በቀጥታ ወደ ዋናው ጉዳይ ግባ

በቀጥታ ወደ ርዕስ ማውጫው ሂድ

የይሖዋ ምሥክሮች

ቋንቋ ምረጥ አማርኛ

ሉቃስ 4:1-44

4  ኢየሱስ በመንፈስ ቅዱስ ተሞልቶ ከዮርዳኖስ ከተመለሰ በኋላ መንፈስ ወደ ምድረ በዳ መራው፤  በዚያም አርባ ቀን ቆየ፤ እዚያ ሳለም በዲያብሎስ ተፈተነ። ከዚህም በተጨማሪ በእነዚህ ቀናት ምንም ስላልበላ መጨረሻ ላይ ተራበ።  በዚህ ጊዜ ዲያብሎስ “እስቲ የአምላክ ልጅ ከሆንክ ይህ ድንጋይ ዳቦ እንዲሆን እዘዝ” አለው።  ኢየሱስ ግን “‘ሰው በምግብ ብቻ ሊኖር አይችልም’ ተብሎ ተጽፏል” ሲል መለሰለት።  ቀጥሎም ዲያብሎስ ወደ አንድ ከፍ ያለ ቦታ አወጣውና የዓለምን መንግሥታት ሁሉ በቅጽበት አሳየው፤  ከዚያም እንዲህ አለው:- “ይህን ሁሉ ሥልጣንና የእነዚህን መንግሥታት ክብር ለአንተ እሰጥሃለሁ፤ ይህ ሁሉ ለእኔ ስለተሰጠ እኔ ደግሞ ለፈለግሁት እሰጠዋለሁ።  ስለዚህ አንድ ጊዜ በፊቴ ተደፍተህ ብታመልከኝ ይህ ሁሉ የአንተ ይሆናል።”  ኢየሱስም መልሶ “‘ይሖዋ አምላክህን ብቻ አምልክ፤ ለእሱም ብቻ ቅዱስ አገልግሎት አቅርብ’ ተብሎ ተጽፏል” አለው።  ከዚያም ወደ ኢየሩሳሌም ከወሰደው በኋላ በቤተ መቅደሱ ግንብ አናት ላይ አቁሞ እንዲህ አለው:- “እስቲ የአምላክ ልጅ ከሆንክ ራስህን ከዚህ ወደ ታች ወርውር፤ 10  ምክንያቱም እንዲህ ተብሎ ተጽፏል:- ‘አንተን እንዲጠብቁ መላእክቱን ስለ አንተ ያዛል’፤ 11  እንዲሁም ‘እግርህን ፈጽሞ እንቅፋት እንዳይመታው በእጃቸው ወደ ላይ ያነሱሃል።’” 12  ኢየሱስም መልሶ “‘አምላክህን ይሖዋን አትፈታተነው’ ተብሏል” አለው። 13  ዲያብሎስም ፈተናውን ሁሉ ከጨረሰ በኋላ ሌላ አመቺ ጊዜ እስኪያገኝ ድረስ ትቶት ሄደ። 14  ከዚህ በኋላ ኢየሱስ በመንፈስ ኃይል ወደ ገሊላ ተመለሰ። ዝናውም በዙሪያው ባለ አገር ሁሉ ተሰራጨ። 15  በተጨማሪም በምኩራቦቻቸው ማስተማር ጀመረ፤ ሕዝቡም ሁሉ በአክብሮት ያየው ነበር። 16  ከዚያም ወዳደገበት ቦታ ወደ ናዝሬት መጣ፤ እንደ ልማዱም በሰንበት ቀን ወደ ምኩራብ ገባ፤ ሊያነብም ተነስቶ ቆመ። 17  የነቢዩ ኢሳይያስ ጥቅልልም ተሰጠው፤ ጥቅልሉንም ተርትሮ እንዲህ ተብሎ የተጻፈበትን ቦታ አገኘ:- 18  “የይሖዋ መንፈስ በእኔ ላይ ነው፤ ለድሆች ምሥራች እንዳውጅ ቀብቶኛል፤ ለተማረኩት ነፃነትን፣ ለታወሩትም ማየትን እንድሰብክ፣ የተጨቆኑትን ነፃ እንዳወጣ 19  እንዲሁም በይሖዋ ዘንድ የተወደደውን ዓመት እንድሰብክ ልኮኛል።” 20  ከዚያም ጥቅልሉን ጠቅልሎ ለአገልጋዩ መልሶ ሰጠውና ተቀመጠ፤ በምኩራቡ ውስጥ ያሉት ሰዎችም ሁሉ ትኩር ብለው ይመለከቱት ነበር። 21  እሱም “ይህ አሁን የሰማችሁት የቅዱሳን መጻሕፍት ቃል ዛሬ ተፈጸመ” ይላቸው ጀመር። 22  ሁሉም ስለ እሱ መልካም ነገር ይናገሩ ጀመር፤ ከአፉ በሚወጡት የሚማርኩ ቃላትም በመደነቅ “ይህ የዮሴፍ ልጅ አይደለም እንዴ?” ይሉ ነበር። 23  በዚህ ጊዜ “‘አንተ ሐኪም፣ እስቲ ራስህን አድን’ የሚለውን አባባል እንደምትጠቅሱብኝ ጥርጥር የለውም፤ እንዲሁም ‘በቅፍርናሆም እንደተደረገ የሰማነውን ነገር እዚህ በራስህ አገርም አድርግ’ ትሉኛላችሁ” አላቸው። 