በቀጥታ ወደ ዋናው ጉዳይ ግባ

በቀጥታ ወደ ርዕስ ማውጫው ሂድ

የይሖዋ ምሥክሮች

ቋንቋ ምረጥ አማርኛ

ሉቃስ 6:1-49

6  በአንድ የሰንበት ቀን ኢየሱስ በእርሻ መካከል እያለፈ ሳለ ደቀ መዛሙርቱ እሸት ቀጥፈው በእጃቸው እያሹ ይበሉ ነበር።  በዚህ ጊዜ አንዳንድ ፈሪሳውያን “በሰንበት ቀን በሕግ የተከለከለ ነገር የምታደርጉት ለምንድን ነው?” አሏቸው።  ኢየሱስ ግን መልሶ እንዲህ አላቸው:- “ዳዊት እሱና ከእሱ ጋር የነበሩት ሰዎች በተራቡ ጊዜ ያደረገውን ነገር አንብባችሁ አታውቁም?  ወደ አምላክ ቤት ገብቶ ከካህናት በስተቀር ማንም እንዲበላው ያልተፈቀደውን የመባ ኅብስት ተቀብሎ እንደበላና ከእሱ ጋር ለነበሩት ሰዎች እንደሰጠ አላነበባችሁም?”  ቀጥሎም “የሰው ልጅ የሰንበት ጌታ ነው” አላቸው።  በሌላ የሰንበት ቀን ወደ ምኩራብ ገብቶ ያስተምር ጀመር። በዚያም ቀኝ እጁ የሰለለ አንድ ሰው ነበር።  ጸሐፍትና ፈሪሳውያንም ኢየሱስን የሚከሱበት ምክንያት ማግኘት ይፈልጉ ስለነበር በሰንበት ይፈውስ እንደሆነ ለማየት በትኩረት ይከታተሉት ነበር።  እሱ ግን ሐሳባቸውን አውቆ ነበር፤ ያም ሆኖ እጁ የሰለለበትን ሰው “ተነሳና መካከል ላይ ቁም” አለው። ሰውየውም ተነስቶ ቆመ።  ከዚያም ኢየሱስ “እስቲ አንድ ነገር ልጠይቃችሁ፣ በሰንበት ቀን የተፈቀደው መልካም ማድረግ ነው ወይስ ክፉ? ነፍስ ማዳን ነው ወይስ ማጥፋት?” አላቸው። 10  በዙሪያው ያሉትን ሁሉ ከተመለከተ በኋላ ሰውየውን “እጅህን ዘርጋ” አለው። ሰውየውም እንደተባለው አደረገ፤ እጁም ዳነለት። 11  እነሱ ግን በቁጣ ተሞሉ፤ በኢየሱስ ላይ ምን ሊያደርጉ እንደሚችሉም እርስ በርሳቸው ይነጋገሩ ጀመር። 12  በዚያው ሰሞን አንድ ቀን ኢየሱስ ሊጸልይ ወደ ተራራ ወጣ፤ ሌሊቱንም ሙሉ ወደ አምላክ ሲጸልይ አደረ። 13  በነጋ ጊዜም ደቀ መዛሙርቱን ወደ እሱ ጠርቶ ከመካከላቸው አሥራ ሁለት መረጠ፤ “ሐዋርያት” ብሎም ሰየማቸው፤ እነሱም የሚከተሉት ናቸው:- 14  ጴጥሮስ ብሎ የሰየመው ስምዖን፣ ወንድሙ እንድርያስ፣ ያዕቆብ፣ ዮሐንስ፣ ፊልጶስ፣ በርቶሎሜዎስ፣ 15  ማቴዎስ፣ ቶማስ፣ የእልፍዮስ ልጅ ያዕቆብ፣ “ቀናተኛው” የሚባለው ስምዖን፣ 16  የያዕቆብ ልጅ ይሁዳና በኋላ ከሃዲ የሆነው የአስቆሮቱ ይሁዳ። 17  ከእነሱም ጋር ወርዶ ደልዳላ ቦታ ላይ ቆመ፤ ደቀ መዛሙርቱ የሆኑ እጅግ ብዙ ሰዎችም በዚያ ነበሩ፤ በተጨማሪም እሱን ለመስማትና ከበሽታቸው ለመፈወስ ከይሁዳ ሁሉና ከኢየሩሳሌም እንዲሁም በባሕር ጠረፍ አካባቢ ከሚገኙት ከጢሮስና ከሲዶና የመጡ በጣም ብዙ ሰዎች ነበሩ። 