በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ሉቃስ 24:1-53

24  ይሁን እንጂ በሳምንቱ የመጀመሪያ ቀን፣ ያዘጋጇቸውን ጥሩ መዓዛ ያላቸው ቅመሞች ይዘው ጠዋት በማለዳ ወደ መቃብሩ ሄዱ።  ሆኖም ድንጋዩ ከመታሰቢያ መቃብሩ ተንከባሎ አገኙት፤  ወደ ውስጥ ሲገቡም የጌታ ኢየሱስን አስከሬን አላገኙም።  በሁኔታው ግራ ተጋብተው እያሉ የሚያንጸባርቅ ልብስ የለበሱ ሁለት ሰዎች ድንገት አጠገባቸው ቆሙ።  ሴቶቹ ፈርተው ወደ መሬት አቀርቅረው ሳሉ ሰዎቹ እንዲህ አሏቸው:- “ሕያው የሆነውን ለምን ከሙታን መካከል ትፈልጉታላችሁ?  [እሱ እዚህ የለም፤ ተነስቷል።]* ገና በገሊላ በነበረበት ጊዜ ምን እንዳላችሁ አስታውሱ፤  የሰውን ልጅ ለኃጢአተኛ ሰዎች አሳልፈው ሊሰጡት፣ ሊሰቀልና በሦስተኛው ቀን ሊነሳ ይገባል ብሎ ነበር።”  በዚህ ጊዜ ሴቶቹ የተናገረውን ቃል አስታወሱ፤  ከዚያም ከመታሰቢያ መቃብሩ ተመልሰው እነዚህን ነገሮች በሙሉ ለአሥራ አንዱና ለተቀሩት ሁሉ ነገሯቸው። 10  እነሱም መግደላዊት ማርያም፣ ዮሐናና የያዕቆብ እናት ማርያም ነበሩ። ከእነሱ ጋር የነበሩት ሌሎቹ ሴቶችም እነዚህን ነገሮች ለሐዋርያት ነገሯቸው። 11  ይሁን እንጂ እንዲሁ የሚቀባጥሩ ስለመሰላቸው ሴቶቹ የሚናገሩትን ነገር አላመኗቸውም። 12  [ጴጥሮስ ግን ተነስቶ ወደ መታሰቢያ መቃብሩ ሮጠ፤ ጎንበስ ብሎም ወደ ውስጥ ሲመለከት የተገነዘበትን ጨርቅ ብቻ አየ። በሆነውም ነገር እየተገረመ ከዚያ ሄደ።]* 13  ይሁንና በዚያው ቀን ከመካከላቸው ሁለቱ ከኢየሩሳሌም አሥራ አንድ ኪሎ ሜትር ያህል ርቃ ወደምትገኝ ኤማሁስ ወደምትባል መንደር እየተጓዙ ነበር፤ 14  እነሱም ስለሆነው ነገር ሁሉ እርስ በርሳቸው እየተነጋገሩ ነበር። 15  እየተነጋገሩና እየተወያዩ ሳሉም ኢየሱስ ራሱ ቀርቦ አብሯቸው መሄድ ጀመረ፤ 16  ነገር ግን እንዳይለዩት ዓይናቸው ተይዞ ነበር። 17  እሱም “እየሄዳችሁ እንዲህ እርስ በርስ የምትወያዩበት ጉዳይ ምንድን ነው?” አላቸው። በዚህ ጊዜ በሐዘን እንደተዋጡ ባሉበት ቆሙ። 18  ቀለዮጳ የተባለውም መልሶ “በኢየሩሳሌም ውስጥ ለብቻህ የምትኖር እንግዳ ሰው ነህ እንዴ? ሰሞኑን በከተማዋ ውስጥ የተፈጸመውን ነገር አታውቅም ማለት ነው?” አለው። 