በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ሉቃስ 3:1-38

3  ጢባርዮስ ቄሳር በነገሠ በአሥራ አምስተኛው ዓመት፣ ይኸውም ጳንጥዮስ ጲላጦስ የይሁዳ አገረ ገዥ፣ ሄሮድስ* የገሊላ አውራጃ ገዥ፣ ወንድሙ ፊልጶስ ደግሞ የኢጡርያስና የጥራኮኒዶስ አውራጃ ገዥ፣ ሊሳኒዮስ የአቢላኒስ አውራጃ ገዥ በነበሩበት ጊዜ፣  እንዲሁም ሐናና ቀያፋ የካህናት አለቆች በነበሩበት ዘመን የአምላክ ቃል በምድረ በዳ ወደነበረው ወደ ዘካርያስ ልጅ ወደ ዮሐንስ መጣ።  ስለዚህ ዮሐንስ ለኃጢአት ይቅርታ፣ የንስሐ ምልክት የሆነውን ጥምቀት እየሰበከ በዮርዳኖስ ዙሪያ ወዳለው አገር ሁሉ መጣ፤  ይህም የሆነው በነቢዩ ኢሳይያስ መጽሐፍ እንዲህ ተብሎ በተጻፈው ቃል መሠረት ነው:- “አዳምጡ! አንድ ሰው በምድረ በዳ ‘የይሖዋን መንገድ አዘጋጁ፤ ጎዳናዎቹንም አቅኑ’ በማለት እየጮኸ ነው።  ‘ሸለቆው ሁሉ ይሞላ፣ ተራራውና ኮረብታው ሁሉ ደልዳላ ሜዳ ይሁን፣ ጠመዝማዛው ቀጥ ያለ፣ ጎርበጥባጣውም ለጥ ያለ መንገድ ይሁን፤  ሥጋም ሁሉ አምላክ የሚያድንበትን መንገድ ያያል።’”  በመሆኑም ዮሐንስ በእሱ እጅ ለመጠመቅ የሚመጡትን ሰዎች እንዲህ ይላቸው ጀመር:- “እናንት የእፉኝት ልጆች፣ ከሚመጣው ቁጣ እንድትሸሹ ማን መከራችሁ?  እንግዲህ ለንስሐ የሚገባ ፍሬ አፍሩ። ‘እኛ እኮ አባታችን አብርሃም ነው’ እያላችሁ ራሳችሁን አታጽናኑ። አምላክ ለአብርሃም ከእነዚህ ድንጋዮች ልጆች ማስነሳት እንደማይሳነው ልነግራችሁ እወዳለሁ።  እንዲያውም መጥረቢያው ዛፎቹ ሥር ተቀምጧል፤ ስለዚህ መልካም ፍሬ የማያፈራ ዛፍ ሁሉ ተቆርጦ እሳት ውስጥ ይጣላል።” 10  ሕዝቡም “ታዲያ ምን ብናደርግ ይሻላል?” ብለው ይጠይቁት ነበር። 11  እሱም መልሶ “ሁለት ልብስ ያለው አንዱን ምንም ለሌለው ይስጥ፤ ምግብ ያለውም እንዲሁ ያድርግ” ይላቸው ነበር። 12  ሌላው ቀርቶ ቀረጥ ሰብሳቢዎች እንኳ ለመጠመቅ ወደ እሱ መጥተው “መምህር፣ ምን ብናደርግ ይሻላል?” አሉት። 13  እሱም “ከተተመነው ቀረጥ በላይ አትጠይቁ” አላቸው። 14  ወታደሮች ደግሞ “እኛስ ምን እናድርግ?” ብለው ይጠይቁት ነበር። እሱም “በማንም ላይ ግፍ አትሥሩ ወይም ማንንም በሐሰት አትክሰሱ፤ ከዚህ ይልቅ ባላችሁ መተዳደሪያ ረክታችሁ ኑሩ” አላቸው። 15  ሕዝቡ ክርስቶስን ይጠባበቁ ስለነበር “ይህ ሰው ክርስቶስ ይሆን?” እያሉ ሁሉም በልባቸው ስለ ዮሐንስ ያስቡ ነበር። 16  ዮሐንስ ለሁሉም እንዲህ ሲል መለሰላቸው:- “እኔ በውኃ አጠምቃችኋለሁ፤ ሆኖም ከእኔ የሚበረታ የሚመጣ ሲሆን እኔ የጫማውን ማሰሪያ እንኳ ለመፍታት አልበቃም። እሱ በመንፈስ ቅዱስና በእሳት ያጠምቃችኋል። 17  አውድማውን ፈጽሞ ለማጥራትና ስንዴውን ወደ ጎተራ ለማስገባት ላይዳውን* በእጁ ይዟል፤ እብቁን ግን በማይጠፋ እሳት ያቃጥለዋል።” 18  በዚህ መንገድ ዮሐንስ የተለያየ ብዙ ምክር በመስጠት ለሕዝቡ ምሥራች ማብሰሩን ቀጠለ። 