በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ሉቃስ 7:1-50

7  ኢየሱስ ይህን ሁሉ ለሕዝቡ ተናግሮ ከጨረሰ በኋላ ወደ ቅፍርናሆም ገባ።  በዚያም አንድ የመቶ አለቃ ነበር፤ በጣም የሚወደው ባሪያውም ታሞበት ሊሞት ተቃርቦ ነበር።  እሱም ስለ ኢየሱስ ሲሰማ መጥቶ ባሪያውን እንዲፈውስለት ይለምኑለት ዘንድ የአይሁድ ሽማግሌዎችን ላከ።  ወደ ኢየሱስ የመጡት መልእክተኞችም እንዲህ በማለት አጥብቀው ይለምኑት ጀመር:- “እሱ ልትረዳው የሚገባው ሰው ነው፤  ምክንያቱም ሕዝባችንን ይወዳል፤ ምኩራቡን ያሠራልንም እሱ ነው።”  ስለዚህ ኢየሱስ አብሯቸው መጓዝ ጀመረ። ሆኖም ወደ ቤቱ በተቃረበ ጊዜ የመቶ አለቃው ወዳጆቹን እንዲህ ሲል ወደ ኢየሱስ ላከ:- “ጌታ ሆይ፣ በቤቴ ጣሪያ ሥር ልትገባ የሚገባኝ ሰው ስላልሆንኩ አትድከም።  ከዚህም የተነሳ አንተ ፊት መቅረብ የሚገባኝ ሰው እንደሆንኩ አልተሰማኝም። ስለዚህ አንተ አንድ ቃል ተናገርና አገልጋዬ ይፈወስ።  እኔ ራሴ የምታዘዛቸው የበላይ አዛዦች አሉ፤ ለእኔም የሚታዘዙ የበታች ወታደሮች አሉኝ፤ አንዱን ‘ሂድ!’ ስለው ይሄዳል፣ ሌላውንም ‘ና!’ ስለው ይመጣል፤ ባሪያዬንም ‘ይህን አድርግ!’ ስለው ያደርጋል።”  ኢየሱስ ይህን በሰማ ጊዜ በሰውየው በጣም ተደንቆ ይከተለው ወደነበረው ሕዝብ ዞር በማለት “እላችኋለሁ፣ በእስራኤል ውስጥ እንኳ እንዲህ ዓይነት ታላቅ እምነት አላገኘሁም” አለ። 10  የተላኩት ሰዎችም ወደ ቤት ሲመለሱ ባሪያው ድኖ አገኙት። 11  ከዚህ በኋላ ብዙም ሳይቆይ ናይን ወደምትባል ከተማ ተጓዘ፤ ደቀ መዛሙርቱና ሌሎች ብዙ ሰዎችም አብረውት ይጓዙ ነበር። 12  ወደ ከተማይቱ መግቢያ ሲቃረብ ሰዎች የአንድ ሰው አስከሬን ተሸክመው በመውጣት ላይ ነበሩ፤ ሟቹ ለእናቱ አንድ ልጅ ነበር። በተጨማሪም እናቱ መበለት ነበረች። ብዙ የከተማዋ ሕዝብም ከእሷ ጋር ነበር። 13  ጌታም ባያት ጊዜ በጣም አዘነላትና “በቃ፣ አታልቅሺ” አላት። 14  ከዚያም ቀረብ ብሎ ቃሬዛውን ነካ፤ የተሸከሙት ሰዎችም ባሉበት ቆሙ፤ ኢየሱስም “አንተ ወጣት፣ ተነስ እልሃለሁ!” አለ። 15  የሞተውም ሰው ቀና ብሎ ተቀመጠና መናገር ጀመረ፤ ኢየሱስም ለእናቱ ሰጣት። 16  በዚህ ጊዜ ሁሉም በፍርሃት ተውጠው “ታላቅ ነቢይ በመካከላችን ተነስቷል”፤ እንዲሁም “አምላክ ሕዝቡን አሰበ” እያሉ አምላክን ያወድሱ ጀመር። 17  ይህ የኢየሱስ ዝናም በይሁዳ ሁሉና በአካባቢው ባለ አገር ሁሉ ተሰማ። 