24  ደግሞም እንዲህ አላቸው:- “እውነት እላችኋለሁ፣ ነቢይ በገዛ አገሩ ተቀባይነት አያገኝም። 25  እውነቱን ልንገራችሁ፣ ለምሳሌ በኤልያስ ዘመን ሰማይ ለሦስት ዓመት ከስድስት ወር በመዘጋቱ በምድሪቱ ሁሉ ጽኑ ረሃብ በተከሰተ ጊዜ በእስራኤል ብዙ መበለቶች ነበሩ፤ 26  ሆኖም ኤልያስ በሲዶና አገር በሰራፕታ ትኖር ወደነበረች አንዲት መበለት ተላከ እንጂ ከእነዚህ መበለቶች ወደ አንዷም አልተላከም። 27  በተጨማሪም በነቢዩ ኤልሳዕ ዘመን በእስራኤል ብዙ የሥጋ ደዌ በሽተኞች ነበሩ፤ ሆኖም ከሶርያዊው ከንዕማን በስተቀር ከእነሱ መካከል አንድም ሰው አልነጻም።” 28  በምኩራቡ ውስጥ የነበሩት ሁሉ ይህን ሲሰሙ እጅግ ተቆጡ፤ 29  ተነስተውም እያጣደፉ ከከተማው አስወጡት፤ ቁልቁል ገፍትረው ሊጥሉትም ፈልገው ከተማቸው ወደተሠራችበት ተራራ አፋፍ ወሰዱት። 30  እሱ ግን በመካከላቸው ሰንጥቆ ሄደ። 31  ከዚያም በገሊላ ምድር ወደምትገኘው ወደ ቅፍርናሆም ከተማ ሄደ። እዚያም በሰንበት ሕዝቡን ያስተምር ነበር፤ 32  በሥልጣን ይናገር ስለነበረም ሕዝቡ በትምህርት አሰጣጡ እጅግ ተደነቁ። 33  በምኩራቡ ውስጥም ርኩስ መንፈስ ይኸውም ጋኔን ያደረበት አንድ ሰው ነበር፤ ሰውየውም በታላቅ ድምፅ እንዲህ ሲል ጮኸ:- 34  “አሃ! የናዝሬቱ ኢየሱስ፣ እኛ ከአንተ ጋር ምን ጉዳይ አለን? የመጣኸው ልታጠፋን ነው? ማን እንደሆንክ በሚገባ አውቃለሁ፤ አንተ የአምላክ ቅዱስ ነህ።” 35  ሆኖም ኢየሱስ “ዝም በል፤ ከእሱም ውጣ!” ብሎ ገሠጸው። ጋኔኑም ሰውየውን በሕዝቡ ፊት ከጣለው በኋላ ምንም ሳይጎዳው ለቆት ወጣ። 36  በዚህ ጊዜ ሁሉም በመገረም “እንዴ! ይህ እንዴት ዓይነት አነጋገር ነው? ርኩሳን መናፍስትን በሥልጣንና በኃይል ያዛል፤ እነሱም ታዘው ይወጣሉ” ሲሉ እርስ በርሳቸው ይነጋገሩ ጀመር። 37  ስለ ኢየሱስ የሚወራው ወሬም በዙሪያው ባለው አገር ሁሉ መሰራጨቱን ቀጠለ። 38  ኢየሱስ ከምኩራቡ ከወጣ በኋላ ወደ ስምዖን ቤት ገባ። የስምዖን አማትም ኃይለኛ ትኩሳት ይዟት እየተሠቃየች ነበር፤ አንድ ነገር እንዲያደርግላትም ለመኑት። 39  እሱም አጠገቧ ቆመና ትኩሳቱን ገሠጸው፤ ትኩሳቱም ለቀቃት። ወዲያውም ተነስታ ታገለግላቸው ጀመር። 40  ፀሐይ ስትጠልቅም ሰዎች በተለያየ በሽታ የተያዙ ሕመምተኞቻቸውን ወደ እሱ አመጡ። እሱም በእያንዳንዳቸው ላይ እጁን በመጫን ይፈውሳቸው ነበር። 41  አጋንንትም “አንተ የአምላክ ልጅ ነህ” እያሉና እየጮኹ ከብዙ ሰዎች ይወጡ ነበር። እሱ ግን ገሠጻቸው፤ ክርስቶስ መሆኑንም አውቀው ስለነበር ምንም እንዳይናገሩ ይከለክላቸው ነበር። 42  በነጋም ጊዜ ወጥቶ ጭር ወዳለ ስፍራ ሄደ። ሕዝቡ ግን ፈልገው ፈላልገው ያለበት ቦታ ድረስ መጡ፤ እንዳይሄድባቸውም ለማድረግ ሞከሩ። 43  እሱ ግን “ለሌሎች ከተሞችም የአምላክን መንግሥት ምሥራች ማወጅ አለብኝ፤ ምክንያቱም የተላክሁት ለዚህ ዓላማ ነው” አላቸው። 44  በዚህ መሠረት በይሁዳ ምኩራቦች መስበኩን ቀጠለ።

የግርጌ ማስታወሻዎች