19  ሆኖም የአውራጃ ገዥ የሆነው ሄሮድስ የወንድሙ ሚስት በሆነችው በሄሮድያዳ ምክንያትና በሠራቸው ሌሎች ክፉ ድርጊቶች የተነሳ ዮሐንስ ስለገሠጸው 20  ዮሐንስን ወህኒ ቤት በማስገባት በክፋት ላይ ክፋት ሠራ። 21  ሕዝቡም ሁሉ በሚጠመቁበት ጊዜ ኢየሱስም ተጠመቀ፤ እየጸለየም ሳለ ሰማይ ተከፈተ፤ 22  መንፈስ ቅዱስም አካላዊ ቅርጽ ይዞ በርግብ መልክ በእሱ ላይ ወረደ፤ ከዚያም “አንተ የምወድህ ልጄ ነህ፤ በአንተ ደስ ይለኛል” የሚል ድምፅ ከሰማይ መጣ። 23  በተጨማሪም ኢየሱስ ሥራውን ሲጀምር ሠላሳ ዓመት ገደማ ሆኖት ነበር፤ ሕዝቡም የዮሴፍ ልጅ እንደሆነ አድርገው ያስቡ ነበር፤ ዮሴፍ የሄሊ ልጅ፣ 24  ሄሊ የማታት ልጅ፣ ማታት የሌዊ ልጅ፣ ሌዊ የሚልኪ ልጅ፣ ሚልኪ የያና ልጅ፣ ያና የዮሴፍ ልጅ፣ 25  ዮሴፍ የማታትዩ ልጅ፣ ማታትዩ የአሞጽ ልጅ፣ አሞጽ የናሆም ልጅ፣ ናሆም የኤስሊ ልጅ፣ ኤስሊ የናጌ ልጅ፣ 26  ናጌ የማአት ልጅ፣ ማአት የማታትዩ ልጅ፣ ማታትዩ የሴሜይ ልጅ፣ ሴሜይ የዮሴክ ልጅ፣ ዮሴክ የዮዳ ልጅ፣ 27  ዮዳ የዮናን ልጅ፣ ዮናን የሬስ ልጅ፣ ሬስ የዘሩባቤል ልጅ፣ ዘሩባቤል የሰላትያል ልጅ፣ ሰላትያል የኔሪ ልጅ፣ 28  ኔሪ የሚልኪ ልጅ፣ ሚልኪ የሐዲ ልጅ፣ ሐዲ የቆሳም ልጅ፣ ቆሳም የኤልሞዳም ልጅ፣ ኤልሞዳም የዔር ልጅ፣ 29  ዔር የኢየሱስ* ልጅ፣ ኢየሱስ የኤሊዔዘር ልጅ፣ ኤሊዔዘር የዮሪም ልጅ፣ ዮሪም የማታት ልጅ፣ ማታት የሌዊ ልጅ፣ 30  ሌዊ የስምዖን ልጅ፣ ስምዖን የይሁዳ ልጅ፣ ይሁዳ የዮሴፍ ልጅ፣ ዮሴፍ የዮናም ልጅ፣ ዮናም የኤልያቄም ልጅ፣ 31  ኤልያቄም የሜልያ ልጅ፣ ሜልያ የሜና ልጅ፣ ሜና የማጣታ ልጅ፣ ማጣታ የናታን ልጅ፣ ናታን የዳዊት ልጅ፣ 32  ዳዊት የእሴይ ልጅ፣ እሴይ የኢዮቤድ ልጅ፣ ኢዮቤድ የቦዔዝ ልጅ፣ ቦዔዝ የሰልሞን ልጅ፣ ሰልሞን የነአሶን ልጅ፣ 33  ነአሶን የአሚናዳብ ልጅ፣ አሚናዳብ የአርናይ ልጅ፣ አርናይ የኤስሮን ልጅ፣ ኤስሮን የፋሬስ ልጅ፣ ፋሬስ የይሁዳ ልጅ፣ 34  ይሁዳ የያዕቆብ ልጅ፣ ያዕቆብ የይስሐቅ ልጅ፣ ይስሐቅ የአብርሃም ልጅ፣ አብርሃም የታራ ልጅ፣ ታራ የናኮር ልጅ፣ 35  ናኮር የሴሮህ ልጅ፣ ሴሮህ የራግው ልጅ፣ ራግው የፋሌቅ ልጅ፣ ፋሌቅ የዔቤር ልጅ፣ ዔቤር የሴሎም ልጅ፣ 36  ሴሎም የቃይናን ልጅ፣ ቃይናን የአርፋክስድ ልጅ፣ አርፋክስድ የሴም ልጅ፣ ሴም የኖኅ ልጅ፣ ኖኅ የላሜሕ ልጅ፣ 37  ላሜሕ የማቱሳላ ልጅ፣ ማቱሳላ የሄኖክ ልጅ፣ ሄኖክ የያሬድ ልጅ፣ ያሬድ የመላልኤል ልጅ፣ መላልኤል የቃይናን ልጅ፣ 38  ቃይናን የሄኖስ ልጅ፣ ሄኖስ የሴት ልጅ፣ ሴት የአዳም ልጅ፣ አዳም የአምላክ ልጅ።

የግርጌ ማስታወሻዎች

ሉቃስ 3:1 * እዚህ ላይ የተጠቀሰው የታላቁ ሄሮድስ ልጅ ሄሮድስ አንቲጳስ ነው።
ሉቃስ 3:17 ማቴዎስ 3:12 ላይ የሚገኘውን የግርጌ ማስታወሻ ተመልከት።
ሉቃስ 3:29 * አንዳንድ በእጅ የተጻፉ ጥንታዊ ቅጂዎች “ዮሴ” ይላሉ።