በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ሉቃስ 19:1-48

19  ኢየሱስ ወደ ኢያሪኮ ገብቶ በዚያ አልፎ እየሄደ ነበር።  በዚያም ዘኬዎስ የተባለ አንድ ሀብታም ሰው የነበረ ሲሆን ይህ ሰው የቀረጥ ሰብሳቢዎች አለቃ ነበር።  እሱም ኢየሱስ የሚባለው ማን እንደሆነ ለማየት ይፈልግ ነበር፤ ሆኖም ቁመቱ አጭር ስለነበረ ከሕዝቡ ብዛት የተነሳ ማየት አልቻለም።  ኢየሱስ በዚያ በኩል ያልፍ ስለነበር ዘኬዎስ ሮጦ ወደፊት በመሄድ እሱን ለማየት አንድ የሾላ ዛፍ ላይ ወጣ።  ኢየሱስ እዚያ ቦታ በደረሰ ጊዜ ቀና ብሎ በመመልከት “ዘኬዎስ፣ ዛሬ አንተ ቤት ጎራ ማለት ስላለብኝ ቶሎ ውረድ” አለው።  በዚህ ጊዜ በፍጥነት ወርዶ ደስ እያለው በእንግድነት ተቀበለው።  ይሁን እንጂ ሰዎቹ ይህን ባዩ ጊዜ “ኃጢአተኛ ሰው ቤት ሊያርፍ ገባ” ብለው ሁሉም አጉተመተሙ።  ዘኬዎስ ግን ቆሞ ጌታን “ጌታ ሆይ፣ ካለኝ ሀብት ግማሹን ለድሆች እየሰጠሁ ነው፤ በሐሰት ክስ ከሰው የቀማሁትንም ሁሉ አራት እጥፍ እየመለስኩ ነው” አለው።  በዚህ ጊዜ ኢየሱስ እንዲህ አለ:- “ይህም ሰው የአብርሃም ልጅ ስለሆነ ዛሬ ለዚህ ቤት መዳን መጥቷል። 10  ምክንያቱም የሰው ልጅ የመጣው የጠፋውን ለመፈለግና ለማዳን ነው።” 11  እነሱም እነዚህን ነገሮች እየሰሙ ሳሉ አንድ ምሳሌ አክሎ ነገራቸው፤ ይህን የተናገረው ወደ ኢየሩሳሌም ስለተቃረበና የአምላክ መንግሥት ወዲያውኑ የሚገለጥ ስለመሰላቸው ነው። 12  ስለዚህ እንዲህ አለ:- “አንድ መስፍን ንጉሣዊ ሥልጣኑን ተረክቦ ለመመለስ ወደ ሩቅ አገር ሄደ። 13  ከባሪያዎቹም መካከል አሥሩን ጠርቶ አሥር ምናን ሰጣቸውና ‘እስክመጣ ድረስ ነግዱበት’ አላቸው። 14  የአገሩ ሰዎች ግን ይጠሉት ስለነበር እሱ ከሄደ በኋላ ‘ይህ ሰው በእኛ ላይ እንዲነግሥ አንፈልግም’ ብለው እንዲነግሩላቸው መልእክተኞች ላኩ። 15  “ከጊዜ በኋላ ንጉሣዊ ሥልጣኑን ተረክቦ ሲመጣ የብር ገንዘብ* የሰጣቸው ባሪያዎች ነግደው ምን ያህል እንዳተረፉ ለማወቅ እንዲጠሩለት አዘዘ። 16  ከዚያም የመጀመሪያው ቀርቦ ‘ጌታዬ፣ ምናንህ አሥር ምናን ትርፍ አስገኝቷል’ አለው። 17  ስለዚህ ጌታው ‘ጎበዝ፣ አንተ ጥሩ ባሪያ! በጣም አነስተኛ በሆነው ነገር ታማኝ ሆነህ ስለተገኘህ በአሥር ከተሞች ላይ ሥልጣን ተሰጥቶሃል’ አለው። 18  ሁለተኛው ደግሞ ቀርቦ ‘ጌታዬ፣ ምናንህ አምስት ምናን አስገኝቷል’ አለ። 19  ለዚህኛውም ‘አንተም በአምስት ከተሞች ላይ ተሹመሃል’ አለው። 20  ሆኖም ሌላኛው መጥቶ እንዲህ አለ:- ‘ጌታዬ፣ በጨርቅ ጠቅልዬ ያስቀመጥኩት ምናንህ ይኸውልህ። 21  ይህን ያደረግኩት አንተ ያላስቀመጥከውን የምትወስድ፣ ያልዘራኸውንም የምታጭድ ጨካኝ ሰው ስለሆንክ ፈርቼህ ነው።’ 22  ጌታውም እንዲህ አለው:- ‘አንተ ክፉ ባሪያ፣ በገዛ አፍህ በተናገርከው ነገር እፈርድብሃለሁ። ያላስቀመጥኩትን የምወስድ፣ ያልዘራሁትንም የማጭድ ጨካኝ ሰው እንደሆንኩ ታውቅ ኖሯል ማለት ነው? 23  ታዲያ ገንዘቤን ለምን ለገንዘብ ለዋጮች* አልሰጠህም? እንደዚህ አድርገህ ቢሆን ኖሮ ስመጣ ከነወለዱ እወስደው ነበር።’ 24  “ከዚያም በዚያ ቆመው የነበሩትን ሰዎች ‘ምናኑን ውሰዱበትና አሥር ምናን ላለው ስጡት’ አላቸው። 