18  በዚህ ጊዜ የዮሐንስ ደቀ መዛሙርት ስለ እነዚህ ነገሮች ሁሉ አወሩለት። 19  ዮሐንስም ከደቀ መዛሙርቱ መካከል ሁለቱን ጠርቶ “ይመጣል የተባልከው አንተ ነህ ወይስ ሌላ እንጠብቅ?” ብለው እንዲጠይቁት ወደ ጌታ ላካቸው። 20  ሰዎቹም ወደ ኢየሱስ መጥተው “መጥምቁ ዮሐንስ ‘ይመጣል የተባልከው አንተ ነህ ወይስ ሌላ እንጠብቅ?’ ብለን እንድንጠይቅህ ወደ አንተ ልኮናል” አሉት። 21  ኢየሱስ በዚያኑ ሰዓት ብዙዎችን ከሕመም፣ ከከባድ በሽታና ከክፉ መናፍስት ፈወሳቸው፤ የብዙ ዓይነ ስውራንንም ዓይን አበራ። 22  ስለዚህ ለሁለቱ ሰዎች እንዲህ ሲል መለሰላቸው:- “ሄዳችሁ የሰማችሁትንና ያያችሁትን ነገር ለዮሐንስ ንገሩት፤ ዕውሮች ዓይናቸው እየበራ ነው፣ አንካሶች እየተራመዱ ነው፣ የሥጋ ደዌ የያዛቸው እየነጹ ነው፣ ደንቆሮዎች እየሰሙ ነው፣ ሙታን እየተነሱ ነው፣ ድሆችም ምሥራቹ እየተነገራቸው ነው። 23  በእኔ የማይሰናከል ደስተኛ ነው።” 24  የዮሐንስ መልእክተኞች ከሄዱ በኋላ ኢየሱስ ዮሐንስን በተመለከተ ለሕዝቡ እንዲህ አለ:- “ወደ ምድረ በዳ የሄዳችሁት ምን ለማየት ነበር? ነፋስ የሚያወዛውዘውን ሸምበቆ ለማየት ነው? 25  ታዲያ ምን ለማየት ነበር የሄዳችሁት? ያማረ ልብስ የለበሰ ሰው ለማየት? የተንቆጠቆጠ ልብስ የሚለብሱና በቅንጦት የሚኖሩማ የሚገኙት በቤተ መንግሥት ነው። 26  ታዲያ ምን ለማየት ሄዳችሁ? ነቢይ? አዎ፣ እላችኋለሁ፣ ከነቢይም የሚበልጥ ነው። 27  ‘እነሆ፣ ከፊትህ እየሄደ መንገድህን የሚያዘጋጅ መልእክተኛዬን በፊትህ እልካለሁ’ ተብሎ የተጻፈው ስለ እሱ ነው። 28  እላችኋለሁ፣ ከሴት ከተወለዱት መካከል ከዮሐንስ የሚበልጥ የለም፤ ሆኖም በአምላክ መንግሥት ዝቅተኛ የሆነው እንኳ ይበልጠዋል።” 29  (ሕዝቡም ሁሉ እንዲሁም ቀራጮች ይህን በሰሙ ጊዜ በዮሐንስ ጥምቀት ተጠምቀው ስለነበር አምላክ ጻድቅ መሆኑን ተናገሩ። 30  ሆኖም ፈሪሳውያንና የሕጉ አዋቂዎች በዮሐንስ ባለመጠመቃቸው የአምላክን ምክር አቃለሉ።) 31  “እንግዲህ የዚህን ትውልድ ሰዎች ከማን ጋር ላመሳስላቸው? ማንንስ ይመስላሉ? 32  በገበያ ስፍራ ተቀምጠው እርስ በርሳቸው እየተጠራሩ ‘ዋሽንት ነፋንላችሁ፣ እናንተ ግን አልጨፈራችሁም፤ ሙሾ አወረድንላችሁ፣ እናንተ ግን አላለቀሳችሁም’ ከሚባባሉ ልጆች ጋር ይመሳሰላሉ። 33  በተመሳሳይም መጥምቁ ዮሐንስ እህል ሳይበላና ወይን ጠጅ ሳይጠጣ መጣ፣ እናንተ ግን ‘ጋኔን አለበት’ አላችሁ። 