እነሆ፣ ዘሪው ሊዘራ ወጣ።   በሚዘራበት ጊዜም አንዳንዱ ዘር መንገድ ዳር ወደቀ፤ ወፎችም መጥተው ለቀሙት።  ሌላው ዘር ደግሞ በቂ አፈር በሌለበት ድንጋያማ ቦታ ላይ ወደቀ፤ አፈሩም ጥልቀት ስለሌለው ዘሩ ወዲያውኑ በቀለ።  ፀሐይ በወጣ ጊዜ ግን ተቃጠለ፤ ሥር ስላልነበረውም ደረቀ።  ሌላው ዘር ደግሞ በእሾህ መካከል ወደቀ፤ እሾሁም አድጎ አነቀው፤ ፍሬም አልሰጠም።  ሌሎቹ ግን ጥሩ አፈር ላይ ወድቀው ከበቀሉና ካደጉ በኋላ ፍሬ ማፍራት ጀመሩ፤ ሠላሳ፣ ስልሳና መቶ እጥፍም አፈሩ።”  አክሎም “የሚሰማ ጆሮ ያለው ይስማ” አለ። 10  ብቻውን በሆነ ጊዜ ከአሥራ ሁለቱ ጋር በዙሪያው የነበሩት ስለ ምሳሌዎቹ ይጠይቁት ጀመር። 11  እሱም እንዲህ አላቸው:- “ለእናንተ የአምላክ መንግሥት ቅዱስ ሚስጥር ተሰጥቷችኋል፤ በውጭ ላሉት ግን የሚሰሙት ነገር ሁሉ እንዲሁ ምሳሌ ብቻ ሆኖ ይቀርባቸዋል፤ 12  ማየቱን እያዩ የማያስተውሉት፣ መስማቱን እየሰሙ ትርጉሙን የማይረዱት፣ ሙሉ በሙሉ ተመልሰውም ይቅር የማይባሉት ለዚህ ነው።” 13  ደግሞም እንዲህ አላቸው:- “ይህን ምሳሌ ካልተረዳችሁ ታዲያ ሌሎቹን ምሳሌዎች ሁሉ እንዴት ትረዳላችሁ? 14  “ዘሪው   ቃሉን   ይዘራል። 15  ቃሉ ሲዘራ መንገድ ዳር እንደወደቀው ዘር የሆኑት እነዚህ ናቸው፤ ቃሉን እንደሰሙ ግን ሰይጣን መጥቶ በውስጣቸው የተዘራውን ቃል ይወስደዋል። 16  በተመሳሳይም በድንጋያማ ቦታ እንደተዘራው ዘር የሆኑት እነዚህ ናቸው:- ቃሉን እንደሰሙ በደስታ ይቀበሉታል። 17  ሆኖም ቃሉ በውስጣቸው ሥር ስለማይሰድ የሚቆዩት ለጥቂት ጊዜ ነው፤ ከዚያም በቃሉ የተነሳ መከራ ወይም ስደት ሲደርስባቸው ወዲያውኑ ይሰናከላሉ። 18  በእሾህ መካከል እንደተዘራው ዘር የሆኑ ሌሎች ደግሞ አሉ፤ እነዚህ ቃሉን የሰሙ ናቸው፤ 19  ነገር ግን የዚህ ሥርዓት ጭንቀት፣ ሀብት ያለው የማታለል ኃይል እንዲሁም የሌሎች ነገሮች ምኞት ወደ ልባቸው ሰርጎ በመግባት ቃሉን ያንቀዋል፤ የማያፈራም ይሆናል። 20  በመጨረሻም፣ ጥሩ አፈር ላይ እንደተዘሩት ዘሮች የሆኑት ቃሉን የሚሰሙና በደስታ የሚቀበሉ እንዲሁም ሠላሳ፣ ስልሳና መቶ እጥፍ የሚያፈሩ ናቸው።” 21  ደግሞም እንዲህ አላቸው:- “መብራት አምጥቶ እንቅብ የሚደፋበት ወይም አልጋ ሥር የሚያስቀምጥ ይኖራል? የሚቀመጠው በመቅረዝ ላይ አይደለም እንዴ? 22  ስለዚህ የተሸሸገ ሳይገለጥ፣ የተሰወረም ይፋ ሳይወጣ አይቀርም። 23  የሚሰማ ጆሮ ያለው ሁሉ ይስማ።” 