በቀጥታ ወደ ዋናው ጉዳይ ግባ

በቀጥታ ወደ ርዕስ ማውጫው ሂድ

የይሖዋ ምሥክሮች

ቋንቋ ምረጥ አማርኛ

ሉቃስ 2:1-52

2  በዚያ ዘመን፣ አውግስጦስ ቄሳር የዓለም ሕዝብ ሁሉ እንዲመዘገብ አዋጅ አወጣ፤  (ይህ የመጀመሪያ ምዝገባ የተካሄደው ቄሬኔዎስ የሶርያ አገረ ገዥ በነበረበት ጊዜ ነው፤)  ስለዚህ ሁሉም ሰው ለመመዝገብ ወደየራሱ ከተማ ሄደ።  ዮሴፍም ከዳዊት ቤትና ወገን ስለነበር በገሊላ ከምትገኘው ከናዝሬት ከተማ ተነስቶ በይሁዳ ወዳለች ቤተልሔም ተብላ ወደምትጠራ የዳዊት ከተማ ሄደ፤  ወደዚያ የሄደውም በታጨችለት መሠረት ካገባት ከማርያም ጋር ነበር፤ በዚህ ወቅት ማርያም የመውለጃዋ ጊዜ ተቃርቦ ነበር።  በዚያም እንዳሉ የምትወልድበት ቀን ደረሰ።  የበኩር ልጇ የሆነውን ወንድ ልጅም ወለደች፤ በእንግዶች ማረፊያ ቦታ ስላላገኙም ልጁን በመጠቅለያ ጠቅልላ በግርግም ውስጥ አስተኛችው።  በዚያው አገር፣ ሌሊት* ሜዳ ላይ መንጎቻቸውን ሲጠብቁ የሚያድሩ እረኞች ነበሩ።  በድንገት የይሖዋ መልአክ መጥቶ አጠገባቸው ቆመ፤ የይሖዋም ክብር በዙሪያቸው አንጸባረቀ፤ በዚህ ጊዜ በታላቅ ፍርሃት ተዋጡ። 10  መልአኩ ግን እንዲህ አላቸው:- “አትፍሩ፣ እነሆ ለሰዎች ሁሉ ታላቅ ደስታ የሚያስገኝ ምሥራች እነግራችኋለሁ፤ 11  ምክንያቱም በዛሬው ዕለት በዳዊት ከተማ አዳኝ ተወልዶላችኋል፤ እሱም ጌታ ክርስቶስ ነው። 12  ይህም ምልክት ይሁናችሁ:- አንድ ሕፃን በመጠቅለያ ተጠቅልሎ በግርግም ተኝቶ ታገኛላችሁ።” 13  ድንገትም ብዙ የሰማይ ሠራዊት ከመልአኩ ጋር ታዩ፤ አምላክንም እያመሰገኑ እንዲህ አሉ:- 14  “በሰማያት ለአምላክ ክብር ይሁን፤ በምድርም አምላክ ለሚወዳቸው ሰዎች ሰላም ይሁን።” 15  መላእክቱም ከእነሱ ተለይተው ወደ ሰማይ ከሄዱ በኋላ እረኞቹ እርስ በርሳቸው “አሁኑኑ ወደ ቤተልሔም ሄደን ይሖዋ በገለጠልን መሠረት በዚያ የተፈጸመውን ነገር ማየት አለብን” ይባባሉ ጀመር። 16  በፍጥነትም ሄደው ማርያምንና ዮሴፍን አገኙ፤ ሕፃኑም በግርግም ተኝቶ ነበር። 17  ሕፃኑን ባዩትም ጊዜ ስለ እሱ የተነገራቸውን አወሩ። 18  ይህንንም የሰሙ ሰዎች ሁሉ እረኞቹ በነገሯቸው ነገር ተደነቁ፤ 19  ማርያም ግን የሰማቻቸውን ነገሮች በውስጧ ይዛ በልቧ ታሰላስል ነበር። 20  እረኞቹም የሰሙትና ያዩት ነገር ሁሉ ልክ እንደተነገራቸው ሆኖ ስላገኙት አምላክን እያከበሩና እያመሰገኑ ተመለሱ። 21  ስምንት ቀን ሞልቶት የሚገረዝበት ጊዜ ሲደርስ ከመፀነሱ በፊት መልአኩ በተናገረው መሠረት ስሙ ኢየሱስ ተብሎ ተጠራ። 22  በተጨማሪም በሙሴ ሕግ መሠረት የሚነጹባቸው ቀናት ሲፈጸሙ ሕፃኑን በይሖዋ ፊት ለማቅረብ ወደ ኢየሩሳሌም ይዘውት መጡ፤ 23  ይህንንም ያደረጉት “ማህፀን የሚከፍት ወንድ ሁሉ ለይሖዋ የተቀደሰ መሆን አለበት” ተብሎ በይሖዋ ሕግ ላይ በተጻፈው መሠረት ነው፤ 24  እንዲሁም የይሖዋ ሕግ በሚያዘው መሠረት “ሁለት ዋኖሶች ወይም ሁለት የርግብ ጫጩቶች” መሥዋዕት አድርገው ለማቅረብ ነው። 25  እነሆም፣ በኢየሩሳሌም ስምዖን የሚባል አንድ ሰው ነበር፤ እሱም የእስራኤልን መጽናናት የሚጠባበቅ ጻድቅና አምላክን የሚፈራ ሰው ነበር፤ መንፈስ ቅዱስም በእሱ ላይ ነበር። 26  በተጨማሪም የይሖዋን መሲሕ ሳያይ እንደማይሞት አምላክ በመንፈስ ቅዱስ ገልጦለት ነበር። 