በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ሉቃስ 23:1-56

23  ስለዚህ በዚያ ተሰብስበው የነበሩት ሰዎች በሙሉ ተነስተው ወደ ጲላጦስ ወሰዱት።  ከዚያም እንዲህ እያሉ ይከሱት ጀመር:- “ይህ ሰው ሕዝባችንን ሲያሳምፅ፣ ለቄሳር ግብር እንዳይከፈል ሲከለክልና ‘እኔ ክርስቶስ ንጉሥ ነኝ’ ሲል አግኝተነዋል።”  በዚህ ጊዜ ጲላጦስ “አንተ የአይሁድ ንጉሥ ነህ?” ሲል ጠየቀው። እሱም መልሶ “አንተው ራስህ እኮ እየተናገርከው ነው” አለው።  ከዚያም ጲላጦስ ለካህናት አለቆቹና ለሕዝቡ “በዚህ ሰው ላይ ምንም ወንጀል አላገኘሁበትም” አለ።  እነሱ ግን “በመላው ይሁዳ፣ እንዲያውም ከገሊላ አንስቶ እስከዚህ ድረስ እያስተማረ ሕዝቡን ይቀሰቅሳል” በማለት አጥብቀው ይናገሩ ጀመር።  ጲላጦስ ይህን ሲሰማ ሰውየው የገሊላ ሰው መሆኑን ለማረጋገጥ ጠየቀ፤  ከሄሮድስ* ግዛት የመጣ መሆኑን ካረጋገጠ በኋላም በዚያን ጊዜ በኢየሩሳሌም ወደነበረው ወደ ሄሮድስ ላከው።  ሄሮድስ ኢየሱስን ሲያየው በጣም ደስ አለው፤ ምክንያቱም ስለ እሱ ሰምቶ ስለነበር ለረጅም ጊዜ እሱን ለማየት ይፈልግ ነበር፤ አንዳንድ ምልክት ሲፈጽም ለማየትም ተስፋ ያደርግ ነበር።  በመሆኑም ብዙ ጥያቄ ይጠይቀው ጀመር፤ እሱ ግን ምንም መልስ አልሰጠውም። 10  ይሁን እንጂ የካህናት አለቆቹና ጸሐፍት በተደጋጋሚ እየተነሱ አጥብቀው ይከሱት ነበር። 11  ከዚያም ሄሮድስ ከወታደራዊ ዘቦቹ ጋር አቃለለው፤ እንዲሁም ያጌጠ ልብስ አልብሶ ካፌዘበት በኋላ መልሶ ወደ ጲላጦስ ላከው። 12  በዚያን ዕለት ሄሮድስና ጲላጦስ ወዳጆች ሆኑ፤ ከዚያ በፊት በመካከላቸው ለተወሰነ ጊዜ የዘለቀ ጠላትነት ነበር። 13  ከዚያም ጲላጦስ የካህናት አለቆቹን፣ ገዥዎቹንና ሕዝቡን በአንድነት ጠርቶ 14  እንዲህ አላቸው:- “ይህን ሰው ወደ እኔ ያመጣችሁት ሕዝቡን ለዓመፅ ያነሳሳል ብላችሁ ነበር፤ ይኸው በፊታችሁ መረመርኩት፤ ሆኖም በእሱ ላይ ላቀረባችሁት ክስ መሠረት የሚሆን ምንም ነገር አላገኘሁበትም። 15  ሄሮድስም ቢሆን ምንም ስላላገኘበት ወደ እኛ መልሶ ልኮታል፤ በመሆኑም ለሞት የሚያበቃ ምንም ነገር አልፈጸመም። 16  ስለዚህ ቀጥቼ እፈታዋለሁ።” 17*  —— 18  ሕዝቡ ሁሉ ግን በአንድ ላይ “ይህን ሰው አስወግደው፤ በርባንን ግን ፍታልን!” እያሉ ጮኹ። 19  (ይህ ሰው በከተማው ውስጥ በተከሰተ የሕዝብ ዓመፅና በነፍስ ግድያ የታሰረ ነበር።) 20  ጲላጦስ ኢየሱስን ሊፈታው ስለፈለገ ድምፁን ከፍ አድርጎ እንደገና ለሕዝቡ ተናገረ። 21  እነሱ ግን “ስቀለው! ስቀለው!” እያሉ ይጮኹ ጀመር። 