በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ሉቃስ 17:1-37

17  ከዚያም ደቀ መዛሙርቱን እንዲህ አላቸው:- “መሰናክል የሚሆኑ ነገሮች መከሰታቸው የማይቀር ነው። ሆኖም ለመሰናክሉ ምክንያት ለሚሆነው ለዚያ ሰው ወዮለት!  ከእነዚህ ከታናናሾቹ አንዱን ከሚያሰናክል የወፍጮ ድንጋይ በአንገቱ ታስሮ ወደ ባሕር ቢጣል ይሻለዋል።  ለራሳችሁ ተጠንቀቁ። ወንድምህ በደል ቢፈጽም ገሥጸው፤ ከተጸጸተም ይቅር በለው።  በቀን ሰባት ጊዜ ቢበድልህ እንኳ ‘ተጸጽቻለሁ’ እያለ ሰባት ጊዜ ወደ አንተ ከመጣ ይቅር ልትለው ይገባል።”  በዚህ ጊዜ ሐዋርያቱ ጌታን “እምነት ጨምርልን” አሉት።  ጌታም እንዲህ አለ:- “የሰናፍጭ ዘር የሚያክል እምነት ካላችሁ ይህን የእንጆሪ ዛፍ ‘ከዚህ ተነቅለህ ባሕሩ ውስጥ ተተከል!’ ብትሉት ይታዘዛችኋል።  “ከእናንተ መካከል የሚያርስ ወይም መንጋ የሚጠብቅ ባሪያ ያለው፣ ባሪያው ከእርሻ ሲመለስ ‘ቶሎ ናና ወደ ማዕድ ቅረብ’ የሚለው ማን ነው?  ከዚህ ይልቅ ‘ራቴን አዘጋጅልኝ፤ በልቼና ጠጥቼ እስክጨርስም ድረስ አሸርጠህ አገልግለኝ፤ ከዚያ በኋላ መብላትና መጠጣት ትችላለህ’ አይለውም?  ባሪያው የተሰጠውን ሥራ በማከናወኑ ጌታው የሚያመሰግነው ይመስላችኋል? 10  ስለዚህ እናንተም የተሰጣችሁን ሥራ ሁሉ ባከናወናችሁ ጊዜ ‘ምንም የማንጠቅም ባሪያዎች ነን። ያደረግነው ልናደርገው የሚገባንን ነገር ነው’ በሉ።” 11  ኢየሱስ ወደ ኢየሩሳሌም እየሄደ ሳለ በሰማርያና በገሊላ መካከል ያልፍ ነበር። 12  ወደ አንድ መንደር እየገባ ሳለም የሥጋ ደዌ የያዛቸው አሥር ሰዎች አዩት፤ በሩቅ እንዳሉም ቆመው 13  ድምፃቸውን ከፍ በማድረግ “ኢየሱስ፣ መምህር፣ ምሕረት አድርግልን!” አሉ። 14  እሱም ባያቸው ጊዜ “ሄዳችሁ ራሳችሁን ለካህናት አሳዩ” አላቸው። ከዚያም እየሄዱ ሳሉ ነጹ። 15  ከእነሱ አንዱ እንደተፈወሰ ባየ ጊዜ አምላክን በታላቅ ድምፅ እያመሰገነ ተመለሰ። 16  ኢየሱስ እግር ላይ ተደፍቶም አመሰገነው፤ ሰውየውም ሳምራዊ ነበር። 17  ኢየሱስም መልሶ እንዲህ አለ:- “የነጹት አሥር አይደሉም እንዴ? ታዲያ ዘጠኙ የት አሉ? 18  ከዚህ ከባዕድ አገር ሰው በስተቀር አምላክን ለማመስገን የተመለሰ ሌላ አንድም ሰው አልተገኘም?” 