24  አክሎም እንዲህ አላቸው:- “የምትሰሙትን ነገር ልብ በሉ። በምትሰፍሩበት መስፈሪያ ይሰፈርላችኋል፤ እንዲያውም ከዚያ የበለጠ ይጨመርላችኋል። 25  ምክንያቱም ላለው ይጨመርለታል፤ የሌለው ግን ያው ያለው እንኳ ይወሰድበታል።” 26  ከዚያም እንዲህ አለ:- “እንግዲያው የአምላክ መንግሥት መሬት ላይ ዘር የሚዘራን ሰው ይመስላል፤ 27  ሰውየው ሌሊት ይተኛል፣ ቀንም ይነሳል፤ እንዴት እንደሆነም ሳያውቅ ዘሩ ይበቅልና ያድጋል። 28  መሬቱም ራሱ ቀስ በቀስ ፍሬ ያፈራል፤ በመጀመሪያ ቡቃያውን፣ ከዚያም ዛላውን በመጨረሻም በዛላው ላይ የጎመራ ፍሬ ይሰጣል። 29  ፍሬው እንደደረሰ ግን የመከር ወቅት በመሆኑ ሰውየው ማጭዱን ይዞ ያጭዳል።” 30  ደግሞም እንዲህ አለ:- “የአምላክን መንግሥት በምን ልንመስለው እንችላለን? ወይስ በምን ምሳሌ እንገልጸዋለን? 31  መሬት ላይ በተዘራች ጊዜ በምድር ላይ ካሉ ዘሮች ሁሉ እጅግ የምታንስን የሰናፍጭ ዘር ይመስላል፤ 32  ከተዘራች በኋላ ግን አድጋ ከሌሎች አትክልቶች ሁሉ የምትበልጥ ትሆናለች፤ ትልልቅ ቅርንጫፎችም ታወጣለች፤ በመሆኑም የሰማይ ወፎች በጥላዋ ሥር መስፈሪያ ያገኛሉ።” 33  በዚህ መንገድ ኢየሱስ እንዲህ የመሳሰሉ በርካታ ምሳሌዎችን በመጠቀም መረዳት በሚችሉት መጠን ቃሉን ይነግራቸው ነበር። 34  እንዲያውም ያለ ምሳሌ አይነግራቸውም፤ ብቻቸውን በሚሆኑበት ጊዜ ግን ለደቀ መዛሙርቱ ሁሉንም ነገር ያብራራላቸው ነበር። 35  በዚያም ቀን በመሸ ጊዜ “ወደ ባሕሩ ማዶ እንሻገር” አላቸው። 36  በመሆኑም ሕዝቡን ካሰናበቱ በኋላ እዚያው ጀልባዋ ውስጥ እንዳለ ይዘውት ሄዱ፤ ሌሎች ጀልባዎችም አብረውት ነበሩ። 37  በዚህ ጊዜ እጅግ ኃይለኛ አውሎ ነፋስ ተነሳ፤ ማዕበሉም ከጀልባዋ ጋር እየተላተመ ወደ ውስጥ ይገባ ጀመር፤ ከዚህም የተነሳ ጀልባዋ በውኃ ልትሞላ ተቃረበች። 38  ኢየሱስ ግን በጀልባዋ የኋለኛ ክፍል ትራስ ተንተርሶ ተኝቶ ነበር። ስለዚህ ቀስቅሰውት “መምህር፣ ስናልቅ ዝም ብለህ ታያለህ?” አሉት። 39  በዚህ ጊዜ ተነስቶ ነፋሱን ገሠጸው፤ ባሕሩንም “ጸጥ በል! ረጭ በል!” አለው። ነፋሱም ቆመ፤ ታላቅ ጸጥታም ሰፈነ። 40  ከዚያም “ለምን ትሸበራላችሁ? አሁንም እምነት የላችሁም?” አላቸው። 41  እነሱ ግን በታላቅ ፍርሃት ተውጠው እርስ በርሳቸው “ለመሆኑ፣ ነፋስና ባሕር እንኳ የሚታዘዙለት ይህ ማን ነው?” ተባባሉ።

የግርጌ ማስታወሻዎች