34  የሰው ልጅ እየበላና እየጠጣ መጣ፤ እናንተ ግን ‘እዩ፣ ይህን ሆዳምና ለወይን ጠጅ ያደረ፣ የቀረጥ ሰብሳቢዎችና የኃጢአተኞች ወዳጅ!’ አላችሁ። 35  የሆነ ሆኖ፣ ጥበብ ጻድቅ መሆኗ በልጆቿ ሁሉ ተረጋግጧል።” 36  ከዚህ በኋላ ከፈሪሳውያን አንዱ አብሮት እንዲበላ ኢየሱስን ደጋግሞ ለመነው። ስለሆነም ኢየሱስ ወደ ፈሪሳዊው ቤት ገብቶ በማዕድ ተቀመጠ። 37  እነሆም፣ በከተማው ውስጥ በኃጢአተኝነቷ የምትታወቅ አንዲት ሴት በፈሪሳዊው ቤት በማዕድ እንደተቀመጠ በሰማች ጊዜ ሽቶ የያዘ የአልባስጥሮስ ብልቃጥ ይዛ መጣች፤ 38  ከበስተኋላ እግሩ አጠገብ ሆና እያለቀሰች በእንባዋ እግሩን ታርስ ጀመር፤ ከዚያም በራስ ፀጉሯ ታብሰው ነበር። በተጨማሪም እግሩን እየሳመች ሽቶ ቀባችው። 39  የጋበዘው ፈሪሳዊም ይህን ሲያይ በልቡ “ይህ ሰው ነቢይ ቢሆን ኖሮ እየነካችው ያለችው ማን መሆኗንና ምን ዓይነት ሴት እንደሆነች ይኸውም ኃጢአተኛ መሆኗን ያውቅ ነበር” ብሎ አሰበ። 40  ኢየሱስ ግን መልሶ “ስምዖን፣ አንድ የምነግርህ ነገር አለኝ” አለው። እሱም “መምህር፣ እሺ ንገረኝ” አለው። 41  “ከአንድ አበዳሪ ገንዘብ የተበደሩ ሁለት ሰዎች ነበሩ፤ አንዱ አምስት መቶ ሌላው ደግሞ ሃምሳ ዲናር ተበድረው ነበር። 42  ሁለቱም የተበደሩትን መክፈል ባቃታቸው ጊዜ አበዳሪው ዕዳቸውን ሙሉ በሙሉ ተወላቸው። እንግዲህ ከሁለቱ ሰዎች አበዳሪውን አብልጦ የሚወደው የትኛው ነው?” 43  ስምዖንም መልሶ “ብዙ ዕዳ የተተወለት ይመስለኛል” አለው። እሱም “በትክክል ፈርደሃል” አለው። 44  ከዚያም ወደ ሴቲቱ ዞር ብሎ ስምዖንን እንዲህ አለው:- “ይህችን ሴት ታያታለህ? እኔ ወደ ቤትህ ገባሁ፤ ይሁንና አንተ ለእግሬ ውኃ አልሰጠኸኝም። ይህች ሴት ግን እግሬን በእንባዋ እያራሰች በፀጉሯ አበሰች። 45  አንተ አልሳምከኝም፤ ይህች ሴት ግን ከገባሁበት ሰዓት አንስቶ እግሬን መሳሟን አላቋረጠችም። 46  አንተ ራሴን ዘይት አልቀባህም፤ ይህች ሴት ግን እግሬን ሽቶ ቀባች። 47  ስለዚህ እልሃለሁ፣ ኃጢአቷ ብዙ ቢሆንም እንኳ ታላቅ ፍቅር ስላሳየች ይቅር ተብሎላታል፤ በትንሹ ይቅር የተባለ ግን የሚያሳየውም ፍቅር አነስተኛ ነው።” 48  ከዚያም ሴትየዋን “ኃጢአትሽ ይቅር ተብሎልሻል” አላት። 49  በዚህ ጊዜ በማዕድ አብረውት የተቀመጡት በልባቸው “ኃጢአትን እንኳ ሳይቀር ይቅር የሚል ይህ ሰው ማን ነው?” ይሉ ጀመር። 50  ኢየሱስ ግን ሴትየዋን “እምነትሽ አድኖሻል፤ በሰላም ሂጂ” አላት።

የግርጌ ማስታወሻዎች