22  እሱም ለሦስተኛ ጊዜ “ለምን? ይህ ሰው ምን ያጠፋው ነገር አለ? ለሞት የሚያበቃ ምንም ነገር አላገኘሁበትም፤ ስለዚህ ቀጥቼ እፈታዋለሁ” አላቸው። 23  በዚህ ጊዜ ድምፃቸውን ከፍ አድርገው ኢየሱስ እንዲሰቀል በመጠየቅ አጥብቀው ይወተውቱ ጀመር፤ ድምፃቸው እየበረታ በመሄዱም ተሸነፈላቸው። 24  ስለዚህ ጲላጦስ የጠየቁት እንዲፈጸም ፈረደ፤ 25  ሕዝብ በማሳመፅና በነፍስ ግድያ ታስሮ የነበረውንና እንዲፈታላቸው የጠየቁትን ሰው ለቀቀው፤ ኢየሱስን ግን እንደ ፍላጎታቸው አሳልፎ ሰጠው። 26  ይዘውትም እየሄዱ ሳሉ ስምዖን የተባለ አንድ የቀሬና ሰው ከገጠር መጥቶ በዚያ ሲያልፍ ያዙትና የመከራውን እንጨት* አሸክመው ከኢየሱስ ኋላ እንዲሄድ አደረጉት። 27  ብዙ ሕዝብም ይከተለው ነበር፤ ከእነሱም መካከል በሐዘን ደረታቸውን እየደቁ የሚያለቅሱለት ሴቶች ነበሩ። 28  ኢየሱስም ወደ ሴቶቹ ዞር ብሎ እንዲህ አለ:- “እናንተ የኢየሩሳሌም ሴቶች ልጆች፣ ለእኔ ማልቀሳችሁን ተዉ። ከዚህ ይልቅ ለራሳችሁና ለልጆቻችሁ አልቅሱ፤ 29  ምክንያቱም ሰዎች ‘መሃን የሆኑ ሴቶች፣ ያልወለዱ ማህፀኖችና ያላጠቡ ጡቶች ደስተኞች ናቸው!’ የሚሉበት ቀን ይመጣል። 30  በዚያን ጊዜ ተራሮችን ‘በላያችን ውደቁ!’ ኮረብቶችንም ‘ሸሽጉን!’ ማለት ይጀምራሉ። 31  ምክንያቱም ዛፉ እርጥብ ሆኖ ሳለ እንዲህ ካደረጉ በደረቀ ጊዜማ ምን ይከሰት ይሆን?” 32  ወንጀለኞች የሆኑ ሌሎች ሁለት ሰዎችም ከእሱ ጋር ሊገደሉ እየተወሰዱ ነበር። 33  የራስ ቅል ወደተባለ ቦታ በደረሱ ጊዜ ኢየሱስን በዚያ ሰቀሉት፤ ወንጀለኞቹንም አንዱን በቀኙ አንዱን በግራው ሰቀሉ። 34  [ኢየሱስ ግን “አባት ሆይ፣ እያደረጉ ያሉትን ስለማያውቁ ይቅር በላቸው” ይል ነበር።]* ከዚህ በተጨማሪ ልብሶቹን ለመከፋፈል ዕጣ ተጣጣሉ። 35  ሕዝቡም ቆመው ይመለከቱ ነበር። ገዥዎቹ ግን “ሌሎችን አዳነ፤ የተመረጠው የአምላክ ክርስቶስ እሱ ከሆነ እስቲ ራሱን ያድን” እያሉ ያሽሟጥጡት ነበር። 36  ወታደሮቹ እንኳ ሳይቀሩ ወደ እሱ ቀርበው የኮመጠጠ ወይን በመስጠት አፌዙበት፤ 37  እንዲሁም “አንተ የአይሁድ ንጉሥ ከሆንክ ራስህን አድን” ይሉት ነበር። 38  በተጨማሪም ከበላዩ “ይህ የአይሁድ ንጉሥ ነው” የሚል ጽሑፍ ነበር። 39  ከተሰቀሉትም ወንጀለኞች አንዱ “አንተ ክርስቶስ አይደለህም እንዴ? እስቲ ራስህንም እኛንም አድን” እያለ ይዘልፈው ጀመር። 40  ሌላኛው ግን መልሶ እንዲህ ሲል ገሠጸው:- “አንተ ራስህ ተመሳሳይ ፍርድ እየተቀበልክ እያለህ ትንሽ እንኳ አምላክን አትፈራም? 