በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ሉቃስ 9:1-62

9  ከዚያም አሥራ ሁለቱን አንድ ላይ ጠርቶ አጋንንትን ሁሉ የማዘዝ እንዲሁም በሽታን የመፈወስ ኃይልና ሥልጣን ሰጣቸው።  ደግሞም የአምላክን መንግሥት እንዲሰብኩና የታመሙትን እንዲፈውሱ ላካቸው፤  እንዲህም አላቸው:- “ለጉዟችሁ ምንም ነገር አትያዙ፤ በትርም ሆነ የምግብ ከረጢት፣ ዳቦም ሆነ የብር ገንዘብ* እንዲሁም ሁለት እጀ ጠባብ አትያዙ።  ሆኖም በምትገቡበት ቤት ሁሉ በዚያው ቆዩ፤ ከዚያም ተነስታችሁ ሂዱ።  የሚቀበላችሁ ሰው ካጣችሁበት ከተማ ሁሉ ስትወጡ ደግሞ ምሥክር እንዲሆንባቸው የእግራችሁን አቧራ አራግፉ።”  እነሱም ወጥተው በሄዱበት ሁሉ ምሥራቹን እየተናገሩና የታመሙትን እየፈወሱ ከመንደር ወደ መንደር በመሄድ ክልሉን አዳረሱ።  በዚህ ጊዜ የአውራጃ ገዥ የሆነው ሄሮድስ* የተፈጸመውን ነገር ሁሉ ሰማ፤ አንዳንዶች ዮሐንስ ከሞት ተነስቷል ይሉ ስለነበረም በጣም ግራ ተጋባ፤  ይሁንና ሌሎች ኤልያስ ተገልጧል፣ ሌሎች ደግሞ ከጥንት ነቢያት አንዱ ተነስቷል ይሉ ነበር።  ሄሮድስም “ዮሐንስን አንገቱን ቆርጬዋለሁ። ታዲያ እንዲህ ሲወራለት የምሰማው ይህ ሰው ማን ነው?” አለ። ስለሆነም ሊያየው ይፈልግ ነበር። 10  ሐዋርያቱም በተመለሱ ጊዜ ያደረጉትን ነገር ሁሉ ተረኩለት። እሱም ብቻቸውን ይሆኑ ዘንድ ቤተሳይዳ ወደምትባል ከተማ ይዟቸው ሄደ። 11  ሆኖም ሕዝቡ ይህን ስላወቁ ተከተሉት። እሱም በደግነት ተቀብሎ ስለ አምላክ መንግሥት ይነግራቸው ጀመር፤ ፈውስ የሚያስፈልጋቸውንም ፈወሳቸው። 12  ቀኑም መምሸት ሲጀምር አሥራ ሁለቱ ወደ እሱ መጥተው “ያለንበት ስፍራ ገለል ያለ ስለሆነ ሕዝቡ በአካባቢው ወዳለው መንደርና ገጠር ሄደው ማደሪያና ምግብ እንዲፈልጉ አሰናብታቸው” አሉት። 13  እሱ ግን “የሚበሉት ነገር እናንተ ስጧቸው” አላቸው። እነሱም “እኛ ራሳችን ሄደን ለዚህ ሁሉ ሕዝብ የሚበቃ ምግብ ካልገዛን በስተቀር ከአምስት ዳቦና ከሁለት ዓሣ ሌላ ምንም የለንም” አሉት። 14  በዚያም አምስት ሺህ ያህል ወንዶች ነበሩ። እሱ ግን ደቀ መዛሙርቱን “ሕዝቡን በሃምሳ በሃምሳ ሰው መድባችሁ ማዕድ ፊት እንደሚቀርቡ አድርጋችሁ አስቀምጧቸው” አላቸው። 15  እነሱም እንደተባሉት አደረጉ፤ ሕዝቡንም አስቀመጡ። 16  ከዚያም አምስቱን ዳቦና ሁለቱን ዓሣ ይዞ ወደ ሰማይ በማየት ባረከ፤ ቆርሶም ለሕዝቡ እንዲያቀርቡ ለደቀ መዛሙርቱ ይሰጣቸው ጀመር። 17  ሁሉም በልተው ጠገቡ፤ የተረፈውንም አሥራ ሁለት ቅርጫት ሙሉ ቁርስራሽ ሰበሰቡ። 18  በኋላም ብቻውን ሆኖ እየጸለየ ሳለ ደቀ መዛሙርቱ አንድ ላይ ሆነው ወደ እሱ መጡ፤ እሱም “ሕዝቡ እኔን ማን ይሉኛል?” ሲል ጠየቃቸው። 19  እነሱም መልሰው “አንዳንዶች መጥምቁ ዮሐንስ፣ ሌሎች ኤልያስ፣ ሌሎች ደግሞ ከጥንት ነቢያት አንዱ ተነስቷል ይላሉ” አሉት። 20  እሱም “እናንተስ እኔን ማን ትሉኛላችሁ?” አላቸው። ጴጥሮስም መልሶ “የአምላክ መሲሕ” አለው። 