19  ከዚያም ሰውየውን “ተነስና ሂድ፤ እምነትህ አድኖሃል” አለው። 20  ፈሪሳውያን የአምላክ መንግሥት መቼ እንደሚመጣ በጠየቁት ጊዜ እንዲህ ሲል መለሰላቸው:- “የአምላክ መንግሥት በግልጽ በሚታይ ሁኔታ አይመጣም፤ 21  ሰዎችም ‘እነሆ እዚህ ነው!’ ወይም ‘እዚያ ነው!’ አይሉም። ምክንያቱም የአምላክ መንግሥት በመካከላችሁ ነው።” 22  ከዚያም ደቀ መዛሙርቱን እንዲህ አላቸው:- “ከሰው ልጅ ቀኖች አንዱን ለማየት የምትመኙበት ጊዜ ይመጣል፤ ግን አታዩትም። 23  ሰዎችም ‘እዚያ ነው!’ ወይም ‘እዚህ ነው!’ ይሏችኋል። ነገር ግን አትሂዱ ወይም አትከተሏቸው። 24  ምክንያቱም መብረቅ በብልጭታው ከሰማይ በታች ከአንዱ የምድር ክፍል እስከ ሌላኛው የምድር ክፍል እንደሚያበራ ሁሉ የሰው ልጅ በሚገለጥበትም ቀን እንዲሁ ይሆናል። 25  በመጀመሪያ ግን ብዙ መከራ ሊቀበልና በዚህ ትውልድ ሊናቅ ግድ ነው። 26  በተጨማሪም በኖኅ ዘመን እንደተከሰተው ሁሉ በሰው ልጅ ዘመንም እንዲሁ ይሆናል፤ 27  ኖኅ ወደ መርከቡ እስከገባበትና የጥፋት ውኃ መጥቶ ሁሉንም እስካጠፋበት ቀን ድረስ ሰዎች ይበሉና ይጠጡ እንዲሁም ወንዶች ያገቡ፣ ሴቶችም ይዳሩ ነበር። 28  በተመሳሳይም በሎጥ ዘመን እንደተከሰተው ሁሉ እንዲሁ ይሆናል፤ ሰዎች ይበሉ፣ ይጠጡ፣ ይገዙ፣ ይሸጡ፣ ይተክሉና ይገነቡ ነበር። 29  ሆኖም ሎጥ ከሰዶም በወጣበት ቀን ከሰማይ እሳትና ድኝ ዘንቦ ሁሉንም አጠፋቸው። 30  የሰው ልጅ በሚገለጥበት ቀንም እንዲሁ ይሆናል። 31  “በዚያን ቀን በጣሪያ ላይ ያለ ሰው በቤቱ ውስጥ ያለውን ዕቃ ለመውሰድ አይውረድ፤ ልክ እንደዚሁ በእርሻም ያለ ሰው በኋላው ያለውን ነገር ለመውሰድ አይመለስ። 32  የሎጥን ሚስት አስታውሱ። 33  ነፍሱን ለራሱ ጠብቆ ለማቆየት የሚፈልግ ሁሉ ያጣታል፤ ነፍሱን የሚያጣት ሁሉ ግን በሕይወት ጠብቆ ያቆያታል። 34  እላችኋለሁ፣ በዚያች ሌሊት ሁለት ሰዎች በአንድ አልጋ ላይ ይሆናሉ፤ አንዱ ይወሰዳል፣ ሌላኛው ግን ይተዋል። 35  ሁለት ሴቶች በአንድ ወፍጮ ይፈጫሉ፤ አንዷ ትወሰዳለች፣ ሌላኛዋ ግን ትተዋለች።” 36*  —— 37  እነሱም መልሰው “ጌታ ሆይ፣ የት?” አሉት። እሱም “በድን ባለበት ንስሮች ይሰበሰባሉ” አላቸው።

የግርጌ ማስታወሻዎች

ሉቃስ 17:36 ማቴዎስ 17:21 ላይ የሚገኘውን የግርጌ ማስታወሻ ተመልከት።