በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ማርቆስ 13:1-37

13  ከቤተ መቅደስ እየወጣ ሳለ ከደቀ መዛሙርቱ አንዱ “መምህር፣ እንዴት ያሉ ድንጋዮችና እንዴት ያሉ ሕንጻዎች እንደሆኑ ተመልከት!” አለው።  ኢየሱስ ግን “እነዚህን ታላላቅ ሕንጻዎች ታያለህ? ይህ ሁሉ ሳይፈርስ እንዲህ ድንጋይ በድንጋይ ላይ እንደተነባበረ ከቶ አይኖርም” አለው።  በቤተ መቅደሱ ትይዩ በደብረ ዘይት ተራራ ላይ ተቀምጦ ሳለ ጴጥሮስ፣ ያዕቆብ፣ ዮሐንስና እንድርያስ ብቻቸውን ሆነው እንዲህ በማለት ይጠይቁት ጀመር:-  “እስቲ ንገረን፣ እነዚህ ነገሮች የሚፈጸሙት መቼ ነው? እነዚህ ነገሮች በሙሉ መደምደሚያ ማግኘታቸው እንደማይቀር የሚያሳየው ምልክትስ ምንድን ነው?”  ኢየሱስም እንዲህ ይላቸው ጀመር:- “ማንም እንዳያሳስታችሁ ተጠንቀቁ።  ብዙዎች ‘እኔ እሱ ነኝ’ እያሉ በስሜ ይመጣሉ፤ ብዙዎችንም ያሳስታሉ።  ከዚህም ሌላ ጦርነትና የጦርነት ወሬ ስትሰሙ አትሸበሩ፤ እነዚህ ነገሮች መፈጸማቸው የግድ ነው፤ ሆኖም ፍጻሜው ገና ነው።  “ምክንያቱም ሕዝብ በሕዝብ ላይ መንግሥትም በመንግሥት ላይ ይነሳል፤ በተለያየ ስፍራ የምድር ነውጥና የምግብ እጥረት ይከሰታል። እነዚህ የምጥ ጣር መጀመሪያ ናቸው።  “እናንተ ግን ለራሳችሁ ተጠንቀቁ፤ ሰዎች ለፍርድ ሸንጎ አሳልፈው ይሰጧችኋል፤ በምኩራብም ትገረፋላችሁ፤ ምሥክርም ይሆንባቸው ዘንድ በእኔ ምክንያት በገዥዎችና በነገሥታት ፊት ያቆሟችኋል። 10  አስቀድሞም ምሥራቹ ለሕዝብ ሁሉ መሰበክ አለበት። 11  ይሁንና አሳልፈው ሊሰጧችሁ ሲወስዷችሁ ምን እንናገራለን በማለት አስቀድማችሁ አትጨነቁ፤ ከዚህ ይልቅ በዚያች ሰዓት የሚሰጣችሁን ተናገሩ፤ ምክንያቱም የሚናገረው መንፈስ ቅዱስ እንጂ እናንተ አይደላችሁም። 12  በተጨማሪም ወንድም ወንድሙን፣ አባትም ልጁን ለሞት አሳልፎ ይሰጣል፤ ልጆችም በወላጆቻቸው ላይ ይነሳሉ፤ ያስገድሏቸዋልም፤ 13  በስሜም ምክንያት በሰዎች ሁሉ ዘንድ የተጠላችሁ ትሆናላችሁ። እስከ መጨረሻው የጸና ግን እሱ ይድናል። 14  “ይሁንና ጥፋት የሚያመጣው ርኩስ ነገር በማይገባው ስፍራ ቆሞ ስታዩ አንባቢው ያስተውል፣ በዚህ ጊዜ በይሁዳ ያሉ ወደ ተራሮች ይሽሹ። 15  በጣሪያ ላይ ያለ ሰው አይውረድ፤ አንዳችም ነገር ለመውሰድ ወደ ቤቱ አይግባ፤ 16  በእርሻም ያለ መደረቢያውን ለመውሰድ ወደኋላ አይመለስ። 17  በእነዚያ ቀናት ለነፍሰ ጡሮችና ለሚያጠቡ ወዮላቸው! 18  ይህ በክረምት እንዳይሆን ዘወትር ጸልዩ፤ 19  ምክንያቱም እነዚያ ቀናት አምላክ ከፈጠረው ከፍጥረት መጀመሪያ አንስቶ እስከዚያ ጊዜ ድረስ ሆኖ የማያውቅ ዳግመኛም የማይሆን መከራ የሚከሰትባቸው ቀናት ይሆናሉ። 20  እንዲያውም ይሖዋ ቀኖቹን ባያሳጥራቸው ኖሮ ሥጋ ሁሉ ባልዳነ ነበር። ሆኖም እሱ ለመረጣቸው ምርጦች ሲል ቀኖቹን አሳጥሯል። 21  “በዚያን ጊዜም ማንም ‘እነሆ፣ ክርስቶስ ይኸውላችሁ፣’ ‘እነሆ፣ ክርስቶስ ያውላችሁ’ ቢላችሁ አትመኑ። 22  ምክንያቱም ሐሰተኛ ክርስቶሶችና ሐሰተኛ ነቢያት ይነሳሉ፤ ቢቻላቸው የተመረጡትን እንኳ እስኪያስቱ ድረስ ምልክቶችና አስደናቂ ነገሮች ያደርጋሉ። 23  ስለዚህ ተጠንቀቁ፤ ሁሉን ነገር አስቀድሜ ነግሬያችኋለሁ። 24  “በእነዚያ ቀናት ግን፣ ከዚያ መከራ በኋላ ፀሐይ ትጨልማለች፤ ጨረቃም ብርሃኗን አትሰጥም፤ 25  ከዋክብትም ከሰማይ ይወድቃሉ፤ በሰማያት ያሉ ኃይላትም ይናወጣሉ። 26  በዚያን ጊዜም የሰው ልጅ በታላቅ ኃይልና ክብር በደመና ሲመጣ ያዩታል። 27  እሱም መላእክቱን ልኮ ከአራቱ ነፋሳት፣ ከምድር ዳርቻ እስከ ሰማይ ዳርቻ ለእሱ የተመረጡትን ይሰበስባል። 28  “እንግዲያው ምሳሌውን ከበለስ ዛፍ ተማሩ:- አዳዲስ ቅርንጫፎች ስታቆጠቁጥ፣ ቅጠሎችም ስታወጣ በጋ* እንደቀረበ ታውቃላችሁ። 29  በተመሳሳይ እናንተም እነዚህ ነገሮች ሲፈጸሙ ስታዩ የሰው ልጅ እንደቀረበ፣ ደጃፍ ላይም እንደደረሰ እወቁ። 30  እውነት እላችኋለሁ፣ እነዚህ ነገሮች ሁሉ እስኪፈጸሙ ድረስ ይህ ትውልድ ፈጽሞ አያልፍም። 31  ሰማይና ምድር ያልፋሉ፤ ቃሌ ግን አያልፍም። 32  “ስለዚያ ቀን ወይም ሰዓት ከአብ በቀር በሰማይ ያሉ መላእክትም ሆኑ ወልድ፣ ማንም አያውቅም። 33  ስለዚህ የተወሰነው ጊዜ መቼ እንደሆነ ስለማታውቁ ምንጊዜም በንቃት ተከታተሉ፣ ዘወትር ነቅታችሁ ጠብቁ። 34  ይህም ለባሪያዎቹ ሥልጣን ከሰጠና ለእያንዳንዱ የሥራ ድርሻውን ከመደበ በኋላ በር ጠባቂውን ነቅቶ እንዲጠብቅ በማዘዝ ቤቱን ትቶ ወደ ሌላ አገር እንደሄደ ሰው ነው። 35  ስለዚህ የቤቱ ባለቤት፣ በምሽት* ይሁን በእኩለ ሌሊት* ወይም ዶሮ ሲጮኽ* ይሁን ንጋት* ላይ፣ መቼ እንደሚመጣ ስለማታውቁ ምንጊዜም ነቅታችሁ ጠብቁ፤ 36  ድንገት ሲመጣ ተኝታችሁ እንዳያገኛችሁ! 37  ይሁንና ለእናንተ የምነግራችሁን ለሁሉም እናገራለሁ፤ ምንጊዜም ነቅታችሁ ጠብቁ።”