21  ከዚያም ይህን ለማንም እንዳይናገሩ አጥብቆ አስጠነቀቃቸው፤ 22  ቀጥሎም “የሰው ልጅ ብዙ መከራ መቀበል ይገባዋል፤ ሽማግሌዎች፣ የካህናት አለቆችና ጸሐፍትም አይቀበሉትም፤ እንዲሁም ይገደላል፤ በሦስተኛውም ቀን ይነሳል” አላቸው። 23  ከዚያም ለሁሉም እንዲህ ሲል ተናገረ:- “ሊከተለኝ የሚፈልግ ካለ ራሱን ይካድ፣ የራሱን የመከራ እንጨት* በየዕለቱ ይሸከም፤ ያለማቋረጥም ይከተለኝ። 24  ምክንያቱም ነፍሱን ማዳን የሚፈልግ ሁሉ ያጣታል፤ ለእኔ ሲል ነፍሱን የሚያጣ ግን ያድናታል። 25  ደግሞስ አንድ ሰው ዓለሙን ሁሉ የራሱ ቢያደርግ፣ ነገር ግን ሕይወቱን ቢያጣ ወይም ለጉዳት ቢዳረግ ምን ጥቅም ያገኛል? 26  በእኔና በቃሌ የሚያፍር ሁሉ የሰው ልጅም በክብሩ እንዲሁም በአብና በቅዱሳን መላእክት ክብር ሲመጣ ያፍርበታል። 27  እውነት እላችኋለሁ፣ እዚህ ከቆሙት መካከል አንዳንዶች የአምላክን መንግሥት እስኪያዩ ድረስ ፈጽሞ ሞትን አይቀምሱም።” 28  በዚህም መሠረት ይህን ከተናገረ ከስምንት ቀን ያህል በኋላ ጴጥሮስን፣ ዮሐንስንና ያዕቆብን ይዞ ለመጸለይ ወደ ተራራ ወጣ። 29  እየጸለየም ሳለ የፊቱ መልክ ተለወጠ፤ ልብሱም ነጭ ሆኖ አንጸባረቀ። 30  እነሆም ሁለት ሰዎች ይኸውም ሙሴና ኤልያስ ከእሱ ጋር ይነጋገሩ ነበር። 31  እነሱም በክብር ተገልጠው፣ በኢየሩሳሌም ስለሚፈጸመው ከዚህ ዓለም ተለይቶ ስለሚሄድበት ሁኔታ ይነጋገሩ ጀመር። 32  በዚህ ጊዜ ጴጥሮስና አብረውት የነበሩት እንቅልፍ ተጫጭኗቸው ነበር፤ ሙሉ በሙሉ ሲነቁ ግን የኢየሱስን ክብር እንዲሁም አብረውት የቆሙትን ሁለት ሰዎች አዩ። 33  ሰዎቹ ከኢየሱስ ተለይተው ሲሄዱ ጴጥሮስ ኢየሱስን “መምህር፣ እዚህ መሆን ለእኛ መልካም ነው፤ ስለዚህ አንድ ለአንተ፣ አንድ ለሙሴና አንድ ለኤልያስ ሦስት ድንኳኖች እንትከል” አለው፤ የሚናገረውንም አያውቅም ነበር። 34  ይህን እየተናገረ ሳለ ግን ደመና መጥቶ ጋረዳቸው። ደመናው ሲሸፍናቸውም ፍርሃት አደረባቸው። 35  ከደመናውም “የመረጥኩት ልጄ ይህ ነው። እሱን ስሙት” የሚል ድምፅ መጣ። 36  ድምፁም በተሰማ ጊዜ ኢየሱስን ብቻውን ሆኖ አዩት። እነሱም ዝም አሉ፤ ያዩትንም ነገር በዚያን ወቅት ለማንም አልተናገሩም። 37  በማግስቱ ከተራራው ሲወርዱ እጅግ ብዙ ሕዝብ ከኢየሱስ ጋር ተገናኘ። 38  እነሆም ከሕዝቡ መካከል አንድ ሰው ድምፁን ከፍ አድርጎ እንዲህ አለ:- “መምህር፣ ልጄን እንድታይልኝ እለምንሃለሁ፤ ያለኝ ልጅ አንድ እሱ ብቻ ነው፤ 39  መንፈስ ይይዘውና በድንገት ይጮኻል፤ ጥሎም አረፋ እያስደፈቀ ያንፈራግጠዋል፤ ጉዳት ካደረሰበትም በኋላ በስንት መከራ ይለቀዋል። 40  ደቀ መዛሙርትህ እንዲያስወጡት ለምኛቸው ነበር፤ ግን አልቻሉም።” 41  ኢየሱስም መልሶ “እምነት የለሽና ጠማማ ትውልድ ሆይ፣ እስከ መቼ ከእናንተ ጋር መቆየትና እናንተን መታገስ ሊኖርብኝ ነው? እስቲ ልጅህን ወደዚህ አምጣው” አለ። 