25  እነሱ ግን ‘ጌታ ሆይ፣ እሱ እኮ አሥር ምናን አለው’ አሉት። እሱም መልሶ እንዲህ አላቸው:- 26  ‘እላችኋለሁ፣ ላለው ሁሉ ተጨማሪ ይሰጠዋል፤ ከሌለው ሰው ላይ ግን ያው ያለው እንኳ ይወሰድበታል። 27  በተጨማሪም በእነሱ ላይ እንድነግሥ ያልፈለጉትን እነዚያን ጠላቶቼን ወደዚህ አምጡና በፊቴ እረዷቸው።’” 28  ኢየሱስ ይህን ከተናገረ በኋላ ጉዞውን ወደ ኢየሩሳሌም በመቀጠል ከፊት ከፊት ይሄድ ጀመር። 29  ደብረ ዘይት በተባለው ተራራ ወደሚገኙት ወደ ቤተፋጌና ወደ ቢታንያ በተቃረበ ጊዜ ከደቀ መዛሙርቱ መካከል ሁለቱን ላካቸው፤ 30  እንዲህም አላቸው:- “ወደዚያ ወደምታዩት መንደር ሂዱ፤ ወደ መንደሩ ከገባችሁም በኋላ ሰው ተቀምጦበት የማያውቅ ውርንጭላ ታስሮ ታገኛላችሁ። ፈታችሁ አምጡት። 31  ይሁን እንጂ ማንም ሰው ‘የምትፈቱት ለምንድን ነው?’ ብሎ ቢጠይቃችሁ ‘ጌታ ይፈልገዋል’ ብላችሁ ንገሩት።” 32  የተላኩትም ሄደው ልክ እንዳላቸው አገኙት። 33  ውርንጭላውን እየፈቱ ሳሉ ግን ባለቤቶቹ “ውርንጭላውን የምትፈቱት ለምንድን ነው?” አሏቸው። 34  እነሱም “ጌታ ይፈልገዋል” አሉ። 35  ከዚያም ውርንጭላውን ወደ ኢየሱስ ወሰዱት፤ መደረቢያቸውንም በውርንጭላው ላይ ጣል አድርገው ኢየሱስን በላዩ አስቀመጡት። 36  እየተጓዘ ሳለም መደረቢያቸውን በመንገዱ ላይ ያነጥፉ ነበር። 37  ከደብረ ዘይት ተራራ ቁልቁል ወደሚወስደው መንገድ እንደተቃረበ ከፍተኛ ቁጥር ያላቸው ደቀ መዛሙርቱ በሙሉ ባዩአቸው ተአምራት ሁሉ መደሰትና አምላክን በታላቅ ድምፅ ማወደስ ጀመሩ፤ 38  እንዲህ ይሉም ነበር:- “በይሖዋ ስም ንጉሥ ሆኖ የሚመጣ የተባረከ ነው! በሰማይ ሰላም፣ በሰማያት ላለውም ክብር ይሁን!” 39  በሕዝቡ መካከል የነበሩ አንዳንድ ፈሪሳውያን ግን “መምህር፣ ደቀ መዛሙርትህን ገሥጻቸው እንጂ” አሉት። 40  እሱ ግን መልሶ “እላችኋለሁ፣ እነዚህ ዝም ቢሉ እንኳ ድንጋዮች ይጮኻሉ” አላቸው። 41  ወደ ኢየሩሳሌም በተቃረበ ጊዜም ከተማዋን አይቶ አለቀሰላት፤ 42  እንዲህም አለ:- “አንቺ፣ አዎ አንቺ ራስሽ፣ ሰላም የሚያስገኙልሽን ነገሮች ምነው ዛሬ በተረዳሽ ኖሮ፤ አሁን ግን ከዓይኖችሽ ተሰውረዋል። 43  ምክንያቱም ጠላቶችሽ በሾለ እንጨት ዙሪያሽን ቅጥር ቀጥረውና ከበውሽ ከሁሉም አቅጣጫ አንቺን የሚያስጨንቁበት ጊዜ ይመጣል፤ 44  አንቺንና በውስጥሽ የሚኖሩትን ልጆችሽን ፈጥፍጠው ከአፈር ይደባልቃሉ፤ በአንቺ ውስጥም ሳያፈርሱ እንደተነባበረ የሚተዉት ድንጋይ አይኖርም፤ ምክንያቱም በአንቺ ላይ ምርመራ የሚካሄድበትን ጊዜ አልተገነዘብሽም።” 45  ወደ ቤተ መቅደሱ ገብቶም በዚያ የሚሸጡትን ያስወጣ ጀመር፤ 46  እንዲህም አላቸው:- “‘ቤቴ የጸሎት ቤት ይሆናል’ ተብሎ ተጽፏል፤ እናንተ ግን የዘራፊዎች ዋሻ አደረጋችሁት።” 47  ደግሞም በየዕለቱ በቤተ መቅደሱ ማስተማሩን ቀጠለ። ሆኖም የካህናት አለቆችና ጸሐፍት እንዲሁም የሕዝቡ መሪዎች ሊያጠፉት ይፈልጉ ነበር፤ 48  ይሁንና ሕዝቡ ሁሉ እሱን ለመስማት ከአጠገቡ ስለማይለይ ምን እንደሚያደርጉ ግራ ገባቸው።

የግርጌ ማስታወሻዎች

ሉቃስ 19:15 * ብር ከተባለው ማዕድን የተሠራ ገንዘብ።
ሉቃስ 19:23 * ገንዘብ ተቀብለው የሚያስቀምጡና የሚያበድሩ ሰዎች።