የግርጌ ማስታወሻዎች

ማር 13:28 * በጳለስጢና ምድር ዕፅዋት የሚለመልሙት በበጋ ነው።
ማር 13:35 * “ምሽት።” ግሪካውያንና ሮማውያን የሌሊቱን ጊዜ በሚከፋፍሉበት መሠረት የመጀመሪያው ክፍለ ሌሊት ሲሆን ይህም ፀሐይ ከጠለቀችበት ጊዜ አንስቶ እስከ 3 ሰዓት ገደማ ድረስ ነው።
ማር 13:35 * “እኩለ ሌሊት።” ሁለተኛው ክፍለ ሌሊት ሲሆን ይህም ከምሽቱ 3 ሰዓት ገደማ አንስቶ እስከ እኩለ ሌሊት ድረስ ነው።
ማር 13:35 * “ዶሮ ሲጮኽ።” ሦስተኛው ክፍለ ሌሊት ሲሆን ይህም ከእኩለ ሌሊት እስከ ሌሊቱ 9 ሰዓት ገደማ ድረስ ነው።
ማር 13:35 * “ንጋት።” አራተኛው ክፍለ ሌሊት ሲሆን ይህም ከሌሊቱ 9 ሰዓት ገደማ አንስቶ ፀሐይ እስከምትወጣበት ጊዜ ድረስ ነው።