19  እሱም “ምን ተፈጸመ?” አላቸው። እነሱም እንዲህ አሉት:- “በአምላክና በሰው ሁሉ ፊት በሥራና በቃል ኃያል ነቢይ ከሆነው ከናዝሬቱ ኢየሱስ ጋር በተያያዘ የተፈጸመው ነገር ነዋ፤ 20  የካህናት አለቆቻችንና ገዥዎቻችን ለሞት ፍርድ አሳልፈው ሰጡት፤ እንዲሁም ሰቀሉት። 21  እኛ ግን ይህ ሰው እስራኤልን ነፃ ያወጣል ብለን ተስፋ አድርገን ነበር፤ ከዚህም በላይ ይህ ነገር ከተፈጸመ እነሆ ዛሬ ሦስተኛ ቀኑ ነው። 22  ደግሞም ከእኛው መካከል አንዳንድ ሴቶች የሚያስገርም ነገር ነገሩን፤ በማለዳ ወደ መታሰቢያ መቃብሩ ሄደው ነበር፤ 23  ሆኖም አስከሬኑን አላገኙም፤ ከዚያም በተመለሱ ጊዜ በተአምር የተገለጡላቸውንና እሱ ሕያው እንደሆነ የነገሯቸውን መላእክት እንዳዩም ነገሩን። 24  በተጨማሪም ከእኛ መካከል አንዳንዶች ወደ መታሰቢያ መቃብሩ ሄደው ነበር፤ እነሱም ሴቶቹ እንደተናገሩት ሆኖ አገኙት፤ እሱን ግን አላዩትም።” 25  እሱም እንዲህ አላቸው:- “እናንተ ማስተዋል የጎደላችሁና ነቢያት የተናገሩትን ሁሉ ከማመን ልባችሁ የዘገየ! 26  ክርስቶስ እነዚህን መከራዎች መቀበልና ወደ ክብሩ መግባት አይገባውም?” 27  ከዚያም ከሙሴና ከነቢያት ሁሉ ጀምሮ ስለ እሱ በቅዱሳን መጻሕፍት ሁሉ የተጻፈውን በሚገባ አብራራላቸው። 28  በመጨረሻም ወደሚሄዱበት መንደር ተቃረቡ፤ ይሁንና እሱ አልፎ የሚሄድ ይመስል ነበር። 29  እነሱ ግን “ቀኑ እየተገባደደና ምሽቱ እየተቃረበ ስለሆነ እኛ ጋር እደር” ብለው አጥብቀው ለመኑት። እሱም እነሱ ጋር ለማደር ገባ። 30  ከእነሱ ጋር በማዕድ ተቀምጦ ሳለም ዳቦውን አንስቶ ባረከ፤ ቆርሶም ይሰጣቸው ጀመር። 31  በዚህ ጊዜ ዓይናቸው ሙሉ በሙሉ ተከፈተና ማን መሆኑን አወቁ፤ እሱ ግን ከአጠገባቸው ተሰወረ። 32  እነሱም እርስ በርሳቸው “በመንገድ ላይ ሲያነጋግረንና ቅዱሳን መጻሕፍትን ግልጽልጽ አድርጎ ሲያስረዳን ልባችን እንደ እሳት ይቃጠልብን አልነበረም?” ተባባሉ። 33  በዚያኑም ሰዓት ተነስተው ወደ ኢየሩሳሌም ተመለሱ፤ አሥራ አንዱንና ከእነሱ ጋር የነበሩትንም አንድ ላይ ተሰብስበው አገኟቸው፤ 34  እነሱም “ጌታ በእርግጥ ተነስቷል፤ ለስምዖንም ተገልጦለታል!” እያሉ ነበር። 35  ሁለቱ ደግሞ በመንገድ ላይ ያጋጠማቸውን ነገርና ዳቦውን በቆረሰበት ጊዜ እንዴት እንዳወቁት ተረኩላቸው። 36  እነዚህን ነገሮች እየተነጋገሩ ሳለ እሱ ራሱ በመካከላቸው ቆመ፤ [ከዚያም “ሰላም ለእናንተ ይሁን” አላቸው።]