በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ሉቃስ 5:1-39

5  አንድ ቀን ኢየሱስ በጌንሴሬጥ ሐይቅ ዳርቻ ቆሞ የአምላክን ቃል ሲያስተምር ብዙ ሰዎች ተሰብስበው ያዳምጡት ነበር፤ ከዚያም ሰዎቹ እየተገፋፉ ያጨናንቁት ጀመር።  በዚህ ጊዜ ሁለት ጀልባዎች በሐይቁ ዳርቻ ቆመው ተመለከተ፤ ዓሣ አጥማጆቹ ግን ከጀልባዎቹ ላይ ወርደው መረቦቻቸውን እያጠቡ ነበር።  ኢየሱስም አንደኛዋ ጀልባ ላይ ወጣ፤ ጀልባዋም የስምዖን የነበረች ሲሆን ከየብስ ጥቂት ፈቀቅ እንዲያደርጋት ጠየቀው። ከዚያም ጀልባዋ ላይ ተቀምጦ ሕዝቡን ያስተምር ጀመር።  ንግግሩን በጨረሰ ጊዜ ስምዖንን “ጥልቅ ወደሆነው አካባቢ ፈቀቅ በልና መረቦቻችሁን ጥላችሁ አጥምዱ” አለው።  ሆኖም ስምዖን መልሶ “መምህር፣ ሌሊቱን ሙሉ ስንደክም አድረን ምንም አልያዝንም፤ አንተ ካልክ ግን መረቦቹን እጥላለሁ” አለው።  እንደተባሉት ባደረጉም ጊዜ እጅግ ብዙ ዓሣ ያዙ። እንዲያውም መረቦቻቸው መበጣጠስ ጀመሩ።  በመሆኑም በሌላኛው ጀልባ ላይ የነበሩትን ባልደረቦቻቸውን መጥተው እንዲያግዟቸው በምልክት ጠሯቸው፤ እነሱም መጡ፣ ሁለቱንም ጀልባዎች በዓሣ ሞሏቸው፤ ከዚህም የተነሳ ጀልባዎቹ መስጠም ጀመሩ።  ስምዖን ጴጥሮስ ይህን ባየ ጊዜ በኢየሱስ ጉልበት ላይ ወድቆ “ጌታ ሆይ፣ እኔ ኃጢአተኛ ሰው ስለሆንኩ ከእኔ ራቅ” አለው።  ይህን ያለው እሱና ከእሱ ጋር የነበሩት ሁሉ ከያዙት ዓሣ ብዛት የተነሳ በጣም ስለተደነቁ ነው፤ 10  ከስምዖን ጋር አብረው ይሠሩ የነበሩት የዘብዴዎስ ልጆች ያዕቆብና ዮሐንስም በጣም ተደንቀው ነበር። ኢየሱስ ግን ስምዖንን “አይዞህ አትፍራ፤ ከአሁን ጀምሮ ሰውን በሕይወት እንዳለ የምታጠምድ ትሆናለህ” አለው። 11  ስለዚህ ጀልባዎቹን መልሰው ወደ የብስ ካስጠጉ በኋላ ሁሉን ነገር ትተው ተከተሉት። 12  በሌላ ጊዜ ደግሞ በአንድ ከተማ ውስጥ ሳለ፣ መላ ሰውነቱን የሥጋ ደዌ የወረሰው አንድ ሰው መጣ። ኢየሱስን ባየው ጊዜ በግምባሩ ተደፍቶ “ጌታ ሆይ፣ ብትፈልግ እኮ ልታነጻኝ ትችላለህ” ሲል ለመነው። 13  ኢየሱስም እጁን ዘርግቶ ዳሰሰውና “እፈልጋለሁ፣ ንጻ” አለው። ወዲያውም የሥጋ ደዌው ለቀቀው። 14  ኢየሱስም ሰውየውን ለማንም እንዳይናገር አዘዘው፤ “ነገር ግን ሄደህ ራስህን ለካህን አሳይ፤ ለእነሱም ምሥክር እንዲሆን ሙሴ ባዘዘው መሠረት መንጻትህን በተመለከተ መባ አቅርብ” አለው። 15  ሆኖም ስለ እሱ የሚወራው ወሬ ይበልጥ እየተሰራጨ ሄደ፤ በጣም ብዙ ሰዎችም የሚናገረውን ለመስማትና ከበሽታቸው ለመፈወስ ተሰብስበው ወደ እሱ ይመጡ ነበር። 16  ይሁን እንጂ ኢየሱስ ብቻውን ወደ በረሃ ሄዶ ቆየ፤ በዚያም ይጸልይ ነበር። 17  አንድ ቀን ኢየሱስ እያስተማረ ሳለ ከገሊላና ከይሁዳ መንደሮች ሁሉ እንዲሁም ከኢየሩሳሌም የመጡ ፈሪሳውያንና የሕጉ መምህራን በዚያ ተቀምጠው ነበር፤ ሰዎችንም ለመፈወስ የሚያስችለው የይሖዋ ኃይል ከእሱ ጋር ነበር። 18  በዚያን ጊዜም አንድ ሽባ ሰው በአልጋ የተሸከሙ ሰዎች መጡ፤ ኢየሱስ ወዳለበት አስገብተው ፊቱ ለማስቀመጥ መግቢያ ይፈልጉ ነበር። 