18  በርኩሳን መናፍስት ይሠቃዩ የነበሩ ሰዎችም እንኳ ተፈወሱ። 19  ኃይል ከእሱ እየወጣ ሁሉንም ይፈውስ ስለነበረ ሕዝቡ ሁሉ ሊነካው ይፈልግ ነበር። 20  ኢየሱስ ወደ ደቀ መዛሙርቱ በመመልከት እንዲህ ይል ጀመር:- “እናንተ ድሆች የሆናችሁ ደስተኞች ናችሁ፤ ምክንያቱም የአምላክ መንግሥት የእናንተ ነው። 21  “እናንተ አሁን የምትራቡ ደስተኞች ናችሁ፤ ምክንያቱም ኋላ ትጠግባላችሁ። “እናንተ አሁን የምታለቅሱ ደስተኞች ናችሁ፤ ምክንያቱም ኋላ ትስቃላችሁ። 22  “ሰዎች፣ በሰው ልጅ ምክንያት በሚጠሏችሁ፣ በሚያገሏችሁ፣ በሚነቅፏችሁና ክፉ እንደሆናችሁ አድርገው ያለ ስማችሁ ስም በሚሰጧችሁ ጊዜ ሁሉ ደስተኞች ናችሁ። 23  ሽልማታችሁ በሰማይ ታላቅ ስለሆነ በዚያን ቀን ሐሴት አድርጉ፣ በደስታም ፈንጥዙ፤ ምክንያቱም አባቶቻቸው በነቢያት ላይ እንዲሁ ያደርጉ ነበር። 24  “ነገር ግን እናንተ ሀብታሞች ወዮላችሁ፤ ምክንያቱም መጽናኛችሁን በሙሉ አግኝታችኋል። 25  “እናንተ አሁን የጠገባችሁ ወዮላችሁ፤ ምክንያቱም ኋላ ትራባላችሁ። “እናንተ አሁን የምትስቁ ወዮላችሁ፤ ምክንያቱም ኋላ ታዝናላችሁ እንዲሁም ታለቅሳላችሁ። 26  “ሰዎች ስለ እናንተ መልካም ነገር በሚናገሩበት ጊዜ ሁሉ ወዮላችሁ፤ ምክንያቱም አባቶቻቸው ለሐሰተኛ ነቢያት እንዲህ ያለ ነገር አድርገው ነበር። 27  “ለእናንተ ለምትሰሙ ግን እላችኋለሁ፣ ለጠላቶቻችሁ ፍቅር ማሳየታችሁን፣ ለሚጠሏችሁ መልካም ማድረጋችሁን፣ 28  የሚረግሟችሁን መመረቃችሁን እንዲሁም ለሚሰድቧችሁ መጸለያችሁን ቀጥሉ። 29  አንዱን ጉንጭህን ለሚመታህ ሌላውን ስጠው፤ መደረቢያህን ለሚወስድብህ እጀ ጠባብህንም አትከልክለው። 30  ለሚለምንህ ሁሉ ስጥ፤ ንብረትህን የሚወስድብህንም ሰው እንዲመልስ አትጠይቀው። 31  “በተጨማሪም ልክ ሰዎች እንዲያደርጉላችሁ እንደምትፈልጉት ሁሉ እናንተም እንዲሁ አድርጉላቸው። 32  “ደግሞም የሚወዷችሁን ብቻ ብትወዱ ምን የሚያስመሰግን ነገር አለው? ምክንያቱም ኃጢአተኞችም እንኳ የሚወዷቸውን ይወዳሉ። 33  መልካም ለሚያደርጉላችሁ መልካም ብታደርጉስ ምን ዋጋ አለው? ኃጢአተኞችም እንኳ እንዲሁ ያደርጋሉ። 34  እንዲሁም ይመልስልኛል ብላችሁ ለምታስቡት ሰው ያለ ወለድ ብታበድሩ ምን ፋይዳ አለው? ኃጢአተኞችም እንኳ የሰጡትን ያህል መልሰው ለመቀበል ለኃጢአተኞች ያለ ወለድ ያበድራሉ። 35  ከዚህ ይልቅ በምላሹ ምንም ሳትጠብቁ ለጠላቶቻችሁ ፍቅር ማሳየታችሁን፣ መልካም ማድረጋችሁንና ያለ ወለድ ማበደራችሁን ቀጥሉ፤ ሽልማታችሁም ታላቅ ይሆናል፤ የልዑሉም ልጆች ትሆናላችሁ፤ ምክንያቱም እሱ ለማያመሰግኑም ሆነ ለክፉዎች ደግ ነው። 