* 37  ሆኖም በጣም ከመደንገጣቸውና ከመፍራታቸው የተነሳ መንፈስ ያዩ መሰላቸው። 38  በዚህ ጊዜ እንዲህ አላቸው:- “ለምን ትረበሻላችሁ? ለምንስ በልባችሁ ውስጥ ጥርጣሬ ያድራል? 39  እኔ ራሴ መሆኔን እንድታውቁ እጆቼንና እግሮቼን ተመልከቱ፤ ደግሞም ዳስሳችሁኝ እዩ፤ ምክንያቱም መንፈስ በእኔ ላይ እንደምታዩት ሥጋና አጥንት የለውም።” 40  [ይህንም እያለ እጆቹንና እግሮቹን አሳያቸው።]* 41  እነሱ ግን በጣም ከመደሰታቸው የተነሳ ለማመን ተቸግረው በነገሩ እየተገረሙ ሳሉ “የሚበላ ነገር አላችሁ?” አላቸው። 42  እነሱም የተጠበሰ ቁራሽ ዓሣ ሰጡት፤ 43  እሱም ተቀብሎ በፊታቸው በላ። 44  ደግሞም እንዲህ አላቸው:- “ከእናንተ ጋር በነበርኩበት ጊዜ በሙሴ ሕግ፣ በነቢያትና በመዝሙራት ስለ እኔ የተጻፉት ነገሮች ሁሉ መፈጸም አለባቸው ብዬ የነገርኳችሁ ቃሌ ይህ ነው።” 45  ከዚያም የቅዱሳን መጻሕፍትን ትርጉም መረዳት እንዲችሉ አእምሯቸውን ከፈተላቸው፤ 46  እንዲህም አላቸው:- “እንደሚከተለው ተብሎ ተጽፏል፤ ክርስቶስ መከራ ይቀበላል፤ በሦስተኛውም ቀን ከሙታን ይነሳል፤ 47  በስሙም የኃጢአት ይቅርታ የሚያስገኝ ንስሐ ለሕዝቦች ሁሉ ይሰበካል፤ ከኢየሩሳሌምም አንስቶ 48  ለእነዚህ ነገሮች ምሥክሮች ትሆናላችሁ። 49  እኔም አባቴ ቃል የገባውን ነገር እልክላችኋለሁ። እናንተ ግን ከላይ የሚመጣውን ኃይል እስክትለብሱ ድረስ በከተማዋ ውስጥ ቆዩ።” 50  ከዚህ በኋላ እስከ ቢታንያ ይዟቸው ሄደ፤ እጆቹንም አንስቶ ባረካቸው። 51  እየባረካቸውም ሳለ ከእነሱ ተለይቶ ወደ ሰማይ ማረግ ጀመረ። 52  እነሱም ሰገዱለትና በታላቅ ደስታ ወደ ኢየሩሳሌም ተመለሱ። 53  ዘወትር በቤተ መቅደስ እየተገኙም አምላክን ይባርኩ ነበር።

የግርጌ ማስታወሻዎች

ሉቃስ 24:6 * ቅንፉን በተመለከተ ለተሰጠው ማብራሪያ ሉቃስ 23:34 ላይ የሚገኘውን የግርጌ ማስታወሻ ተመልከት።
ሉቃስ 24:12 * ቅንፉን በተመለከተ ለተሰጠው ማብራሪያ ሉቃስ 23:34 ላይ የሚገኘውን የግርጌ ማስታወሻ ተመልከት።
ሉቃስ 24:36 * ቅንፉን በተመለከተ ለተሰጠው ማብራሪያ ሉቃስ 23:34 ላይ የሚገኘውን የግርጌ ማስታወሻ ተመልከት።
ሉቃስ 24:40 * ቅንፉን በተመለከተ ለተሰጠው ማብራሪያ ሉቃስ 23:34 ላይ የሚገኘውን የግርጌ ማስታወሻ ተመልከት።