በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ማርቆስ 2:1-28

2  ይሁን እንጂ ከተወሰኑ ቀናት በኋላ ወደ ቅፍርናሆም ተመልሶ መጣ፤ ቤት ውስጥ እንዳለም ተወራ።  ስለዚህ ቤቱ ሞልቶ በደጅ እንኳ ቦታ እስኪታጣ ድረስ ብዙ ሰዎች ተሰበሰቡ፤ እሱም ቃሉን ይነግራቸው ጀመር።  ሰዎችም አንድ ሽባ በአራት ሰዎች አሸክመው ወደ እሱ አመጡ።  ሆኖም ከሕዝቡ ብዛት የተነሳ ሽባውን ወደ ኢየሱስ ማቅረብ ስላልቻሉ እሱ ባለበት በኩል ቆፍረው ጣራውን በመክፈት ሽባው የተኛበትን አልጋ ወደ ታች አወረዱ።  ኢየሱስም እምነታቸውን በማየት ሽባውን “ልጄ ሆይ፣ ኃጢአትህ ይቅር ተብሎልሃል” አለው።  በዚያ ተቀምጠው የነበሩ አንዳንድ ጸሐፍት ግን እንዲህ ሲሉ በልባቸው አሰቡ:-  “ይህ ሰው እንዲህ ብሎ የሚናገረው ለምንድን ነው? አምላክን እየተዳፈረ እኮ ነው። ከአንዱ ከአምላክ በስተቀር ኃጢአትን ማን ይቅር ሊል ይችላል?”  ሆኖም ኢየሱስ በልባቸው ይህን እያሰቡ እንዳሉ ወዲያው በመንፈሱ ተረድቶ “በልባችሁ እንዲህ እያላችሁ የምታስቡት ለምንድን ነው?  ሽባውን ‘ኃጢአትህ ይቅር ተብሏል’ ከማለትና ‘ተነሳና አልጋህን ተሸክመህ ሂድ’ ከማለት የቱ ይቀላል? 10  ይሁንና የሰው ልጅ በምድር ላይ ኃጢአትን ይቅር ለማለት ሥልጣን እንዳለው ታውቁ ዘንድ” ካለ በኋላ ሽባውን እንዲህ አለው:- 11  “ተነስ፣ አልጋህን ተሸክመህ ወደ ቤትህ ሂድ እልሃለሁ።” 12  በዚህ ጊዜ ሽባው ብድግ ብሎ ወዲያው አልጋውን በማንሳት በሁሉ ፊት እየተራመደ ወጣ። ይህን ሲያዩ ሁሉም እጅግ ተደንቀው “እንዲህ ያለ ነገር ፈጽሞ አይተን አናውቅም” በማለት አምላክን አከበሩ። 13  ኢየሱስ እንደገና ወደ ባሕሩ ዳርቻ ሄደ፤ ሕዝቡም ወደ እሱ መጉረፉን ቀጠለ፤ እሱም ያስተምራቸው ጀመር። 14  በመንገድ እያለፈ ሳለም የእልፍዮስን ልጅ ሌዊን በቀረጥ መሰብሰቢያው ቦታ ተቀምጦ አየውና “ተከታዬ ሁን” አለው። እሱም ተነስቶ ተከተለው። 15  በኋላም በቤቱ በማዕድ ተቀምጦ ሳለ ብዙ ቀረጥ ሰብሳቢዎችና ኃጢአተኞች ከኢየሱስና ከደቀ መዛሙርቱ ጋር ተቀምጠው ነበር። ከእነሱም ብዙዎቹ እሱን መከተል ጀምረው ነበር። 16  ሆኖም ከፈሪሳውያን ወገን የሆኑ ጸሐፍት ከኃጢአተኞችና ከቀረጥ ሰብሳቢዎች ጋር ሲበላ ባዩ ጊዜ ደቀ መዛሙርቱን “እንዴት ከቀረጥ ሰብሳቢዎችና ከኃጢአተኞች ጋር ይበላል?” ይሏቸው ጀመር። 17  ኢየሱስ ይህን ሲሰማ “ሐኪም የሚያስፈልጋቸው በሽተኞች እንጂ ጤነኞች አይደሉም። እኔ የመጣሁት ጻድቃንን ሳይሆን ኃጢአተኞችን ልጠራ ነው” አላቸው። 18  የዮሐንስ ደቀ መዛሙርትና ፈሪሳውያን የመጾም ልማድ ነበራቸው። ስለዚህም ወደ እሱ መጥተው “የዮሐንስ ደቀ መዛሙርትና የፈሪሳውያን ደቀ መዛሙርት ዘወትር ሲጾሙ የአንተ ደቀ መዛሙርት ግን የማይጾሙት ለምንድን ነው?” አሉት። 19  ኢየሱስም እንዲህ አላቸው:- “ሙሽራው ከእነሱ ጋር እያለ የሙሽራው ጓደኞች ሊጾሙ ይችላሉ እንዴ? ሙሽራው አብሯቸው እስካለ ድረስ ሊጾሙ አይችሉም። 20  ሆኖም ሙሽራው ከእነሱ የሚወሰድበት ጊዜ ይመጣል፤ በዚያን ጊዜ ይጾማሉ። 21  በአሮጌ ልብስ ላይ ውኃ ያልነካው አዲስ ጨርቅ የሚጥፍ ሰው የለም፤ እንዲህ ቢያደርግ ግን አዲሱ ጨርቅ ሲሸበሸብ አሮጌውን በኃይል ስለሚስበው ቀዳዳው የባሰ ይሰፋል። 22  እንዲሁም ባረጀ አቁማዳ አዲስ የወይን ጠጅ የሚያስቀምጥ ሰው የለም፤ እንዲህ ቢያደርግ ግን የወይን ጠጁ አቁማዳውን ያፈነዳዋል፤ ወይኑ ይፈሳል፣ አቁማዳውም ከጥቅም ውጭ ይሆናል። ሰዎች ግን አዲስ የወይን ጠጅ የሚያስቀምጡት በአዲስ አቁማዳ ነው።” 23  ከጊዜ በኋላ ደግሞ በሰንበት ቀን በእርሻ መካከል ያልፍ ነበር፤ ደቀ መዛሙርቱም እየሄዱ ሳሉ እሸት ይቀጥፉ ጀመር። 24  በመሆኑም ፈሪሳውያን “ተመልከት! በሰንበት ቀን በሕግ የተከለከለ ነገር የሚያደርጉት ለምንድን ነው?” አሉት። 25  እሱ ግን እንዲህ አላቸው:- “ዳዊት የሚበላው ባጣና በተራበ ጊዜ እሱም ሆነ አብረውት የነበሩት ሰዎች ያደረጉትን ነገር አንብባችሁ አታውቁም? 26  ሊቀ ካህናት ስለሆነው ስለ አብያታር በሚናገረው ታሪክ ላይ ዳዊት ወደ አምላክ ቤት ገብቶ ከካህናት በቀር ማንም እንዲበላ ያልተፈቀደውን የመባ ኅብስት እንደበላና ከእሱ ጋር ለነበሩትም ሰዎች እንደሰጣቸው አላነበባችሁም?” 27  ስለዚህ ኢየሱስ እንዲህ አላቸው:- “ሰንበት ለሰው ተሰጠ እንጂ፣ ሰው ለሰንበት አልተፈጠረም፤ 28  በመሆኑም የሰው ልጅ የሰንበትም እንኳ ጌታ ነው።”

የግርጌ ማስታወሻዎች