27  እሱም በዚህ ጊዜ በመንፈስ ተመርቶ ወደ ቤተ መቅደሱ መጣ፤ ወላጆቹ ሕጉ በሚያዘው የተለመደ ሥርዓት መሠረት ሕፃኑን ኢየሱስን ይዘው በገቡ ጊዜ 28  ስምዖን ሕፃኑን ተቀብሎ አቀፈውና አምላክን ባረከ፤ እንዲህም አለ:- 29  “ሉዓላዊ ጌታ ሆይ፣ ቃል በገባኸው መሠረት አሁን ባሪያህን በሰላም ታሰናብተዋለህ፤ 30  ምክንያቱም ዓይኖቼ ሰዎችን የምታድንበትን መንገድ አይተዋል፤ 31  ይህም በሰዎች ሁሉ ፊት ያዘጋጀኸው ነው፤ 32  ሕዝቦችን የጋረደውን መሸፈኛ የሚገልጥ ብርሃን እንዲሁም የሕዝብህ የእስራኤል ክብር ነው።” 33  አባቱና እናቱም ስለ እሱ በሚነገሩት ነገሮች ይደነቁ ነበር። 34  ስምዖንም ከባረካቸው በኋላ እናቱን ማርያምን እንዲህ አላት:- “እነሆ ይህ ሕፃን በእስራኤል ለብዙዎች መውደቅም ሆነ መነሳት ምክንያት ይሆናል እንዲሁም በንቀት ዓይን የሚታይ ምልክት ይሆናል፤ 35  በዚህም በብዙዎች ልብ ውስጥ ያለው ሐሳብ ይገለጣል፤ በአንቺም ነፍስ ትልቅ ሰይፍ ያልፋል።” 36  ከአሴር ነገድ የሆነች የፋኑኤል ልጅ፣ ሐና የምትባል ነቢይት ነበረች፤ ይህች ሴት በዕድሜ የገፋች ስትሆን በድንግልናዋ ካገባችው ባሏ ጋር ለሰባት ዓመት ኖራለች፤ 37  በዚህ ጊዜ ሰማንያ አራት ዓመት የሆናት መበለት ነበረች፤ ሌትና ቀንም በጾምና በምልጃ ቅዱስ አገልግሎት እያቀረበች ከቤተ መቅደስ ፈጽሞ አትጠፋም ነበር። 38  በዚያን ሰዓትም ቀርባ አምላክን ታመሰግን ጀመር፤ የኢየሩሳሌምን መዳን ለሚጠባበቁም ሁሉ ስለ ሕፃኑ መናገር ጀመረች። 39  የይሖዋ ሕግ በሚለው መሠረት ሁሉንም ነገር ከፈጸሙ በኋላ በገሊላ ወደምትገኘው ወደ መኖሪያ ከተማቸው ወደ ናዝሬት ተመለሱ። 40  ሕፃኑም እያደገና እየጠነከረ እንዲሁም በጥበብ እየተሞላ ሄደ፤ የአምላክም ሞገስ በእሱ ላይ ነበር። 41  ወላጆቹም በየዓመቱ ለፋሲካ በዓል ወደ ኢየሩሳሌም የመሄድ ልማድ ነበራቸው። 42  አሥራ ሁለት ዓመት በሞላው ጊዜም በበዓሉ ልማድ መሠረት ወደ ኢየሩሳሌም ወጡ፤ 43  በዓሉ እስኪያበቃም እዚያው ቆዩ። በሚመለሱበት ጊዜ ግን ኢየሱስ እዚያው ኢየሩሳሌም ቀረ፤ ወላጆቹም ይህን አላስተዋሉም ነበር። 44  አብረዋቸው ከሚጓዙት ሰዎች ጋር ያለ ስለመሰላቸው የአንድ ቀን መንገድ ተጓዙ፣ በኋላም ከዘመዶቻቸውና ከሚያውቋቸው ሰዎች ዘንድ ይፈልጉት ጀመር። 45  ባጡት ጊዜ ግን እየፈለጉት ወደ ኢየሩሳሌም ተመለሱ። 46  በመጨረሻም ከሦስት ቀን በኋላ ቤተ መቅደሱ ውስጥ በመምህራን መካከል ተቀምጦ ሲያዳምጣቸውና ሲጠይቃቸው አገኙት። 47  በዚያ የነበሩት ሰዎችም ሁሉ በማስተዋል ችሎታውና በመልሱ ተደንቀው ያዳምጡት ነበር። 48  ወላጆቹም ባዩት ጊዜ ተገረሙ፤ እናቱም “ልጄ፣ ምነው እንዲህ አደረግከን? እኔና አባትህ እኮ በጣም ተጨንቀን ስንፈልግህ ነበር” አለችው። 49  እሱ ግን “ለምን ፈለጋችሁኝ? በአባቴ ቤት መሆን እንደሚገባኝ አታውቁም?” አላቸው። 50  እነሱ ግን የተናገረው ነገር አልገባቸውም። 51  ከዚያም ኢየሱስ አብሯቸው ወደ ናዝሬት ወረደ፤ እንደ ወትሮውም ይታዘዛቸው ነበር። እናቱም የተባሉትን ነገሮች ሁሉ በልቧ ትይዝ ነበር። 52  ኢየሱስም በአካልና በጥበብ እያደገ እንዲሁም በአምላክና በሰው ፊት ይበልጥ ሞገስ እያገኘ ሄደ።

የግርጌ ማስታወሻዎች

ሉቃስ 2:8 * ይህ ቃል አራቱን የሌሊት ክፍለ ጊዜያት ያመለክታል። ማርቆስ 13:35 ላይ የሚገኘውን የግርጌ ማስታወሻ ተመልከት።