በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ማርቆስ 15:1-47

15  ወዲያውም በማለዳ የካህናት አለቆች፣ ሽማግሌዎችና ጸሐፍት ማለትም መላው የሳንሄድሪን ሸንጎ አባላት ተሰብስበው ተማከሩ፤ ኢየሱስንም አስረው በመውሰድ ለጲላጦስ አስረከቡት።  ጲላጦስም “አንተ የአይሁድ ንጉሥ ነህ?” ሲል ጠየቀው። እሱም መልሶ “አንተው ራስህ ተናገርከው” አለው።  የካህናት አለቆቹ ግን በእሱ ላይ በርካታ ክስ መደርደራቸውን ቀጠሉ።  በዚህ ጊዜ ጲላጦስ “ምንም መልስ አትሰጥም? በስንት ነገር እየከሰሱህ እንዳሉ ተመልከት” ሲል እንደገና ጠየቀው።  ሆኖም ኢየሱስ ምንም ተጨማሪ መልስ አልሰጠም፤ በመሆኑም ጲላጦስ በጣም ተገረመ።  ጲላጦስ ሁልጊዜ በዚህ በዓል ወቅት ሕዝቡ ይፈታልን ብለው የጠየቁትን አንድ እስረኛ የመፍታት ልማድ ነበረው።  በወቅቱ፣ በመንግሥት ላይ ዓመፅ በማነሳሳት ሰው ገድለው ከታሰሩ ዓመፀኞች መካከል በርባን የሚባል ሰው ይገኝ ነበር።  ሕዝቡም መጥተው ጲላጦስ እንደ ልማዱ ያደርግላቸው ዘንድ ይለምኑት ጀመር።  ጲላጦስም መልሶ “የአይሁድን ንጉሥ እንድፈታላችሁ ትፈልጋላችሁ?” አላቸው። 10  ይህን ያለው የካህናት አለቆች አሳልፈው የሰጡት በቅናት ተነሳስተው እንደሆነ ያውቅ ስለነበር ነው። 11  ይሁንና የካህናት አለቆቹ በእሱ ምትክ በርባንን ይፈታላቸው ዘንድ እንዲጠይቁ ሕዝቡን አነሳሱ። 12  ጲላጦስም እንደገና መልሶ “እንግዲያው የአይሁድ ንጉሥ የምትሉትን ምን ባደርገው ይሻላል?” አላቸው። 13  እነሱም “ስቀለው!” ብለው እንደገና ጮኹ። 14  ሆኖም ጲላጦስ “ለምን? ምን ያጠፋው ነገር አለ?” አላቸው። እነሱ ግን “ስቀለው!” እያሉ የባሰ ጮኹ። 15  በዚህ ጊዜ ጲላጦስ ሕዝቡን ለማስደሰት ስለፈለገ በርባንን ፈታላቸው፤ ኢየሱስንም ከገረፈው በኋላ እንዲሰቀል አሳልፎ ሰጠው። 16  ወታደሮቹ በአገረ ገዢው ቤተ መንግሥት ወዳለው ግቢ ወሰዱት፤ ሠራዊቱንም ሁሉ አንድ ላይ ሰበሰቡ፤ 17  ሐምራዊ ልብስም አለበሱት፤ የእሾህ አክሊል ጎንጉነውም በራሱ ላይ ደፉበት። 18  “የአይሁድ ንጉሥ ሆይ፣ ሰላም ለአንተ ይሁን!” እያሉም እጅ ይነሱት ጀመር። 19  ከዚህም ሌላ ራሱን በመቃ ይመቱት፣ ይተፉበትና ተንበርክከው ይሰግዱለት ነበር። 20  በመጨረሻም ሲያፌዙበት ከቆዩ በኋላ ሐምራዊውን ልብስ ገፈው የራሱን መደረቢያዎች አለበሱት። ከዚያም ሊሰቅሉት ይዘውት ሄዱ። 21  የእስክንድርና የሩፎስ አባት የሆነ ስምዖን የተባለ አንድ የቀሬና ሰው ከገጠር መጥቶ በዚያ ሲያልፍ ኢየሱስ የሚሰቀልበትን የመከራ እንጨት* እንዲሸከም አስገደዱት።* 22  በኋላም ጎልጎታ ወደተባለ ቦታ አመጡት፤ ትርጉሙም የራስ ቅል ቦታ ማለት ነው። 23  እዚያም ከርቤ* የተቀላቀለበት ወይን ጠጅ ሰጡት፤ እሱ ግን አልተቀበለም። 24  ከዚያም ሰቀሉት፤ ማን ምን እንደሚወስድ ለመወሰንም ዕጣ ተጣጥለው መደረቢያዎቹን ተከፋፈሉ። 25  ሲሰቅሉትም ጊዜው ሦስት ሰዓት ነበር። 26  የተከሰሰበትን ጉዳይ የሚገልጽ “የአይሁድ ንጉሥ” የሚል ጽሑፍ ከበላዩ ተጽፎ ነበር። 27  ከእሱም ጋር ሁለት ወንበዴዎችን፣ አንዱን በቀኙ አንዱን በግራው ሰቀሉ። 