41  እኛስ ላደረግነው ነገር የሚገባንን ቅጣት በሙሉ እየተቀበልን ስለሆነ በእኛ ላይ የተፈጸመው ተገቢ ፍርድ ነው፤ ይህ ሰው ግን ምንም የሠራው ጥፋት የለም።” 42  ቀጥሎም “ኢየሱስ ሆይ፣ ወደ መንግሥትህ ስትመጣ አስበኝ” አለው። 43  እሱም “እውነት እልሃለሁ ዛሬ፣ ከእኔ ጋር በገነት ትሆናለህ” አለው። 44  ጊዜው ስድስት ሰዓት የነበረ ቢሆንም ምድሪቱ በሙሉ እስከ ዘጠኝ ሰዓት ድረስ በጨለማ ተሸፈነች፤ 45  ይህም የሆነው የፀሐይ ብርሃን በመጥፋቱ ነው፤ ከዚያም የቤተ መቅደሱ መጋረጃ መሃል ለመሃል ተቀደደ። 46  ኢየሱስም በታላቅ ድምፅ ጮኾ “አባት ሆይ፣ መንፈሴን በእጅህ አደራ እሰጣለሁ” አለ። ይህንም ብሎ ሞተ። 47  የመቶ አለቃውም የተፈጸመውን ነገር በማየቱ “ይህ ሰው በእርግጥ ጻድቅ ነበር” በማለት ለአምላክ ክብር ይሰጥ ጀመር። 48  ይህን ለማየት በቦታው ተሰብስበው የነበሩ ሰዎች ሁሉ የተከሰቱትን ነገሮች ሲመለከቱ ደረታቸውን እየደቁ ይመለሱ ጀመር። 49  በተጨማሪም በቅርብ የሚያውቁት ሁሉ በርቀት ቆመው ነበር። እንዲሁም ከገሊላ አንስቶ አንድ ላይ ሆነው ሲከተሉት የነበሩ ሴቶች እነዚህን ነገሮች ቆመው ይመለከቱ ነበር። 50  እነሆም፣ የሸንጎ አባል የሆነ ዮሴፍ የሚባል አንድ ጥሩና ጻድቅ ሰው ነበረ፤ 51  ይህ ሰው ሴራቸውንና ድርጊታቸውን በመደገፍ ድምፅ አልሰጠም ነበር፤ የአይሁዳውያን ከተማ የሆነችው የአርማትያስ ሰው ሲሆን የአምላክን መንግሥት ይጠባበቅ ነበር፤ 52  እሱም ወደ ጲላጦስ ሄዶ የኢየሱስ አስከሬን እንዲሰጠው ጠየቀ። 53  አስከሬኑንም አውርዶ በበፍታ ገነዘው፤ ከዚያም ማንም ሰው ተቀብሮበት በማያውቅ ከዐለት ተፈልፍሎ በተሠራ መቃብር ውስጥ አኖረው። 54  ዕለቱ የዝግጅት ቀን ነበር፤ የሰንበት የምሽት ብርሃንም እየተቃረበ ነበር። 55  ከገሊላ ከኢየሱስ ጋር አብረው የመጡት ሴቶች ግን ተከትለው በመሄድ የመታሰቢያውን መቃብር አዩ፤ አስከሬኑም እንዴት እንዳረፈ ተመለከቱ፤ 56  ጥሩ መዓዛ ያላቸው ቅመሞችና ሽቶዎች ለማዘጋጀትም ተመልሰው ሄዱ። ሆኖም ሕጉ በሚያዘው መሠረት በሰንበት አረፉ።

የግርጌ ማስታወሻዎች

ሉቃስ 23:7 ሉቃስ 3:1 ላይ የሚገኘውን የግርጌ ማስታወሻ ተመልከት።
ሉቃስ 23:17 ማቴዎስ 17:21 ላይ የሚገኘውን የግርጌ ማስታወሻ ተመልከት።
ሉቃስ 23:26 * ከተጨማሪው መረጃ ላይ 6ኛውን ርዕስ ተመልከት።
ሉቃስ 23:34 * ይህ ሐሳብ በቅንፍ ውስጥ የተቀመጠው በእጅ በተጻፉ አንዳንድ የጥንት ቅጂዎች ውስጥ የማይገኝ መሆኑን ለማመልከት ነው፤ ሆኖም በአንዳንዶቹ ውስጥ ይገኛል።