42  ሆኖም ወደ እሱ እየመጣ ሳለም ጋኔኑ መሬት ላይ ጥሎ በኃይል አንፈራገጠው። ይሁንና ኢየሱስ ርኩሱን መንፈስ ገሠጸውና ልጁን ፈወሰው፤ ከዚያም ለአባቱ ሰጠው። 43  በዚህ ጊዜ ሁሉም በአምላክ ታላቅ ኃይል ይደነቁ ጀመር። ሁሉም ኢየሱስ እያደረገው ባለው ነገር ሁሉ እየተደነቁ ሳሉ ደቀ መዛሙርቱን እንዲህ አላቸው:- 44  “ይህን የምነግራችሁን ቃል ልብ በሉ፤ የሰውን ልጅ ለሰዎች አሳልፈው ይሰጡታል።” 45  እነሱ ግን ይህ አባባል አሁንም አልገባቸውም። እንዲያውም እንዳያስተውሉት ነገሩ ተሰውሮባቸው ነበር፤ ስለዚህ ጉዳይ እንዳይጠይቁትም ፈሩ። 46  ከዚህ በኋላ ከመካከላቸው ማን እንደሚበልጥ እርስ በርሳቸው ይከራከሩ ጀመር። 47  ኢየሱስ የልባቸውን ሐሳብ ስላወቀ አንድ ትንሽ ልጅ አምጥቶ አጠገቡ አቆመ፤ 48  ከዚያም እንዲህ አላቸው:- “ይህን ልጅ በስሜ የሚቀበል ሁሉ እኔንም ይቀበላል፤ እኔንም የሚቀበል ሁሉ የላከኝንም ይቀበላል። ምክንያቱም ታላቅ የሚባለው ራሱን ከሁላችሁ እንደሚያንስ አድርጎ የሚቆጥር ነው።” 49  ዮሐንስም “መምህር፣ አንድ ሰው በስምህ አጋንንት ሲያስወጣ አየን፤ ይሁንና ከእኛ ጋር ሆኖ አንተን ስለማይከተል ልንከለክለው ሞከርን” አለው። 50  ኢየሱስ ግን “የማይቃወማችሁ ሁሉ ከእናንተ ጋር ስለሆነ ልትከለክሉት አትሞክሩ” አለው። 51  ኢየሱስ የሚያርግበት ጊዜ ሲቃረብ ወደ ኢየሩሳሌም ለመሄድ ቆርጦ ተነሳ። 52  ስለዚህ አስቀድሞ መልእክተኞች ላከ። እነሱም ሄደው ለእሱ የሚያስፈልገውን ነገር ለማዘጋጀት ወደ አንድ የሳምራውያን መንደር ገቡ፤ 53  ሕዝቡ ግን ወደ ኢየሩሳሌም ለመሄድ እንደተነሳ ስላወቁ አልተቀበሉትም። 54  ደቀ መዛሙርቱ ያዕቆብና ዮሐንስ ይህን ባዩ ጊዜ “ጌታ ሆይ፣ እሳት ከሰማይ ወርዶ እንዲያጠፋቸው እንድናዝ ትፈልጋለህ?” አሉት። 55  እሱ ግን ዞር ብሎ ገሠጻቸው። 56  ስለዚህ ወደ ሌላ መንደር ሄዱ። 57  በመንገድ እየተጓዙ ሳሉም አንድ ሰው “ወደምትሄድበት ሁሉ እከተልሃለሁ” አለው። 58  ኢየሱስም “ቀበሮዎች ጉድጓድ፣ የሰማይ ወፎችም መስፈሪያ አላቸው፤ የሰው ልጅ ግን ራሱን እንኳ የሚያሳርፍበት ቦታ የለውም” አለው። 59  ከዚያም ሌላውን “ተከታዬ ሁን” አለው። ሰውየውም “በመጀመሪያ ሄጄ አባቴን እንድቀብር ፍቀድልኝ” አለው። 60  እሱ ግን “ሙታን ሙታናቸውን እንዲቀብሩ ተዋቸው፤ አንተ ግን ሄደህ የአምላክን መንግሥት በየቦታው አውጅ” አለው። 61  አንድ ሌላ ሰው ደግሞ “ጌታ ሆይ፣ እኔ እከተልሃለሁ፤ በመጀመሪያ ግን ቤተሰቤን እንድሰናበት ፍቀድልኝ” አለው። 62  ኢየሱስም “ዕርፍ ጨብጦ በኋላው ያሉትን ነገሮች የሚመለከት ሰው ለአምላክ መንግሥት የሚገባ አይደለም” አለው።

የግርጌ ማስታወሻዎች

ሉቃስ 9:3 * ብር ከተባለው ማዕድን የተሠራ ገንዘብ።
ሉቃስ 9:7 ሉቃስ 3:1 ላይ የሚገኘውን የግርጌ ማስታወሻ ተመልከት።
ሉቃስ 9:23 * ከተጨማሪው መረጃ ላይ 6ኛውን ርዕስ ተመልከት።