36  አባታችሁ መሐሪ እንደሆነ ሁሉ እናንተም ምሕረት ማሳየታችሁን ቀጥሉ። 37  “በተጨማሪም በሌሎች ላይ መፍረዳችሁን ተዉ፤ በእናንተም ላይ ፈጽሞ አይፈረድባችሁም፤ ሌሎችን መኮነናችሁን ተዉ፤ እናንተም ፈጽሞ አትኮነኑም። ምንጊዜም ሌሎችን ማሩ፤ እናንተም ትማራላችሁ። 38  ሰጪዎች ሁኑ፤ ሰዎችም ይሰጧችኋል። ተትረፍርፎ እስኪፈስ ድረስ በተጠቀጠቀና በተነቀነቀ ጥሩ መስፈሪያ ሰፍረው በእቅፋችሁ ይሰጧችኋል። ምክንያቱም በምትሰፍሩበት መስፈሪያ መልሰው ይሰፍሩላችኋል።” 39  ከዚያም እንዲህ ሲል አንድ ምሳሌ ነገራቸው:- “ዕውር ዕውርን ሊመራ አይችልም፤ ይችላል እንዴ? አለዚያ ሁለቱም ተያይዘው ጉድጓድ ውስጥ ይወድቃሉ፤ አይደለም እንዴ? 40  ተማሪ ከአስተማሪው አይበልጥም፤ በሚገባ የተማረ ሁሉ ግን እንደ አስተማሪው ይሆናል። 41  ታዲያ በራስህ ዓይን ውስጥ ያለውን ግንድ ሳታይ በወንድምህ ዓይን ውስጥ ያለውን ጉድፍ ለምን ታያለህ? 42  በራስህ ዓይን ውስጥ ያለውን ግንድ ሳታይ ወንድምህን ‘ወንድሜ፣ ዓይንህ ውስጥ ያለውን ጉድፍ ላውጣልህ’ እንዴት ትለዋለህ? አንተ ግብዝ! በመጀመሪያ በራስህ ዓይን ውስጥ ያለውን ግንድ አውጣ፤ ከዚያም በወንድምህ ዓይን ውስጥ ያለውን ጉድፍ ለማውጣት አጥርተህ ማየት ትችላለህ። 43  “መልካም ዛፍ ሆኖ ሳለ የበሰበሰ ፍሬ የሚያፈራ ዛፍ የለም፤ እንዲሁም የበሰበሰ ዛፍ ሆኖ መልካም ፍሬ የሚያፈራ ዛፍ የለም። 44  እያንዳንዱ ዛፍ በፍሬው ይታወቃል። ለምሳሌ ሰዎች ከእሾህ በለስ አይለቅሙም፤ ወይም ከእሾሃማ ቁጥቋጦ ወይን አይቆርጡም። 45  ጥሩ ሰው በልቡ ካከማቸው መልካም ነገር ጥሩ ነገር ያወጣል፤ ክፉ ሰው ግን ካከማቸው መጥፎ ነገር ክፉ ነገር ያወጣል፤ ምክንያቱም አንደበቱ የሚናገረው በልቡ ውስጥ የሞላውን ነው። 46  “ታዲያ ‘ጌታ ሆይ! ጌታ ሆይ!’ የምትሉኝ፣ የምለውን ግን የማታደርጉት ለምንድን ነው? 47  ወደ እኔ የሚመጣ፣ ቃሌን የሚሰማና የሚያደርግ ሁሉ ከማን ጋር እንደሚመሳሰል ልንገራችሁ:- 48  ቤት ለመሥራት በጥልቀት ቆፍሮ በዐለት ላይ መሠረቱን ከጣለ ሰው ጋር ይመሳሰላል። በኋላም ጎርፍ መጥቶ ወንዙ ቤቱን በኃይል መታው፤ ሆኖም ቤቱ በደንብ ስለተገነባ ሊያነቃንቀው አልቻለም። 49  በሌላ በኩል ደግሞ ቃሌን ሰምቶ የማይፈጽም ሰው ያለ መሠረት በአፈር ላይ ቤት ከሠራ ሰው ጋር ይመሳሰላል። ወንዙም ቤቱን በኃይል መታው፤ ወዲያውም ተደረመሰ፤ እንዳልነበረም ሆነ።”

የግርጌ ማስታወሻዎች