19  ከሕዝቡም ብዛት የተነሳ መግቢያ ስላላገኙ ጣራው ላይ ወጥተው ጡቡን ካነሱ በኋላ የተኛበትን ትንሽ አልጋ አሾልከው ሽባውን ኢየሱስ ፊት በነበሩት ሰዎች መካከል አወረዱት። 20  እምነታቸውንም ባየ ጊዜ “አንተ ሰው፣ ኃጢአትህ ይቅር ተብሎልሃል” አለው። 21  በዚህ ጊዜ ጸሐፍትና ፈሪሳውያን “አምላክን የሚዳፈረው ይሄ ማን ነው? ከአምላክ በቀር ኃጢአትን ማን ይቅር ሊል ይችላል?” ብለው ያስቡ ጀመር። 22  ኢየሱስ ግን ሐሳባቸውን ተረድቶ እንዲህ ሲል መለሰላቸው:- “በልባችሁ እያሰባችሁ ያላችሁት ምንድን ነው? 23  ‘ኃጢአትህ ይቅር ተብሎልሃል’ ከማለትና ‘ተነስተህ ሂድ’ ከማለት የቱ ይቀላል? 24  ይሁንና የሰው ልጅ በምድር ላይ ኃጢአትን ይቅር የማለት ሥልጣን እንዳለው ታውቁ ዘንድ” አላቸውና ሽባውን ሰው “ተነስ፣ አልጋህን ተሸከምና ወደ ቤትህ ሂድ እልሃለሁ” አለው። 25  ወዲያውም በፊታቸው ተነስቶ ተኝቶበት የነበረውን አልጋ ተሸከመና አምላክን እያመሰገነ ወደ ቤቱ ሄደ። 26  በዚህ ጊዜ ሁሉም በአድናቆት ተውጠው አምላክን ማመስገን ጀመሩ፤ ታላቅ ፍርሃትም አድሮባቸው “ዛሬ የሚያስደንቅ ነገር አየን!” አሉ። 27  ይህ ከሆነም በኋላ ወጥቶ ሲሄድ ሌዊ የሚባል ቀረጥ ሰብሳቢ በቀረጥ መሰብሰቢያው ቦታ ተቀምጦ አየውና “ተከታዬ ሁን” አለው። 28  እሱም ሁሉንም ነገር እርግፍ አድርጎ በመተው ተነስቶ ተከተለው። 29  ከዚህም በተጨማሪ ሌዊ በቤቱ ለኢየሱስ ትልቅ ግብዣ አደረገ፤ በግብዣውም ላይ ብዙ ቀረጥ ሰብሳቢዎችና ሌሎች ሰዎች ከእነሱ ጋር በማዕድ ተቀምጠው ነበር። 30  ፈሪሳውያንና ከእነሱ ወገን የሆኑ ጸሐፍት ይህን ባዩ ጊዜ “ከቀረጥ ሰብሳቢዎችና ከኃጢአተኞች ጋር የምትበሉትና የምትጠጡት ለምንድን ነው?” በማለት በደቀ መዛሙርቱ ላይ ማጉረምረም ጀመሩ። 31  ኢየሱስም መልሶ እንዲህ አላቸው:- “ሐኪም የሚያስፈልጋቸው ሕመምተኞች እንጂ ጤነኞች አይደሉም። 32  እኔ የመጣሁት ኃጢአተኞች ንስሐ እንዲገቡ ለመጥራት እንጂ ጻድቃንን ለመጥራት አይደለም።” 33  እነሱም “የዮሐንስ ደቀ መዛሙርት አዘውትረው ይጾማሉ እንዲሁም ምልጃ ያቀርባሉ፤ የፈሪሳውያን ደቀ መዛሙርትም እንዲሁ ያደርጋሉ፤ የአንተ ደቀ መዛሙርት ግን ይበላሉ፣ ይጠጣሉ” አሉት። 34  ኢየሱስም እንዲህ አላቸው:- “ሙሽራው ከእነሱ ጋር እያለ የሙሽራው ጓደኞች እንዲጾሙ ልታደርጓቸው አትችሉም፤ ትችላላችሁ እንዴ? 35  ይሁንና ሙሽራው ከእነሱ የሚወሰድበት ጊዜ ይመጣል፤ በዚያን ጊዜ ይጾማሉ።” 36  በተጨማሪም እንዲህ ሲል አንድ ምሳሌ ነገራቸው:- “ከአዲስ ልብስ ላይ ቁራጭ ጨርቅ ወስዶ በአሮጌ ልብስ ላይ የሚጥፍ ሰው የለም፤ እንዲህ ቢያደርግ ግን አዲሱ ቁራጭ ጨርቅ ተቦጭቆ ይነሳል እንዲሁም ከአዲሱ ልብስ የተቆረጠው ጨርቅ ከአሮጌው ልብስ ጋር አይጣጣምም። 37  ደግሞም ባረጀ አቁማዳ አዲስ የወይን ጠጅ የሚያስቀምጥ ሰው የለም፤ እንዲህ ቢያደርግ ግን አዲሱ የወይን ጠጅ አቁማዳውን ያፈነዳዋል፤ ወይኑ ይፈሳል አቁማዳውም ከጥቅም ውጭ ይሆናል። 38  ስለዚህ አዲስ የወይን ጠጅ በአዲስ አቁማዳ መቀመጥ አለበት። 39  አሮጌ የወይን ጠጅ ከጠጣ በኋላ አዲሱን የሚፈልግ የለም፤ ምክንያቱም ‘አሮጌው ግሩም ነው’ ይላል።”

የግርጌ ማስታወሻዎች