28*  —— 29  በዚያ የሚያልፉም ይሰድቡትና ራሳቸውን እየነቀነቁ እንዲህ ይሉት ነበር:- “አቤት! ቤተ መቅደሱን አፍርሼ በሦስት ቀን መልሼ እሠራለሁ ባይ! 30  እስቲ ከተሰቀልክበት እንጨት ላይ ወርደህ ራስህን አድን።” 31  የካህናት አለቆችም እንደዚሁ ከጸሐፍት ጋር ሆነው እርስ በርሳቸው እንዲህ እያሉ ያፌዙበት ነበር:- “ሌሎችን አዳነ፤ ራሱን ግን ማዳን አልቻለም! 32  አይተን እናምን ዘንድ የእስራኤል ንጉሥ ክርስቶስ እስቲ አሁን ከተሰቀለበት እንጨት ይውረድ።” አብረውት የተሰቀሉት እንኳ ሳይቀሩ ይነቅፉት ነበር። 33  ስድስት ሰዓት በሆነ ጊዜም አገሩ በሙሉ እስከ ዘጠኝ ሰዓት ድረስ በጨለማ ተሸፈነ። 34  በዘጠነኛውም ሰዓት ኢየሱስ በታላቅ ድምፅ “ኤሊ፣ ኤሊ፣ ላማ ሳባቅታኒ?” ብሎ ጮኸ፤ ትርጉሙም “አምላኬ፣ አምላኬ ለምን ተውከኝ?” ማለት ነው። 35  በአቅራቢያው ቆመው ከነበሩት አንዳንዶቹ ይህን ሲሰሙ “አያችሁ! ኤልያስን እየተጣራ ነው” ይሉ ጀመር። 36  አንድ ሰው ግን ሮጦ በመሄድ የኮመጠጠ ወይን ጠጅ ውስጥ ሰፍነግ ከነከረ በኋላ በመቃ ላይ አድርጎ እንዲጠጣ ሰጠውና “ተዉት! እስቲ ኤልያስ መጥቶ ያወርደው እንደሆነ እንይ” አለ። 37  ሆኖም ኢየሱስ በታላቅ ድምፅ ከጮኸ በኋላ እስትንፋሱ ቆመ። 38  የቤተ መቅደሱ መጋረጃም ከላይ እስከ ታች ለሁለት ተቀደደ። 39  ከፊት ለፊቱ ቆሞ የነበረው የመቶ አለቃም በዚህ ሁኔታ መሞቱን ሲያይ “ይህ በእርግጥ የአምላክ ልጅ ነበር” አለ። 40  ከሩቅ ሆነው የሚያዩ ሴቶችም የነበሩ ሲሆን ከእነሱም መካከል መግደላዊት ማርያም እንዲሁም የትንሹ ያዕቆብና የዮሳ እናት ማርያምና ሰሎሜ ነበሩ፤ 41  እነዚህም በገሊላ ሳለ ይከተሉትና ያገለግሉት የነበሩ ናቸው፤ ከእሱ ጋር ወደ ኢየሩሳሌም የመጡ ሌሎች በርካታ ሴቶችም ነበሩ። 42  ቀኑ ሊመሽ በመቃረቡና የዝግጅት ቀን ማለትም የሰንበት ዋዜማ በመሆኑ 43  የተከበረ የሸንጎ አባል የሆነውና የአምላክን መንግሥት ይጠባበቅ የነበረው የአርማትያሱ ዮሴፍ መጣ። ደፍሮም ወደ ጲላጦስ ገባና የኢየሱስን አስከሬን ጠየቀ። 44  ጲላጦስ ግን የኢየሱስ ቶሎ መሞት አስገርሞት የመቶ አለቃውን ጠርቶ በእርግጥ ሞቶ እንደሆነ ጠየቀው። 45  መሞቱን ከመቶ አለቃው ካረጋገጠ በኋላም አስከሬኑን እንዲወስድ ለዮሴፍ ፈቀደለት። 46  እሱም በፍታ ገዛና አስከሬኑን አውርዶ በበፍታው ገነዘው፤ ከዚያም ከዐለት ተፈልፍሎ በተሠራ መቃብር ውስጥ አኖረው፤ ድንጋይ አንከባሎም የመታሰቢያ መቃብሩን ደጃፍ ዘጋው። 47  ይሁንና መግደላዊት ማርያምና የዮሳ እናት ማርያም የት እንደተቀበረ ይመለከቱ ነበር።

የግርጌ ማስታወሻዎች

ማር 15:21 * ከተጨማሪው መረጃ ላይ 6ኛውን ርዕስ ተመልከት።
ማር 15:21 * ወይም፣ “የግዳጅ አገልግሎት እንዲፈጽም አስገደዱት።”
ማር 15:23 * የሚያሰክር ንጥረ ነገር።
ማር 15:28 * የቆዩና ይበልጥ አስተማማኝ የሆኑ በእጅ የተጻፉ ቅጂዎች ይህን ጥቅስ አላካተቱም። ይሁን እንጂ በእጅ የተጻፉ አንዳንድ ቅጂዎች “‘ከዓመፀኞችም ጋር ተቆጠረ’ የሚለው ቃል ተፈጸመ” የሚል ጥቅስ ጨምረዋል።